Reʼ hoj testigo reh Jehová inqaaj chi reʼ taqeh i qafamilia eh jeʼ woʼ taqeh i qakaʼjaah suq kikʼux. Qʼeʼ loqʼ chi qeh taqeh familia ruum chi qehtʼal chi reʼ i Dios xtzʼuhkrisanik reh (Génesis 2:21-24; Efesios 3:14, 15). Pan Santo Laj Huuj reʼ i Dios rukanaam i holohik laj naʼojbʼal keh i kʼachareel chi jun suut i wach akʼal reh chi reʼ taqeh i kaxaro suq kikʼux eh ne kiwihʼik pan jenaj wach kʼuxliis.

  Inqayeew qakʼux runimjiik taqeh naʼojbʼal iruyeʼew qeh i Santo Laj Huuj eh qojrutobʼeej chi hoj bʼahilbʼees ehkʼenbʼees eh ajabʼees holohik i qanaʼojbʼal (Proverbios 31:10-31; Efesios 5:22–6:4; 1 Timoteo 5:8). Reʼ i Santo Laj Huuj ne woʼ irutoʼbʼeej taqeh i familia reh reh wach i kinimanik (1 Pedro 3:1, 2). Qilow chajariik xkiqʼor juʼjun taqeh kaʼchareel noq jenaj keh xokik chi testigo reh Jehová:

•   Reʼ Clauir, aj Brasil iruqʼor: «Noq xqabʼan kaxaro chuwach i waqʼiibʼ haabʼ xa peleeto woʼ naq inqaaj eh maʼ suq ta naq qakʼux. Xa reʼ laʼ noq reʼ Ivete xubʼan chi testigo reh Jehová, chaqʼlaam naq chik eh wilik naq chik ruqʼunil. Reʼ i xujal pan rukʼachariik xukoʼleej riij i qakaxarohiil».

•   Reʼ Agness, aj Zambia iruqʼor: « Noq reʼ inubʼahiil, Chansa, xutoqʼaaʼ tijinik kuukʼ taqeh testigo reh Jehová, reʼ hin maʼ xponik ta chi nuwach. Maj xnukapaaj chi reʼ keh inkichʼaq naq taqeh i familia. Xa reʼ laʼ xnukoj rehtaal chi reʼ i Santo Laj Huuj xojrutoʼbʼeej pan qakaxarohiil.

 Eh noq inqabʼan i qʼoroj kʼuhbʼaal inqakʼuhtaaj woʼ keh i qakaʼjaah chi reʼ i Santo Laj Huuj ne qojrutobʼeej ruukʼ taqeh i naʼojbʼal wilih:

•   Rusikʼariik chi korik ajwach aj uukʼ naqabʼanam kaxaro

•   Rukuyariik taqeh i kʼaxkilal kichalik ruukʼ i peet haabʼ reh i kaxarohiil

•   Rukʼamariik qiibʼ chi korik ruukʼ i rutuut rajaaw i qehkʼeen oon i qabʼahiil

•   Rukojariik chi korik i tumiin

•   Chi maʼ ne ta imbʼan choqinik iibʼ

•   Rukuyariik taqeh qamahk chi qawach

•   Ruyeʼariik taqeh kinaʼojbʼal taqeh halakʼun

 Wilik pech jeʼ reʼ inkʼularik. Jenaj huuj reh i molaabʼ Sofres reʼ xutzʼir riij i wilih pan 1998, iruqʼor chi jenaj reh i veinte chi kaxarohiil xureq kʼaxkilal noq reʼ i ruchʼihiil xokik chi testigo reh Jehová.

 Reʼ i Jesús ruqʼorom naq chik cho chi reʼ taqeh rajtahqaneel wilik pech na naq ruwihʼiik kikaxkilaal ruukʼ i kifamilia (Mateo 10:32-36). Reʼ Will Durant, reʼ rutzʼir riij i xkʼularik cho, iruqʼor chi noq reʼ taqeh aj najtir Roma wilik naq kajaawriik chi kinaah i tokoom tinamit, inkapebʼjik naq chi «reʼ i cristianismo iruchʼaq naq taqeh i familia». a Eh yuʼnaak jeʼ woʼ reʼ inkiqʼor chi kiij taqeh testigo reh Jehová. Xa reʼ laʼ, ¿reʼ na taqeh i testigo reh Jehová inkibʼan chi ne inwihʼik choqinik iibʼ?

 Reʼ i Tribunal Europeo reh Derechos Humanos xuqʼor i wilih noq xkiqʼor chi reʼ taqeh i testigo reh Jehová inkichʼaq taqeh i familia: Reʼ taqeh familiar maʼ reʼ ta testigo reh Jehová taqeh inkitoqʼaaʼ i kʼaxkilal, ruum chi «maʼ imponik ta chi kiwach chi reʼ taqeh i kifamiliar ne inkijal i kinimanik eh ne kiʼokik chi testigo reh Jehová». Reʼ Tribunal xuqʼor: «Reʼ reʼ i kaxkilal inkikʼul taqeh familia i maʼ jenaj ta wach i kinimanik eh je woʼ reʼ inkʼularik kuukʼ taqeh testigo reh Jehová». b Atoobʼ ta maʼ holohik ta ne qojkilow, reʼ hoj testigo reh Jehová inqabʼan iruqʼor i texto wilih: «Eh wilaʼ awach xbʼanik tiʼ kʼaxik taq aweh, maaqʼaj taq wach reh. [...] cha chop taq akʼux chi kʼacharik pansuqkiil kʼuxliis chi kixilak taqe aawas achaaqʼ» (Romanos 12:17, 18).

 Reʼ taqeh testigo inqakʼam nah iruqʼor i Santo Laj Huuj chi naqabʼanam kaxaro xa ruukʼ woʼ «jinoʼq i aj nimaneel». Reʼ i wilih iraaj ruqʼorom chi naqabʼanam kaxaro xa ruukʼ jenoʼ ajnimaneel testigo reh Jehová (1 Corintios 7:39). Reʼ i Dios iraaj chi xa suq qakʼux ruum xuyeew qeh i kʼuhbʼaal wilih. Jenaj huuj xelik pan 2010, reʼ rubʼihnaal Journal of Marriage and Family iruqʼor chi «reʼ taqeh i kaxaro jenaj wach i kinimanik» inkikʼam kiibʼ chi korik. c

 Xa reʼ laʼ, reʼ taqeh i testigo maʼ inkiqʼor ta keh i kiponik pan kimolaabʼ chi ne inkichʼaq kiibʼ kuukʼ i kuchʼihiil maʼ reʼ ta testigo. Reʼ i Santo Laj Huuj irukʼuhtaaj: «Reʼ hin kinqʼorik taq reje aweh i wili, maʼ reʼ ta rukʼuhbʼaal i QaJaaw: chi wilaʼ wilik jinoʼq i hermano taq chaxilak maʼ reʼ ta aj nimaneel i rehkʼeen, maʼ ruchʼaq irukaxaro ruukʼ, wilaʼ reʼ i rehkʼeen i rukʼul wach i kʼacharik ruukʼ chi jeʼ reʼ. Eh wilaʼ wilik jinoʼq i hermana maʼ reʼ ta aj nimaneel i rubʼahiil, eh i rukʼul-oq rukʼux i kʼacharik chi jeʼ reʼ ruukʼ i rehkʼeen, reʼ hermana reʼ reʼ maa rukanaaʼ i rubʼahiil» (1 Corintios 7:12, 13). Reʼ hoj inqanimaj i kʼuhbʼaal wilih.