Re’ taqeh peet haabʼ reh i nukʼachariik xinwihʼik ma najt ta ruukʼ i tinamit Leipzig, pan najtir República Demócratica Alemana, maʼ najt ta ruukʼ i yeʼaabʼ Polonia eh ruukʼ i najtir República Checa. Noq wilik naq weh waqiibʼ haabʼ, xojʼooj chi kʼacharik ar Brasil ruum i rukamaj i wajaaw, chi riij i reʼ xojʼooj ar Ecuador.

Noq wilik naq weh 14 haabʼ, reʼ taqeh wajaaw xinkitaqʼaaj woʼ chik ar Alemania reh tijinik. Yuʼnaak najt naq chik wilkiin kuukʼ eh re’ hin na naq wilom chajariik nanubʼanam. Jeʼ reʼ noq, wutkeel naq eh maʼxta naq inwaaj reh mi re’ inub’an maʼ imponik ta naq chi kiwach i tokoom.

Reʼ taqeh wajaaw xiʼooj woʼ chik ar Alemania noq wilik naq weh 17 haabʼ. Peet xinwihʼik kuukʼ, xa reʼ laʼ ruum chi maʼ imponik ta naq chi nuwach chi ne inkiqʼor weh i nanubʼanam, kʼaxik naq chik chi weh runimjiik inkiqʼor weh. Ruum aj reʼ, noq 18 haabʼ naq chik wilik weh xinelik pan paat.

Maʼ inusuqkileej ta naq chik i nukʼachariik, jeʼ reʼ noq, xnutoqʼaaʼ rusikʼariik riij chajariik naq ne inub’an reh chi suq nuk’ux. Xnutz’ir riij i juʼjun chi molaabʼ eh xnureq chi riij chi reʼ nanub’anam re’ chi na naq nusuqkileem i irubʼehsaj i wach akʼal wilih noq ko majaaʼ irusach wach i winaq.

Xnuloqʼ jenaj numoto, xinelik rejeh ar Alemania eh xinooj ar África. Xa reʼ la, maʼ najt ta xikʼik noq xinooj woʼ chik ar Europa, ruum chi reʼ numoto xuyoj riibʼ. Noq nukorsam naq chik i numoto, xinooj pan jenaj playa ar Portugal. Ar xnukapaaj chi maʼ ne ta naq chik inkamanik weh i moto eh chi na naq wojiik chi bʼehik pan barco chi jun suut i akʼal.

Xwuchʼihleej juʼjun taqeh kʼijool reʼ kʼahchiʼ naq kitiqʼaam kiibʼ chi ojik nah palaw Atlántico. Chi kixilak wilik naq i Laurie reʼ naq rukahniik chi wehkʼeen. Xojponik pan las islas del Caribe eh chi riij i reʼ xojhiʼlik junkʼaam ar Puerto Rico eh xoj’ooj woʼ chik ar Europa. Reʼ Laurie eh re’ hin inqaaj naq qareqem jenaj barco reh kʼacharik chupaam. Xa reʼ la, noq ixibʼ naq poh inqakʼam chi rusikʼariik, xqakanaaʼ ruum chi reʼ taqeh soldado alemán xinkichop reh ojik pan qʼaqʼinik.

Xinwihʼik jenaj haabʼ ruukʼ ixibʼ poh chi soldado eh chuwach taqeh qʼiij reʼreʼ xqabʼan kaxaro. Maʼ inqaaj ta naq qakanaam i qakʼachariik nah haʼ. Noq ko majaaʼ naq kinkichop reh ojik pan qʼaqʼinik, xqaloqʼ jenaj lancha, eh noq wilkiin naq pan ejército xqakorsaj chi barco. Inqaaj chi na naq qakʼachariik chupaam reh bʼehik chi jun suut i akʼal. Noq xinelik cho pan ejército, ko majaaʼ naq inukohlaaj rukorsjiik i barco, xa reʼ laʼ, reʼ taqeh testigo reh Jehová xiqoʼrik quukʼ eh xqatikʼaaʼ tijinik chi riij i Santo Laj Huuj kuuk’.

Peet xnukapaaj chi maʼ na ta naq nujalam i nukʼachariik: hin naq kaxaro ruukʼ jenaj ixoq ruuk’ i inwaaj naq k’acharik eh nukanaam naq chik i bʼanaj siikʼ (Efesios 5:5). Eh inukapaaj naq chi reʼ bʼehik chi jun suut i akʼal reh rilariik i rutzʼuhkrisam i Dios, reʼ naq i reʼ i ruwiiʼ i nukʼachariik.

Xa reʼ laʼ, ko wilik naq taqeh jalooj nanubʼanam, jeʼ rukabʼ i nunaʼojbʼal. Ko inunimbʼisaj naq wiibʼ eh maʼ imponik ta naq chi nuwach chi ne inkiqʼor weh i na naq nubʼanam, eh imponik woʼ naq chi nuwach qʼorik chi riij i inchol nub’anam. Xa reʼ naq i inwaaj i hin inusik’.

