Nikʼwach noq wilik quukʼ i Santo Laj Huuj

Jenaj sachbʼal kʼuxliis chi reʼ Santo Laj Huuj ko wilik quukʼ yuʼnaak. Ikʼinaq chik 1,900 haabʼ chi xkuxik rutzʼihbʼjiik. Xtzʼihbʼjik chuwach taqeh kamambʼal re’ maʼ najt ta inkikuy jeʼ rukabʼ i (raa’ papiro eh pergamino korsimaj ruukʼ riij chikop) eh xtzʼihbʼjik pan juʼjun qʼorbʼal re’ maʼ kʼih ta kikojwik reh. Eh jeʼ woʼ taqeh winaq wilik kajaawriik eh taqeh kikʼamwik bʼeeh pan juʼjun iglesia xkaaj naq kisacham wach chi jun pech.

¿NIKʼWACH xubʼan chi reʼ huuj wilih xukuy i tiʼ kʼaxik? Atoobʼ ta ikʼinaq chik taqeh haabʼ xponik chi jenaj huuj wilik ruloqʼil pan qaqʼijil. Naqaqʼoriik chi riij i kiʼibʼ ruwiiʼ wilih.

Ruum chi xtzʼihbʼjik woʼ chik i tzʼihbʼamaj naq chik, maʼ xsahchik ta wach i ruqʼorbʼal i Dios

Reʼ taqeh israelita, reʼ wilik naq kuukʼ taqeh peet tzʼihbʼ reh i Santo Laj Huuj xkibʼan chi maʼ xsahchik ta wach ruum chi xkitzʼihbʼaaj woʼ chik i tzʼihbʼamaj naq chik. Xqʼorarik keh taqeh reey chi na naq kitzʼihbʼaam pan jenaj huuj i kʼuhbʼaal re’ wilik naq pan kiqʼabʼ i kʼamal bʼeeh ajtiij levita (Deuteronomio 17:18).

Kʼih taqeh israelita imponik naq chi kiwach rilariik i ruqʼorbʼal i Dios, ruum chi ruukʼ naq i Dios inchalik. Ruum aj reʼ, xtzʼihbʼjik woʼ chik chi korik i ruqʼorbʼal i Dios ruum taqeh kichol tzʼihbʼanik. Reʼ Esdras, jenaj naq ajtzʼihb’ iruyohleej wach i Dios, rutijem naq riibʼ chi korik ruukʼ chuʼnchel i rukʼuhbʼaal i Moisés re’ xyeʼarik reh ruum i Dios aj Israel (Esdras 7:6). Reʼ taqeh masoreta xkikoj kikʼux rutzʼihbʼjiik woʼ chik taqeh xtzʼihbʼjik pan hebreo (Najtir Kʼuhbʼaal) chupaam taqeh haabʼ 500 ko 900 eh inkajlaaj naq taqeh letra reh chi maʼ ne ta inkijot’ kiibʼ. Ruum chi reʼ keh xkikoj kikʼux, maʼ xkijal ta wach i tzʼihbʼamaj pan ruqʼorbʼal i Dios eh chi reʼ Santo Laj Huuj maʼ xsahchik ta wach ruum taqeh ajixowaal.

Pan haabʼ 168 noq ko majaa’ inkʼulik i Cristo, reʼ reey sirio Antíoco IV xraaj naq rusacham wach taqeh tzʼihbʼ hebreo reʼ wilkeebʼ naq ar Palestina. Jenaj najtir qʼorik judío iruqʼor: «Xkixih eh xkik’at chuʼnchel taqeh huuj reh i k’uhbaal xkireq». The Jewish Encyclopedia iruqʼor: «Reʼ naq i nakibʼanik reh i kamanik wilih, xkibʼan ruukʼ chuʼnchel kikʼux [...]. Na naq rukansjiik jenoʼ [...] mi wilik naq ruukʼ jenaj huuj qʼeʼ looqʼ». Atoobʼ ta jeʼreʼ xkʼularik, maʼ xsahchik ta wach taqeh tzʼihbʼ reh i ruqʼorbʼal i Dios chi kixilak taqeh judío reh i Palestina eh taqeh wilkeebʼ pan juʼjun yeʼaabʼ chi jun suut i akʼal.

