NOQ reʼ Jesús xwihʼik wach akʼal, xukʼuhtaaj chi manlik i runaʼojbʼal eh i rubʼanooj i Rajaaw wilik cho pan taxaaj. Reʼ reh xuqʼor: «Maʼ xtaj i nubʼan chi xa nunaʼojbʼal wiibʼ, reʼ laʼ i nuqʼor i rukʼuhtaam cho weh i waJaaw» eh xuqʼor woʼ: «Ruum eliik kʼahchiʼ kiin chubʼanariik imponik chuwach i reh» (Juan 8:​28, 29; Colosenses 1:​15). Jeʼ reʼ noq, mi inqaaj qanabʼeem chajariik irukapaaj i Dios chi kiij taqeh ixoq eh nikʼwach iraaj chi ne inqilow taqeh, ko ruman chi ne inqatijej i rehtalil i Jesús.

Re’ kitz’irim riij taqeh evangelio, xkiq’or chi reʼ Jesús maʼ irilow ta naq taqeh ixoq jeʼ rukabʼ inkil taqeh kʼachareel pan ruq’ijil. ¿Chaaj woʼ reet jeʼ reʼ inqaqʼor? Eh ¿mi ne irutoob’eej taqeh ixoq pan qaq’ijil i xuk’uhtaaj?

Reʼ Jesús maʼ irilow ta naq taqeh ixoq chi xa je’ k’o’naal taqeh. Keh taqeh ajkʼamal bʼeeh reh i kinimaniik taqeh judío, wihʼik chi kixilak taqeh ixoq jenaj naq kʼaxkilal chi keh, ruum chi inkikapaaj naq chi ne kikʼamarik rejeh pan kʼoyomal. Ruum aj reʼ, maʼ inyeʼarik ta naq qʼabʼ keh chi ne kiqʼorik ruukʼ taqeh winaq noq wilkeeb’ naq chi kixilak k’ih taqeh k’achareel eh noq ma’ kib’urum ta naq i kinaah. Xa reʼ laʼ, reʼ Jesús maʼ jankʼal ta xuk’uhtaaj chi ma’ na ta naq kiq’o’reem taqeh ixoq, xwihʼik laʼ chi kixilak, eh jeʼ reʼ xukʼuhtaaj keh taqeh winaq chi ne naq inkibʼan ruqʼilariik kiibʼ ruukʼ irukʼax wach i kitiʼjolal eh chi na naq kiyeʼem kiloqʼil taqeh ixoq (Mateo 5:​28).

Jenaj pech xuqʼor: «Awach i neeruchʼaq i rehkʼeen, eh nee woʼ chik i rubʼan kaxáro ruukʼ i tokoom ixoq, nee ruchʼuwaʼrisaj wach i rukaxaro ruukʼ i peet rehkʼeen» (Marcos 10:​11, 12). Qehtʼal chi reʼ Jesús maʼ irukʼam ta naq naah inkib’an taqeh ajk’amal b’eeh pan ruq’ijil, chi reʼ taqeh winaq ne inkichʼaq kiibʼ ruukʼ i kehkʼeen «ruum i xa chibʼih jariik» i maʼxta ruwiiʼ (Mateo 19:​3, 9). K’isiin ma’ chu’nchel taqeh judío, re’ inkikapaaj naq chi riij i k’oyomal ma’ je’ ta naq rukab’ iruk’uhtaaj i Santo Laj Huuj. Maʼ inkinimaj ta naq chi, mi jenoʼ winaq iruk’at rooq i rehkʼeen kʼahchiʼ ruchʼuwaʼrisam wach i rukaxaro. Reʼ taqeh fariseo inkikapaaj naq chi xa reʼ taqeh ixoq inkichʼuwaʼrisaj naq wach i kaxarohiil, eh maʼ jeʼ ta naq reʼ inkikapaaj chi kiij taqeh winaq. Jenaj huuj inqʼorik chi riij i wilih iruq’or: «Noq re’ Jesús xuk’uhtaaj chi reʼ taqeh ehkʼeenbʼees jenaj kiwach ruukʼ taqeh bʼahiilbʼees, xubʼan chi ne inwihʼik kiloqʼil taqeh ixoq».

