1. ¿Chaaj woʼ reet qehtʼal chi kʼacharik inqabʼan pan rukuxiik taqeh qʼiij?

 Mi xojʼasjik noq ikʼinaq chik i haabʼ 1914, iraaj ruqʼorom chi kʼacharik inqabʼan «pan rukuxiik taqeh qʼiij» reh i wach akʼal wilih (2 Tim. 3:1, TNM). Chi qunchelaal qabʼiram chi riij i xuqʼor cho rubʼiral i Jesús, reʼ i kʼahchiʼ rukʼulariik chupaam i qaqʼijil jeʼ rukabʼ taqeh qʼaqinik, wiʼjaleel, taqeh nimlaj yihk, yabʼilaal, kʼahchiʼ ruukʼihiik wach i yiibʼ wach bʼanooj eh kʼahchiʼ kitahqaljiik taqeh rajkamanoom i Dios, eh kʼih chik i kʼahchiʼ rilariik (Mat. 24:​3, 7-9, 12; Luc. 21:10-​12). Qilom woʼ, chi reʼ kinaʼojbʼal taqeh kʼachareel, jeʼ rukabʼ i xuqʼor i apóstol Pablo (chawil i recuadro « Nikʼwach i kinaʼojbʼal taqeh kʼachareel pan qaqʼijil»). Reʼ hoj rajkamanoom i Jehová chʼiklik qakʼux chi kʼacharik inqabʼan pan rukuxiik taqeh qʼiij (Miq. 4:1).

2. ¿Ahaʼ wilik taqeh pahqanik aajwaal wach chi ne qojqʼorik chi riij?

² Ruum chi kʼih chik haabʼ ikʼinaq chi riij i haabʼ 1914, reʼ wilih iraaj ruqʼorom chi kʼacharik inqabʼan pan rukuxiik taqeh qʼiij reh i kuxesbʼal wach taqeh qʼiij. Ponik chik reh i qʼiij chi narusachariik wach i wach akʼal wilih. Jeʼ reʼ noq, ko ruman chi ne qojqʼorik chi riij i kiʼibʼ chi pahqanik wilih: ¿Chajariik narukʼulariik pan rukuxiik i kuxesbʼal wach taqeh qʼiij? Eh ¿chajariik iruyʼeej i Jehová chi ne inqabʼan?

3.Jeʼ rukabʼ i qʼoroj cho rubʼiral pan 1 Tesalonicenses 5:​1-3, ¿chajariik nakiqʼorom taqeh nimlaj tinamit?

³ (Chawil i 1 Tesalonicenses 5:​1-3, RLLH). Reʼ Pablo inqʼorik chi riij i «riqʼijil i Qajaaw» Jehová. Ayuʼ reʼ taqeh qʼorik wilih kʼahchiʼ kiqʼoriik chi riij taqeh qʼiij noq narutohqʼiik i qʼaqʼinik ruukʼ i nimlaj tinamit Babilonia, (reʼ taqeh maʼ manlik ta nimanik chi jun suut i akʼal) eh inkuxik pan Armagedón (Apoc.16:14, 16; 17:5). Noq tohqʼik chik reh i qʼiij reʼreʼ, reʼ taqeh tinamit nakiqʼorom «wilkooj pan suqkiil kʼuxliis maʼxta tiʼ qeh». Reʼ taqeh i kitaqʼanik chi naah i wach akʼal, wilik pech inkikoj taqeh qʼorik wilih, noq kiqʼorik chi riij inkibʼan i juʼjun chi tinamit reh chi ne inkikʼam kiibʼ chi korik chi kiwach. b Xa reʼ laʼ, reʼ iruqʼor i Santo Laj Huuj chi riij i nakiqʼorom taqeh tinamit maʼ jenaj ta wach ruukʼ i wilih. ¿Chaaj woʼ reet? Ruum chi, noq naruqʼorariik i wilih, kʼih taqeh kʼachareel nakikapaam chi reʼ taqeh taqʼaneel xkibʼan chi ne inwihʼik i tuqkiil kʼuxliis chi naah i wach akʼal eh chi maʼ yohbʼaal ta chik. Xa reʼ laʼ, ayuʼ narutohqʼiik jenaj i «runimaal tiʼ kʼaxik» eh i rusahchik kiwach chi maʼ kehtʼal (Mat. 24:21).

