Reʼ Santo Laj Huuj maʼ jenaj ta wach ruukʼ taqeh i tokoom chik huuj reʼ inkikoj i maʼ manlik ta nimanik. Atoobʼ ta ikʼinaq chik kʼih haabʼ, kʼihaal chi kʼachareel inkikoj wach iruqʼor i Santo Laj Huuj. Maʼxta chik jenaj huuj jeʼ rukabʼ i Santo Laj Huuj kitzʼirim riij chi manlik eh kichukum qʼorik chi riij.

Juʼjun taqeh inkitzʼir riij i Santo Laj Huuj maʼ inkikoj ta kikʼux chi reʼ tzʼihbʼamaj pan Santo Laj Huuj yuʼnaak jeʼ rukabʼ i tzʼihbʼamaj cho najtir. Jenaj irutzʼir riij taqeh i nimanik xuqʼor: «Maʼ chʼikʼlik ta qakʼux chi xtzʼihbʼjik chi korik taqeh tzʼihbʼ reh najtir». Eh chi riij i reʼ xuqʼor: «Reʼ taqeh xitzʼihbʼjik woʼ chik maʼ manlik ta kiwach. Kʼisiin maʼ chuʼnchel taqeh i tzʼihbʼ reʼreʼ xitzʼihbʼjik noq ikʼinaq chik kʼih taqeh haabʼ eh inkʼutinik chi kʼih taqeh xjaljik chupaam».

Juʼjun taqeh kʼachareel maʼ inkikoj ta kikʼux chi reʼ Santo Laj Huuj manlik wach ruum i kinimaniik. Jeʼ rukabʼ i Faizal, xkʼihik pan jenaj familia tokoom i kinimanik. Xkikʼuhtaaj reh chi reʼ Santo Laj Huuj jenaj huuj looqʼ eh xkiqʼor woʼ reh chi reʼ i tzʼihbʼamaj chupaam maʼ manlik ta chik wach. Reʼ Faizal iruqʼor: «Ruum aj reʼ maʼ inukoj ta naq chik nukʼux chi kiij taqeh i kʼachareel reʼ inkaaj naq kiqʼorom weh chi riij i Santo Laj Huuj eh jeʼ woʼ maʼxta naq chik kuukʼ i Santo Laj Huuj xtzʼihbʼjik cho najtir. Xjaljik naq chik wach».

Xa reʼ laʼ, ¿ko ruman na chi qeh runabʼjiik mi reʼ Santo Laj Huuj xjaljik wach? Chakapaaj chi riij i wilih: pan Santo Laj Huuj wilik taqeh holohik irubʼehsaj qeh i Dios reh i kʼacharik chalik reh chi qawach. Mi maʼ inakoj akʼux chi reʼ i qʼorooj cho rubʼiral reʼreʼ wilkeebʼ chupaam i tzʼihbʼ reh najtir, ¿mi ne naq inakoj akʼux ruukʼ taqeh i rubʼehsaj qeh i Dios? (Romanos 15:4). Mi reʼ taqeh i Santo Laj Huuj reh i qaqʼijil maʼ manlik ta wach, ¿mi ne naq inakoj taqeh i naʼojbʼal inatijej chupaam reh ruchihariik i aajwaal wach jeʼ rukabʼ akamaj, afamilia oon aloqʼinik ruukʼ i Dios?

Atoobʼ ta reʼ xtzʼihbʼjik cho najtir reh i Santo Laj Huuj wilik xsahchik kiwach, ne irubʼan chi ne inqil reʼ xtzʼihbʼjik woʼ chik reh i najtir. Jeʼ rukabʼ taqeh i reʼ ne inqareq kʼihaal chi tzʼihbʼ, reʼ Santo Laj Huuj xtzʼihbʼjik chuwach taqeh kamambʼal reʼ maʼ najt ta inkikuy, xikʼik pan ixowanik eh xkaaj woʼ naq kijalam wach i tzʼihbʼamaj chupaam. Xa reʼ laʼ, ¿chaaj woʼ reet maʼ xsahchik ta wach? ¿chaaj woʼ reet runabʼjiik i wilih ne tirutobʼeej reh chi ne inakoj akʼux ruukʼ taqeh i Santo Laj Huuj reh i qaqʼijil? Chatzʼir riij taqeh pahqanik wilih pan jenaj chik.