Kitoobʼal taqeh ixoq pan qaqʼijil. Pan kimolaabʼ taqeh testigo reh Jehová, reʼ taqeh ixoq kiwihʼik chi kixilak taqeh winaq eh chʼiklik kikʼux chi maʼ ne ta inkapebʼjik i maʼ holohik ta chi kiij, eh maʼ ne ta woʼ kiyoʼjik chi ne inbʼanarik i maʼ holohik ta keh. Reʼ taqeh winaq ajnimaneel inkiyeew kikʼux chi rilariik taqeh ixoq nimaq kihabʼul chi jeʼ kituut, eh taqeh qʼahxoq chi jeʼ kanaabʼ, ruukʼ korik wach kʼuxliis (1 Timoteo 5:2).

Reʼ Jesús xuyeew ruqʼiij reh kitijaljik. Chupaam taqeh qʼiij reʼreʼ, reʼ taqeh fariseo inkiqʼor chi reʼ taqeh ixoq maʼ ne ta naq kikojarik pan ruman eh chi maʼxta naq narukʼuhtjiik keh. Xa reʼ laʼ, reʼ Jesús maʼ jeʼ ta reʼ xubʼan, reʼ reh xuyeew i ruqʼiij chi ruk’uhtjiik keh i korik eh xukowej kikʼux reh chi ne naq inkiqʼor chajariik inkikapaaj. Eh reʼ Jesús maʼ xukapaaj ta chi reʼ kikamaj xa re’ wo’ pan cocina. Jeʼ reʼ xukʼuhtaaj jenaj pech noq xuyeew qʼabʼ reh i María chi ne irutijej i k’ahchi’ naq ruk’uhtaam (Lucas 10:​38-​42). Eh reʼ taqeh i qʼorik kapebʼimaj riij chi korik xuqʼor i Marta reh i Jesús noq kamnaq naq chik i Lázaro, irukʼuhtaaj chi k’ih xutijej ruukʼ taqeh kʼuhtanik xubʼan i Jesús (Juan 11:​21-​27).

Reʼ Jesús irukapaaj naq taqeh ixoq eh irutijej naq taqeh. K’isiin ma’ chuʼnchel taqeh ixoq judío naq taqeh looq’ naq chi keh chi re’ taqeh kak’uun ne inwih’ik kajaawriik eh chi ne naq kiponik chi profeta taqeh. Ruum aj reʼ, noq jenaj ixoq xuqʼor reh: «Atoobʼ reh ixoq x-akʼunanik aweh», reʼ Jesús xukʼuhtaaj reh chi reʼ xti q’e’ looq’, reʼ runimjiik i Dios (Lucas 11:​27, 28). Jeʼ reʼ xukʼuhtaaj chi reʼ taqeh ixoq ne wo’ irub’an chi ne kikamanik chuwach i Jehová, eh xa ma’ naa ta naq kik’amam naah inkiq’or taqeh winaq (Juan 8:​32).

Kitoobʼal taqeh ixoq pan qaqʼijil: Pan kimolaabʼ taqeh testigo reh Jehová, qʼeʼ holohik rubʼirjiik taqeh qʼorbʼal inkiyeew taqeh ixoq pan taq moloj iibʼ. Eh reʼ taqeh ajkʼuhtoom inkiyeew kiloqʼil taqeh ixoq wilik kinaʼojbʼal, ruum chi noq wilkeeb’ chi kixilak k’ih taqeh k’achareel eh noq wilkeeb’ chi kutkeel, inkik’uhtaaj «i holohik laj naʼojbʼal» (Tito 2:3). Eh kitoobʼinik woʼ chi qʼoroj kʼuhbʼaal chi riij i runimaal Rajaawriik i Dios (Salmo 68:11; chawil i recuadro  «¿Xuyeew na qʼabʼ i apóstol Pablo chi nakiqʼoriik ixoq?», pan página 9).

