Ruum chi reʼ Santo Laj Huuj maʼ xsahchik ta wach, reʼ hat ne inwihʼik jenoʼ aweh eh ne inawil wach. Noq reʼ hat ne inachih jenoʼ aSanto Laj Huuj, chʼiklik oq akʼux chi kʼahchiʼ awilom wach jenaj copia manlik wach reh taqeh tzʼihbʼ reh najtir. a Atoobʼ ta xtzʼihbʼjik chuwach taqeh kamambʼal maʼ najt ta inkikuy, xikʼik pan ixowanik eh xkaaj kikʼatam eh xkaaj naq kijalam wach i naʼojbʼal wilik chupaam, ¿chaaj woʼ reet maʼ xsahchik ta wach i Santo Laj Huuj? ¿Chaaj woʼ reet qʼeʼ looqʼ i huuj wilih?

Kʼih taqeh ajtijineel reh i Santo Laj Huuj inkiqʼor woʼ i xuqʼor i apóstol Pablo noq xutzʼihbʼaaj: «Chuʼnchel i tzʼihbʼamaj pan santo laj huuj reʼ i Dios xyeʼwik chaloq ruukʼ i Ruxlabʼal» (2 Timoteo 3:16). Inkikapaaj chi reʼ Santo Laj Huuj maʼ xsahchik ta wach ruum chi reʼreʼ i ruqʼorbʼal i Dios eh xubʼan chi ko wilik quukʼ pan qaqʼijil. Reʼ Faizal, reʼ xojqʼorik chi riij pan peet wilik naq taqeh iraaj runabʼeem eh ruum aj reʼ xraaj rutzʼirim riij i Santo Laj Huuj. Sahchik rukʼux ruukʼ i xutijej ruum chi maʼ najt ta xikʼik xukoj rehtaal chi chuʼnchel taqeh irukʼuhtaaj i iglesia maʼ irukʼam ta riibʼ ruukʼ irukʼuhtaaj i Santo Laj Huuj. Reʼ xponik chuwach runabʼjiik reʼ chi reʼ Dios narubʼanam chi reʼ wach akʼal chi xa holohik chik jeʼ rukabʼ iruqʼor pan ruqʼorbʼal.

Reʼ Faizal xuqʼor: «Chʼiklik nukʼux chi reʼ Santo Laj Huuj reʼ wilik pan nuqʼabʼ jenaj kooch inchalik ruukʼ i Dios. Wilaʼ reʼ Dios xutzʼuhkrisaj i taxaaj akʼal ¿maʼ ne ta naq inqaqʼor chi wilik rajaawriik reh ruyeʼariik qeh i ruqʼorbʼal eh rukoʼljiik chi qeh i hoj? Mi xqaqʼor chi maʼ reʼ ta ruqʼorbʼal i Dios iraaj ruqʼorom chi maʼ inqakoj ta wach chi wilik rajaawriik, ¿ajnuwach i hin chi maʼ ne ta inukoj wach chi reʼ Dios wilik rajaawriik?» (Isaías 40:8).