Noq ikʼinaq chik taqeh haabʼ, noq kuxinaq chik rutzʼihbʼjiik taqeh tzʼihbʼ griego (Reʼ Akʼ Kʼuhbʼaal) kʼih naq chi taqeh copia wilkeebʼ reh taqeh carta, taqeh qʼorooj cho rubʼiral eh taqeh kʼuljinaq. Jeʼ rukabʼ i apóstol Juan, xutzʼihbʼaj i ruhuuj ar Éfeso oon mareh maʼ najt ta ar. Xa reʼ laʼ noq ik’inaq chik taqeh haab’ najt ruukʼ i Éfeso, ar Egipto xkireq i ruqohx i ruhuuj eh reʼ taqeh inkitzʼir riij i qʼorik inkiqʼor chi reʼ ruqohx wilih wilik reh 50 haabʼ noq rutzʼihbʼaam naq chik i ruhuuj i Juan. Reʼ xreqarik wilih irukʼuhtaaj chi reʼ taqeh ajnimaneel reh taqeh tokoom tinamit wilik naq kuukʼ i ruqʼorbʼal i Dios.

Reʼ qʼoroj kʼuhbʼaal xubʼan chi reʼ ruqʼorbʼal i Dios maʼ xsahchik ta wach, atoobʼ ta ikʼinaq chik taqeh haabʼ ko wilik quukʼ yuʼnaak. Inqʼorarik chi pan wahqʼeq reh i 23 reh febrero reh i haabʼ 303, reʼ intaqʼanik chi naah i tinamit Roma re’ Diocleciano kʼahchiʼ naq rilom taqeh rusoldado chi kʼahchiʼ kiyojom i rupuerta jenaj iglesia eh chi kʼahchiʼ woʼ naq kik’atam taqeh rucopia i ruqʼorbʼal i Dios. Chʼiklik naq rukʼux chi narusacham kiwach taqeh ajnimaneel ruukʼ ruk’atariik i kihuuj qʼeʼ looqʼ chi keh, eh jeʼ iqʼal xuqʼor chi na naq ruk’atariik taqeh Santo Laj Huuj pan tinamit ahaʼ wiiʼ intaqʼanik. Xa reʼ laʼ, maʼ chuʼnchel xik’atarik. Eh ruukʼ taqeh wilih xibʼanarik kʼih taqeh copia. Ruum aj reʼ, yuʼnaak wilik quukʼ kiʼibʼ chi Santo Laj Huuj pan griego xa yejal, re’ wilih xtz’ib’jik noq re’ Diocleciano rukohlaam chik ruk’atariik taqeh Santo Laj Huuj. Jenaj i wilik ar Roma eh re’ jenaj wilik ar British Library reh Londres.

Atoob’ ta ko majaa’ inreqarik taqeh i peet tz’ihb’, xti k’ih taqeh copia wilik reh i ruq’orb’al i Dios, chun’chel oon xa yejal eh ju’jun najtir chik taqeh. ¿Xjaljik na i kapeb’al wilik chupaam i peet tz’ihb’ noq xkitz’ib’aaj wo’ chik i tz’ihb’amaj naq chik? Chi riij xtz’ihb’jik pan hebreo, re’ erudito W.H. Green xuq’or: «Ma’ qojyo’jik ta chi ruq’orariik chi ma’xta jeno’ kamanik reh najtir xb’anarik chi korik». Chi riij taqeh tz’ihb’amaj pan griego, re’ Sir Frederic Kenyon jenaj ajtz’irool riij i tz’ihb’amaj pan Santo Laj Huuj xutzʼihbʼaaj: «Reʼ taqeh qʼiij noq xtzʼihbʼjik i peet eh taqeh copia, irukʼuhtaaj chi maʼ najt ta kixilak. Eh ruum aj reʼ, maʼ rukʼul ta chi ne inqʼorarik chi xjaljik wach. Eh reʼ xqʼorarik chi xam chi reʼ Santo Laj Huuj xa xkʼuloq chi jeʼ reʼ ruum nikʼwach tzʼihbʼamaj maʼ inkojarik ta chik wach. Ruum chi korik iruqʼor eh manlik wach i wilik chupaam taqeh huuj reh i Akʼ Kʼuhbʼaal ne inqaqʼor chi maʼxta xjaljik reh». Chi riij i re’ xuqʼor: «Ne inqakoj qakʼux ruukʼ taqeh tzʼihbʼ pan Santo Laj Huuj.[...] Maʼ jeʼ ta reʼ ne inqaqʼor chi riij jenoʼ chik huuj reh najtir».

Reʼ rik’sjiik pan tokoom qʼorbʼal

Reʼ rukabʼ ruwiiʼ re’ chi reʼ Santo Laj Huuj eht’alimaj wach pan kʼih qʼorb’al chi jun suut i akʼal. Reʼ wilih irukʼam riibʼ ruukʼ iraaj i Dios chi chuʼnchel taqeh tinamit eh reh reh wach i kiqʼorbʼal ne inkinabʼeej wach eh ne inkiyeew ruloqʼil chi «korik eh pan Uxlabʼal naa kianam» (Juan 4:​23, 24; Miqueas 4:2).

