Re’ taqeh testigo reh Jehová ma’ inqaninq’ijej ta wach i qahab’ul ruum chi q’ehtal chi re’ Dios ma’ imponik ta chuwach chi ne inqabʼan i wilih. Atoob’ ta re’ Santo Laj Huuj ma’ iruq’or ta chi manlik chi ma’ na ta qaninq’ijem wach i qahab’ul, iruyeew juʼjun qanaʼojbʼal qojrutob’eej rureqariik chi riij chajariik irukapaaj i Dios chi riij i runinqʼijiik wach i qahabʼul. Qilow kijib’ reh taqeh na’ojb’al wilih eh chajariik iruq’or i Santo Laj Huuj chi riij i wilih.

1.   Re’ runinq’ijiik wach i hab’ul iruk’am riib’ ruuk’ i inkikoj wach taqeh ma’ manlik ta wach nimanik. Jenaj Diccionario enciclopédico iruq’or chi reʼ ninqʼiij wilih wilik raaʼ riʼsil ruukʼ i kapebʼal chi reʼ ruqʼijil i ruhabʼul jenoʼ «re’ taqeh ma’ atob’laj uxlab’al kiponik pan runinqʼiij reh habʼul jenoʼ reh rub’anariik i ma’ holohik ta reh». Eh chi «ruukʼ i kiponiik taqeh ramigo eh ruukʼ ruyeʼariik rusuqkiil rukʼux chupaam i runinqʼiij ne inkiko’leej i kʼachareel». (Funk & Wagnalls Standard Dictionary of Folklore, Mythology, and Legend). Jenaj chik huuj iruq’or chi najtiir intzihb’jik naq i q’iij noq jenoʼ inaasjik ruum chi «aajwaal naq wach reh runab’jiik chajariik naq i naruk’ulariik ruuk’», ehsamaj cho ruuk’ «i rutz’irariik riij taqeh ch’umiil». Eh re’ huuj wilih iruq’or wo’: «re’ taqeh k’achareel inkikapaaj chi re’ taqeh candela inkojarik chupaam i q’ij re’re’, inkamanik reh chi ne inooj eloq wach chuʼnchel chajariij inajwanjik» (The Lore of Birthdays).

    Xa re’ la’, re’ Santo Laj Huuj iruq’or chi re’ Dios ma’ imponik ta chuwach i kiq’orik rib’iral i chib’ih i naa ruk’ulariik, re’ q’ijinik, re’ kiqʼorik ruukʼ taqeh maʼ atoobʼ laj uxlabʼal eh chuʼnchel «taqe xa chibʼih jariik» iruchop riib’ ruuk’ i wilih (Deuteronomio 18:14; Gálatas 5:​19-​21). Eh jenaj razoon reh chi re’ Dios xuq’at q’orik chi naah i tinamit Babilonia, re’ chi inkitz’ir naq riij taqeh ch’umiil reh runab’jiik chajariik naq naruk’ulariik chupam taqeh q’iij chalik reh (Isaías 47:11-​15). Atoob’ ta re’ taqeh testigo reh Jehová ma’ inqayeew ta qak’ux chi runab’jiik aha’ kichalik taqeh juʼjun chi ninq’iij, ma’ inqikʼsaj ta naah i iruq’or i Santo Laj Huuj chi riij i q’ijinik oon i qʼorik kuukʼ taqeh maʼ atoobʼ laj uxlabʼal.

2.   Re’ taqeh peet ajnimaneel ma’ inkininq’ijej ta naq wach i kihab’ul. Jenaj huuj iruq’or chi, re’ taqeh peet ajnimaneel «inkikapaaj naq chi re’ runinq’ijiik wach jenoʼ habʼul inchalik naq ruuk’ i ma’ manlik ta nimanik» (The World Book Encyclopedia). Re’ Santo Laj Huuj iruk’uhtaaj chi re’ taqeh apóstol eh re’ taqeh xkuhtjik keh i korik ruum i Jesús noq xwihʼik ayu’ nah ak’al, xkik’uhtaaj chajariik nakikʼamam naah taqeh manlik ajnimaneel (2 Tesalonicenses 3:6).

3.   Re’ xutaq’aaj i Jesús chi nakininq’ijem wach taqeh rajtaahqaneel, ma’ re’ ta i raasjiik re’ la’ i rukimiik (Lucas 22:17-​20). Reʼ wilih maʼ irusach ta qakʼux, maj reʼ Santo Laj Huuj iruqʼor chi «qʼeʼ woʼ chihooj i kimik, chuwach i aasjik» (Eclesiastés 7:1). Noq re’ Jesús kimik naq chik reh, ruk’uhtaam naq chik chi holohik i runa’ojb’al chuwach i Dios, je re’ noq, re’ i ruq’ijil i rukimik q’e’ looq’ chuwach i ruqʼijil i raasjiik (Hebreos 1:4).

4.   Pan Santo Laj Huuj ma’ iruq’or ta chi jenoʼ rajkamanoom i Dios xuninq’ijeej wach i ruhab’ul. Ma’ re’ ta, chi maʼxta xtz’ihb’jiik chi riij i wilih, maj re’ i ruqʼorbʼal i Dios inq’orik laʼ chi riij i kiʼib’ chi k’achareel ma’ inkiloq’ej ta wach i Dios xkininq’ijej wach i kihab’ul. Eh re’ Santo Laj Huuj ma’ holohik ta inq’orik chi riij taqeh i ninq’iij wilih (Génesis 40:20-​22; Marcos 6:​21-​29).

 Re’ taqeh tutb’ees ajab’ees inkik’ax taqeh i kihalak’uun. Ruum aj re’, inkiyeew rukooch i kihalak’uun xa nik’ pa q’iij chuwach i haab’ eh inkikorsaj xa reh reh wach ninq’iij reh chi suq kik’ux. Inkaaj kik’amam keh ruuk’ i Dios, ruum chi re’ reh iruyeew xa chajariik qʼeʼ atoobʼ keh i rajkamanoon xa nikʼ paʼ qʼiij (Mateo 7:​11). Jeʼ re’ noq, re’ taqeh kak’uun kixq’uun taqeh Testigo ma’ inkikʼraaj ta chi ma’ suq ta kik’ux atoobʼ ta ma’ k’ahchi’ ta kininq’ijem wach i kihabʼul. Jeʼ re’ iruk’uhtaaj i kiqʼorom ju’jun taqeh halak’un.

•   «Qʼeʼ insuqbʼik nukʼux noq inkiyeew jenoʼ nukooch noq ma’ wehtʼal ta chi nakiyeʼem weh» (Tammy, aj kabʼlaj haabʼ).

•   «Re’ taqeh wajaaw ma’ inkiyeew ta nukooch pan ruq’ijil i nuhab’ul, xa re’ la’ inkiyeew nukooch pan tokoom chik q’iij. Reʼ wilih imponik chi nuwach» (Gregory, aj junlaj haabʼ).

•   «Re’ taqeh halak’un xa inkik’ux kipastel eh inkiʼan kitz’uuy. Re’ taqeh ninq’iij re’re’, ma’ imponik ta chi nuwach re’ inqabʼan pan nupaat qʼeʼ holohik taqeh (Eric, aj waqiibʼ haabʼ).