Reʼ i kikʼamwik bʼeeh pan rutinamiit i Jehová jenaj tzuhbʼ chi ajnimaneel kow taqeh pan uxlabʼal inkibʼehsaj i molaabʼ keh taqeh testigo reh i Jehová chi jun suut i wach akʼal. Kiʼibʼ wach i kamanik inkibʼan:

•   Inkil nikʼwach kʼahchiʼ rukorsjiik taqeh i naʼojbʼal reh i Santo Laj Huuj reʼ nakelik chupaam taqeh qahuuj eh chupaam taqeh qamoloj iibʼ eh jeʼ woʼ i narukʼuhtjiik chupaam taqeh tijinbʼal keh taqeh testigo reh Jehová (Lucas 12:42).

•   Inkil i kamanik inkibʼan taqeh testigo reh Jehová chi jun suut i akʼal. Inkil i kamanik reh qʼoroj kʼuhbʼaal eh inkil nikʼwach inkojarik i toobʼinik ruukʼ tumiin inkiyew taqeh kʼachareel.

 Reʼ kikʼamwik bʼeeh pan rutinamiit i Jehová inkikʼam keh ruukʼ i ehtalil xkikanaaʼ taqeh apóstol eh taqeh kʼamal bʼeeh wilkeebʼ ar Jerusalén pan peet siglo. Reʼ keh wilik taqeh aajwaal wach xkichih reh kilarik taqeh molaabʼ (Hechos 15:2). Reʼ taqeh kikʼamwik bʼeeh pan rutinamiit i Jehová eh taqeh xikʼamwik bʼeeh najtir maʼ reʼ te keh kiʼehchanik reh i rutinamiit i Jehová. Reʼ keh intzʼir riij i Santo Laj Huuj reh rusikʼariik kinaʼojbʼal eh inkinimaj chi reʼ Jehová xukoj i Jesús chi kʼamal bʼeeh chi naah i molaabʼ (1 Corintios 11:3; Efesios 5:23).

 Reʼ taqeh kikʼamwik bʼeeh pan rutinamiit i Jehová reʼ taqeh i wilih: Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Rumph, Jacob, Mark Sanderson, David Splane eh Jeffrey Winder. Chi kunchelaal kikamanik pan kiyeʼaabʼ taqeh testigo reh Jehová ar Warwick (Nueva York).

 Reʼ taqeh i kikʼamwik bʼeeh pan rutinamiit i Jehová kikanaam waqiibʼ tzuhbʼ taqeh hermano reh rilariik i reh reh wach kamanik inbʼanarik pan rutinamiit i Jehová. Chi kijuʼjunaal kitoobʼinik kuukʼ i juʼjun chi tzuhbʼ wilih.

•   Reʼ kiʼilwik reh i jun tzuhbʼ chi kʼamal bʼeeh. Inkil nikʼwach nakitobʼeem taqeh testigo reh kikoʼljiik chuwach taqeh qʼatal qʼorik ruum i kinimanik, inkil woʼ nikʼwach nakitoobʼinik noq inkʼularik i kowlaj jabʼ oon elel haʼ, noq inwihʼik jenoʼ kʼaxkilal iruyeew pan tiʼ kʼaxik jenoʼ testigo reh Jehová eh noq maʼ inyeʼarik ta qʼabʼ keh chi ne inkibʼan i nimanik.

•   Reʼ kiʼilwik reh i familia Betel. Inkil chuʼnchel i kamanik inbʼanarik pan Betel, jeʼ rukabʼ taqeh i kikamanik chupaam taqeh sucursal keh taqeh testigo reh Jehová.

•   Reʼ kiʼilwik reh i rehsjiik taqeh huuj. Inkil i kamanik inbʼanarik ruukʼ i rehsjiik eh rupuhkaaljiik taqeh qahuuj isimaj pan Santo Laj Huuj, inkil woʼ i kamanik reh rukorsjiik taqeh yeʼaabʼ reh moloj iibʼ, taqeh yeʼaabʼ reh rikʼsjik taqeh qahuuj pan tokoom qʼorbʼal eh taqeh sucursal.

•   Reʼ kiʼilwik reh i qʼoroj kʼuhbʼaal. Inkil eh inkitus wach nikʼwach narubʼanariik i qʼoroj kʼuhbʼaal chi riij i runimaal rajaawriik i Dios (Mateo 24:14).

•   Reʼ kiʼilwik reh i kʼuhtanik. Inkamanik chi riij i kʼuhtanik inyeʼarik chupaam taqeh moloj iibʼ, chupaam taqeh tijinbʼal eh iril taqeh audio eh video.

•   Reʼ kiʼilwik reh intzʼihbʼjik wach huuj. Irukorsaj taqeh inelik chupaan taqeh qahuuj eh inelik pan qayeʼabʼ reh Internet eh irilow i kamanik inbʼanarik reh jalal qʼorik.

 Ruukʼ i kamanik inkibʼan ruukʼ taqeh i juʼjun tzuhbʼ, reʼ taqeh juʼjun reh i kikʼamwik bʼeeh pan rutinamiit i Jehová inkimol kiibʼ rajlaal xamaano reh rutzʼirariik riij chajariik i aajwaal wach chi reh i rutinamiit i Jehová. Chupaam taqeh moloj iibʼ wilih inkitzʼir riij iruqʼor i Santo Laj Huuj eh inkikanaaʼ chi reʼ santo laj uxlabʼal ne inkʼamwik kibʼeeh. Pan jenaj wach kʼuxliis inkichih wach chajariik nakibʼanam (Hechos 15:25).

 Reʼ juʼjun chi tzuhbʼ aj ilool, reh i kikʼamwik bʼeeh pan rutinamiit i Jehová kitoobʼjiik ruum taqeh ajnimaneel korik wach kikʼux eh kikorsam kiibʼ chi korik reh rubʼanariik i juʼjun chi kamanik inyeʼarik keh (1 Corintios 4:2). Reʼ taqeh ajtoobʼineel wilih inkimol kiibʼ rajlaal xamaano kuukʼ taqeh juʼjun tzuhbʼ. Atoobʼ ta reʼ keh maʼ inkichih ta chajariik narubʼanariik, inkiqʼor chajariik inkikapaaj eh inkiyeew i kiqʼorbʼal chi riij i kʼahchiʼ rutzʼirariik riij, inkibʼan chajariik xkichih i juʼjun tzuhbʼ eh inkil nikʼwach kʼahchiʼ reliik i kamanik kʼahchiʼ rubʼanariik. Reʼ kikʼamwik bʼeeh pan rutinamiit i Jehová wilik pech inkipahqaaj woʼ reh taqeh ajtoobʼineel chi ne kiʼooj chi rilariik taqeh testigo reh tokoom yeʼaabʼ oon wilik pech inkipahqaaj chi neʼ kiwihʼik pan moloj iibʼ inbʼanarik jenaj pech chuwach i haabʼ oon chupaam taqeh i graduación reh Galaad.