Chi jun suut i ak’al wilkeebʼ kʼihaal taqeh ixoq testigo reh Jehová inkiqʼor i kʼuhbʼaal chi riij i runimaal Rajaawriik i Dios. Reʼ xq’orjik cho pan Salmo 68:12 inooj eloq wach kuuk’. Ar re’ Jehová iruq’or: Re’ Qajaaw xq’orik cho, eh «k’ih taqeh ixoq xkipuhkaaj rib’iral».

Ruuk’ chuʼnchel i wilih, re’ q’oroj k’uhb’aal inkib’an taqeh ixoq testigo reh Jehová ma’ jenaj ta wach ruuk’ inkibʼan taqeh ixoq pan tokoom nimanik. ¿Chaaj woʼ reet maʼ jenaj ta wach i q’oroj k’uhb’aal inkib’an?

Peet, reʼ taqeh ixoq wilih, xa ruukʼ jun tzuhbʼ chi kʼachareel kiqʼorik eh kikʼamwik bʼeeh pan kiʼiglesia. Jeʼ reʼ noq, reʼ koruman chi keh rubʼanariik, reʼ rukowsjiik kikʼux i wilkeebʼ pan kiʼiglesia. Xa reʼ laʼ, re’ taqeh ixoq testigo reh Jehová inkiqʼor i kʼuhbʼaal keh chuʼnchel taqeh kʼachareel reʼ inkireq noq ojik inkib’an chi q’oroj k’uhb’aal chi’ taq paat oon pan tokoom chik yeʼaabʼ.

Reʼ kamanik inkib’an taqeh ixoq Testigo pan molaabʼ maʼ jenaj ta wach ruukʼ taqeh inkibʼan i ixoq reh tokoom nimanik. Reʼ taqeh ixoq reh i tokoom nimanik, ajkʼamal bʼeeh taqeh pan kiʼiglesia eh inkikʼuhtaaj chajariik i nakinimam taqeh kiponik ar. Re’ taqeh ixoq Testigo ma’ inkiyeew ta k’uhb’aal pan molaabʼ noq wilik jenoʼ winaq qahsamaj chik ruhaa’. Xa re’ taqeh winaq ajk’amal b’eeh taqeh eh kojomaj taqeh reh chi ne inkib’an k’untanik chi korik inkib’an i wilih (1 Timoteo 3:2; Santiago 3:1).

Pan Santo Laj Huuj inkan chi xa re’ taqeh winaq ne kikʼamwik b’eeh pan molaabʼ. Eh re’ taqeh naʼojbʼal xuyeew i apóstol Pablo reh jenaj chik ula’ineel, Tito i rub’ihnaal, irukʼuhtaaj chi jeʼ reʼ, noq xuqʼor: «Reʼ wilih kamaj noq xatnikanaaʼ cho Kreta, [...] eh naapahbʼaam taqeh aj kʼamal bʼeeh» (Tito 1:​5, RLLH). Chi riij i reʼ, xuqʼor chi reʼ ajkʼamal bʼeeh, «kʼacharik i rubʼan parukorkiil, reh chi maʼ xtaj neenqʼilarik wiiʼ. Eh xa jinaj-oq i rehkʼeen chuwach» (Tito 1:​6). Re’ apóstol xuqʼor woʼ chik taqeh naʼojbʼal wilih pan jenaj carta xutaq’aaj reh i Timoteo. «Wi wilik jinoʼq iraaj ribʼanam chi aj ilol reh i ritinamiit i Tʼyoos, atoobʼ laj kamanik irikapaaj. Reʼ aj ilol reh i ritinamiit i Tʼyoos ku riman chi maʼxta oq qʼilarik wach naah, xa junpech ribʼanam kaxaaro, [...] maʼ ahl ta oq rikʼux chi kʼuhtanik» (1 Timoteo 3:​1, 2).

Xa re’ la’, ¿chaaj woʼ reet xa re’ taqeh winaq ne irub’an chi ne kik’amwik b’eeh pan molaabʼ? Re’ Pablo xuq’or: «Ma’ inwaaj ta chi re’ taqeh ixoq nakitijem taqeh winaq ma’ woʼ nakiye’em kajawriik chikinaah; inwaaj laʼ chi kiwih’oq’ pan ch’uub’ laj k’uxliis. Ruʼuum chi peet xtz’uhkresjik i Adán eh xam chik re’ Eva» (1 Timoteo 2:​12, 13, RLLH). Iraaj ruq’orom chi, noq re’ Dios xutz’uhkrisaj chi peet i winaq, iraaj naq chi reʼ naq i reh ne irubʼan i k’uhtanik eh chi ne inkʼamwik b’eeh.

Re’ Jesús iruk’am kib’eeh taqeh rajkamanoom i Jehová, ruum inkik’am keh ruuk’ i rehtalil. Reʼ Lucas, jenaj rajtahqaneel i Jesús xuqʼor: «Reʼ Jesuus xib’ehuj paam taqeh tinamit eh ab’ixb’al, k’ahchiʼ ripuhkaam eh risilk’aam i Atoob’ laj Rib’iral i rinimaal rajawriik i Tʼyoos». ¿Eh chajariik xkib’an taqeh rahtahqaneel noq xitaq’abʼjik chi rub’anariik i kamanik wilih? «Re’ taqe i raj tahqaneel xiooj wo’ hoq pantaq ab’iix wilkeeb’ wii’ patineel chuq’orariik rib’iral i ak’ k’uhb’aal ree ko’lemb’al iib’» (Lucas 8:1; 9:​2-6).

Je’ woʼ reʼ yuʼnaak, re’ taqeh winaq eh taqeh ixoq testigo reh Jehová inkiqʼor i kʼuhbʼaal, eh chi jeʼ reʼ inooj eloq wach i qʼoroj cho rubʼiral pan Mateo 24:14. Ar, re’ Jesús xuq’or: «Naripuhkteesjiik i Atoob’ laj Q’orik wilih chiriij i rinimaal rajawriik i taxaaj chi junsuut i wach ak’al reh chi nariq’orariik rikorkiil keh chu’nchel i tinamit: ku re’ ajik narik’uliik re’ i kuxesb’al wach» (Mateo 24:14. RLLH).