2. Wiʼjaleel

«Naa ruwihiik [...] wiʼjaleel» (MARCOS 13:8)

● Jenaj winaq inooj pan yeʼaabʼ rubʼihnaal Quaratadji (Níger). Reʼ taqeh ruprimo, taqeh ras eh taqeh ranaabʼ xichalik woʼ pan yeʼaabʼ reʼreʼ ruum chi maʼxta kiwaʼ kihaʼ pan kitinamiit. Irukʼut kohoq riibʼ wach pohp, chi rutkeel. ¿Chaj woʼ reet? «Maʼxta pan ruqʼabʼ ruketarik [i rufamilia], eh ruum i rukʼixik maʼ raaj ta rilom kiwach», iruqʼor i Sidi, reʼ kʼamol bʼeeh pan abʼixbʼal.

¿CHAJARIK INKʼUTINIK RUUKʼ XKʼULJIK? Jenaj reh wuquubʼ chi kʼachareel chi junsut i akʼal maʼxta ruwaʼ ruhaʼ, eh pan yeʼaabʼ África subsahariana, reʼ jenaj reh ixibʼ chi kʼachareel maʼxta wilik reh chi jumpech. Reh chi ne inqareq chi riij, qakapaaj chi riij i ehtalil wilih, pan jenaj paat wilik jenaj ajabʼees, jenaj tutbʼees eh i kakʼuun. Wilik kʼuxbʼal xa reh kiʼibʼ kʼachareel, ¿ajwach ne rukuy ruwaʼ: reʼ ajabʼees on reʼ tutbʼees? Kʼih taqeh familia kiʼikʼik chupaam i wilih iqal iqal.

REʼ INKIQʼOR I JUʼJUN. Chuʼnchel i intikarik wach akʼal inwachinik chi korik. Xa reʼ laʼ, reʼ iraaj reʼ chi ne inqatzʼir riij chi korik i qatumiin.

¿MI KORIK INKIQʼOR? Korik chi maʼ jankʼal ta qilom i wiʼk haʼ chi kʼihaal chi naah i wach akʼal. Holohik naq chi reʼ taqeh wilik kajaawriik naah akʼal ne naq inkichʼeq i wiʼk haʼ reh taqeh kʼachareel maʼxta kiwaʼ kihaʼ; xa reʼ laʼ atoobʼ ta inkiyeew kikʼux, maʼ kichol ta rubʼan.

¿CHAJARIK INAQʼOR I HAT? ¿Korik na iruqʼor pan Marcos 13:8? Atoobʼ ta wilik kʼih taqeh kamambʼal reh chi ne inwihʼik wiʼk haʼ, ¿chaj woʼ reet ko wilik wiʼjaleel naah akʼal?

Reʼ taqeh kow laj yihk eh i wiʼjaleel irukʼam chaloq taqeh kʼaxkilaal chi naah i akʼal pan tzʼapaabʼ wach ree qʼiij.

[Re’ taqeh q’orik koruman]

«Kʼihaal chi halakʼun reʼ i kikimik ruum i alaqis, ruum haʼsaaʼ eh tokoom chik yabʼilaal wilik ta naq kiwaʼ kihaʼ maʼ kikimik ta naq.» (ANN M. VENEMAN, REʼ NAQ INKʼAMWIK BʼEEH PAN MOLAABʼ REH I UNICEF)

[Ehtalil re’ taqeh xi’esanik cho reh]

© Paul Lowe/Panos Pictures