Reʼ Jesús xuyeew kiloqʼil taqeh ixoq. Najtir cho qʼiij, inyeʼarik naq kiloqʼil taqeh winaq. Eh reʼ Talmud iruqʼor naq: «Qʼeʼ atoobʼ keh i xwihʼik kak’uun, eh qʼeʼ tiʼ xkik’ul i xwihʼik kixq’uun». Jenaj ixqʼunbʼees xa jeʼ naq jenaj ihq keh taqeh juʼjun chi ajabʼees, ruum chi ko na naq kisikʼim kibʼahiil eh na naq kiye’em tumiin chi kiij, eh maʼ naa ta naq kuyʼeem chi ne kichaʼjaljiik noq ne naq kirijb’ik.

Xa reʼ laʼ, reʼ Jesús iruyeew naq ruloqʼil i rukʼachariik jenaj kʼisa xqʼun eh jeʼ woʼ i ruk’achariik jenaj kʼisa akʼun. Xruksaj i rakʼuun ixoq kamnaq rubʼahiil aj Naín, eh xruksaj woʼ i rixqʼuun i Jairo (Marcos 5:​35, 41, 42; Lucas 7:​11-​15). Jenaj pech, xroqʼomaaj jenaj ixoq kʼahchiʼ naq rikʼiik pan jenaj kowlaj yabʼilaal eh irukʼam naq wahxaqlaj haabʼ chupaam. Eh xuqʼor chi reʼ ixoq «xikin cho riih rumaam i Abraham», reʼ taqeh q’orik wilih maʼ ehtʼalimaj ta naq wach kuum taqeh ajtzʼihbʼ judío (Lucas 13:​10-​16). Ruukʼ taqeh q’orik pan chaqʼlamiil xub’an i Jesús, xukʼuhtaaj chi ko ruman taqeh ixoq eh chi iruyeew naq ruloqʼil i kikojbʼaal (Lucas 19:9; Galatas 3:7).

Kitoobʼal taqeh ixoq pan qaqʼijil: Jenaj qʼorik reh i tinamit Asia, iruqʼor chi reʼ rukʼihsjiik jenaj ixqʼun, xa jeʼ rukojariik ruha’iil taqeh i ruhtzʼuubʼ i ka’jaaj. Xa reʼ laʼ, reʼ ajabʼees iruloq’ej wach i Jehová maʼ irukʼam ta naah i kapebʼaal wilih. Irucha’jeej laʼ taqeh i ruhalakʼuun chi korik, atoobʼ ta akʼun oon xqʼun taqeh, irukoj taqeh pan tijinbʼaal reh chi ne inkikʼul kitijinik eh irucha’jeej taqeh reh chi ma’ ne ta kiyowabʼjik.

Reʼ Jesús iruchʼikaa’ naq rukʼux chi kiij taqeh ixoq. Pan qʼatbʼal qʼorik keh taqeh judío, reʼ i ruqʼorbʼal jenoʼ ixoq ma’xta naq kamaj, xa je’ naq rukab’ i ruq’orb’al jenoʼ moso i wilik pan kowlaj kamanik. Jenaj ajtzʼihbʼ reh i peet siglo, Josefo i rub’ihnaal xuq’or: «Ma’xta kamaj i ruqʼorbʼal jenoʼ ixoq, ruum chi ma’xta rehtʼal eh yob’sa’»

Tokoom naq i runaʼojbʼal i Jesús. Reʼ reh xuchih taqeh ixoq reh chi ne naq inkiqʼor chi xwuktiik chi kixilak taqeh kamnaq (Mateo 28:​1, 8-​10). Atoob’ ta reʼ taqeh ixoq wilih i korik wach kikʼux xkil i rukimiik eh i rumuhqiik i Jesús, reʼ taqeh apóstol k’axik naq chi keh rukojariik wach i kʼahchiʼ kiqʼorom (Mateo 27:55, 56, 61; Lucas 24:​10, 11). Jeʼ reʼ noq, noq reʼ Jesús xuchih taqeh ixoq wilih reh qʼorik chi riij i ruwuktiik, xuyeew kiloqʼil eh xukʼuhtaaj chi maʼxta ta naq reet chi ne kiqʼorik chi riij jeʼ rukabʼ inkib’an taqeh rajtahqaneel (Hechos 1:​8, 14).