Jenaj pech, xwil wach i kʼuhbʼaal xuyeew i Jesús nah yuuqʼ (Mateo, capítulo 5 ko 7). Peet xsahchik nukʼux ruukʼ i xuqʼor i Jesús chi riij i suqkiil kʼuxliis. Jenaj ehtalil, xuqʼor chi reʼ suqkiil kʼuxliis keh naq taqeh kinuhmik (kikʼahrik) eh i chiqiij kichiiʼ (Mateo 5:6). Xa reʼ laʼ, maʼ inureq ta naq chi riij nikʼwach jenoʼ inuhmik (inkʼahrik) eh chiqiij i chiiʼ suq rukʼux. Noq kʼahchiʼ naq nutijem wiibʼ chi riij i Santo Laj Huuj xnukoj rehtaal chi ko ruman naq chi qeh runabʼjiik wach i Dios, eh reh chi ne inqab’an i wilih ko ruman naq chi ne inqakoj rehtaal chi ko ruman i Dios pan qak’achariik. Jeʼ rukabʼ xuqʼor i Jesús: «Suq kik’ux taqeh inkikoj rehtaal chi aajwaal wach chi keh runab’jiik wach i Dios» (Mateo 5:3, TNM).

Reʼ Laurie eh re’ hin xqatikʼaaʼ tijinik chi riij i Santo Laj Huuj ar Alemania, xa reʼ laʼ, xojʼooj kʼacharoq ar Francia eh chi riij i reʼ ar Italia. Imponik naq chi nuwach chi re’ taqeh testigo reh Jehová pan chu’nchel taqeh ye’aab’ aha’ wilkeeb’ wii’, inkik’uhtaaj naq i kʼaxooj chi kiwach eh pan jenaj naq wach kʼuxliis wilkeebʼ. Xwil chi reʼ keh jenaj familia chi jun suut i akʼal (Juan 13:​34, 35). Chi riij i reʼ, xqaqahsaj qahaaʼ.

Atoobʼ ta hin naq chik testigo reh Jehová, ko ajwaal naq wach chi ne inujal i nunaʼojbʼal. Reʼ Laurie eh i hin xqachih naq chik bʼehik nah haʼ pan chuʼnchel i costa reh África eh ikʼik nah palaw Atlántico reh ponik ar Estados Unidos. Pan yejaal i palaw, chi qutkeel ruchʼihiil i wehkʼeen pan jenaj kʼisa barco, eh hoj sutimaj ruukʼ i runimaal wach palaw, xnukoj rehtaal chi hoj qʼeʼ kʼisiin chuwach i nimlaj Ajzʼuhkrisaneel. Kʼih naq i nuqʼiij wilik (nah haʼ mʼa k’ih ta naq i nukamaj), jeʼ reʼ noq, xnutoqʼaaʼ rilariik paam i Santo Laj Huuj. Kinokik naq chi kapebʼinik chi riij i rukʼachariik i Jesús. Atoobʼ ta maʼ ajmahk ta naq eh wilik naq taqeh ruholohik laj naʼojbʼal, maʼ jankʼal ta xunimbʼisaj riibʼ. Reʼ i ko ruman naq pan rukʼachariik reʼ naq i Rajaaw.

Noq xnukapaaj chi riij i rehtalil i Jesús, xnukoj rehtaal chi na naq nukojom i nuqʼiij reh qʼorik chi riij i runimaal Rajaawriik i Dios eh chi reʼ naq i reʼ i ko ruman pan nukʼachariik (Mateo 6:33). Noq xojponik ar Estados Unidos xqakanaaʼ chi jun pech i bʼehik pan barco eh xqakoj qakʼux chi kamanik chuwach i Dios.

Najtir, noq xa inukapaaj naq chi wiij i hin, maʼ inukoj ta naq nukux ruukʼ taqeh inuchih pan nukʼachariik. Yuʼnaak xnureq i naʼojbal reʼ maʼ insahchik ta wach (Isaías 48:​17, 18). Eh xnureq i rusuqkiil i nukʼachariik, reʼ ruloq’jiik i Dios eh rutobʼjiik taqeh kʼachareel reh chi ne inkinabʼeej wach.

Reʼ nukaxarohiil ruukʼ i Laurie qʼeʼ holohik ruum taqeh i naʼojbal inqareq pan Santo Laj Huuj. Jeʼ woʼ, reʼ Jehová xojrukuxisaj ruukʼ jenaj qixqʼuun runabʼeem wach i Jehová eh irukʼax.

Pan qakʼachariik wihʼinaq qakʼaxkilaal, xa reʼ laʼ, reʼ Jehová maʼ jaruuj hoj rukanaam eh chʼiklik qakʼux chi ma’ na ta qaqʼuhtiik eh junelik naqakojom qakʼux ruukʼ (Proverbios 3:​5, 6).