Xin-asjik Sajonia, jenaj yeʼaabʼ reh i República Democrática Alemana (RDA). Pan nupaat qʼeʼ chaqʼlaam naq taqeh eh reʼ taqeh wajaaw xkikʼuhtaaj weh i holohik laj naʼojbʼal. Reʼ ajaawriik RDA inkisikʼ naq riij nikʼwach rutobʼjiik i kitinamiit nakibʼanam, eh kʼih taqeh kʼachareel ar Sajonia maʼ koruman ta naq chi keh runimjiik i Dios. Reʼ hin maʼ nunimaj ta naq chi wilik jenaj Dios. Wilik naq kiʼibʼ nukapebʼaal: reʼ peet, maʼ nunimaj ta naq chi wilik jenaj Dios, reʼ rukabʼ, inukoj naq nukʼux kuukʼ taqeh ajaawriik reʼ inkiqʼor chi jenaj qawach.

¿Chaj woʼ reet inukʼax naq wach i ajaawriik reʼ irukʼuhtaaj chi jenaj naq qawach? Imponik naq chi nuwach ruum chi inwaaj naq chi reʼ taqeh kʼachareel jenaj kiwach. Inukapaaj naq chi, reh chi maʼ ne ta inwihʼik bʼehoom eh nebʼaaʼ koruman naq chi ne inchʼeqarik i tumiin chi jenaj wach. Ruum xnutobʼeej jenaj molaabʼ keh taqeh kʼijool chi riij i wihʼik pan jenaj wach kʼuxliis. Noq wilik weh catorce haabʼ xnukoj nukʼux reh kamanik reh chi saq wach i akʼal, jeʼ rukabʼ noq xnumol taqeh huuj reh rukorsjiik woʼ chik taqeh chi akʼ. Reʼ taqeh wilik kajaawriik pan nutinamiit suq naq kikʼux chi wiij eh xkiyeew jenaj nukooch. Atoobʼ ta ko hin naq kʼijool xnunabʼeej kiwach taqeh wilik kajaawriik eh ehtʼalimaj kiwach pan tinamit. Inukapaaj naq chi holohik kʼahchiʼ relik i nukʼachariik.

Xa reʼ laʼ xyoj nukʼux. Pan haabʼ 1989 xqʼehbʼik i tzʼaq irusutej riij i tinamit Berlín, eh xyoj woʼ wach i rajaawriik i juntzʼuhbʼ chi tinamit rubʼihnaal Europa del Este. Chi riij i reʼ xnukoj rehtaal chi kʼih taqeh yiibʼ wach bʼanooj xbʼaan. Jeʼ rukabʼ noq reʼ taqeh i maʼ inkikoj ta kikʼux ruukʼ i ajaawriik reʼreʼ inchʼeqarik naq wach i kitumiin. Xa reʼ laʼ ¿chaj woʼ reet jeʼ reʼ inbʼaan? ¿Maʼ irukʼuhtaaj ta na i ajaawriik reʼreʼ chi jenaj qawach? ¿Mi korik ta woʼ naq irukʼuhtaaj i ajaawriik reʼreʼ? Ruukʼ chuʼnchel i wilih xirukoj chi kapebʼinik.

Reʼ ajwaal naq wach chi weh xjaljik, xnutoqʼaʼ nukʼaxam wach i tzʼuuy eh i korsanik ehtalil. Eh xnutijej wiibʼ pan jenaj nim laj tijinbʼal reh tzʼuuy ruum chi inwaaj naq okik pan universidad; inwaaj naq nukamaneem wach i tzʼuuy eh i korsanik ehtalil pan nukʼachariik. Xnukanaʼ rubʼanariik taqeh holohik naʼojbʼal reʼ xnutijej noq ko hin halakʼun. Xa reʼ naq chik i ninqʼiij imponik chi nuwach eh wihʼik kuukʼ taqeh reh reh wach ixoq. Xa reʼ laʼ ni xa ta reʼ tzʼuuy, reʼ korsanik ehtalil ni xa ta reʼ taqeh ninqʼiij xusuqbʼisaj nukʼux eh reʼ wilih inkʼutinik naq chupaam taqeh ehtalil inukorsaj. ¿Nikʼwach taqeh qʼiij chalik reh? ¿Chajarik inquyʼeej pan qakʼachariik?

Noq xnureq chi riij taqeh nupahqanik xusach nukʼux, jenaj xqʼeq noq wilkiin naq pan tijinbʼal, xintzuhnik ruukʼ juntzuhbʼ chi kʼijool reʼ keh qʼorik naq inkibʼan chi riij i chalik reh. Chikixilak wilik naq i Mandy * jenaj testigo reh Jehová. Reʼ reh xuqʼor weh: «Andreas, mi inawaaj anabʼeem chi riij i kʼacharik eh i chalik reh, chatzʼir riij iruqʼor i Santo Laj Huuj».