Reʼ peet Santo Laj Huuj wilik naq pan hebreo xkik’saj pan qʼorbʼal griego. Reʼ wilih eht’alimaj wach chi Septuaginta. Re’ xi’ik’sinik reh, judío naq taqeh kiqʼorik griego eh maʼ reʼ ta naq Palestina kipatinik. Reʼ wilih xkuxik rubʼanariik kiʼibʼ ciento haabʼ noq ko majaaʼ irutoqʼaaʼ i rukamaj i Jesús ayuʼ wach akʼal. Reʼ Santo Laj Huuj, jeʼ rukabʼ xtzʼihbʼjik pan griego ik’sjik pan kʼih qʼorbʼal noq ikʼinaq chik taqeh haabʼ noq xkuxik rutzʼihbʼjiik. Xa reʼ la’, chi riij i re’ xiwihʼik taqeh reey eh taqeh kʼamal bʼeeh pan iglesia, re’ keh noq na naq kitobʼeem taqeh kʼachareel reh chi ne inwihʼik jenoʼ kiSanto Laj Huuj pan kiqʼabʼ, maʼ jeʼ ta reʼ xkibʼan. Reʼ keh xkaaj naq chi reʼ taqeh kʼachareel ne kiwihʼik pan qʼequm. Ruum chi maʼ xkiyeew ta qʼabʼ chi reʼ ruqʼorbʼal i Dios ne inik’sjik pan kiqʼorbʼal taqeh kʼachareel.

Xwihʼik taqeh winaq kow kikʼux, xkikoj pan yohbʼaal i kikʼachariik reh rik’sjik i Santo Laj Huuj pan kiqʼorbʼal taqeh kʼachareel. Eh maʼ xiyoʼjik ta ruum taqeh iglesia ni xata ruum taqeh reey. Jenaj reh taqeh winaq reʼreʼ, reʼ William Tyndale jenaj inglés xutijej riibʼ pan Oxford, pan 1530 xik’saj pan tokoom qʼorbʼal (taqeh peet hoʼoobʼ huuj reh i Santo Laj Huuj re’ xtzʼihbʼjik pan hebreo). Atoobʼ ta yohbʼaal wach taqeh ajixowaal, reʼ reh i peet xik’saj i Santo Laj Huuj re’ xtzʼihbʼjik pan hebreo pan qʼorbʼal inglés eh reʼ reh i peet xukoj i bʼihnaal Jehová pan inglés. Irukʼul woʼ chi ne qojqʼorik chi riij i ajtzʼihbʼ pan kaxlan qʼorik Casiodoro de Reina, re’ reh xkiq’or rukansjiik ruum taqeh ajixowaal católico, noq kʼahchiʼ naq rik’sam i peet Santo Laj Huuj pan kaxlan qʼorik. Reh chi ne naq irubʼan i rukamaj xooj Inglaterra, Francia, Holanda eh Suiza. a

Reʼ Santo Laj Huuj ko kʼahchiʼ woʼ rik’sjik pan kʼih qʼorbʼal yu’naak eh inpuhkaaljik chi millón. Ruum chi re’ Santo Laj Huuj ma’ xsacharik ta wach eh ruum chi eht’alimaj wach chi jun suut i akʼal, irukʼuhtaaj chi korik taqeh qʼorik xuqʼor i apóstol Pedro: «i rax ch’ahn inchiqik. […] i rixmak’al i ch’ahn inpuhlujik. Raaj i ruq’oral i QaJaaw Dios [Jehová] reh wilik chi juneliik» (1 Pedro 1:​24, 25).

[Ruman]

 [Reʼ taqeh recuadro eh taqeh ehtalil]

¿AHAʼ WILIK I SANTO LAJ HUUJ NAWILOM WACH?

Kʼih i Santo Laj Huuj wilik pan reh reh wach qʼorbʼal. Juʼjun wilik pan najtir qʼorbʼal eh maʼ inreqarik ta chi riij. Eh juʼjun taqeh Santo Laj Huuj irukoj taqeh qʼorik maʼ kʼaxik ta rureqariik chi riij, xa reʼ laʼ maʼ manlik ta wach. Eh juʼjun xkitzʼihbʼaaj jeʼ rukabʼ xkireq chi riij eh maʼ jeʼ ta rukabʼ iraaj naq ruyeʼem chi nabʼjik.

Reʼ Santo Laj Huuj pan inglés reʼ Traducción del Nuevo Mundo de las Santas Escrituras, reʼ xkikamaneej wach taqeh testigo reh Jehová ikʼsamaj pan tokoom qʼorbʼal. Ruum chi jun tzʼuhbʼ chi ajnimaneel maʼ ehtʼalimaj ta kiwach xkitzʼir riij i wilik chupaam taqeh peet tzʼihbʼ. Eh reʼ wilih inkamanik keh, reh riksjiik pan 60 oq chik chi qʼorbʼal i Santo Laj Huuj. Eh reʼ taqeh inkikʼsaj i qʼorbʼal kisikʼim chupaam taqeh i peet tzʼihbʼamaj. Inkikoj rehtaal chi reʼ tzʼihbʼamaj maʼ ne ta inkijal wach reʼ iraaj ruyeʼem chi nabʼjik. Inkaaj chi reʼ i narilwik reh i Santo Laj Huuj ne irureq chi riij jeʼ rukabʼ xkireq chi riij taqeh kʼachareel reh najtir qʼiij.