4. (a) ¿Chajariik maʼ qehtʼal taj chi riij i nakiqʼorom taqeh tinamit? (b)  ¿Chajariik qehtʼal chik chi riij i wilih?

⁴ Wilik i qehtʼal chik chi riij taqeh qʼorik «wilkooj pan suqkiil kʼuxliis maʼxta tiʼ qeh». Xa reʼ laʼ, wilik i maʼ qehtʼal taj, jeʼ rukabʼ chaaj woʼ reet reʼ taqeh tinamit nakiqʼorom taqeh qʼorik wilih eh nikʼwach nakiyeʼem chi nabʼjik. Maʼ qehtʼal ta woʼ mi xa jenaj pech nakiqʼorom taqeh qʼorik wilih oon kʼih pech nakiqʼorom. Xa reʼ laʼ, wilik i qehtʼal, qehtʼal chi maʼ na ta qakanaam chi ne qojkijotʼ eh maʼ na ta woʼ qakapaam chi reʼ taqeh ajtaqʼaneel ne inkibʼan chi ne inwihʼik i tuqkiil kʼuxliis chi naah i wach akʼal. Kʼahchiʼ laʼ quyʼeem chi reʼ taqeh nimlaj tinamit ne inkiqʼor taqeh qʼorik wilih, ruum chi reʼ wilih narukʼuhtaam qeh chi reʼ i ruqʼijiil i Qajaaw Jehová na chik rutoqʼaam.

5. ¿Nikʼwach qojrutobʼeej 1 Tesalonicenses 5:​4-6 reh chi qakorsam qiibʼ reh i ruqʼijil i Qajaaw Jehová?

⁵ (Chawil 1 Tesalonicenses 5:​4-6). Reʼ Pablo iruqʼor qeh chajariik naqabʼanam reh chi tiqlikooj noq naruponiik i ruqʼijiil i Jehová. Maʼ na ta qawiriik jeʼ rukabʼ inkibʼan taqeh jun chʼuq, naʼlik oq laʼ qeh eh manlik oq wach i qanaʼojbʼal. Jenaj ehtalil, qakoj rehtaal chi maʼ inqamin qiibʼ pan política reh chi maʼ kiʼibʼ ta wach qakʼux. Eh jeʼ reʼ maʼ ne ta inqabʼan jenaj qawach ruukʼ i wach akʼal wilih (Juan 15:19, TNM). Reʼ hoj qehtʼal chi xa reʼ woʼ i runimaal rajaawriik i Dios narukʼamam cho i manlik tuqkiil kʼuxliis ayuʼ nah akʼal.

6. ¿Nikʼwach inqaaj qatobʼeem taqeh kʼachareel, eh chaaj woʼ reet inqaaj qatobʼeem taqeh?

⁶ Ruum chi naʼlik qawach, inqaaj woʼ qatobʼeem taqeh kʼachareel reh chi naʼlik kiwach, inqaaj qatobʼeem taqeh reh chi ne inkehtʼaliij iruqʼor i Santo Laj Huuj chi riij i narukʼulariik ruukʼ i wach akʼal wilih. Kʼoloq pan qakʼux chi, noq narutohqʼiik i nimlaj tiʼ kʼaxik, maʼxta chik kamaj rusikʼariik i Jehovaʼ. Ruum aj reʼ, xti aajwaal wach chi ne inqabʼan i qʼoroj kʼuhbʼaal. c

7. ¿Chajariik iraaj i Jehová chi ne inqabʼan?

⁷ Maʼ naj ta chik iraaj chi ne inponik i riqʼijil i Qajaaw Jehová. Reʼ reh iraaj chi lahtzʼ qawach chi qʼoroj kʼuhbʼaal. Ruum aj reʼ ko ruman chi ne inqayeew qakʼux chi lahtzʼ oq qawach chi rubʼanariik «i rukamaj i QaJaaw» (1 Cor. 15:58). Noq reʼ Jesús xqʼorik chi riij taqeh ehtalil, reʼ na naq qilom pan rukuxiik taqeh qʼiij, xuqʼor chajariik naqabʼanam i hoj rajkamanoom i Dios. Xuqʼor: «Ajwaal wach chi peet naa ruqʼorariik ribʼiraal i akʼ kʼuhbʼaal chupaam i nimaq taq tinamiit sut i wach akʼal» (Mar. 13:​4, 8, 10; Mat. 24:14). Jeʼ reʼ noq, noq qojʼelik chi qʼoroj kʼuhbʼaal, qojtoobʼinik reh chi ne inooj eloq wach i qʼoroj cho rubʼiral wilih.

