KʼIH TAQEH KʼACHAREEL inkipahqaaj chi riij i wilih. Xqil chik chi reʼ Dios irubʼiraj juʼjun taqeh i tiij, xa reʼ laʼ maʼ irub’iraj ta chuʼnchel. Jeʼ reʼ noq, ¿irubʼiraj na i qeh i hoj? Reʼ wilih pan qaqʼabʼ wilik.

Reʼ Jesús xuq’at q’orik chi kinaah taqeh kʼamal bʼeeh pan ruqʼijil, ruum chi noq inkibʼan naq kitiij, xa chi riij wo’ nik’wach naq kiʼilarik kuum taqeh k’achareel inkikapaaj. Ruum aj reʼ xuqʼor chi reʼ keh, «xyeʼarik chik i kikooch». Re’ taqeh ajk’amal b’eeh wilih ma’ inkaaj ta naq chi re’ Dios ne inb’irinik keh, inkaaj la’ naq chi ne ki’ilarik kuum taqeh k’achareel. Je’ re’ noq, xa re’ wo’ i ruloq’il taqeh k’achareel xkik’ul (Mateo 6:5). Jeʼ woʼ reʼ inkʼularik pan qaqʼijil. Kʼih taqeh kʼachareel, noq inkibʼan kitiij, xa chi kiij wo’ i keh inkikapaaj, eh maʼ chi riij ta i Dios. Korik, ruum chi maʼ inkikʼam ta naah taqeh naʼojbʼal iruk’uhtaaj i Santo Laj Huuj, maʼ ki’ibʼirjik ta ruum i Dios.

Eh, ¿chajariik ne inqaqʼor chi qiij i hoj? Reh chi reʼ Jehová ne irubʼiraj i qatiij maʼxta q’orik reh aha’ qojchalik, nik’wach i qawiiʼ eh mi wilik qabʼehomal. Reʼ Santo Laj Huuj iruqʼor chi reʼ Dios «maʼ ajwach ta i tokoom iril». Eh iruqʼor woʼ chi «reʼ taqeh kiyohlinik reh, eh inkibʼan i atoobʼ chi bʼanarik atoobʼ ta reh reh wach i kitinamitaal imponik chuwach i reh» (Hechos 10:​34, 35, TNM). Eh ruum aj reʼ, reʼ kʼachareel iruyohleej eh iruloq’ej wach i Dios, maʼ irutiʼbʼisaj ta rukʼux ruuk’ i rub’anooj. Eh reʼ inkibʼan i atoobʼ chi bʼanarik, inkikoj kikʼux chi rubʼanariik reʼ iraaj i Dios eh maʼ reʼ ta inkaaj i keh ni xa ta reʼ inkaaj taqeh tokoom kʼachareel. Jeʼ reʼ noq, mi inqaaj chi reʼ Jehová ne irubʼiraj i qatiij naqakʼamam naah iruqʼor i ruqʼorbʼal. a

Kʼih taqeh kʼachareel inkuyʼeej chi reʼ Dios ne irub’an jenaj sachb’al k’uxliis ruuk’ inkipahqaaj pan kitiij. Xa reʼ laʼ, najtir cho qʼiij, reʼ Jehová xa ma’ eliik ta wo’ naq irubʼan i sachb’al k’uxliis. Pan Santo Laj Huuj inkʼutinik chi, wilik pech ik’inaq naq chik kʼih taqeh haabʼ ko re’ aj inkilow jenaj sachbʼal kʼuxliis. Eh re’ Santo Laj Huuj irukʼuhtaaj woʼ naq chi reʼ taqeh sachbʼal kʼuxliis na naq rusahchiik kiwach noq kamnaq naq chik taqeh i ru’apóstol i Jesús. (1 Corintios 13:​8-10). Reʼ wilih maʼ iraaj ta ruqʼorom chi reʼ Dios maʼ ne ta irubʼiraj i qatiij. Qilow juʼjun taqeh ehtalil inkikʼuhtaaj chi reʼ Jehová irubʼiraj taqeh i tiij pan qaqʼijil.

Iruyeew naʼojbʼal. Ruukʼ i Dios nim rajaawriik inchalik i korik wach naʼojbʼal. Eh maʼ pajooj ta iruyeew keh i inkisik’ i runaʼojbʼal eh inkikowej kiibʼ reh runimjiik (Santiago 1:5).

Iruyeew cho i santo laj uxlabʼal. Maʼxta ne irupaj riibʼ ruukʼ i santo laj uxlabʼal. Reʼ wilih reʼ i raansil i Dios, reʼ iruyeew chi kamanik. Eh qojrutobʼeej woʼ chi ikʼik chupaam taqeh pajarik, iruyeew qatuqkilal noq qojikʼik pan kʼaxkilal eh irub’an chi ne inwihʼik qaholohik naʼojbʼal (Gálatas 5:​22, 23). Eh, reʼ Jesús xuqʼor qeh chi reʼ Dios naruyeʼem qeh i santo laj uxlabʼal noq ajwaaj wach chi qeh (Lucas 11:13).

Iruk’uhtaaj i korik keh i k’ahchi’ kisik’im. Jeʼ rukabʼ iruqʼor pan Hechos 17:26, 27, kʼihaal chi kʼachareel chi jun suut i akʼal inkisikʼ i Dios. Inkaaj kinabʼeem i rubʼihnaal, inkaaj kinab’eem chajariik iraaj rubʼanam chinaah i wach akʼal eh chi keh taqeh kʼachareel eh inkaaj woʼ kinabʼeem nikʼwach ne inkijil ikoq kiibʼ ruukʼ (Santiago 4:8). Reʼ taqeh testigo reh Jehová kiq’orik ruuk’ taqeh kʼachareel jeʼ rukabʼ i wilih eh insuqbʼik kikʼux rukʼuhtjiik keh chi riij i kipahqanik.

¿Mi ruum i wilih xakʼul i huuj wilih? ¿Kʼahchiʼ na asikʼim i Dios? Mi jeʼ reʼ, mareh je’ wilih xuk’uhtaaj aweh i Dios chi xub’iraj atiij.