Juʼjun taqeh inkitzʼir riij i qʼorik inkikoj kikʼux reh rutzʼirjiik riij juʼjun taqeh Santo Laj Huuj reh i qaqʼijil jeʼ rukabʼ i Traducción del Nuevo Mundo pan inglés, reh rusikʼariik mi wilik qʼorik maʼ manlik ta wach oon mi maʼ holohik ta. Jenaj keh, reʼ Jason David BeDuhn, profesor adjunto reh i cátedra reh Estudios Religiosos reh i Northern Arizona University, reh Estados Unidos, xrehsaj cho pan 2003 jenaj tijinik reh kiʼibʼ ciento chi páginas chi riij i bʼelejeebʼ chi «Santo Laj Huuj reʼ xti inkojarik chi jun suut i akʼal kuukʼ taqeh aj inglés». b Ruukʼ i rutijiniik xutzʼir riij juʼjun taqeh texto reh i Santo Laj Huuj reʼ maʼ holohik ta inkiqʼor, ruum chi «ar inkʼutinik mi reʼ xikʼsanik reh i Santo Laj Huuj pan tokoom qʼorbʼal xukoj i rukapebʼaal». Reh chi ne naq irureq ahaʼ xjaljik wach taqeh qʼorik xril i tzʼihbʼ griego mi jenaj naq wach iruqʼor ruukʼ xtzʼihbʼjik pan inglés. ¿Chajariik xukapaaj chi riij i xureq?

Reʼ BeDuhn xuqʼor chi reʼ taqeh kʼachareel eh juʼjun taqeh ajtzʼihbʼ inkikapaaj naq chi maʼ jenaj ta wach iruqʼor i Traducción del Nuevo Mundo ruum chi reʼ taqeh xiʼikʼsinik reh pan tokoom qʼorbʼal xkikoj chajariik inkinimaj. Xa reʼ laʼ reʼ BeDuhn iruqʼor: «Maʼ jenaj ta wach iruqʼor ruum chi manlik wach, korik iruqʼor eh iruyeew chi nabʼjik i aajwaal wach». Atoobʼ ta maʼ xponik ta chuwach nikʼwach xjaljik juʼjun taqeh qʼorik pan Traducción del Nuevo Mundo xuqʼor chi «manlik wach chuwach taqeh tokoom Santo Laj Huuj» eh iruqʼor chi atoobʼ chi ne iniljik paam.

Reʼ doctor Benjamin Kedar, i rutzʼir riij i qʼorbʼal hebreo ar Israel, pan 1989 xuqʼor jeʼ rukabʼ xuqʼor i BeDuhn reh qʼorik chi riij i Traducción del Nuevo Mundo. Jeʼ wilih xuqʼor: «Reʼ kamanik wilih irukʼuhtaaj chi xkikowej kikʼux reh rureqariik chi riij i kʼuhbʼaal chi manlik. [...] Noq xwil, xnukoj rehtaal chi maʼxta jenoʼ qʼorik maʼ holohik ta wilik chupaam».

Chapahqaaj aweh: «¿Chaaj woʼ reet inwaaj wilom paam i Santo Laj Huuj? ¿Inusikʼ na jenoʼ maʼ kʼaxik ta rilariik atoobʼ ta maʼ manlik ta wach? ¿Inwaaj na wilom wach jenoʼ Santo Laj Huuj manlik wach eh maʼ xjaljik ta wach?» (2 Pedro 1:​20, 21). Reʼ inawaaj asikʼim ne irukʼuhtaaj chajariik chi Santo Laj Huuj inawaaj awilom wach.

[Ruman]

[Ehtalil]

Reʼ Traducción del Nuevo Mundo de las Santas Escrituras wilik chik pan kʼih qʼorbʼal

[Ehtalil]

Reʼ taqeh tzʼihbʼ hebreo

[Ehtalil]

Jenaj ruqohx ahaʼ wiiʼ inkan i Lucas 12:7: «Mat yoʼjik taq, ruum reʼ taq i hat kʼih taq atzʼaaqʼ chikiwach i rukʼihaal chi kokʼ tzʼikin»

[Ehtalil]

Página en primer plano: Biblioteca Nacional de Rusia (San Petersburgo); segunda y tercera: Bibelmuseum, Münster; fondo: © The Trustees of the Chester Beatty Library (Dublín)