8. ¿Chaaj woʼ reet qehtʼal chi reʼ qʼoroj kʼuhbʼaal chi riij i runimaal rajaawriik i Dios kʼahchiʼ rukʼihiik?

⁸ Rajlal i haabʼ, kʼih taqeh kʼachareel inkibʼiraj i akʼ kʼuhbʼaal chi riij i runimaal rajaawriik i Dios. Qilow nikʼwach kʼahchiʼ kikʼihbʼiik taqeh ajqʼorol kʼuhbʼaal chuwach taqeh qʼiij wilih. Pan haabʼ 1914, wilik naq 5.155 ajqʼorol kʼuhbʼaal pan 43 chi tinamit. Yuʼnaak, hoj 8.500.000 chi ajqʼorol kʼuhbʼaal pan 240 chi tinamit eh abʼixbʼaal. Xa reʼ laʼ, reʼ kamanik wilih ko majaaʼ inkuxik. Ko ruman chi ne inqakʼuhtaaj chi xa reʼ woʼ i runimaal rajaawriik i Dios narusacham wach taqeh kʼaxkilal wilik nah akʼal (Sal. 145:11-​13).

9. ¿Chaaj woʼ reet maʼ na ta qakanaam ruqʼorariik i kʼuhbʼaal chi riij i runimaal rajaawriik i Dios?

⁹ Reʼ Jehová ko majaaʼ iruqʼor qeh chi naqakanaam i qʼoroj kʼuhbʼaal. Ruum aj reʼ, qayeew qakʼux chi rubʼanariik. ¿Jarubʼ qʼiij chik inkahnik keh taqeh kʼachareel reh chi ko ne inkinabʼeej wach i Jehová eh i Jesucristo? (Juan 17:3). Maʼ qehtʼal ta. Xa reʼ laʼ, qehtʼal chi yuʼnaak, noq ko majaaʼ irutikʼaaʼ i nimlaaj tiʼ kʼaxik, ne irubʼan chi chuʼnchel i «rukʼul chi keh chi naakehchaam i juneliik kʼacharik», neʼ inkibʼiraaj chi riij irunimaal rajaawriik i Dios (Hech. 13:48). ¿Nikʼwach ne inqatobʼeej taqeh kʼachareel wilih yuʼnaak noq ko majaaʼ inponik i ruqʼijiil i Jehová?

10. ¿Ahaʼ wilik taqeh toobʼaal iruyeew qeh i Jehová reh chi ne inqatobʼeej taqeh kʼachareel reh runabʼjiik i korik?

¹⁰ Reʼ rutinamiit i Jehová ruyeʼem qeh i aajwaal wach chi qeh reh rukʼuhtjiik keh i kʼachareel i korik inkan pan Santo Laj Huuj. Jenaj ehtalil, chuʼnchel taqeh xamaano qojrutobʼeej ruukʼ taqeh moloj iibʼ xilak xamaano, ar inqatijej chajariik naqaqʼorom noq qojʼooj chi qʼoroj kʼuhbʼaal eh noq qojponik woʼ chik kuukʼ i kʼachareel, eh inqatijej nikʼwach ruyeʼariik tijinik chi riij i Santo Laj Huuj. Reʼ rutinamiit i Jehová ruyeʼem woʼ qeh taqeh kamambʼal reʼ wilkeebʼ pan kit reh kʼuhtanik. Reʼ wilih ne qojrutoobʼeej:  . . .

•   reh chi ne inqatoqʼaaʼ qʼorik ruukʼ jenoʼ kʼachareel,

•   reh chi reʼ taqeh kʼachareel ne inkaaj qojkibʼiram,

•   kitobʼjiik taqeh kʼachareel reh chi ne inkaaj kinabʼeem ruman,

•   reh chi ne inqakʼuhtaaj i korik noq inqayeew tijinik ruukʼ i Santo Laj Huuj, eh

•   reh rutobʼjiik taqeh kʼachareel reh chi ne kiʼokik pan qayeʼaabʼ reh internet eh chi ne kiponik pan qayeʼaabʼ reh moloj iibʼ.

