KʼIH taqeh kʼachareel inkikapaaj chi re’ tiij ma’ irutoob’eej ta taqeh. Xa reʼ laʼ, re’ Santo Laj Huuj maʼ jeʼ ta reʼ iruqʼor (Lucas 22:40; Santiago 5:13). Reʼ tiij maʼ xa ta qojrutobʼeej ta pan uxlabʼal, qojrutobʼeej woʼ pan qakapebʼaal eh pan qatibʼkal. ¿Nikʼwach irubʼan i wilih?

Noq reʼ taqeh halakʼun inkikʼul jenoʼ kooch ruukʼ i kajaaw, ¿chajariik inkiqʼor i ajabʼees chi nakibʼanam taqeh i halakʼun? Inkʼuhtjik keh chi ma’ xa ta nakik’uhtaam chi looq’ chi keh i kooch xye’arik keh, ko ruman la’ chi ne inkityooxeej. Noq inqatyooxeej inkiyeew qeh, inqak’uhtaaj chi looq’ chi qeh i xkiyeew qeh. Jeʼ woʼ reʼ inkʼularik noq qojqʼorik ruukʼ i Dios. Naqilom nikʼwach ne qojrutobʼeej i tiij inqabʼan.

Reʼ taqeh tiij aha’ wii’ inqatyooxeej chu’nchel. Noq inqatyooxeej reh i Dios chuʼnchel i holohik inqakʼul pan qakʼachariik, re’ wilih qojrutoob’eej reh chi ne inqakapaaj chi riij taqeh i kuxisanik inqak’ul. Re’ wilih irub’an xa ne wo’ inqatyooxeej chu’nchel inye’arik qeh eh chi suq qak’ux (Filipenses 4:6).

Jenaj ehtalil. Reʼ Jesús xutyooxeej reh i Rajaaw chi xub’iraj i rutiij (Juan 11:41).

Reʼ taqeh tiij reh rupahqaljiik kuybʼal mahk. Noq inqapahqaaj reh i Dios chi ne irukuy qamahk, re’ reh irisaj jenaj ihq chi qanaah. Irukʼuhbʼalej i qakapebʼaal eh irubʼan chi ne inqakoj rehtaal chaajreet re’ xqab’an jenaj nimlaj mahk eh irubʼan woʼ chi ne inqayotʼ qakʼux.

Jenaj ehtalil. Reʼ tiij xubʼan i David noq xuyotʼ rukʼux (Salmo 51).

Reʼ taqeh tiij reh rupahqaljiik qanaʼojbʼal. Reʼ wilih irubʼan chi ne inqaq’ahsaj qiibʼ, ruum chi ma’ inqab’an ta rub’aan chu’nchel. Irubʼan chi maʼ ne ta inqakoj qakʼux xa chi qibʼil qiibʼ, irub’an la’ chi ne inqakoj qak’uux ruukʼ i Qajaaw wilik cho pan taxaaj (Proverbios 3:​5, 6).

Jenaj ehtalil. Reʼ tiiij xubʼan i Salomón noq xupahqaaj reh i Dios chi ne inyeʼarik runaʼojbʼal reh taqʼanik chinaah i tinamit Israel (1 Reyes 3:​5-12).

Re’ taqeh taqeh tiij inqab’an noq tiʼ qakʼux. Noq qojkaaj kapeew, irusuqbʼisaj qakʼux qʼorik ruukʼ i Jehová chi riij inqikʼraaj. Eh re’ wilih qojrutoob’eej reh chi ne inqatijej rukojariik qakʼux ruukʼ i Jehová (Salmo 62:8).

Jenaj ehtalil. Reʼ tiij xubʼan i reey Asá noq wilik naq chuwach jenaj aj’ixowaal (2 Crónicas 14:11).

Reʼ taqeh tiij chi kiij ajwach inkaaj toobʼjik. Jeʼ reʼ maʼ ne ta inqanimbʼisaj ta qiibʼ eh inqatijej i ketelinik wachiis eh inqakoj qiib’ pan kiye’aab’ i tokoom.

Jenaj ehtalil. Reʼ tiij xubʼan i Jesús chi kiij taqeh rajtahqaneel (Juan 17:​9-17).

Reʼ taqeh tiij reh ruloqʼjiik wach i Dios. Reʼ loqʼil eh i kʼaxooj inqik’raaj chi riij i Jehová inkʼihik noq inqayeew ruloqʼil taqeh ruholohik laj naʼojbʼal eh taqeh i xutzʼuhkrisaj. Reʼ taqeh tiij wilih qojkijil wo’ ruukʼ i qaDios eh Qajaaw wilik cho pan taxaaj.

Jenaj ehtalil. Reʼ tiij xubʼan i David noq xuyeew ruloqʼil i Dios ruum chu’nchel i xutzʼuhkrisaj (Salmo 8).

Xa maʼ ayuʼ ta imponik taqeh kooch inqakʼul ruum i tiij. Inqakʼul i «tuqkiil kʼuxliis inchalik ruukʼ i Tʼyoos eh inqʼahxik chiwach chuʼnchel i noʼjbʼal» (Filipenses 4:7, RLLH). Pan korik, reʼ tuqkilal inqikʼraaj jenaj kooch xiikʼ naah ruloqʼil (Proverbios 14:30.) Xa reʼ laʼ, ¿nikʼwach inqareq i tuqkilal wilih? ¿Xa quukʼ na inchalik oon wilik i naqabʼanam reh chi ne inqakʼul?