Ma’ inqakana’ ta kiq’orob’jiik taqeh testigo reh Jehová reʼ inkikana’ rumolariik kiib’ eh ma’ kiʼelik ta chik chi q’oroj kʼuhb’aal ruukʼ i molaabʼ. Inqakowej laʼ kik’ux reh chi ne woʼ chik kikowb’ik pan uxlabʼal eh chi ne woʼ chik kiponik pan taq moloj iib’.

 Noq jenoʼ Testigo qahsamaj chik ruhaa’ irubʼan jenaj nimlaj mahk, inehsjik chi testigo reh Jehová. Xa re’ la’, reʼ wilih ko intzʼirarik riij. Mi reʼ kʼachareel ma’ irukanaa’ ta rub’aan i nimlaj mahk xub’an eh mo oq iruyot’ ruk’ux ruukʼ i xubʼan, ne inehsjik chi testigo reh Jehová eh re’ molaab’ ne irukanaa’ q’orik eh wihʼik ruukʼ i kʼachareel reʼreʼ. Re’ Santo Laj Huuj iruq’or chi korik: «Chawesaj taq cho chaxilak i winaq inb’anik reh i mahk» (1 Corintios 5:13).

 ¿Chajariik ink’ularik mi jenoʼ winaq ehsjik chi Testigo, Xa re’ laʼ re’ rehk’een eh taqeh ruhalak’uun ko testigo taqeh? Atoob’ ta ma’ ne ta chik irub’an chi ne kiq’orik chi riij i kinimaniik ruukʼ jeʼ rukab’ naq inki’an najtir, xa rufamilia woʼ taqeh. Ruum chi rukaxaro, ko narucha’jeem i rehk’een eh taqeh ruhalak’un, reʼ wilih maʼ na ta rukanaam rubʼanariik.

 Re’ taqeh ki’ehsjiik chi testigo reh Jehová ne irubʼan chi ne kiponik pan taq moloj iib’ eh mi reʼ keh inkaaj chi ne kitob’jiik pan uxlabʼal kuum taqeh k’amal b’eeh pan molaab’, ne woʼ kitobʼjik. Re’ aajwaal wach, re’ chi ne inki’an woʼ chik iruq’or i Santo Laj Huuj reh ponik chi testigo reh Jehová taqeh. Mi re’ taqeh i xi’ehsjiik chi testigo reh Jehová inkinanaaʼ rubʼanariik i kʼoyomal eh inkik’uhtaaj chi pan korik inkaaj k’acharik jeʼ rukab’ iruq’or taqeh naʼojbʼal inkitijej pan Santo Laj Huuj ne woʼ chik irub’an chi ne kiponik chi testigo reh Jehová.