Hat qʼoreel mi ne nasuqkileej rilariik wach i Santo Laj Huuj oon ne tiqʼuhtik reh. Qil chajariik ne intoobʼinik aweh.

Chachih jenoʼ Santo Laj Huuj inreqarik chi riij. Ruum chi mi kʼahchiʼ awilom jenoʼ Santo Laj Huuj maʼ inreqarik ta chi riij oon ne irukoj taqeh qʼorik reh najtir, maʼ ne ta inasuqkileej rilariik wach. Ruum aj reʼ, chasikʼ jenoʼ Santo Laj Huuj maʼ kʼaxik ta rureqariik chi riij eh ne inponik pan awanima. Ko ruman woʼ chi reʼ Santo Laj Huuj reʼ i naʼawilom wach manlik wach eh korik iruqʼor. a

Chakoj taqeh i akʼ kamaambʼal. Yuʼnaak reʼ Santo Laj Huuj wilik chi huuj, ne woʼ irubʼan chi ne inwihʼik aweh pan acelular. Ne irubʼan chi ne inawil wach pan qayeʼaabʼ reh Internet oon ne inaqahsaj pan jenoʼ computadora, tablet oon celular. Wilik juʼjun taqeh Santo Laj Huuj iruyeew qʼabʼ, reh chi ne inawil pan tokoom chik Santo Laj Huuj i versículo kʼahchiʼ awilom wach. Jeʼ woʼ wilik pan audio mi maʼ inawaaj awilom wach. Kʼih imponik chi kiwach rubʼirjik noq kiʼooj pan bus noq komajaaʼ kiponik pan kikamaj, noq inkitzʼaj i kisoʼ oon noq inkibʼan jenoʼ kamanik ahaʼ wiiʼ maʼxta choqik. ¿Ahaʼ wilik imponik chawach i hat? ¿Chaaj woʼ reet maʼ inabʼan i wilih?

Chasikʼ taqeh kamaambʼal reh rutijaljik i Santo Laj Huuj. Reʼ taqeh huuj reh tijinik reh i Santo Laj Huuj ne tirutobʼeej reh chi ne inatijej chi korik taqeh naʼojbʼal wilik chupaam. Ruum chi wilik taqeh mapa, reʼ taqeh yeʼaabʼ iruqʼor i Santo Laj Huuj ne inkamanik aweh reʼ runabʼjiik nikʼ najtil wilkeebʼ taqeh yeʼaabʼ iruqʼor eh chi ne inakapaaj i kʼahchiʼ rukʼulariik. Jeʼ woʼ wilik juʼjun taqeh naʼojbʼal chupaam i huuj wilih eh jeʼ woʼ ahaʼ iruqʼor «Kʼuhtanik chi riij i Santo Laj Huuj» reh i qayeʼaabʼ pan Internet jw.org. Ne tirutobʼeej reh chi ne inareq chi riij versículo reh i Santo Laj Huuj.

Chajal wach nikʼwach rilariik inabʼan. Mi inakapaaj chi ne tiqʼuhtik reh i rilariik paam i Santo Laj Huuj parutohqʼiik eh pan rukuxiik, chatoqʼaaʼ rilariik reʼ imponik chawach. Reh chi ne inareq kʼisinoq chik chi riij i kʼachareel reʼ inawaaj atijeem pan Santo Laj Huuj, ne irubʼan chi ne inawil ahaʼ wiiʼ iruqʼor « Chatijej chi riij taqeh kʼachareel inkan pan Santo Laj Huuj». Ne woʼ irubʼan chi ne inasikʼ chi naʼojbʼal oon chi tuslik wach taqeh haabʼ xkʼularik wiiʼ. ¿Chajariik inaqʼor mi xanikʼeej rubʼanariik xqaqʼor ayuʼ?