 Ruum chi wilik quukʼ taqeh kamambʼal wilih, ko ruman chi naqakojom taqeh. d Qakoj jenaj ehtalil. Noq qojqʼorik ruukʼ jenoʼ kʼachareel eh reʼ kʼachareel wilih irukʼuhtaaj chi iraaj qojrubʼiram, eh inqakanaaʼ reh jenaj huuj, reʼ kʼachareel reʼreʼ ne irunabʼeej ruman xqaqʼor reh ko rehtaal ne inqabʼan woʼ chik i qʼorik ruukʼ. Chi qajuʼjunaal, pan qaqʼabʼ wilik ruqʼorariik i kʼuhbʼaal chuʼnchel taqeh poh.

11. ¿Chaaj woʼ reet xkikorsaj wach i tijinik chi riij i Santo Laj Huuj pan internet?

¹¹ Qilow nikʼ chik wach kʼahchiʼ rutobʼeem i Jehová taqeh kʼachareel reh chi ne inkitijej i korik. pan jw.org^® ne irubʼan chi ne inqayeew jenaj tijinik chi riij i Santo Laj Huuj. e ¿Chaaj woʼ reet kikorsam wach i wilih? Chuʼnchel taqeh poh, kʼih taqeh kʼachareel chi jun suut i nah akʼal inkisikʼ pan Internet tijinik chi riij i Santo Laj Huuj. Reʼ wilik pan qayeʼaabʼ reh internet ne irutobʼeej taqeh kʼachareel reh chi ne inkinabʼeej i korik inkan pan Santo Laj Huuj. Wilik taqeh kʼachareel ko inkikapaaj mi inkaaj kikʼulum kitijiniik chi riij i Santo Laj Huuj. Mi jeʼ reʼ inqakʼul, qakʼuhtaaj keh i kamambʼal wilih reʼ inkan pan qayeʼaabʼ reh internet, oon qataqʼaaj keh i qayeʼaabʼ reh internet chupaam i qʼorbʼal i kiqʼorik wiiʼ.

12. ¿Chajariik ne inatijej ruukʼ i tijinik wilik pan qayeʼaabʼ reh internet?

¹² Reʼ tijinik wilih inqʼorik chi riij i Santo Laj Huuj eh chi riij i xyeʼwik cho reh. Inqʼorik woʼ chi riij juʼjun taqeh kʼachareel wilik kajaawriik eh chi riij i uyʼinik iruyeew qeh. Noq jenoʼ kʼachareel irutijej chi riij taqeh naʼojbʼal wilih irureq chi riij:

•   Nikʼwach qojrutobʼeej i Santo Laj Huuj,

•   ajwach i Jehová, i Jesús eh taqeh ángel,

•   chaaj woʼ reet noq reʼ Dios xutzʼuhkrisaj taqeh kʼachareel eh

•   chaaj woʼ reet wilik tiʼ kʼaxik eh yiibʼ wach bʼanooj.

 Chupam i tijinik wilih, intzʼirarik woʼ riij taqeh naʼojbʼal wilih:

•   Chajariik narubʼanam i Jehová reh rusachariik wach i tiʼ kʼaxik eh i kimik,

•   nikʼwach narubʼanam reh ruyeʼariik woʼ chik kikʼachariik taqeh xikimik chik eh

•   nikʼwach narujalariik kiwach ruukʼ i runimaal rajaawriik i Dios taqeh i wilik kajaawriik chi naah i wach akʼal.

13. Chaqʼor mi reʼ tijinik chi riij i Santo Laj Huuj pan internet jenaj wach ruukʼ i tijinik inqayeew chiʼ taq paat.

¹³ Reʼ tijinik wilih, maʼ jenaj ta wach ruukʼ i tijinik inqayeew keh taqeh kʼachareel pan kipaat. Reʼ Jesús xuyeew qeh i loqʼlaj kamanik reh rusikʼariik rajtahqaneel. Inqaaj chi reʼ taqeh kʼachareel ne inkil wach i tijinik pan qayeʼaabʼ reh internet, looqʼ oq chi keh inkitijeej chupaam eh chi ne inkaaj kinabʼeem ruman. Mi jeʼ reʼ inkʼularik, mareh ne inkaaj chi jenoʼ ajqʼorol kʼuhbʼaal ne inponik kuukʼ chi ruyeʼariik kitijinik chi riij i Santo Laj Huuj. Noq inkuxik i juʼjun chi tijinik, inqʼorarik reh i kʼachareel chi ne irupahqaaj chi ne kiponik ruukʼ, reh chi ne irutijeej ruman. Rajlaal qʼiij, wilik na 230 chi kʼachareel chi jun suut i akʼal inkipahqaaj chi ne inyeʼarik kitijinik chi riij i Santo Laj Huuj. Xti aajwaal wach chi reʼ taqeh kʼachareel ne inkikʼul jenoʼ tijinik chi riij i Santo Laj Huuj chi kijuʼjunaal pan kipaat.

