Reʼ taqeh testigo reh Jehová inqakowej qakʼux reh rubʼanariik i xukʼuhtaaj i Jesús eh reʼ xkikʼam naah taqeh rajtahqaneel. Chupaam i wilih inkʼutunik chajariik taqeh inqakoj wach.

1.   Reʼ Dios. Xa reʼ inqaloqʼej, nim rajaawriik eh ajtzʼuhkrisaneel reh chuʼnchel i wilik. Reʼ rubʼihnaal Jehová (Salmo 83:18; Apocalipsis 4:11). Reʼ reh i ruDios i Abrahán, Moisés eh i Jesús (Éxodo 3:6; 32:11; Juan 20:17).

2.   Reʼ Santo Laj Huuj. Inqakoj wach chi ruqʼorbʼal i Dios reh taqeh kʼachareel (Juan 17:17; 2 Timoteo 3:16). Reʼ inqakoj wach inelik cho chupaam taqeh 66 chi huuj wilik reh, iraaj ruqʼorom reʼ Najtir kʼuhbʼaal eh i Akʼ kʼuhbʼaal. Reʼ ajkʼuhtaneel Jason BeDuhn xqʼorik chi riij i wilih noq xutzʼihbʼaaj chi reʼ taqeh testigo reh Jehová «inkikoj wach eh inkikʼam naah i wilik pan Santo Laj Huuj, maʼ inkisaj ta eh xa reʼ woʼ i manlik korik inkiqʼor». a

    Atoobʼ ta inqakʼam naah chuʼnchel iruqʼor i Santo Laj Huuj, maʼ inqatahqeej ta i runaʼojbʼal jenoʼ winaq. Inkʼutinik chi reʼ taqeh ehtalil wilik chupaam i Santo Laj Huuj wilik pech xa jalwaach taqeh jeʼ aj reʼ maʼ ne ta inqaqʼor chi xkʼularik chi korik (Apocalipsis 1:1).

3.   Reʼ Jesús. Inqakʼam naah reʼ kʼuhtunik xukanaaʼ qeh i Jesús, eh inqayeew ruloqʼil ruum chi reʼ reh i qajkoʼloom eh reʼ i rakʼuun i Dios (Mateo 20:28; Hechos 5:31). Reʼreʼ irukʼuhtaaj chi hoj ajnimaneel (Hechos 11:26). Eh reʼ Santo Laj Huuj maʼ irukʼuhtaaj ta chi reʼ Jesús reʼ ta naq i Dios reʼ nim rajaawriik ni xa ta irukʼam riibʼ ruukʼ inkikʼuhtaaj taqeh iglesia chi riij i Trinidad (Juan 14:28).

4.   Reʼ runimaal rajaawriik i Dios. Reʼreʼ jenaj ajaawriik pan taxaaj, maʼ reʼ ta chi wilik ta naq pan kanima taqeh ajnimaneel. Narisam taqeh wilik kajaawriik chi taqʼanik wach akʼal eh reʼ Dios narubʼanam chi ne inooj eloq wach irukapaam chi reh i akʼal (Daniel 2:44; Mateo 6:9, 10). Reʼ wilih maʼ najt ta chik wilik cho, ruum chi reʼ taqeh qʼorooj cho rubʼiral pan Santo Laj Huuj iruqʼor chi kʼacharik chik inqabʼan pan «rukuxiik taqeh qʼiij» (2 Timoteo 3:1-5, TNM; Mateo 24:3-14).

    Reʼ Jesús reey chupaam i runimaal rajaawriik i Dios. Xokik chi reyiil pan haabʼ 1914 (Apocalipsis 11:15).

5.   Reʼ koʼlbʼaal. Intyoox reh chi reʼ Jesús xuyeew i rukʼachariik chi mayiij, reʼ taqeh kʼachareel ne kiʼelik chupaam i mahk eh ruchʼihiil i kimik (Mateo 20:28; Hechos 4:12). Reh chi nakikʼulum i kooch wilih ko ruman chi nakikojom i kikojbʼaal ruukʼ i Jesús, nakijalam i kikʼachariik eh naruqajik kihaaʼ (Mateo 28:19, 20; Juan 3:16; Hechos 3:19, 20). Reʼ taqeh rubʼanooj i kʼachareel irukʼuhtaaj chi wilik rukojbʼaal (Santiago 2:24, 26). Xa reʼ laʼ, reʼ koʼlbʼaal maʼ irukʼul ta chi qeh, ne laʼ inqakʼul ruum i «rotobʼil i Dios» eh i ruchaqʼlamiil (Gálatas 2:16, 21).

