Xinasjik eh xinkʼihik pan jenaj yeʼaabʼ nebʼaaʼ ar Roma. Reʼ nukʼachariik xti kʼaxik naq. Maʼ jankʼal ta xnunabʼeej wach i nutuut eh maʼ jankʼal ta woʼ xnujil wiibʼ ruukʼ i wajaaw. Xinkʼihik pan bʼeeh eh inunimaj naq inkiqʼor taqeh wilkeebʼ ar.

Xnutoqʼaaʼ ileqʼ noq lajeebʼ haabʼ naq wilik weh eh kabʼlaj haabʼ naq wilik weh noq xinelik jeʼ pan paat. Kʼih pech xinooj risaj i wajaaw pan kiyeʼaabʼ taqeh policía. Kinikʼik naq qʼiij chi wolik ruukʼ taqeh kʼachareel eh qʼeʼ naq hin josqʼ. Noq kajlaj haabʼ naq wilik weh xinelik jeʼ pan nupaat chi jun pech. Kinkʼachariik naq pan bʼeeh eh inukoj naq taqeh droga. Noq inokik naq i aqʼabʼ i nuteh naq jenoʼ carro eh ar naq kinwirik ko insaqʼik, eh inusikʼ naq i haʼ ahaʼ wiiʼ ne nutzʼaj wiibʼ.

Til woʼ xnutijej ileqʼ chi korik. Inubʼan naq chuʼnchel: inwelqʼaaj naq i kibolso taqeh kʼachareel pan taq bʼeeh eh kinokik woʼ naq chi ileqʼ pan taq paat. Eh ruum chi reʼ i nunaʼojbʼal xnabʼjik xinkiyuqʼeej reh wihʼik chi kixilak taqeh jun tzuhbʼ maʼ holohik ta i kinaʼojbʼal. Ruum chi xnutijej chi korik i ileqʼ, xnutoqʼaaʼ ileqʼ pan taq banco. Reʼ nujosqʼiil xubʼan chi reʼ taqeh wuchʼihil ne inkiyeew nuloqʼil. Maʼ inukanaaʼ ta naq i nupuhbʼaal, chi riʼsil naq i nuchʼitnaah inwirik. Reʼ peletohinik, taqeh droga, reʼ ileqʼ, reʼ kʼoyomal eh reʼ taqeh maʼ holohik ta laj qʼorik xnutoqʼaaʼ nukʼachareem. Reʼ taqeh policía xa kinkitahqeej woʼ naq eh kʼih pech xinkikʼam jeʼ pan tzʼilom. Xinikʼik haabʼ pan bʼeeh eh pan tzʼilom.

Jun riim noq xinelik cho chi preexuhjik, xooj nuqʼoreej i wikaan. Reʼ hin maʼ wehtʼal ta naq chi reʼ reh eh kiʼibʼ reh taqeh wikaaq xiponik chi testigo reh Jehová. Reʼ keh xinkiqʼoreej pan jenaj moloj iibʼ eh xinooj, xa ilbʼal naq reh. Noq xojponik pan yeʼaabʼ reh moloj iibʼ xwaaj tzuhnik pan okbʼal reh rilariik ajwach inokik eh ajwach inelik. Wuchʼihil naq i nupuhbʼaal.

Reʼ moloj iibʼ reʼreʼ xujal i nukʼachariik. Inkʼulik pan nukʼux chi xnukapaaj: «¡Maʼ hin ta wihʼinaq pan jenoʼ yeʼaabʼ jeʼ rukabʼ i wilih!». Inwilow naq taqeh jeʼ kʼachareel seʼeel kiwach eh chaqʼlaam taqeh. Ko yuʼnaak wilik pan nukapebʼaal i chaqʼlamiil xkikʼuhtaj weh taqeh Testigo. ¡Reʼ taqeh testigo reh Jehová tokoom naq i kinaʼojbʼal chi kiwach taqeh inwuhchʼileej!

