Xinkʼihik chi chiiʼ i tinamit Los Ángeles (California, ar Estados Unidos), re’ tinamit wilih ehtʼalimaj wach ruum chi ar inb’aan i kʼay droga eh wilik wo’ k’ih taqeh i k’achareel yiib’ wach i kina’ojb’al i kipatinik pan b’eeh. Hoj waqiibʼ chi halakʼun, re’ hin i rukab’.

Noq ko hin naq kʼisiin, reʼ i nutuut kirukʼam naq pan jenaj iglesia. Xa reʼ laʼ, noq hin naq chik kʼijool, reʼ inubʼiraj naq ar xa re’ yu’ naq insahchik pan nuk’ux. Pan taq domingo kintzʼuyinik naq pan iglesia, xa reʼ laʼ pan rukuxiik i xamaano kinooj naq pan ninqʼiij, inub’an naq i droga eh inubʼan woʼ naq i kʼoyomal.

Xti qʼeʼ naq hin josqʼ eh xa ajwach aj uuk’ naq inutoq’aaʼ peletohinik. Inuqʼoj naq taqeh ruukʼ xa paʼ jariik naq inureq reh chi ne kinelik korik pan peletohinik. Reʼ xnutijej pan iglesia maʼ xirutobʼeej ta, ma xkamanik ta weh. Inuqʼor naq, «Reʼ inye’wik jilow, reʼ Qajaaw, reʼ hin xa kʼahchiʼ kiin chi kamanik ruukʼ». Pan rukuxiik taqeh haabʼ 60, noq kʼisiin naq chik maʼ inukohlaaj i wahxaqlaj haabʼ, xnukʼax wach i kinaʼojbʼal taqeh i wilkeeb’ pan tzuhbʼ Panteras Negras i rub’ihnaal, re’ tzuhb’ wilih ehtʼalimaj kiwach chi suq keh i peletohinik reh kitobʼjik taqeh i kʼachareel. Xinokik chi kixilak jun tzuhb’ chi ajtijineel inkitoob’eej naq i tzuhb’ wilih. Kʼih pech xqakorsaj wach i wolik eh ruum i wilih wilik pech inkitz’ap naq i escuela.

Reʼ wilih maʼ manlik ta naq chi weh i hin. Chi jumehqʼiil reʼ ixowanik xirukʼam chi rubʼanariik i maʼ holohik ta. Wilik pech qoj-oj naq pan cine ruchʼihil taqeh wamigo reh rilariik taqeh película chi riij nikʼwach noq yeʼooj taqeh pan kowlaj kamanik taqeh aj África ar Estados Unidos. Maʼ suq ta xqikʼraaj qiibʼ ruukʼ i maʼ korik ta wach bʼanooj wilih, eh xqaqʼojibʼeej taqeh kʼijool saq i kitibʼkaal reʼ wilkeebʼ naq pan cine. Eh inooj naq qasikʼ taqeh saq, reh rusak’ariik taqeh.

Chupaam taqeh qʼiij reʼreʼ, ehtʼalimaj naq chik chi re’ hin ruchʼihil taqeh i nuchaaqʼ maʼ holohik ta naq i qanaʼojbʼal eh wilik naq qakʼaxkilaal kuukʼ taqeh ajqʼatal qʼorik. Jenaj keh i nuchaaqʼ wilik naq chi kixilak jenaj tzuhb’ chi k’achareel reʼ ehtʼalimaj kiwach chi maʼ holohik ta i kinaʼojbʼal, eh reʼ hin kinwihʼik wo’ naq kuukʼ. Maʼ holohik ta naq i nukʼachariik.

Reʼ taqeh rajaaw jenaj wamigo testigo reh Jehová naq taqeh eh xinkiqʼo’reej pan kimoloj iibʼ. Noq xinponik xnukoj rehtaal chi reʼ taqeh kʼachareel tokoom naq i kina’ojb’al. Chuʼnchel wilik naq jenaj kiSanto Laj Huuj eh inkil naq wach. Eh reʼ i ko kʼijool taqeh inkibʼan naq i yeʼej kʼuhbʼaal. Xusach nukʼux runabʼjiik chi reʼ rubʼihnaal i Dios, Jehová, eh chi chu’nchel naq i wilkeeb’ ar inkikoj noq kiqʼorik naq chi riij (Salmo 83:18). Atoobʼ ta wilkeebʼ naq i kʼachareel reh reh wach kitinamitaal, inkʼutinik naq chi maʼ tokoom ta naq rilariik kiibʼ inkibʼan.

Peet, maʼ inwaaj ta naq tijinik chi riij i Santo Laj Huuj, xa reʼ laʼ imponik naq chi nuwach ojik pan taq moloj iibʼ. Pan jenaj aqʼabʼ, noq wilkiin naq pan moloj iibʼ, juʼjun reh taqeh wamigo xiʼooj pan jenaj ninqʼiij eh xkiqʼojibʼeej eh xkikansaj jenaj k’ijool, ruum chi inkaaj naq kileq’aam i ruchaqueta. Jeʼ na chik iqal kʼahchiʼ naq chik kiqʼoriik chi riij i xkibʼan. Eh pan qʼatbʼal qʼorik, ko kʼahchiʼ woʼ naq keebʼ chi qʼorik chi riij i wilih. Eh chi kunchelaal xikahnik prexo chi jumpech. Qʼeʼ xsuqbʼik nukʼux chi maʼ xinooj ta chi kiij. Ruum aj reʼ, xwaaj nujalam i nukʼachariik eh xnutoqʼaaʼ tijinik chi riij i Santo Laj Huuj.

