Reʼ Santo Laj Huuj maʼ jenaj ta wach ruukʼ taqeh tokoom huuj. Ar inqareq taqeh runaʼojbʼal i Qajtzʼuhkrisaneel (2 Timoteo 3:​16). Reʼ rukʼuhbʼaal ne tirutobʼeej. Ruum aj reʼ, reʼ Santo Laj Huuj iruqʼor: «Reʼ ruqʼorbʼal i Dios kʼachlik, wilik rajaawriik» (Hebreos 4:12). Reʼ huuj wilih ne tirutobʼeej ruum chi ne iruyeew anaʼojbʼal pan akʼachariik eh ne tirutobʼeej runabʼjiik wach i Dios eh taqeh rubʼehsaj (1 Timoteo 4:8; Santiago 4:8).

Iruyeew naʼojbʼal reh i qakʼachariik iqal iqal. Reʼ Santo Laj Huuj iruyeew qeh naʼojbʼal chi qajuʼjunaal. Qojrutobʼeej ruukʼ taqeh wilih:

• Nikʼwach inqakʼam qiibʼ kuukʼ taqeh junchʼuq (Efesios 4:​31, 32; 5:​22, 25, 28, 33).

• Reʼ chi hoj kow pan qakapebʼaal eh pan qatibʼkaal (Salmo 37:8; Proverbios 17:22).

• Reʼ taqeh holohik naʼojbʼal (1 Corintios 6:​9, 10).

• Chi riij i kamanik eh i tumiin (Proverbios 10:4; 28:19; Efesios 4:​28). a

Jenaj kaxaro reh Asia xrilow chi holohik taqeh naʼojbʼal iruyeew i Santo Laj Huuj. Jeʼ rukabʼ taqeh i koreʼ xkibʼan i kaxaro, xkikʼaxkileej i wihʼik pan kabʼchel eh jeʼ woʼ i kʼutaaj chi kiwach. Xkitoqʼaaʼ kikojom pan kikʼachariik reʼ inkil pan Santo Laj Huuj. ¿Nikʼwach xiʼelik? Reʼ Vicent, reʼ bʼahilbʼees, iruqʼor: «Reʼ xwilow pan Santo Laj Huuj hin rutobʼeem reh rikʼsjiik taqeh kʼaxkilaal ruukʼ kʼaxooj pan nukaxarohiil. Rukojariik pan qakʼachariik taqeh naʼojbʼal reʼreʼ iruyeew rusuqkiil qakʼux». Reʼ i rehkʼeen Annalou iruqʼor: «Rilariik taqeh ehtalil wilik pan Santo Laj Huuj xojrutobʼeej. Yuʼnaak suq chik pan nukʼux pan nukaxaro eh suq woʼ nukʼux ruukʼ taqeh inqaaj qabʼanam qakabʼcheel».

Intoobinik reh runabʼjiik wach i Dios. Reʼ Vicent iruqʼor woʼ: «Intyoox reh i nutijinik chi riij i Santo Laj Huuj maʼ najt ta chik inwikʼraaj wiibʼ chi rucheel i Jehová». Reʼ xuqʼor wilih xti ko ruman ruum chi reʼ Santo Laj Huuj ne woʼ tirutobʼeej i hat reh runabʼjiik wach i Dios. Ruukʼ rubʼanariik maʼ xa ta ne inareq i ratobʼil i naʼojbʼal iruyeew ne laʼ woʼ irubʼan chi ne imponik chawamigo. Eh ne woʼ inareq pan ruqʼorbʼal chi naruyeem jenaj qakʼachariik holohik ahaʼ wiiʼ naqasuqkileem i holohik laj kʼacharik (1 Timoteo 6:​19). Maʼ jenoʼ ta chik huuj ne irubʼehsaj aweh i reʼ.

Mi xatoqʼaaʼ rilariik paam i Santo Laj Huuj eh mi maʼ xatqʼuhtik ta, narusuqbʼiik akʼachariik eh ne inanabʼeej wach chi korik i Dios. Xa reʼ laʼ, mareh ne inwihʼik kʼih apahqanik noq ne inawil wach. Mi xakʼul i reʼ, chakapaaj chi riij i winaq aj Etiopía reʼ wihʼinaq cho kiʼibʼ mil haabʼ yuʼnaak. Reʼ winaq wilih kʼih naq taqeh rupahkaniik chi riij i ruqʼorbʼal i Dios. Reʼ Felipe, reʼ rajtahqaneel i Jesús xupahqaaj reh mi irureq naq chi riij i kʼahchiʼ rilom wach. Reʼ reh xuqʼor: «¿Nikʼwach noq ne inureq chi riij, wilaʼ maʼ ajwach ta ne iruqʼor rubʼehel weh?». b Chi riij i reʼ xukanaaʼ chi reʼ Felipe, jenaj manlik ajkʼuhtaneel xuchʼobʼ rubʼehel reh (Hechos 8:​30, 31, 34). Wilaʼ reʼ hat inawaaj areqem chi riij iruqʼor i Santo Laj Huuj inkaqoweej akʼux chi ne inanuqsaj paam i huuj wilik pan qayeʼaabʼ reh Internet jw.org oon chatzʼihbʼaaj chupaam i yeʼaabʼ reʼ maʼ najt ta awuukʼ reʼ inkan pan huuj wilih. Jeʼ woʼ ne irubʼan chi ne inaqʼoreej taqeh testigo reh Jehová reʼ wilkeebʼ maʼ najt ta awuukʼ oon ne tiponik pan jenoʼ yeʼaabʼ reh moloj iibʼ. Inqayeew rukowiil akʼux chi ne inwihʼik jenoʼ aSanto Laj Huuj yuʼnaak eh chakanaaʼ chi reʼ wilih ne irusuqbʼisaj akʼachariik.