CHAKAPAAJ chi wilkaat pan jenaj yeʼaabʼ ahaʼ wiiʼ inkikʼuhtaaj taqeh i reh i najtir. Kʼisiin maʼ chuʼnchel i wilik ar hopimaj taqeh, eh wilik i juʼjun maʼ manlik ta kiwach. Xa reʼ laʼ, wilik jenaj ar jeʼ akʼ wach. Maʼ jeʼ ta rukabʼ taqeh tokoom, maʼ hopimaj ta eh manlik wach. «¿Ko akʼ na taqeh wilih?», inapahqaaj reh i ajilool. Reʼ reh iruqʼor aweh «Ta, reʼ wilih najtir eh maʼ jankʼal ta kiʼakʼbʼisam wach». Reʼ hat inapahqaaj reh «¿Mi wilik naq pan jenoʼ yeʼaabʼ ahaʼ maʼ rujotʼ ta riibʼ?». I ajilool iruqʼor aweh «Tawoʼ, reʼ wilih rukuyum taqeh kʼaxkilaal jeʼ rukabʼ i teew eh i jabʼ, eh inkaaj woʼ naq kisacham wach». Eh mareh i hat inakapaaj: «¿Ruukʼ chajarik korsamaj?».

Jeʼ rukabʼ xqil, reʼ Santo Laj Huuj jeʼ rukabʼ i akʼ xkʼutinik. Jenaj huuj najtir chikiwach taqeh chuʼnchel. Korik wilik taqeh huuj xitzʼihbʼjik najtir, jeʼ rukabʼ taqeh reh i najtir kikʼutinik, kʼih taqeh keh ikʼinaq chik kiwach ruum chi reʼ qʼiij xikʼik chik. Reʼ taqeh naʼojbʼal kitzʼihbʼaam chi riij inkiqʼor taqeh científico yuʼnaak qehtʼal chi maʼ korik ta, ruum chi wilik taqeh naʼojbʼal irukʼuhtaaj chi maʼ jeʼ ta reʼ. Jenaj ehtalil, noq inkiyeew naʼojbʼal chi riij i eqʼoom, xa ne ruyeew pan yohbʼaal i qakʼachariik eh maʼ qojrutobʼeej ta. Eh reʼ taqeh kitzʼihbʼaam reʼreʼ maʼ manlik ta chik kiwach yuʼnaak, xa ruqohx chik taqeh, wilik xiqʼehbʼik eh wilik hopimaj chik taqeh.

Reʼ Santo Laj Huuj maʼ jenaj ta wach ruukʼ taqeh tokoom huuj. Atoobʼ ta ikʼinaq chik ixibʼ mil quiniento haabʼ maʼxta rukʼulum, maj chuwach taqeh haabʼ ikʼinaq, xkaaj laʼ kikʼatam, xkaaj laʼ kitzʼapam eh xkiqʼor i maʼ holohik ta chi riij, chuʼnchel i runaʼojbʼal i Santo Laj Huuj manlik wach. Atoobʼ ta najtir xtzʼihbʼjik reʼ wilik chupaam ko inkamanik. Inqakoj rehtaal chi maʼ xsahchik ta wach taqeh runaʼojbʼal ruukʼ i akʼ naʼojbʼal reh i qaqʼijil, reʼ Santo Laj Huuj ruqʼorom naq chik cho najtir, reʼ taqeh qanabʼeem yuʼnaak (chawil wach i wilih «¿Anticuada, o adelantada para su tiempo?»).

Wilaʼ jeʼ reʼ, mareh ne napahqaaj: «¿Ko inkamanik na taqeh naʼojbʼal wilik chupaam i Santo Laj Huuj?». Reh runabʼjik i wilih, chakapaaj taqeh kʼaxkilaal kiʼikʼik wiiʼ i tinamit. ¿Haj wilik inaqʼor i hat? ¿Reʼ qʼaqʼinik? ¿Reʼ yojooj wach akʼal? ¿Reʼ kansanik on reʼ inkibʼan ileqʼ, jeʼ rukabʼ i wilik kajawriik?. Yuʼnaak chatzʼir wach juʼjun taqeh naʼojbʼal irukʼuhtaaj i Santo Laj Huuj eh chapahqaaj aweh: «¿Nikʼwach naq i kʼacharik mi chuʼnchel inkikoj taqeh naʼojbʼal wilih?».

