Xinasjik Paddington ahaʼ wiiʼ kʼih taqeh patineel pan tinamit Londres (Inglaterra). Patinik naq inubʼan ruukʼ i nutuut eh ixibʼ taqeh was. Reʼ wajaaw inooj eh inchalik naq pan qapaat ruum chi ajhaʼ naq.

Reʼ i nutuut xukʼuhtaaj weh chi nanubʼanam nutiij pan chaqʼabʼ. Wilik naq jenaj kʼisa nuSanto Laj Huuj xa reʼ naq i Salmo wilik chupaam eh inutzʼuyej naq wach chi wutkeel. Jun riim xwil wach pan jenaj huuj jenaj qʼorik xponik pan wanima: «Naruponiik i qʼiij chi naqakimiik». Reʼ taqeh qʼorik wilih maʼ kirukanaaʼ ta naq chik wirik pan chaqʼabʼ. Inukapaaj naq i chalik reh. Inuqʼor naq: «¿Xa reʼ na i wilih i kʼacharik? ¿Chajariik inubʼan ayuʼ?». ¡Reʼ hin maʼ inwaaj ta naq kimik!

Xinokik chi kapebʼinik chi riij i qʼijinik. Jeʼ reʼ noq xnutoqʼaaʼ qʼorik kuukʼ taqeh kamnaq, eh ruchʼihiil taqeh wamigo pan escuela qojʼooj naq ahaʼ wiiʼ muqulkeebʼ taqeh kamnaq. Inqamol woʼ naq qiibʼ chi rilariik taqeh película reʼ inkiyeew yoʼjik. Chuʼnchel taqeh reʼ qojyoʼjik woʼ naq ruum eh insuqbʼik woʼ naq qakʼux.

Xa lajeebʼ haabʼ naq wilik weh eh reʼ nukʼachariik maʼ holohik ta naq kʼahchiʼ rojiik. Xnutoqʼaaʼ nubʼanam i siikʼ eh xa reʼyuʼ xinokrik ruukʼ. Chi riij i reʼ i nusikʼej woʼ naq chik i marihuana. Junlaj haabʼ naq wilik weh noq xnunikʼeej i kʼahlaj haʼ. Atoobʼ ta maʼ inponik ta naq chi nuwach i rusuqkiil, inukʼax naq wach noq kinxohkʼrik. Imponik woʼ naq chi nuwach i tzʼuuy eh jeʼ woʼ i soon. Inusikʼ woʼ naq ruwiiʼ nikʼwach ne kinooj chupaam taqeh ninqʼiij eh taqeh discoteca. Pan chaqʼabʼ kinelik naq je pan nupaat eh ko pan wahqʼeq naq chik kinponik chi maʼ ajwach ta inilwik weh. Ruum chi hin naq chik qʼuhtinaq, maʼ kinooj ta naq chik pan tijinbʼal. Eh noq kinooj naq pan tijinbʼal inwukʼej naq i kʼahlaj haʼ.

Noq nanukohlaam naq chik i básico maʼ xinelik ta korik. Ruum chi reʼ nutuut maʼ rehtʼal ta naq chi maʼ holohik ta i nunaʼojbʼal, maʼ suq ta xrikʼraaj riibʼ wuukʼ eh xkaqrik. Xqachoqej qiibʼ eh xinelik je pan paat. Xinooj chi riij i Tony, reʼ numeetzʼ, reʼ runimaniik rastafari naq. Reʼ reh irubʼan naq ileqʼ, irukʼayej naq droga eh ajpeleto woʼ naq. Chi riij i reʼ xinkahnik wach kʼacharik eh xa dieciséis haabʼ naq wilik weh noq asjik i kʼisa qakʼuun.

Xnunabʼeej kiwach taqeh testigo reh Jehová noq patinik naq inubʼan pan jenaj yeʼaabʼ keh taqeh tutbʼees maʼxta kibʼahiil eh wilik kihalakʼuun. Intyoox reh i toobʼinik inkiyeew juʼjun taqeh molaabʼ. Kiʼibʼ taqeh tuut testigo reh Jehová kiponik naq chi rilariik taqeh qʼahxoq tutbʼees. Jenaj qʼiij xinkahnik kuukʼ noq kʼahchiʼ keebʼ chi qʼorik eh inwaaj naq nukʼuhtaam chi reʼ taqeh testigo reh Jehová maʼ korik ta inkikʼuhtaaj. Xa reʼ laʼ, reʼ keh xkiqʼor weh chi riij chuʼnchel taqeh i nupahqaal pan chaqʼlamiil eh ruukʼ i Santo Laj Huuj. Xponik chi nuwach chi chaqʼlaam naq taqeh wuukʼ. Ruum aj reʼ xwaaj tijinik chi riij i Santo Laj Huuj kuukʼ.