Kʼih naq taqeh nupahqanik, xa reʼ laʼ xti inwaaj naq nunabʼeem chi riij. Reʼ Mandy xukʼuhtaaj weh i rukabʼ capítulo reh i ruhuuj i Daniel, reʼ xwil xusach nukʼux. Reʼ qʼorooj cho rubʼiral wilih inqʼorik naq chi riij taqeh wilik kajaawriik chinaah i wach akʼal reʼ rukʼam riibʼ ruukʼ i kʼahchiʼ rukʼuljik pan qaqʼijil. Chi riij i reʼ i Mandy xukʼuhtaaj weh iruqʼor i Santo Laj Huuj chi riij i chalik reh. Ko reʼ aj xnureq chi riij taqeh nupahqanik. Xa reʼ laʼ ¿ajwach xtzʼihbanik reh i qʼorooj cho rubʼiral? ¿Ajwach woʼ xuqʼor cho rubʼiral i chalik reh chi qawach? ¿Irukʼuhtaaj na i wilih chi wilik jenaj Dios?

Reʼ Mandy xuqʼor keh i Horst eh i Angelika jenaj kaxaro testigo taqeh reh chi xinkitobʼeej reh reqarik chi riij i Santo Laj Huuj. Eh xnukoj rehtaal chi xa reʼ woʼ taqeh testigo reh Jehová jenaj molaabʼ inkikoj eh inkiyeew chi nabʼjik i rubʼihnaal i Dios (Salmo 83:18, TNM; Mateo 6:9). Xnutijej chi reʼ Jehová iraaj ruyeʼem keh i kʼachareel i juneliik kʼacharik ayuʼ wach akʼal noq xa holohik chik. Reʼ Salmo 37:9,⁠TNM iruqʼor: «Eh reʼ inkuyeej i Jehová nakehcham i wach akʼal». Xponik chi nuwach runabʼjik chi reʼ juneliik kʼacharik ayuʼ wach akʼal keh chuʼnchel taqeh kʼachareel, reʼ inkijal i kikʼachariik.

Xnukʼaxkileej rujalarik wach i nukʼachariik eh rubʼanarik iruqʼor i Santo Laj Huuj. Reʼ bʼehomal xnureq noq hin ajtzʼuuy eh ajkorsan ehtalil xubʼan chi xnunimbʼisaj wiibʼ, ruum ajreʼ xnutijej i lochʼik iibʼ. Xnukʼaxkileej rukanabʼjik i kʼoyomal. Xnutyooxeej reh i Jehová chi ajkuyul, ajketelom wachiis eh ajkʼaxool ruukʼ taqeh inkikoj kikʼux chi rubʼanariik irukʼuhtaaj i Santo Laj Huuj.

Reʼ ajaawriik reʼ inkikʼuhtaaj naq chi jenaj qawach eh reʼ runimjik chi maʼxta jenaj Dios reʼ naq taqeh reʼ peet pan nukʼachariik. Xa reʼ laʼ noq wilik weh 18 haabʼ, reʼ Santo Laj Huuj xirutobʼeej, reʼ xnutijej xujal i nukʼachariik eh maʼ qʼeʼ ta naq chik inukapaaj chi riij i chalik reh. pan 1993 xnuqahsaj nuhaaʼ eh xnubʼan chi hin testigo reh Jehová eh pan haabʼ 2000 xnubʼan kaxaro ruukʼ i Tabitha, jenaj ajkʼuhtaneel chi riij i Santo Laj Huuj. Qakabʼcheel inqakʼuhtaaj keh i kʼachareel chi riij i Santo Laj Huuj. Juʼjun taqeh keh jeʼ rukabʼ naq i hin i kikʼachariik, inkinimaj reh i ajaawriik reʼ inkikʼuhtaaj chi jenaj qawach eh chi maʼxta jenaj Dios. Xa reʼ laʼ insuqbʼik nukʼux kitobʼjik reh chi ne inkinabʼeej wach i Jehová.

Noq xnutoqʼaaʼ wihʼik kuukʼ taqeh testigo reh Jehová, reʼ taqeh wajaaw xiyoʼjik, xa reʼ laʼ noq xikʼik taqeh qʼiij xkikoj rehtaal chi holohik chik i nukʼachariik. Yuʼnaak suq nukʼux ruum chi reʼ keh tijinik inkibʼan chi riij i Santo Laj Huuj eh kiponik woʼ pan moloj iibʼ keh taqeh testigo reh Jehová.

Reʼ Tabitha eh reʼ hin inqakoj qakʼux chi rukojarik pan qakʼachariik iruqʼor i Santo Laj Huuj chi riij taqeh kaxaro eh reʼ wilih iruyeew rusuqkiil qakʼux. Jeʼ rukabʼ i rukʼamarik nah i naʼojbʼal reh chi maʼ ne ta inqakanaaʼ qiibʼ irukowej i qakaxarohiil (Hebreos 13:4).

Maʼ inooj ta chik nukʼux chi riij i kʼacharik eh i chalik eloq reh. Wilkiin pan kifamilia taqeh testigo reh Jehová, reʼ keh wilkeebʼ pan tuqkilaal eh pan jenaj wach kʼuxliis. Pan familia wilih chi qunchelaal jenaj qawach. Reʼ naq i wilih kʼahchiʼ nusikʼim pan nukʼachariik.