•  ¿Nikʼwach inkichih taqeh testigo reh Jehová ahaʼ wilik taqeh i ninqʼiij nakininqʼijem wach?

•  Atoobʼ ta wilik taqeh ninqʼiij maʼ inkininqʼijej ta wach taqeh testigo reh Jehová, ¿iraaj na ruqʼorom chi maʼ inkaaj ta chik wach i kifamilia?

•  ¿Maʼ inkiyeew ta na qʼabʼ taqeh Testigo reh chi reʼ taqeh kʼachareel wilik i ne inkininqʼijej wach?

 Noq ko majaaʼ inkibʼan jenaj ninqʼiij, re’ taqeh testigo reh Jehová peet inkilow chajariik iruqʼor i Santo Laj Huuj. Wilik taqeh i ninqʼiij maʼ inkikʼam ta kiibʼ ruukʼ iruqʼor i Santo Laj Huuj, ruum ajreʼ, reʼ taqeh Testigo maʼ inkininqʼijej ta wach. Xa reʼ laʼ, wilik juʼjun taqeh i ninqʼiij ahaʼ wiiʼ reʼ juʼjun chi ajnimaneel naruchihim mi naruninqʼijem wach oon maʼchih, xa reʼ laʼ, ko ruman chi ne inqakapaaj mi reʼ naqabʼanam ne irukanaa’ chi saq wach i qakapeew chuwach i Dios, jeʼ woʼ chi kiwach i tinamit (Hechos 24:16).

 Qilow juʼjun taqeh i pahqanik inkibʼan taqeh testigo reh Jehová reh runabʼjiik mi nakininqʼijem jenoʼ ninqʼiij oon maʼchih. a

•   Reʼ ninqʼiij naqabʼanam, ¿mi iruchop riibʼ ruukʼ i Santo Laj Huuj?

   Naʼojbʼal reh i Santo Laj Huuj: «Eh jeʼ woʼ wili i xuqʼor i QaJaaw Dios: Eleen taq chi kixilak i maʼ reʼ ta taqe aj nimaneel, maa aʼan taq jinaj awach kuukʼ. Eh maa aʼan taq chik aweh i chʼuwaʼ wach naʼojbʼal» (2 Corintios 6:15-17).

   Reh chi ne qojʼelik chi kixilak taqeh i chʼuwaʼ wach naʼojbʼal, reʼ taqeh na’ojb’al maʼ inkikʼam ta kiibʼ ruukʼ iruqʼor i Santo Laj Huuj, reʼ hoj testigo reh Jehová maʼ inqabʼan ta taqeh ninqʼiij jeʼ rukabʼ taqeh i wilih.

   Reʼ taqeh ninqʼiij inbʼanarik keh taqeh i korsamaj tyoox. Reʼ Jesús jeʼ wilih i xuqʼor: «Xa reʼ woʼ QaJaaw Dios naa rulooqʼjiik, eh xa reʼ woʼ reh naa rukamanjiik wach» (Mateo 4:10). Reʼ taqeh testigo reh Jehová inqakʼam qeh ruukʼ i kʼuhbʼaal wilih eh maʼ inqaninqʼijej ta wach i navidad ni xata reʼ i domingo de resurrección, ni xa ta reʼ taqeh ninqʼiij inbʼanarik pan peet qʼiij reh mayo, ruum chi reʼ taqeh ninqʼiij wilih inkichop kiibʼ ruukʼ i ruloqʼjiik taqeh tyoox. Eh reʼ taqeh Testigo maʼ kiwihʼik ta woʼ chupaam taqeh i ninqʼiij wilih:

