Chaqʼor qeh chi riij akʼisinal.

Xinasjik ar Italia pan haabʼ 1943. Reʼ taqeh waas eh taqeh nuchaaqʼ xojkʼihik pan jenaj kʼisa yeʼaabʼ. Reʼ wajaaw ajsehkʼ naq eh ajtikool woʼ naq. Rrʼ wajaaw eh i nutuut xoojkikʼisaj pan nimanik católica.

¿Chaaj woʼ reet xawaaj wihʼik chi kʼamal bʼeeh pan iglesia?

Pan nukʼisinal inukʼax naq wach ojik pan mixa xa reh rubʼirjiik i kʼamal beeh. Inponik naq chi nuwach i ruqʼorbʼal, je woʼ i tiij eh taqeh irubʼan pan iglesia. Jeʼreʼ noq xnukʼax wach wihʼik chi kʼamal bʼeeh. Noq wilik weh oxlaj haabʼ, reʼ nutuut xirukʼam jeʼ pan jenaj yeʼaabʼ ahaʼ wiiʼ inkitobʼeej taqeh haʼlakʼun reh chi ne inkitijej ponik chi kʼamal bʼeeh pan iglesia.

¿Xatijej na chi riij i Santo Laj Huuj reh chi ne inabʼan kamanik chi kʼamal bʼeeh?

Kʼisiin woʼ ti. Noq wilik naq weh 15 haabʼ, jenaj ajkʼuhtaneel xuyeew weh jenaj Santo Laj Huuj ahaʼ wiiʼ xa reʼ taqeh evangelio wilik reh. Ar iruqʼor naq chi riij i rukʼachariik i Jesús. Kʼih pech xwil wach. Noq xnuchop i 18 haabʼ, xinooj ar Roma, reh ojik chupaam taqeh nimaq taq tijinbʼal reh tijinik chi riij nimanik católica, ahaʼ wiiʼ reʼ papa wilik rajaawriik chi naah. Ar xnutijej i qʼorbʼal latín eh griego. Jeʼ woʼ chi riij i xkʼuljik cho najtiir, taqeh naʼojbʼal reh winaq, taqeh yabʼilaal pan kapebʼal eh taqeh nimanik. Atoobʼ ta inkiqʼor naq taqeh versículo reh i Santo Laj Huuj eh inqabʼiraj naq jenaj lectura chi riij i Santo Laj Huuj pan mixa reh domingo, maʼ inqatzʼir ta naq riij.

Noq hat naq kʼamal bʼeeh pan iglesia, ¿inayeew na naq tijinik?

Reʼ naq i hin kinʼilwik reh chuʼnchel inbʼanarik pan tijinbʼal reh i nimanik católica, xa reʼ laʼ inuyeew woʼ naq tijinik chi riij i decreto del Concilio Vaticano II.

¿Chaaj woʼ reet xatrukoj chi kapeebʼinik taqeh inkʼuhtjik pan iglesia?

Wilik ixibʼ ruwiiʼ. Inwil naq chi reʼ iglesia irumin naq riibʼ pan política. Xa maʼxta naq iraaj reh i maʼ holohik ta la naʼojbʼal wilik keh taqeh kʼamal bʼeeh eh je woʼ taqeh i kiponik pan iglesia. Eh juʼjun naʼojbʼal irukʼuhtaaj i iglesia ma reʼ ta naq ruwiiʼ. Jenaj ehtalil, ¿nikʼwach jenaj Dios ajkʼaxool ne iruyeew pan tiʼ kʼaxik jenaj kʼachareel kamnaq chik? eh ¿korik na chi reʼ Dios iraaj chi ne inqakoj jenaj rosario reh rukapechjik kʼih ciento pech i qatiij? a

¿Chajariik xakapaaj rubʼanariik?

Ruukʼ riis pan naqʼ nuwach xnupahqaaj reh i Dios chi ne kirutobʼeej. Xnuloqʼ jenaj Santo Laj Huuj, reʼ rubʼihnaal Biblia de Jerusalén, reʼ ko akʼ naq relik cho pan italiano, eh xnutoqʼaaʼ rilariik wach. Jenaj domingo wahqʼeq noq kʼahchiʼ naq nutʼuyam i nusoʼ, reʼ inukoj naq reh ruyeʼariik i mixa, xiponik kiʼibʼ i winaq wuukʼ. Xkiqʼor weh chi testigo reh Jehová taqeh. Jenaj hora xojqʼorik chi riij i Santo Laj Huuj eh nikʼwach rehtʼaljiik i manlik loqʼinik.