Xwaaj nutijem chi riij i Santo Laj Huuj kuukʼ taqeh Testigo. Ruukʼ naq i kʼahchiʼ wilom pan Santo Laj Huuj xnukoj rehtaal chi ko ruman naq chi nanujalam i nukʼachariik. Xnukoj pan nukʼachariik iruqʼor i Proverbios 13:​20, iruqʼor: «Ajwach i xutahqeej taqeh i holohik i kinaʼojbʼal naruwihiik runaʼojbʼal, eh ajwach i rutahqeej taqeh maʼ kinimanik ta naruqʼebʼem riibʼ». Jeʼ reʼ noq xnureq chi riij chi nanukanaam naq i wihʼik kuukʼ taqeh maʼ holohik ta i kinaʼojbʼal. Kʼaxik naq, xa reʼ laʼ ruukʼ i rutobʼal i Jehová xinelik korik.

Jeʼ woʼ, xnusaqbʼisaj wach i nutiʼjolal. Xnukowsaj wiibʼ eh xnukanaaʼ siikʼ eh xnukanaaʼ i droga. Xwehsaj i nusinchiiʼ, xnusetʼ i wismaal, xwehsaj taqeh i kabʼxikin eh xnukanaaʼ taqeh qʼorik maʼ holohik ta. Ko reʼ peet pech wikʼraam pan nukʼachariik chi ne irubʼan chi ne inuqʼil wiibʼ ruukʼ taqeh maʼ holohik ta laj bʼanooj eh naʼojbʼal.

Maʼ imponik ta naq chi nuwach iloj wach huuj eh tijinik, jeʼ reʼ noq xnukʼaxkileej i tijinik chi riij i Santo Laj Huuj. Chi qʼun qʼun xnutoqʼaaʼ rukʼaxariik i Jehová. Chi riij i reʼ xnuyotʼ nukʼux, maʼ suq ta naq inwikʼraaj wiibʼ eh inukapaaj naq chi reʼ Jehová maʼ jaruuj naq ne irukuy numahk. Chupaam taqeh i junkʼaam reʼreʼ, xwil chi riij nikʼwach i Jehová xukuy rumahk i reey David noq xmahkunik. Reʼreʼ iruchʼikaaʼ naq nukʼux (2 Samuel 11:1–12:13).

Kʼaxik woʼ naq chi weh ruqʼorariik i kʼuhbʼaal keh taqeh kʼachareel pan kipaat (Mateo 28:​19, 20). Ruum chi kinyoʼjik naq rureqariik jenoʼ kʼachareel xnubʼan i kʼaxkilal reh. Xponik i qʼiij xelik i nuyoʼjiik eh xnutoqʼaaʼ nusuqkileem i qʼorik ruukʼ taqeh kʼachareel chi riij i Qajaaw reʼ wilik cho pan taxaaj, reʼ inkuywik qamahk chi junelik.

Runabʼjiik wach i Jehová xukoʼleej i nukʼachariik. Chuʼnchel taqeh wamigo kamnaq chik taqeh oon pan preexuhjik wilkeebʼ. Yuʼnaak i hin suq chik nukʼux eh wilik jenaj wuyʼinik chi nuwach johtoq. Xnutijej chi maʼ na ta nunimbisam wiibʼ eh chi nanubʼirinik eh chi na nujalam i nunaʼojbʼal reh chi maʼ hin ta josqʼ. Intyoox reh i Jehová inukʼam wiibʼ chi korik kuukʼ taqeh wilkeebʼ chi nucheel. Hin kaxaro ruukʼ jenaj holohik laj ixoq rubʼihnaal Carmen. Qakabʼcheel inqatobʼeej taqeh qakaʼjaah runabʼjiik chajariik iruqʼor i Santo Laj Huuj.

Yuʼnaak korik chik wach i nubʼanooj. Kinkamanik pan taq banco xa nikʼ, maʼ reh ta chik ileqʼ reh laʼ chik rumesariik paam.