REʼ TAQEH I RUK’IHAAL nimaq wach nimanik chi jun suut i akʼal inkikorsaj kiyeʼaab’ eh inkikoj kihora reh rubʼanariik i tiij. Xa re’ la’, ¿jeʼ na reʼ iruqʼor i Santo Laj Huuj?

Reʼ Santo Laj Huuj wilik pech iruq’or qeh nikʼ naqab’anam qatiij, jeʼ rukab’ noq re’ Jesús xutyooxeej reh i Dios noq na naq rub’anam ruwaʼ (Lucas 22:17). Reʼ taqeh rajtahqaneel, noq inkimol naq kiibʼ reh ruloqʼjiik wach i Dios inkibʼan woʼ naq kitiij. Xa reʼ laʼ, reʼ wilih maʼ akʼ ta naq chi keh. Jeʼ naq reʼ inbʼanarik chupaam taqeh yeʼaabʼ reh kiloqʼinik keh taqeh judío eh jeʼ woʼ chupaam i templo ar Jerusalén, ahaʼ wiiʼ re’ Dios iraaj naq chi «bʼanbʼal kitiij i kichalik panimaq taq tinamit» (Marcos 11:17).

Reʼ Dios imponik chuwach chi reʼ taqeh rajkamanoom ne inkimol kiibʼ eh ne inkibʼan kitiij pan jenaj wach k’uxliis eh chi ne irukʼam riibʼ ruukʼ taqeh naʼojbʼal inkitijej pan Santo Laj Huuj. Pan korik, reʼ taqeh tiij reʼreʼ ne tirutobʼeej chi rubʼanariik i maʼ tichol ta naq rubʼanariik (Hebreos 13:​18, 19). Ruum ajreʼ, reʼ taqeh testigo reh Jehová inkibʼan kitiij pan kiyeʼaabʼ reh moloj iibʼ. Wilaʼ reʼ hat inawaaj abʼiram i tiij inkibʼan, ne irubʼan chi ne tiponik pan kiyeʼaabʼ reh moloj iib’, ahaʼ wiiʼ inkimol kiibʼ taqeh testigo reh Jehová.

Xa reʼ laʼ, reʼ Santo Laj Huuj maʼ iruqʼor ta nikʼ hora naqabʼanam qatiij oon aha’ yeʼaabʼ naqab’anam. Xa reʼ laʼ, iruqʼor chi reʼ taqeh rajkamanoom i Dios xa nikʼ naq inkib’an kitiij eh xa ahaʼ pa’ yeʼaabʼ. Reʼ Jesús xuqʼor: «Noq naa aʼnam atiij, okeen i koq panapaat, chatzʼap chaa puerta, cha aʼn atiij chuwach aaWaJaaw, reʼ aDios i wilik awuukʼ ar pan Uxlabʼal. Eh reʼ aaWaJaaw inilwik reh i na aʼan chi qʼeeqmaal, reʼ reh naa ruyeʼwiik akooch chuwachiil» (Mateo 6:6).

¿Maj korik chi q’e’ holohik runabʼjiik chi ne irub’an chi ne qojq’orik ruuk’ i Qajaaw wilik rajaawriik eh chi re’ reh qojrubʼiraj atoobʼ ta xa ahaʼ eh nik’ wilkooj? Ruum ajre’, re’ Jesús irusikʼ naq wihʼik chi rutkeel reh rubʼanariik rutiij. Jenaj pech, noq na naq ruchihiim wach taqeh rajtahqaneel, xikʼik aqʼabʼ chi tiij (Lucas 6:​12, 13).

Xiwihʼik woʼ taqeh winaq eh ixoq korik wach kikʼux xkibʼan kitiij chuwach i Dios noq wilik naq i nakichihim pan kikʼachariik, oon noq k’ahchi’ naq kik’iik pan kʼaxkilal. Maʼ qehtʼal ta mi xkibʼan kitiij chi kow oon chi qʼuun, mi xkib’an chi kixilak tokoom k’achareel oon chi kutkeel, reʼ xti aajwaal wach reʼ chi xkibʼan kitiij. Reʼ Jehová iruqʼor: «Xa eliik-oq kʼahchiʼ taq kaat chatiij» (1 Tesalonicenses 5:17). ¿Maj korik chi holohik irupahqaaj qeh? Reʼ Dios iraaj rubʼiram taqeh rajkamanoom jarub’ pa’ pech inkaaj qʼorik ruukʼ.

Pan qaqʼijil, kʼih inkipahqaaj mi re’ tiij ne irutoob’eej taqeh. Mareh re’ hat akapaam wo’ i wilih.