14. Jeʼ rukabʼ xuqʼor i Jesús pan Mateo 28:19, 20, ¿chajariik inqaaj qabʼanam eh chaaj woʼ reet?

¹⁴ (Chawil Mateo 28:19, 20). Noq inqayew tijinik chi riij i Santo Laj Huuj, inqaaj chi reʼ taqeh kʼachareel ne kiponik chi rajtahqaneel i Jesús eh inqaaj qakʼuhtaam keh runimjiik chuʼnchel i xuqʼor i Jesús. Eh ko ruman chi ne inqatobʼeej taqeh reh chi ne inkireq chi riij chi aajwaal wach chi ne inkikoj kikʼux ruukʼ i Jehová eh ruukʼ i runimaal rajaawriik. Reʼ wilih iraaj ruqʼorom chi naqatobʼeem taqeh reh chi ne inkinimaaj i korik eh ne inkikʼuhtaaj i wilih ruukʼ rukojariik pan kikʼachariik inkitijej, ruukʼ ruqʼahtesjiik i kikʼachariik reh Jehová eh ruqahsjiik kihaaʼ. Xa ruukʼ rubʼanariik i wilih ne inkikoʼleej kiibʼ pan ruqʼijiil i Jehová (1 Ped. 3:​21).

15. ¿Chajariik maʼ na ta qabʼanam eh chaaj woʼ reet?

¹⁵ Jeʼ rukabʼ xqilow, maʼ najt ta chik iraaj chi ne inkuxik wach i wach akʼal wilih. Ruum aj reʼ, maʼxta chik qaqʼiij reh ruyeʼariik kitijinik chi riij i Santo Laj Huuj taqeh kʼachareel reʼ maʼ inkaaj ta wihʼik chi rajtahqaneel i Cristo (1 Cor. 9:​26). Jeʼ reʼ noq, reʼ qakamaj aajwaal wach, ruum chi ko kʼih taqeh kʼachareel reʼ aajwaal wach chi ne inkibʼiraj i kʼuhbʼaal chi riij i runimaal rajaawriik i Dios yuʼnaak, noq ko majaaʼ inchalik i ruqʼijiil i Jehová.

16. Jeʼ rukabʼ iruqʼor pan Apocalipsis 18:​2, 4, 5, 8, ¿chajariik ko ruman chi ne inqabʼan chi qunchelaal? (Chawil ruman i naʼojbʼal).

¹⁶ (Chawil Apocalipsis 18:​2, 4, 5, 8). Reʼ taqeh versículo wilih inkiqʼor chajariik chik iruyʼeej i Jehová chi ne inqabʼan. Chuʼnchel taqeh i manlik ajnimaneel naqakanaam chi jumpech i nimlaj tinamit Babilonia. Mareh reʼ taqeh i kʼahchiʼ kikʼulum tijinik chi riij i Santo Laj Huuj xiwihʼik pan jenoʼ maʼ manlik ta wach nimanik, kikamanik naq kuukʼ eh inkiyeew naq tumiin keh. Reh chi ne kiʼokik chi ajqʼorol kʼuhbʼaal chi ko majaaʼ inkiqahsaj kihaaʼ, ko ruman chi ne inkikanaaʼ chuʼnchel i rulaqʼaaʼ taqeh ruukʼ i maʼ manlik ta wach nimanik. Ko ruman chi ne inkiqʼahsaj jenoʼ carta ahaʼ wiiʼ inkiqʼor chi maʼxta chik inkaaj ruukʼ i nimanik reʼreʼ, eh chi nakikanaam rubʼanariik chuʼnchel inkibʼan naq ruukʼ i nimanik reʼreʼ oon ruukʼ jenoʼ chik molaabʼ i wilik chi xilak i nimlaj tinamit Babilonia. f

17. ¿Ahaʼ wilik taqeh kamanik maʼ na ta qabʼanam i hoj ajnimaneel eh chaaj woʼ reet?