Reʼ hin tokoom naq rilariik taqeh kʼachareel inubʼan, juʼjun taqeh bʼanooj xwil chi kixilak taqeh testigo reh Jehová xusach nukʼux. Jenaj ehtalil, re’ chi, noq jenaj testigo reh Jehová saq i rutiʼjolal xooj chi bʼehik chi najt, xukanaaʼ taqeh ruhalakʼun ruukʼ jenaj familia qʼeq i kitiʼjolal. Eh jeʼ woʼ jenaj familia saq kiwach, xkimol jenaj kʼijool qʼeq i rutib’kal, eh xkiyeew reh aha’ narupatiniik. Reʼ wilih xubʼan chi ne inukoj rehtaal chi reʼ taqeh testigo reh Jehová inkibʼan i xuq’or i Jesús pan Juan 13:35: «Eh wilaʼ kʼul taq xakʼax awiibʼ chawach, chuʼnchel i tinamit naa kikojom rehtaal chi hat taq waj tahqaneel, inki Jesús». Xnureq chi riij chi xnureq taqeh i manlik hermano.

Ruukʼ i tijinik chi riij i Santo Laj Huuj xnuk’ul, xnureq chi riij chi na naq nujalam i nunaʼojbʼal. Xnukowej nukʼux reh rukʼuhtjiik i tuqkilal pan nukʼachariik eh xnuyeew nuk’ux reh chi re’ na’ojb’al wilih ne inwih’ik pan wanima (Romanos 12:2). Chi qʼun qʼun xnujal i nunaʼojbʼal, eh pan enero reh 1974 xnuqahsaj nuhaaʼ eh xinponik chi hin testigo reh Jehová.

Noq nuqahsam chik nuhaaʼ, wilik naq i ko na nujalam pan nukʼachariik. Jenaj ehtalil, jenaj qʼiij wilkooj naq ponoq chi qʼoroj kʼuhbʼaal chi’ taq paat eh xwilow chi jenaj aj’ileqʼ xukʼam jeh i radio reh i nucarro. Xinooj wajimam wiib’ chi riij. Eh noq kʼisiin naq chik maʼ inuchop, xukut i nuradio wach akʼal eh xooj rajim. Eh noq xnukʼutjaaj keh taqeh i wuchʼihil nikʼwach xnureq woʼ chik i nuradio, jenaj ajnimaneel wilik runaʼojbʼal xuqʼor weh, «Stephen, ¿Chajariik naq xabʼan wi ta naq xachop?». Reʼ pahqanik wilih xubʼan chi ne inureq chi riij chi ko wilik naq wuukʼ i maʼ holohik ta laj naʼojbʼal.

Pan octubre reh 1974, xnutoqʼaaʼ nuyeʼem i nuqʼiij reh i qʼoroj kʼuhbʼaal. Inwik’saj naq 100 hora chuwach i poh chi ruk’uhtjiik chi riij i Santo Laj Huuj keh taqeh kʼachareel. Chi riij i reʼ xinkiqʼo’reej chi kamanik pan kiyeʼaabʼ taqeh testigo reh Jehová, ar Brooklyn (Nueva York). Pan 1978 xinooj woʼ chik ar Los Ángeles reh rucha’jaljiik i nutuut, re’ i yowaabʼ naq. Kiʼibʼ haabʼ xik’ik, eh xnubʼan kaxaro ruukʼ i Aarhonda. Reʼ reh xirutoob’eej chi rucha’jaljiik i nutuut ko rehtaal xkimik. Eh chi riij i reʼ, xojkiqʼoreej chi tijinik pan Escuela Bíblica reh Galaad reh i Watchtower. Eh noq xkuxik i tijinik wilih, xojkitaqʼaaj chi misionero ar Panamá, aha wiiʼ wilkooj yuʼnaak.

Noq xnuqahsaj nuhaaʼ, wilik pech xnukʼaxkileej ruqʼilariik i nujosqʼiil. Eh reʼ inubʼan naq, re’ chi kinelik reh chi maʼ ne ta inubʼan i peleeto oon inusikʼ riij nik’wach maʼ ne ta inub’an i wolik. Re’ wehkʼeen eh re’ taqeh k’achareel inkiyeew rusuqkiil nukʼux ruukʼ i jalooj xnubʼan, eh jeʼ woʼ hin irusach nukʼux i wilih. Chuʼnchel taqeh jalooj wilih maʼ reʼ ta wuum i hin. Weht’al chi reʼ Santo Laj Huuj wilik rajaawriik reh rujalariik wach i kikʼachariik taqeh kʼachareel (Hebreos 4:​12).

Reʼ Santo Laj Huuj xuyeew rusuqkiil i nukʼachariik eh xukʼuhtaaj weh i wihʼik pan tuqkilal. Maʼ ajwach ta chik aj uukʼ inubʼan peleeto, inutobʼeej laʼ chik taqeh kʼachareel reh runabʼjiik wach i Dios. Eh xnuyeew rutijiniik chi riij i Santo Laj Huuj jenaj i inwixowaj naq wach najtir, noq k’ahchi’ naq kiin chi tijinik pan escuela eh ma’ holohik ta naq i nunaʼojbʼal. Noq ruqahsam chik ruhaaʼ xojpatinik pan jenaj chi paat eh ko hoj manlik amigo yuʼnaak. Reʼ wehkʼeen eh re’ hin qatoob’eem ikʼinaq chi 80 chi kʼachareel reh chi ne kiponik chi testigo reh Jehová.

Xti qʼeʼ inutyoxeej reh i Jehová chi xuyeew jenaj nukʼachariik aha’ wii’ suq nuk’ux chik, chi wilik ruwiiʼ i nuk’achariik eh chi wilkiin chi kixilak taqeh i manlik hermano.