REʼ NAʼOJBʼAL REH I PEET PÁGINA | CHASUQKILEEJ RILARIIK WACH I SANTO LAJ HUUJ
¿Rilariik wach i Santo Laj Huuj?
Reʼ Jovy iruqʼor: «Inukapaaj naq chi kʼaxik rureqariik chi riij i Santo Laj Huuj».
Reʼ Queennie iruqʼor chi jeʼ wilih: «Inukapaaj naq chi jenaj naq huuj ne kinqʼuhtik reh».
Reʼ Ezekiel iruqʼor: «Noq xwil chi yohbʼaal wach, maʼ xwaaj ta chik wilom wach».
¿Jeʼ na reʼ inawikʼraaj awiibʼ jeʼ rukabʼ xkiqʼor taqeh kʼijool? Mareh xawaaj awilom wach i Santo Laj Huuj, xa reʼ laʼ wilik i xatruqʼil. Kʼih taqeh kʼachareel inkiqʼor chi reʼ rilariik paam i Santo Laj Huuj ne kiqʼuhtik reh. ¿Jeʼ na reʼ ne inakapaaj, mi xanabʼeej chi reʼ rilariik wach ne irusuqʼbisaj akʼux eh ne iruyeew rukorkiil akʼachariik? ¿Eh mi xanabʼeej chi wilik juʼjun naʼojbʼal ne intoobʼinik aweh reh chi nasuqkileej rilariik wach? ¿Ne na inawil wach reh runabʼjiik chajariik irubʼehsaj aweh i Santo Laj Huuj?
Chawil i qʼorik inkibʼan taqeh kʼachareel, reʼ kitoqʼaam chik rilariik wach i Santo Laj Huuj eh nikʼwach xitobʼjiik ruum.
Reʼ Ezekiel aj 20 haabʼ iruqʼor: «Najtir cho, hin naq jenaj kʼachareel kinooj chi bʼehik chi maʼ wehtʼal ta chajariik naq inwaaj. Xa reʼ laʼ reʼ rilariik wach i Santo Laj Huuj xuyeew rukorkiil i nukʼachariik eh iruyeew nunaʼojbʼal, reʼ ne irubʼan chi ne inukoj iqal iqal».
Reʼ Frieda aj 20 haabʼ jeʼ wilih iruqʼor: «Reʼ hin xa reʼyuʼ naq inchalik nujosqʼiil chi riij xa chajariik, intyoox reh i rilariik wach i Santo Laj Huuj yuʼnaak maʼ xareʼyuʼ ta chik inchalik nujosqʼiil. Yuʼnaak kʼih chik taqeh wamigo».
Jenaj tuut Eunice rubʼihnaal, aj 50 haabʼ iruqʼor: «Kʼahchiʼ kiin rutobʼeem chi hin holohik kʼachareel eh chi ne inujal taqeh naʼojbʼal maʼ holohik ta».
Reʼ rilariik wach i Santo Laj Huuj ne irubʼan chi ne inqasuqkileej i qakʼachariik jeʼ rukabʼ xkikʼul taqeh juʼjun wilih eh taqeh rukʼihaal chi kʼachareel (Isaías 48:17, 18). Neʼ woʼ qojrutobʼeej ruchihariik i naqabʼanam pan qakʼachariik, ruchihariik taqeh holohik laj amigo, chi maʼ ne ta qojqʼuhtik eh chi ne inqatijej i korik chi riij i Dios. Reʼreʼ xti ko ruman. Reʼ taqeh naʼojbʼal iruyeew i Santo Laj Huuj inchalik ruukʼ i Qajaaw Dios. Maʼ jaruuj ne inqajotʼ qiibʼ ruum rukojariik pan qakʼachariik. Reʼ reh ma iruyeew ta taqeh i maʼ holohik ta laj naʼojbʼal.
Reʼ aajwaal wach reʼ chi naqatoqʼaam rilariik wach. Chupaam taqeh naʼojbʼal chalik reh, ne inareq naʼojbʼal reh nikʼwach ne inatoqʼaaʼ eh ne nasuqkileej rilariik wach i Santo Laj Huuj.