REʼ RUKʼAXARIIK I TUQKILAAL KʼUXLIIS

«Suq kikʼux taqeh inkisikʼ rubʼanariik i tuqkilaal, ruum reʼ keh naruqʼorariik keh rakʼuun rixqʼuun i Dios» (Mateo 5:9, TNM). «Reʼ taq i hat, ko ahaʼ paʼ ruyee riibʼ taq chawach, cha chop taq akʼux chi kʼacharik pansuqkiil kʼuxliis chi kixilak taqe aawas achaaqʼ» (Romanos 12:18).

REʼ KETELINIK WACHIIS EH REʼ I KUYUUJ MAHK

«Atoobʼ keh inkiketelaaj wach i kas kichaaqʼ, ruum reʼ Dios naa ruketeliniik kiwach i keh» (Mateo 5:7). «Makanaʼ taq i kuyuuj iibʼ taq chawach eh juneliik chakuy taq amahk, atoobʼ ta wilik taq akʼaxkilaal chawach. Jeʼ rukabʼ noq xukuy taq amahk i Jehová *, jeʼ reʼ taq nabʼanam i hat» (Colosenses 3:13, TNM).

MAʼ TOKOOM TA RILARIIK TAQEH KʼACHAREEL INQABʼAN

Reʼ Dios «xa jinaj chi winaq xutoqʼaaʼ cho rutzʼuhkrisam wiiʼ chuʼnchel i tinamit, reh chi naa kipatinik chinaah chuʼnchel i wach akʼal» (Hechos 17:26). «Reʼ Dios maʼ awach taj i tokoom rilariik i rubʼan. Irukoj laʼ taqe chi rakʼuun rixqʼuun xa ahaʼ pantaq nimaq tinamit i kiyeʼwik ruloqʼil, eh inki aʼn i holohik laj naʼojbʼal imponik chuwach i reh» (Hechos 10:​34 eh 35).

RUKʼAXARIIK I QAYEʼAABʼ REʼ WACH AKʼAL

«Reʼ QaJaaw Dios [Jehová,TNM] xuyeew i winaq chupaam i yeʼaabʼ Edén, wilik wiiʼ i tik muʼuun, reh chi naa rabʼixeem wach, eh naa ruchaʼjeem» (Génesis 2:15). Reʼ Dios «narusacham kiwach taqeh i kʼahchiʼ kiyojom i akʼal» (Apocalipsis 11:18, TNM).

ROXOWJIIK I ROTOWJIIK I XA CHIBʼIH JARIK EH I KʼOYOMAL

«Jeʼ woʼ chik wili i xuqʼor: Chawikʼraaj taq awiibʼ i hat, maakʼax taq wach i bʼehomal, ruum maʼ reʼ taj i maʼ kʼisa bʼehomal inyeʼwik rukʼachariik i juʼjun, inki» (Lucas 12:15). «Eh maʼ rukʼul taj chi nee taq inakʼutjaaj aweh kʼoyomal, i xa chibʼih chik jariik chi chʼuwaʼ wach naʼojbʼal, ni xata reʼ rukʼaxariik wach i tokoom aj eh ruum hat taq chik santo laj aj nimaneel» (Efesios 5:3).

RUBʼANARIIK I HOLOHIK EH KAMANIK CHI KOW

«Ruum reʼ hoj inqaaj qaʼnam chuʼnchel i maʼ xta reet chi bʼanarik» (Hebreos 13:18). «Awach-oq taq aweh i ko rubʼan i leqʼ, chukanaaʼ rubʼaan. Ruukʼ laʼ ransil chusikʼ rutumiin» (Efesios 4:28).

RUTOBʼJIK TAQEH AJWACH INKAAJ TOBʼJIK

«Chayeew taq rukowiil kikʼux i xa kiʼibʼ kikʼux chi nimanik. Chatoobʼeej woʼ taq i komajaaʼ kow kikʼux. Eh xa hat-oq taq kuyuul chuʼnchel aj uukʼ» (1 Tesalonicenses 5:14). Naqabʼanam «Kitoobʼjiik i wilkeebʼ pantiʼ kʼaxik, chi jeʼ maʼ xta kituut kajaaw, chi jeʼ ixoq kamnaq kibʼahiil» (Santiago 1:27).