¿Chajariik xusach akʼux chi kiij taqeh testigo reh Jehová?

Reʼ keh chʼiklik naq kikʼux chi riij i kʼahchiʼ kiqʼorom eh maʼ kʼaxik ta naq chi keh rusikʼariik taqeh texto pan jenaj Santo Laj Huuj keh taqeh católicos. Chi riij i reʼ jenaj testigo, Mario i rubʼihnaal xutoqʼaaʼ kʼulik wuukʼ. Reʼ reh xwihʼik ruqʼuniil wuukʼ, ruum chi chuʼnchel taqeh sábado, atoobʼ ta kʼahchiʼ naq i jabʼ, xa inponik woʼ naq a las 9 reh wahqʼeq.

¿Eh chajariik naq inkikapaaj taqeh awuchʼihil chi kʼamal bʼeeh noq inponik awuukʼ taqeh Testigo?

Xnuqʼor keh chi ne kinkuchʼihleej chi tijinik, xa reʼ laʼ ma jenoʼ xuchop chi korik i tijinik. Xa reʼ la, reʼ hin ¡inponik naq chi nuwach! Holohik naq i kʼahchiʼ nutijem. Xnureq chi riij chaaj woʼ reet i Dios irukanaaʼ chi wilik i yihbʼ wach naʼojbʼal eh i tiʼ kʼaxik. Reʼ wilih maʼ inureq ta naq chi riij.

¿Xuqʼor na aweh jenaj kʼamal bʼeeh chi ne inakanaaʼ i tijinik chi riij i Santo Laj Huuj?

Pan haabʼ 1975, kʼih pech xinooj Roma reh qʼorik chi riij i kʼahchiʼ nutijem. Reʼ taqeh i kiʼilwik qeh xkiqʼor weh chi kʼahchiʼ nujotʼom wiibʼ, xa reʼ laʼ, maʼ jenoʼ keh xkikoj i Santo Laj Huuj. Chi riij i reʼ, pan 9 reh enero reh 1976, xnutzʼihbʼaaj jenaj huuj ahaʼ wiiʼ xnuqʼor chi nanukanaam i nimanik católica eh xnutaqʼaaj ar Roma. Kiʼibʼ qʼiij xiʼikʼik, xnukanaaʼ i tijinbʼal reh nimanik eh xinooj pan nupeet moloj iibʼ kuukʼ taqeh testigo reh Jehová. Jenaj naq nimlaj moloj iibʼ ahaʼ wiiʼ inkimol kiibʼ kʼih taqeh molaabʼ. Maʼ jenaj ta naq wach ruukʼ i wilom pan iglesia, ruum chi chi kijuʼjunaal wilik naq kiSanto Laj Huuj eh inkisikʼ naq taqeh versículo kʼahchiʼ ruqʼorariik pan kʼuhbʼaal.

¿Chajariik xuqʼor afamilia ruukʼ i xabʼan?

Kʼisiin maʼ chi kunchelaal xikaqrik, xa reʼ laʼ xnunabʼeej chi jenaj reh taqeh nuchaaqʼ tijinik naq irubʼan chi riij i Santo Laj Huuj kuukʼ taqeh testigo reh Jehová ar Lombardía, jenaj yeʼaabʼ wilik pan norte reh Italia. Xooj nuqʼoʼreej, eh reʼ taqeh Testigo ar xinkitobʼeej reh rusikʼariik nukamaaj eh jenaj yeʼaabʼ ahaʼ wiiʼ nanupatiniik. Chupaam i haabʼ reʼ reʼ xinponik chi testigo reh Jehová.

¿Chajariik inakapaaj chi riij i xachih rubʼanariik?

¡Qʼeʼ holohik i xnuchih! Yuʼnaak inwikʼraaj chi maʼ najt ta chik wilkiin ruukʼ i Dios, ruum chi nutijem ajwach i Dios jeʼ rukabʼ irukʼuhtaaj i Santo Laj Huuj. Maʼ reʼ ta nikʼwach irukʼuhtaaj i winaq, ni xata nikʼwach irukʼuhtaaj i iglesia católica. Yuʼnaak ne kinqʼorik ruukʼ taqeh kʼachareel ruum chi wehtʼal chi reʼ kʼahchiʼ nuqʼorom reʼ i korik.