«Ko majaaʼ qojponik pan jenaj wach kapebʼinik reh chi ne inqaqʼor chi reʼ Dios wilik rubʼihnaal. Mi xqaqʼor ta naq chi wilik rubʼihnaal. Maʼ qehtʼaliim ta chajariik i rubʼihnaal» (Profesor David Cunningham, pan ruhuuj Theological Studies).

Reʼ Dios xuqʼor: «Reʼ i hin Jehová. Reʼ i wilih i nubʼihnaal» (Isaías 42:8, TNM). Reʼ Jehová jenaj bʼihnaal hebreo iraaj ruqʼorom «Reʼ reh irubʼan chi ne inkʼularik» (Génesis 2:​4, TNM, ruman).

Reʼ Jehová iraaj chi ne inqaqʼor i rubʼihnaal. Reʼ Santo Laj Huuj iruqʼor: «Chaqʼor taq i rubʼihnaal, chayeew taq chi nabʼjik i rubʼanam chi kixilak taqeh tinamit. Tiqʼoroq taq chi riij i runimaal wach i rubʼihnaal» (Isaías 12:4, TNM).

Reʼ Jesús xuqʼor i rubʼihnaal i Dios eh xukʼuhtaaj keh i rajtahqaneel. Jun riim, reʼ reh xubʼan rutiij ruukʼ i Rajaaw eh xuqʼor: «Xnuyeew keh chi nabʼjik abʼihnaal». ¿Chaaj woʼ reet xuyeew chi nabʼjik? Reʼ reh xuqʼor: «Reh chi reʼ i kʼaxooj xakʼuhtaaj chi wiij ne inwihʼik kuukʼ, eh reʼ hin ne kinwihʼik kuukʼ» (Juan 17:26, TNM).

Reʼ Walter Lowrie ajtzʼirool riij i Santo Laj Huuj xutzʼihbʼaaj: «Jenaj kʼachareel mi maʼ rehtʼal i rubʼihnaal i Dios maʼ rehtʼaliim ta wach [...] maʼ ne ta woʼ iraaj wach mi irukapaaj chi reʼ Dios xa jenaj uxlabʼal maʼ ehtʼalimaj ta wach».

Jenaj winaq Victor i rubʼihnaal inooj naq chuʼnchel taqeh xamaano pan iglesia, xa reʼ laʼ maʼ qʼeʼ ta naq rehtʼaliim wach i Dios. Reʼ reh iruqʼor: «Noq xnutijej i rubʼihnaal i Dios, chi Jehová, xwikʼraaj chi xa jeʼ naq wilik chi nuwach. Kʼih pech xnubʼiraj chi riij, xa reʼ laʼ maʼ wehtʼal ta naq wach. Xa reʼ laʼ yuʼnaak xnunabʼeej wach eh xubʼan chi wamigo».

Reʼ Jehová irujil riibʼ ruukʼ taqeh inkikapaaj i rubʼihnaal eh jeʼ wilih iruqʼor keh: «Eh naa woʼ chik nukuyum kimahk, jeʼ rukabʼ noq i rukuy ru mahk i rakʼuun i ajaabʼees, noq naanuketelaam kiwach taqe i reʼ» (Malaquías 3:​16, 17). Reʼ Dios irukuxisaj woʼ taqeh reʼ inkiqʼoreej ruukʼ i rubʼihnaal. Reʼ i Santo Laj Huuj iruqʼor: «Chuʼnchel reʼ inkiqʼor i rubʼihnaal i Jehová narukoʼljiik» (Romanos 10:13, TNM).