REʼ NAʼOJBʼAL REH I PEET PÁGINA | CHASUQKILEEJ RILARIIK WACH I SANTO LAJ HUUJ
¿Ahaʼ ne inutoqʼaaʼ?
¿Nikʼwach ne nasuqkileej rilariik wach i Santo Laj Huuj eh chi wilik i ne natijej? Chanabʼeej hoʼoobʼ ruwiiʼ reʼ intoobinik keh taqeh ilool wach huuj.
Chasikʼ jenoʼ ayeʼaabʼ chi korik. Jenoʼ yeʼaabʼ ahaʼ wiiʼ maʼxta choqik ahaʼ wiiʼ saqum eh inokik i teew. Jeʼ reʼ ne inawil wach eh ne inkahnik pan akʼux chajariik i xawil pan Santo Laj Huuj.
Tehlik oq wach akapebʼaal noq ne inawil wach. Reʼ Santo Laj Huuj jenaj kooch inchalik ruukʼ i Qajaaw Dios Jehová. Reh chi ne tirutobʼeej i kʼahchiʼ awilom wach jeʼoq akabʼ jenoʼ halakʼun iraaj runabʼeem chi riij i rajaaw. Maʼ akanaaʼ chi reʼ taqeh maʼ holohik ta laj kapebʼal eh reʼ tokoom rilariik i kʼachareel inabʼan ne tiruqʼil reh chi ne tirukʼuhbʼalej i Dios (Salmo 25:4).
Chabʼan atiij noq ne inatoqʼaaʼ. Rukapebʼaal i Dios wilik chupaam i Santo Laj Huuj, ruum aj reʼ ko ruman i rutobʼaal reh chi ne inqareq chi riij. Iruqʼor chi ne iruyeew rusanto laj uxlabʼal ajwach kipahqanik reh (Lucas 11:13). Reʼ santo laj uxlabʼal ne qojrutobʼeej rureqariik chi riij i rukapebʼaal i xtzʼuhkrisanik qeh. Chi qʼun qʼun ne inqareq chi riij i «ruchamiil paam i runaʼojbʼal i Dios» (1 Corintios 2:10).
Chawil wach reh rureqariik chi riij. Maʼ awil wach i Santo Laj Huuj xa pan ajim. Noq kʼahchiʼ awilom wach, chakapaaj chi riij i wilih: «¿Chajariik chi holohik naʼojbʼal xukʼuhtaaj i rajkamanoom i Dios wilih? ¿Nikʼwach ne inukoj pan nukʼachariik i kʼahchiʼ nutijem?.»
Saqumbʼoq wach chajariik inawaaj areqem ruukʼ i kʼahchiʼ awilom. Reh chi ne nasuqkileej rilariik wach aSanto Laj Huuj, chakoj akʼux reh chi wilik taqeh i ne inatijej eh ne inakoj pan akʼachariik. Ne irubʼan chi ne inakoj akʼux runabʼjiik wach i korik laj Dios. Jeʼ reʼ ne tiiponik chi hat holohik laj kʼachareel, ehkʼenbʼees oon bʼahilbʼees. Chi riij i reʼ chasikʼ jenoʼ chik naʼojbʼal reh i Santo Laj Huuj reh chi ne tirutobʼeej rubʼanariik i wilih. a
Reʼ taqeh hoʼoobʼ naʼojbʼal wilih ne tirutobʼeej nikʼwach ne natoqʼaaʼ xa reʼ laʼ ¿nikʼwach ne inabʼan i hat reh chi ne inasuqkileej rilariik wach i Santo Laj Huuj? Reʼ naʼojbʼal chalik reh ne iruqʼor ruman aweh.
a Mi maʼ awehtʼal nikʼwach rubʼanariik i wilih, reʼ taqeh testigo reh Jehová ne tikitobʼeej.