Reʼ Santo Laj Huuj xa maʼ inqʼorik ta chi riij taqeh naʼojbʼal wilih, irukʼuhtaaj laʼ qeh nikʼwach rukojarIik pan qakʼachariik. Mi reʼ taqeh kʼachareel inkikoj naq pan kikʼachariik taqeh naʼojbʼal wilih, ¿maj korik chi reʼ taqeh nimaq taq kʼaxkilaal, maʼ qʼeʼ ta naq kow wach? Pan korik, reʼ taqeh runaʼojbʼal i Santo Laj Huuj qʼeʼ inkamanik yuʼnaak. Xa reʼ la ¿nikʼwach ne tirutobʼeej i Santo Laj Huuj?

Reʼ winaq reʼ xti wilik runaʼojbʼal xuqʼor: «Xa nikʼ paʼ reʼ naʼojbʼal inkʼutinik ruukʼ i bʼanooj» (Mateo 11:19, TNM). ¿Maj korik i xuqʼor? Reh runabʼjik mi jenoʼ naʼojbʼal inkamanik peet naqakojom pan qakʼachariik. Ruum ajreʼ, mareh ne napahqaaj: «mi reʼ Santo Laj Huuj inkamanik chi korik ¿Ne na kirutobʼeej pan nukʼachariik? ¿Ne na kirutobʼeej ruukʼ i nukʼaxkilaal kʼahchiʼ wikʼik wiiʼ yuʼnaak?». Naqilom jenaj ehtalil.

Reʼ Diana * qʼeʼ lahtzʼ naq wach, suq naq rukʼux, xa reʼ laʼ, xjaljik i rukʼachariik noq xikʼik pan reh reh wach kʼaxkilaal: xkimik i rixqʼuun, xkichʼaq kiibʼ ruukʼ i rubʼahiil eh maʼxta naq chik rukamaj. Reʼ reh iruqʼor: «maʼ wehtʼaliim ta naq chajarik i nanubʼanam; xinkahnik chi maʼxta wixqʼuun, nubʼahiil eh nupaat. Xnuqʼebʼ chuʼnchel: maʼxta naq chik i wilik weh, maʼxta naq chik wansil eh maʼxta naq chik i kʼahchiʼ wuyʼeem».

Reʼ Diana xureq chi riij chi reʼ taqeh qʼorik wilih xti korik: «Ruum reʼ hoj xalajeebʼ woʼ ru kajwinaq haabʼ qoh kʼacharik, eh reʼ taqe i xti qʼeʼ kow, kajwinaq haabʼ kikʼachariik. Eh chi qʼeʼ najt nee qoh kʼacharik, xarutiʼkiil kʼuxliis, xa kowlaj kamanik i rukʼam chaloq. Eh reʼ i juʼjun chi haabʼ jumehqʼiil inikʼik jeʼ rukabʼ i qakʼachariik» (Salmo 90:10).

Reh ikʼik chupaam taqeh rukʼaxkilaal. Reʼ Diana xtobʼjik ruum i Santo Laj Huuj. Chupaam taqeh ixibʼ chi naʼojbʼal chalik reh naqilom chi kʼih taqeh kʼachareel inkikoj rehtaal chi reʼ xti koruman reʼ rukojariik pan kikʼachariik i runaʼojbʼal i Santo Laj Huuj. Xkikoj rehtaal chi reʼ Santo Laj Huuj jeʼ rukabʼ i ehtalil xqaqʼor pan rutihkʼik. Maʼ jeʼ ta rukabʼ taqeh kʼihaal chi huuj, noq inikʼik taqeh haabʼ insahchik kiwach. ¿Ruum na chi reʼ Santo Laj Huuj maʼ jenaj ta wach ruukʼ taqeh tokoom huuj? ¿Ruum na chi reʼ kapebʼaal wilik chupaam reh i Dios, eh maʼ reʼ ta reh i winaq? (1 Tesalonicenses 2:13).

Mareh reʼ hat ne nakapaaj chi reʼ qakʼachariik jumehqʼiil inikʼik eh nunjinaq chi kʼaxkilaal. ¿Ahaʼ inareq rukowiil akʼux, atobʼal eh anaʼojbʼal noq tiʼikʼik pan kʼaxkilaal?

Qilow ixibʼ ruwiiʼ reh nikʼwach ne tirutobʼeej i Santo Laj Huuj pan akʼachariik. Ne rukʼuhtaaj aweh chi:

1. Maʼ ne ta inamin awiibʼ pan kʼaxkilaal.

2. Rukorsjiik kiwach taqeh kʼaxkilaal.

3. Rukuyariik taqeh kʼaxkilaal reʼ maʼ ne ta inqajal kiwach.

Reʼ taqeh naʼojbʼal chalik reh narukʼuhtaam i ixibʼ chi naʼojbʼal wilih.