Kitoobʼal taqeh ixoq pan qaqʼijil: Reʼ taqeh i winaq wilik kikamaj pan qamolaabʼ, inkikʼuhtaaj chi inkiyeew kiloqʼil taqeh ixoq noq inkikoj pan ruman chajariik inkiq’or. Eh reʼ taqeh bʼahilbʼees noq inkiyeew kikʼux chi rubʼirjiik i kehkʼeen, inkikʼuhtaaj chi inkiyeew kiloqʼil (​ Pedro 3:7; Génesis 21:12).

Re’ inkikʼam keh ruuk’ i rehtalil i Jesús, inkiyeew kiloqʼil eh inkil taqeh ixoq jeʼ rukabʼ naq iraaj cho i Jehová pan peet (Genesis 1:​27, 28). Reʼ taqeh bʼahilbʼees inkiloqʼej wach i Dios maʼ inkik’uhtaaj ta keh taqeh tokoom chi xa reʼ wo’ taqeh winaq wilik kiloqʼil. Inkikʼam la’ naah taqeh naʼojbʼal wilik pan Santo Laj Huuj reh chi suq kik’ux i kehkʼeen (Efesios 5:​28, 29).

Noq reʼ Yelena xutoqʼaaʼ tijinik chi riij i Santo Laj Huuj, maʼ ajwach ta naq eh iruqʼor i maʼ holohik ta inbʼanarik reh ruum i rubʼahiil. Reʼ i rubʼahiil xkʼihik ahaʼ naq wiiʼ wilik peletohinik, eh aha’ wii’ ma’ mahk ta naq rehq’eljiik jenoʼ xqʼun eh ruqʼojariik. Reʼ reh iruqʼor: «Reʼ Santo Laj Huuj xyeʼwik wansil. Xnutijej chi wilik jenaj Dios qʼeʼ kiraaj, hin looqʼ chi reh eh chi inkapebʼinik chi wiij. Xnukoj rehtaal chi, mi re’ nub’ahiil irutijej naq i Santo Laj Huuj, re’ wilih ne naq irujal i rukʼachariik». Reʼ xuqʼor xooj eloq wach noq reʼ rubʼahiil xuqahsaj ruhaaʼ eh xponik chi jenaj testigo reh Jehová. Reʼ Yelena iruqʼor chi reʼ rubʼahiil xutijej ruq’ilariik riib’. Re’ reh iruq’or: «Qakab’cheel xqatijej i kuyuj mahk». Chi riij i reʼ iruqʼor: «Reʼ taqeh naʼojbʼal inkan pan Santo Laj Huuj hin rutobʼeem reh chi ne inwikʼraaj chi kinkik’ax eh chi kinkichaʼjeej pan nukaxarohiil» (Colosenses 3:​13, 18, 19).

Maʼ xa reʼ ta naq i Yelena jeʼ wilih irikʼraaj riibʼ. Kʼih taqeh ixoq inkiloq’ej wach Jehová suq kikʼux ruukʼ i kibʼahiil, ruum chi inkikowej kikʼux chi rukojariik pan kikaxarohiil taqeh naʼojbʼal iruyeew i Santo Laj Huuj. Inkikʼul woʼ rukowiil kikʼux, inyeʼarik kiloqʼil eh maʼ kiyoʼjik ta chi wihʼik chi kixilak taqeh hermano pan uxlabʼal (Juan 13:34, 35).

Chuʼnchel taqeh ajnimaneel, chi winaq chi ixoq taqeh inkireq chi riij chi maʼ manlik ta kiwach eh chi ajmahk taqeh, eh chi ma’ tiklik ta chik kib’anik, ruum chi ximinarik taqeh pan tiʼ kʼaxik. Xa reʼ laʼ, reʼ keh chʼiklik kikʼux chi mi xkijil kiibʼ ruukʼ i Dios ajkʼaxool, reʼ Qajaaw Jehová, nakehsjiik «chi ri’sil i ma’xta kamaj» eh suq kik’ux ruum chi nakeliik «pan q’ab’ i mahk eh i kimik eh re’ keh nakiponiik chi rak’uun rixq’uun i Dios». Xti qʼeʼ holohik inkuyʼeej taqeh i winaq eh ixoq reʼ wilkeebʼ riʼsiil rukʼaxbʼaal i Dios (Romanos 8:​20, 21, TNM).