REʼ I NAʼAWILOM | ¿CHAAJ WOʼ REET MAʼ XSAHCHIK TA WACH I SANTO LAJ HUUJ?
Reʼ Santo Laj Huuj ma’ xsahchik ta wach atoob’ ta re’ xtz’ihb’jik wii’ ma’ najt ta inkikuy
REʼ K’AXKILAL XIK’IK WII’. Reʼ taqeh ajtzʼihbʼ reh i Santo Laj Huuj xkibʼan i tzʼihbʼ chuwach i papiro eh chuwach i pergamino (2 Timoteo 4:13). a ¿Chaaj woʼ reet ne inqaqʼor chi reʼ taqeh kamambʼal wilih xkikoj pan yohbʼaal i Santo Laj Huuj?
Reʼ papiro inxih, inelik rukolor eh irubʼan chi maʼ piim ta chik. Reʼ taqeh inkitzʼir riij xkʼuljik pan najtir Egipto reʼ Richard Parkinson eh i Stephen Quirke xkiqʼor: «Noq inikʼik taqeh qʼiij jenaj pehr chi huuj inxerebʼik eh inooj kuxoq chi pooq. Noq bʼotlik wach i huuj ne inmoohrik wach eh ne inqʼahik ruum i jotʼik. Noq muqlik pan akʼal ne inkʼuxarik ruum taqeh kokʼ saaʼ haah jeʼ rukabʼ taqeh saq sinik». Noq xreqarik taqeh najtir tzʼihbʼ reh i Santo Laj Huuj reʼ tzʼihbʼamaj wach papiro, xiwihʼik wach saqum eh pan jotʼik eh reʼreʼ xubʼan chi xareʼyuʼ xkijotʼ kiibʼ.
Reʼ pergamino najt irukuy chuwach i papiro, xa reʼ laʼ ne woʼ inyoj mi maʼ xkil chi korik oon mi xkiyeew wach qʼiij oon wach jotʼik. b Eh inkʼuxarik woʼ ruum taqeh kokʼ chikop. Ruum aj reʼ, reʼ huuj Everyday Writing in the Graeco-Roman East (Reʼ tzʼihbʼ inkojarik pan taqeh tinamit wilkeebʼ pan rokbʼal qʼiij reh Grecia eh Roma) iruqʼor chi riij taqeh najtir tzʼihbʼ: «maʼ chuʼnchel ta taqeh huuj inkikuy eh ruum aj reʼ xa juʼjun wilik quukʼ yuʼnaak». Wiʼ xsahchik ta naq wach i Santo Laj Huuj sahchik woʼ naq wach taqeh rukʼuhbʼaal.
NIKʼWACH NOQ MAʼ XSAHCHIK TA WACH I SANTO LAJ HUUJ. Reʼ kʼuhbʼaal xyeʼarik keh taqeh israelita irutaqʼaaʼ naq chi chuʼnchel taqeh reey reh i Israel ne naq inkitzʼihbʼaaj woʼ chik i tzʼihbʼamaj naq chik reh i kʼuhbʼaal reʼ taqeh peet hoʼoobʼ chi huuj reh i Santo Laj Huuj (Deuteronomio 17:18). Eh reʼ taqeh manlik ajtzʼihbʼ kʼih naq chik taqeh tzʼihbʼ xkibʼan pan rukuxiik i peet siglo eh ruum aj reʼ inreqarik naq taqeh tzʼihbʼ reh i ruqʼorbʼal i Dios chupaam taqeh sinagoga pan chuʼnchel i Israel eh jeʼ woʼ ar Macedonia (Lucas 4:16, 17; Hechos 17:11). ¿Nikʼwach xubʼan chi ko xkʼuloq ayuʼ juʼjun reh taqeh najtir tzʼihbʼ reh i Santo Laj Huuj?
Reʼ taqeh najtir tzʼihbʼ reʼ ehtʼalimaj kiwach chi Rollo reh i Mar Muerto maʼ xsahchik ta kiwach atoobʼ ta xikʼik kʼih taqeh haabʼ, ruum chi wilkeebʼ naq chupaam taqeh akʼal ikom. Reʼ wilkeebʼ chupaam taqeh abʼaj pan jenaj yeʼaabʼ ahaʼ wiiʼ tzʼaʼ i qʼiij.
«Ehtʼalimaj naq chi reʼ taqeh judío inkikoj naq taqeh rollo reh i ruqʼorbʼal i Dios chupaam taqeh akʼal xun reh chi najt ne inkikuy», jeʼ reʼ iruqʼor i rutzʼir riij i akʼ kʼuhbʼaal Philip Comfort. Eh reʼ taqeh ajnimaneel jeʼ woʼ chik reʼ xkibʼan eh ruum aj reʼ juʼjun taqeh tzʼihbʼ reh i Santo Laj Huuj kireqarik chupaam taqeh akʼal xun, taqeh paat ahaʼ wiiʼ maʼxta saqum, taqeh paat abʼaj eh jeʼ woʼ taqeh yeʼaabʼ ahaʼ wiiʼ tzʼaʼ i qʼiij.
REʼ XKʼULJIK. Xti kʼih taqeh ruqohx i tzʼihbʼ reh i Santo Laj Huuj maʼ xsahchik ta kiwach eh ko wilkeebʼ pan qaqʼijil eh juʼjun keh ikʼinaq chik kiʼibʼ mil haabʼ tzʼihbʼamaj. Maʼxta jenoʼ najtir tzʼihbʼ xti kʼih xtzʼihbʼjik reh, chuwach i Santo Laj Huuj.
a Reʼ papiro reʼ xkibʼan wiiʼ i tzʼihbʼ, jenaj rooq chʼahn papiro rubʼihnaal inkʼihik pan haʼ. Reʼ pergamino korsamaj ruukʼ taqeh riij chikop.
b Reʼ Acta reh i Independencia reh i Estados Unidos xtzʼihbʼjik wach pergamino, ikʼinaq chik 250 haabʼ chi reʼ xtzʼihbʼjik wach pergamino xujux chik riibʼ eh maʼ inilarik ta chik chajariik i tzʼihbʼamaj.
