NAʼOJBʼAL REH I PEET PÁGINA | REʼ TAQEH CHUKUJ Q‘ORIK INKIQ‘OR CHI RIIJ I DIOS
¿Kʼaxik na rukʼaxariik i Dios?
«Reʼ chi naa akʼaxam aaWaJaaw aaDios chuʼnchel akʼux, chuʼnchel awánima, chuʼnchel akapebʼaal. Reʼ aj i wili xti wilik rajaawriik, eh reʼ i peet kʼuhbʼaal chi kixilak taqe kʼuhbʼaal» (Xuqʼor i Jesucristo pan haabʼ 33 pan qaqʼijil) a.
Wilik taqeh kʼachareel kʼaxik chi keh rukʼaxariik i Dios. Maj inkikapaaj chi jenaj uxlabʼal maʼ ehtʼalimaj ta wach, najt wilik quukʼ eh chi qʼeʼ josqʼ. Chakoj taq rehtaal reʼ inkikapaaj chi riij i juʼjun:
Reʼ Marco aj Italia iruqʼor: «Inupahqaaj woʼ naq nutoobʼjiik reh i Dios, xa reʼ laʼ inwikʼraaj naq chi najt wilik wuukʼ. Inukapaaj naq chi xa jenaj uxlabʼal eh maʼxta irikʼraaj».
Reʼ Rosa aj Guatemala xuqʼor: «Inwaaj naq nuloqʼem wach i Dios, xa reʼ laʼ inukapaaj naq chi kʼaxik rureqariik. Inukapaaj woʼ naq chi jenaj naq Dios qojruyeew pan tiʼ kʼaxik. Maʼ inukoj ta naq wach chi wilik naq rukʼaxooj».
Reʼ Raimunda aj Canadá xuqʼor: «Pan nukʼisinal inukapaaj naq chi reʼ Dios iril taqeh i maʼ holohik ta inubʼan reh chi ne kiruyeew chi rutojarik i numahk. Chi riij i reʼ, inwil naq chi najt wilik wuukʼ, jeʼ rukabʼ jenaj ajabʼees intaqʼanik chi naah jenoʼ tinamit chi maʼ iraaj ta kiwach i kʼachareel».
¿Raaj i hat chajariik inakapaaj? ¿Kʼaxik na rukʼaxariik i Dios? Chuwach taqeh haabʼ ikʼinaq, reʼ taqeh ajnimaneel kibʼanam taqeh pahqanik wilih. Jenaj ehtalil, najtir reʼ rukʼihaal taqeh kʼachareel maʼ inkibʼan ta naq kitiij ruukʼ i Dios. ¿Chaaj woʼ reet? Kiyoʼjik naq ruum. Reʼ Wíll Durant, ajtzʼihbʼaneel chi riij taqeh xkʼuljik jeʼ wilih xuqʼor: «¿Chaaj woʼ reet jenoʼ kʼachareel ajmahk irubʼan rutiij chuwach i rutzʼunaabʼ i Dios mi xti najt wilik eh inyoʼjik ruum?».
¿Chaaj woʼ reet jeʼ reʼ inkikapaaj taqeh kʼachareel chi riij i Dios? ¿Chajariik irukʼuhtaaj i Santo Laj Huuj chi riij i Dios? ¿Ne na tirutobʼeej rukʼaxariik i Dios, mi ne inatijej i korik chi riij?