Xa reʼyuʼ wilik xnutijej pan Santo Laj Huuj eh reʼreʼ xujal i nukʼachariik. Pan nukʼisinaal kinyoʼjik naq ruum i kimik, xa reʼ laʼ xnutijej chajariik xuqʼor i Jesús chi riij i kiwuktiik taqeh kamnaq (Juan 5:​28, 29). Xnutijej woʼ chi reʼ Dios iraaj nuwach (1 Pedro 5:7). Reʼ iruqʼor i Jeremías 29:11 xponik pan wanima, ar iruqʼor: «Ruum reʼ hin wehtʼal chibʼih jariik i nuyejaam wach cha weh taq i hat reh chi suq taq naa awihiik, jeʼ rukabʼ i kʼahchiʼ awuy-eem taq i hat, maʼ reʼ ta yiibʼ wach i kʼahchiʼ nukapaam taq chawiij». Xnutoqʼaaʼ woʼ nukojom nukʼux chi ne naq kinkʼacharik chi juneliik ayuʼ wach akʼal noq xa holohik chik (Salmo 37:29).

Reʼ taqeh testigo reh Jehová xa chaqʼlaam naq chik taqeh wuukʼ. Reʼ peet pech xinponik pan kimoloj iibʼ xnukoj rehtaal chi holohik i wihʼik ar (Juan 13:​34, 35). ¡Reʼ nukʼularik xkibʼan maʼ jeʼ ta rukabʼ inukʼularik inkibʼan naq taqeh iglesia Reʼ taqeh Testigo maʼ xkiqʼat qʼorik chi nunaah ruum nikʼwach i nukʼachariik. Xkiyeew laʼ kiqʼiij weh. Xinkikʼax, xinkibʼiraj eh xinkitobʼeej. Xwikʼaaj chi nufamilia naq taqeh.

Noq xnutijej chi riij i Santo Laj Huuj xnureq chi riij chi na naq nujalam wach i nukʼachariik reh kʼacharik jeʼ rukabʼ imponik chuwach i Dios. Xnukʼaxkileej rukanabʼjiik i bʼanaaj siikʼ. Xnukoj woʼ rehtaal chi wilik tzʼuuy irubʼan naq chi ne inwaaj woʼ chik bʼanaaj marihuana. Jeʼ reʼ noq tokoom naq chik tzʼuuy inubʼiraj. Xnukanaaʼ woʼ ojik chupaam taqeh ninqʼiij eh chupaam taqeh discoteca ruum chi wehtʼal naq chi ar ne naq kinqʼehbʼik chi bʼanaj haʼ. Akʼ chi taqeh wamigo xnusikʼ, kʼachareel holohik i kinaʼojbʼal (Proverbios 13:20).

Chupaam taqeh qʼiij reʼreʼ, reʼ Tony xutoqʼaaʼ woʼ i tijinik chi riij i Santo Laj Huuj ruukʼ taqeh testigo reh Jehová. Noq inkiqʼor naq reh chi riij taqeh i rupahqaal, xukoj rehtaal chi reʼ kʼahchiʼ naq rutijem reʼ naq i korik. Xujal wach i rukʼachariik. Xukanaaʼ taqeh ramigo reʼ suq naq keh i peleto , xukanaaʼ ileqʼ eh xukanaaʼ i bʼanaj siikʼ. Xqakoj woʼ rehtaal chi reh chi ne naq inqaloqʼej wach i Jehová jeʼ rukabʼ iraaj, naqabʼanam naq kaxaro reh chi reʼ qahalakʼuun ne inwihʼik reh i aajwaal wach chi reh. Jeʼ reʼ noq pan 1982 xqabʼan kaxaro.

Inkʼulik pan nukʼux chi inusikʼ naq chupaam taqeh huuj La Atalaya eh ¡Despertad! a chi riij taqeh naʼojbʼal kijalam taqeh kʼachareel reʼ inwaaj naq nujalam i hin. Reʼ naq inwil chi riij i kikʼachariik iruyeew naq rukowiil nukʼux eh iruyeew naq waansil reh chi maʼ ne ta inukanaaʼ rujalariik wach i nunaʼojbʼal. Juneliik naq i nupahqaaj reh i Jehová chi maʼ inqʼuhtik rukʼux wuukʼ. Reʼ Tony eh reʼ hin qajik qahaaʼ chi hoj testigo reh Jehová pan julio reh 1982.

Ruum chi xinponik chi hin ramiga i Jehová xukoʼleej riij i nukʼachariik. Reʼ Tony eh reʼ hin qilom nikʼwach i Jehová hoj rutobʼeem pan kʼaxkilal. Qatijem woʼ rukojariik qakʼux ruukʼ noq qojikʼik pan kʼaxkilal eh qilom chi reʼ reh iruchaʼjeej i qafamilia (Salmo 55:22).

Qeʼ insuqbʼik qakʼux rutoobʼjiik i qakʼuun eh i qixqʼuun reh chi xiponik chi kamigo i Jehová. Eh yuʼnaak xsuqbʼik woʼ nukʼux rilariik chi reʼ taqeh wiih numaam kʼahchiʼ woʼ kinabʼeem wach i Jehová.

Eh yuʼnaak maʼ kinkahnik ta chik chi kapebʼinik pan chaqʼabʼ chi riij i chalik reh oon chi riij i kimik. Yuʼnaak reʼ Tony eh reʼ hin lahtzʼ qawach chi ulaʼinik rajlaal xamaano taqeh molaabʼ keh taqeh testigo reh Jehová reh ruyeʼariik rukowiil kikʼux taqeh qahermano. Eh ruchʼihiil taqeh qahermano inqakʼuhtaaj keh taqeh kʼachareel chi mi inkikoj kikʼux ruukʼ i Jesús ne woʼ kikʼachariik chi juneliik.