6.   Reʼ taxaaj. Reʼ Jehová, reʼ Jesús ruchʼihiil taqeh ángel korik wach kikʼux, kikʼachariik ar pan taxaaj chi uxlabʼal (Salmo 103:19-21; Hechos 7:55). b Xa 144 mil chi kʼachareel nakojiik pan taxaaj chi taqʼanik ruukʼ i Jesús pan runimaal rajaawriik i Dios (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Reʼ akʼal. Reʼ Dios xutzʼuhkrisaj (xutiqʼaaʼ) reh chi reʼ taqeh kʼachareel nakikʼachariik ar chi juneliik (Salmo 104:5; 115:16; Eclesiastés 1:4). Reʼ reh narukuxisam taqeh kʼachareel reʼ kibʼirinik chuwach eh narubʼanam chi maʼ ne ta chik kiyowabʼjiik eh chi nakikʼachariik chi juneliik noq xa holohik chik i wach akʼal (Salmo 37:11, 34).

8.   Reʼ maʼ holohik ta laj bʼanooj eh i tiʼ kʼaxik. Reʼ Santo Laj Huuj iruqʼor rubʼehel qeh, chi jenaj ángel xuqʼehtaaj riibʼ chuwach i Dios. Jeʼ aj reʼ noq xokik cho i kʼahbʼilaal eh ruchʼihiil i tiʼ kʼaxik (Juan 8:44). Reʼ ángel wilih noq xuqʼehtaaj riibʼ chuwach i Dios xnabʼjik chi riij chi reʼ reh i Ajyahm eh Subʼuul, xuchuk qʼorik keh taqeh peet kʼachareel reh chi ne inkibʼan iraaj i reh. Reʼ taqeh kʼaxkilal xchalik chi naah taqeh kih kimaam xkowjik wach (Génesis 3:1-6; Romanos 5:12). Jeʼ aj reʼ, reh rukorsjiik wach i kʼaxkilal xuyeew i Ajyahm noq xuchuk qʼorik, ruum aj reʼ, reʼ Dios xuyeew qʼabʼ chi ne inwihʼik i mahk ruchʼihiil i tiʼ kʼaxik, xa reʼ laʼ maʼ na ta ruyeʼem qʼabʼ chi ne inwihʼik chi juneliik i tiʼ kʼaxik.

9.   Reʼ i kimik. Noq jenoʼ kʼachareel inkimik, maʼxta chik irikʼraaj (Salmo 146:4; Eclesiastés 9:5, 10). Reʼ taqeh kamnaq maʼ kʼahchiʼ ta kitojom wach i kimahk pan qʼaaqʼ.

    Reʼ taqeh kʼihaal kʼachareel reʼ kamnaq chik taqeh na woʼ chik kuktik cho, noq na kuksjik ruum i Dios (Hechos 24:15). Jeʼ woʼ chik, reʼ nakuksjiik cho ruum i Dios wilaʼ maʼ xkikoj wach taqeh rukʼuhbʼaal, narusachariik kiwach chi juneliik (Apocalipsis 20:14, 15).

10.   Reʼ familia. Jeʼ rukabʼ noq xutiqʼaaʼ cho wach i Dios pan rutohqʼiik cho i kʼacharik reʼ kaxaro looqʼ chi reh jenoʼ ixoq eh jenaj winaq noq inkikʼulaaʼ wach i kikʼachariik, eh reʼ ruwiiʼ chi ne inkichʼaq kiibʼ noq ne inwihʼik kʼoyomal chi kiwach (Mateo 19:4-9). Chʼiklik qakʼux chi reʼ taqeh kʼuhbʼaal iruyeew qeh i Santo Laj Huuj xti iruyeew qanaʼojbʼal eh manlik chi qeh eh irutobʼeej taqeh familia reh chi ne kiwihʼik pan suqkiil kʼuxliis (Efesios 5:22–6:1).

11.   Reʼ qaloqʼinik. Maʼ inqaloqʼej ta wach i cruz ni maʼ woʼ tiqʼimaj tyoox (Deuteronomio 4:15-19; 1 Juan 5:21). Reʼ taqeh wilih til aajwaal wach pan qaloqʼinik ruukʼ i Dios:

    •   Qojqʼorik pan tiij ruukʼ i Dios (Filipenses 4:6).

    •   Inqil wach eh inqatijej qiibʼ chupaam i Santo Laj Huuj (Salmo 1:1-3).

    •   Qojkapebʼinik chi riij inqatijej pan Santo Laj Huuj (Salmo 77:12).

    •   Inqamol qiibʼ reh rubʼanariik qatiij, reh tijinik chi riij i Santo Laj Huuj, reh tzʼuyunik (bʼichinik), qojqʼorik chi riij i qakojbʼaal eh inqayeew qakowiil chi qawach (Colosenses 3:16; Hebreos 10:23-25).

    •   Inqaqʼor i kʼuhbʼaal chi riij i «runimaal rajaawriik i Dios» (Mateo 24:14).