¹⁷ Reʼ taqeh ajnimaneel ko ruman chi ne inqakoj rehtaal mi reʼ kamanik inqabʼan maʼ iruchop ta riibʼ ruukʼ i nimlaj tinamit Babilonia (2 Cor. 6:​14-​17). Jenaj ehtalil, Maʼ na ta qakamaniik ruukʼ jenoʼ Iglesia. Eh mi qojkamanik pan jenoʼ empresa, maʼ na ta qakʼulaam i kamanik mi inkipahqaaj qeh chi ne inqatobʼeej jenoʼ maʼ manlik ta wach nimanik. Eh mi wilik jenoʼ qakʼaay maʼ na ta qabʼehsam keh inqakʼayej eh ni xa ta naqakʼulaam naah jenoʼ kamanik inkibʼehsaj qeh reh reh rutobʼjiik i nimlaj tinamit Babilonia. ¿Chaaj woʼ reet jeʼ reʼ naqabʼanam? Ruum chi maʼ inqaaj ta ehtrik ruukʼ i kimahk taqeh molaabʼ wilih, reʼ chʼuwaʼ kiwach chuwach i Dios (Is. 52:11). g

18. ¿Chajariik xubʼan jenaj hermano noq xqʼorarik rukamaj pan jenaj iglesia?

¹⁸ Chupaam taqeh haabʼ ikʼinaq, jenaj winaq xuqʼor reh jenaj kʼamal bʼeeh reh molaabʼ reʼ wilik naq jenaj rukʼaay eh inkamanik naq chi ajsehk, chi ne naq irubʼan jenaj kʼisa kamanik pan jenaj iglesia reh i tinamit ahaʼ wiiʼ inpatinik. Reʼ winaq reʼreʼ rehtʼal naq chi reʼ hermano ruqʼorom chi maʼ jaruuj naq ne irubʼan jenoʼ kamanik pan jenoʼ iglesia. Xa reʼ laʼ, chupaam i jun kʼaam reʼreʼ, aajwaal naq wach chi ne inkireq jenoʼ winaq ne irubʼan i kamanik wilih. Atoobʼ ta jeʼ reʼ, reʼ hermano xunimaj taqeh naʼojbʼal inkan pan Santo Laj Huuj eh maʼ xukʼulaaʼ ta i kamanik. Jenaj xamaano xikʼik, pan prensa xelik i rufoto jenaj ajsehk chi kʼahchiʼ naq rukojom jenaj cruz pan iglesia. Wi ta naq reʼ hermano xukʼulaaʼ i kamanik wilih, reʼ naq i reh xelik pan prensa. Qakapaaj chi riij chajariik naq xrikʼraaj i Jehová eh chajariik naq ne inkikapaaj taqeh hermano pan molaabʼ chi riij i hermano wilih.

19-20. (a) ¿Chajariik xqatijej yuʼnaak? (b) ¿Chajariik chik ko ruman chi ne inqatijej?

¹⁹ Jeʼ rukabʼ inkikʼuhtaaj taqeh qʼoroj cho rubʼiral, kʼahchiʼ quyʼeem chi reʼ taqeh tinamit ne inkiqʼor i wilih: «Wilkooj pan suqʼkiil kʼuxliis, maʼxta chik tiʼ qeh». Xa reʼ laʼ, reʼ Jehová irukʼuhtaaj qeh chi reʼ taqeh tinamit maʼ na ta kireqem i manlik laj tuqkilal. ¿Chajariik naqabʼanam yuʼnaak noq reʼ taqeh tinamit ko majaaʼ inkiqʼor taqeh qʼorik wilih eh noq ko majaaʼ inchalik i rusahchiik i wach akʼal wilih? Reʼ Dios iruyʼeej chi lahtzʼ oq qawach chi ruqʼorariik i akʼ kʼuhbʼaal chi riij i runimaal rajaawriik eh chi rusikʼariik rajtahqaneel i Jesús. Eh naʼ woʼ qakanaam i maʼ manlik ta wach nimanik. Reʼ wilih iraaj ruqʼorom chi, maʼ na ta qawihʼiik chi kixilak taqeh i maʼ manlik ta wach nimanik eh maʼ na ta woʼ qakamaniik kuukʼ.

²⁰ Ko wilik i narukʼulariik pan rukuxiik taqeh qʼiij eh ko wilik taqeh iruyʼeej i Jehová chi ne inqabʼan. ¿Ahaʼ wilik taqeh wilih eh nikʼwach ne inqakorsaj qiibʼ ruukʼ i kʼulik eloq reh chi qawach? Reʼ wilih naqiloom pan jenaj chik tijinik.