    •   Inqatobʼeej taqeh aajwaal wach chi keh kitoobʼjiik (Santiago 2:14-17).

    •   Inqatiqʼaaʼ eh inqakʼax taqeh yeʼaabʼ reh moloj iibʼ eh ruchʼihiil taqeh yeʼaabʼ inkojarik reh chi reʼ qakamaj ne inabʼjik chi jun suut i akʼal (Salmo 127:1).

    •   Qojkamanik chi kitoobʼjiik taqeh inkikʼul cho i tiʼ kʼaxik (Hechos 11:27-30).

12.   Reʼ rutinamiit i Jehová. Wilkooj pan juʼjun taqeh molaabʼ. Pan juʼjun chi molaabʼ wilik juntzuhbʼ chi testigo inqʼorarik keh kʼamal bʼeeh, reʼ keh maʼ jeʼ ta rukabʼ taqeh kʼamal bʼeeh pan tokoom iglesia maʼ inkikʼul ta jenoʼ kitojbʼaal (Mateo 10:8; 23:8). Maʼ inqayeew ta i diezmo eh maʼ inqapahqaaj ta tumiin (2 Corintios 9:7). Reʼ qakamaj inqabʼan ruukʼ taqeh toobʼinik ruukʼ tumiin inkiyeew ruukʼ kikʼux taqeh testigo reh Jehová.

     Juntzuhbʼ chi ajnimaneel til chʼiklik kikʼux ehtʼalimaj kiwach chi Reʼ kikʼamwik bʼeeh pan rutinamiit i Jehová, irukʼam rubʼeeh i kikamaj taqeh testigo rehJehová ko pan kiyeʼaabʼ (Mateo 24:45).

13.   Pan jenaj wach kʼuxliis wilkooj. Xa ahaʼ paʼ wilkooj, chi qunchelaal xa jenaj wach inqanimaj (1 Corintios 1:10). Inqakowej qakʼux chi maʼ tokoom ta rilariik inqabʼan taqeh kʼachareel ruum i kibʼehomaal, ruum i kitinamiit, i kiwiiʼ eh i kiqʼorbʼal (Hechos 10:34, 35; Santiago 2:4). Xa reʼ laʼ, reʼ jenaj wach kʼuxliis wilih iruyeew qʼabʼ chi kijuʼjunaal taqeh testigo ne inkichih i holohik ruukʼ i kikapebʼaal tijimaj ruum i Santo Laj Huuj (Romanos 14:1-4; Hebreos 5:14).

14.   Reʼ qawiiʼ. Inqakʼuhtaaj i kʼaxooj iibʼ chi qawach ruukʼ chuʼnchel inqabʼan (Juan 13:34, 35). Maʼ inqabʼan ta rubʼanariik reʼ maʼ imponik ta chuwach i Dios. Ruum inqayohbʼalej qiibʼ chi maʼ ne ta inqakoj i kikʼ. Jeʼ rukabʼ noq maʼ inqakoj ta pan qatibʼkaal (Hechos 15:28, 29; Gálatas 5:19-21). Hoj kʼachareel xa tuqlik wach qakʼux eh maʼ qojooj ta chi qʼaqʼinik (Mateo 5:9; Isaías 2:4). Inqakʼaam naah inkiqʼor taqeh kitaqʼanik nah tinamit xa reʼ laʼ maʼ nikʼ naah chuwach i reh i Dios (Mateo 22:21; Hechos 5:29).

15.   Nikʼwach inqil taqeh kʼachareel. Reʼ Jesús xuqʼor: «Chakʼax aawas achaaqʼ jeʼ rukabʼ noq inakʼax awiibʼ i hat». Eh xuqʼor woʼ chi reʼ taqeh i rajnimaneel «maʼ jenaj ta kiwach ruukʼ i wach akʼal» (Mateo 22:39; Juan 17:16). Jeʼ reʼ noq, qabʼan i holohik keh chuʼnchel i kʼachareel. Reʼ hoj maʼ inqatahqeej ta i rutaqʼaniik i winaq eh i política ni xata  inqamin qiibʼ kuukʼ taqeh tokoom nimanik (Gálatas 6:10; 2 Corintios 6:14). Xa reʼ laʼ, inqakanaaʼ chi reʼ taqeh kʼachareel inkichih inkaaj kibʼanaam (Romanos 14:12).

 Mi ko wilik apahqanik chi riij inkikoj wach taqeh testigo reh Jehová, ne irubʼan chi ne tiʼokik panqayeʼaabʼ reh Internet, eh ne woʼ irubʼan chi ne inatzʼihbʼaaj ruje pan sucursal oon tiponoq pan jenoʼ moloj iibʼ pan qayeʼaabʼ reh moloj iibʼ pan atinimiit oon tiqʼoroq ruukʼ jenoʼ Testigo reh Jehová pan atinamiit.