  •  Kwanza. Jenaj huuj reh i qaqʼijil iruqʼor chi reʼ rubʼihnaal i ninqʼiij wilih «inchalik ruukʼ taqeh qʼorik swahili matunda ya kwanzaa, reʼ iraaj ruqʼorom (reʼ taqeh peet wachinik)» eh re’ ninq’iij wilih inb’aan «jeʼ rukabʼ taqeh ninqʼiij inbʼaan ar África noq inelik cho i peet wach i kitik». Atoobʼ ta wilik inkiqʼor chi reʼ ninqʼiij wilih maʼ iruchop ta riibʼ ruukʼ i nimanik, jenaj huuj iruqʼor chi reʼ ninqʼiij wilih jenaj wach ruukʼ jenaj ninqʼiij inkibʼan ar África «ahaʼ wiiʼ inkiqʼahsaj taqeh i peet wach i kitik keh taqeh tyoox eh keh taqeh i kimaam katiʼt i xikimik chik». Eh iruqʼor chi reʼ ninqʼiij wilih eh reʼ ninqʼiij inkibʼan ar África inkikʼam kiibʼ, ruum chi «inkibʼan taqeh i ninqʼiij wilih reh rutyooxjiik ruum i kuxisanik inyeʼarik keh kuum i kimaam katiʼt reʼ i xikimik chik» (Encyclopedia of African religion [Jenaj huuj keh taqeh iglesia ar África]).

  •  Ninqʼiij reh i medio otoño oon ninqʼiij reh i si’qil. Reʼ Huuj Otras culturas, otras formas de vida, iruqʼor chi reʼ wilih jenaj ninqʼiij «ahaʼ wiiʼ reʼ taqeh kʼachareel inkiyeew i kimayij reh i poh». Chupaam i ninqʼiij wilih «reʼ taqeh ixoq i wilkeebʼ pan paat inkixukʼaaʼ kiibʼ [...] chuwach i tyoox wilih». (Religions of the World​—A Comprehensive Encyclopedia of Beliefs and Practices [Reʼ taqeh nimanik wilkeebʼ chi naah i wach akʼal: Jenaj huuj inqʼorik chi riij taqeh inkikoj wach eh inkibʼan taqeh nimanik]).

  •  Nowruz. «Reʼ ninqʼiij wilih inchalik ruukʼ i kinimanik taqeh aj Persia reh i najtir cho qʼiij eh re’ ninq’iij wilih q’e’ looq’ chupaam i kicalendario taqeh Persa [...] Inkapeb’jik naq chi reʼ uxlab’al reh i jabʼ irumin naq i uxlabʼal reh i kabʼlaj hora, (Rapithwin i rubʼihnaal), reh chi ne irumin riibʼ riʼsil akʼal chupaam taqeh i poh noq inchalik i jabʼ, eh chupaam i qʼiij Nowruz inkik’ul naq i uxlabʼal wilih ruukʼ jenaj ninqʼiij, jeʼ rukabʼ naq inkibʼan pan kinimanik taqeh Persa» (Organización de las Naciones Unidas para la Educación, la Ciencia y la Cultura [Unesco]).

  •  Shab-e Yalda. Reʼ ninqʼiij wilih, inbʼaan noq inchalik i jabʼ eh «irukʼam riibʼ ruukʼ i loqʼinik inkibʼan noq inkiloqʼej wach i Mitra», reʼ tyoox reh i saqum (Sufism in the Secret History of Persia [Reʼ inqʼorarik chi riij i nimanik reh i tinamit Persia]). Inqʼorarik woʼ hoq chi reʼ ninqʼiij wilih iruchop riibʼ ruukʼ i loqʼinik inkiyeew reh i qʼiij taqeh aj Roma eh taqeh aj Grecia. b

  •  Ruqʼijiil i tyooxinik. Reʼ wilih jeʼ rukabʼ i ninqʼiij reh Kwanza, inchalik ruukʼ taqeh ninqʼiij inkibʼan cho najtir reh ruloqʼjiik taqeh tyoox noq inelik naq wach taqeh i kitik. Noq xikʼik taqeh qʼiij «reʼ ninqʼiij wilih inkibʼan naq chik taqeh iglesia» (A Great and Godly Adventure​—The Pilgrims and the Myth of the First Thanksgiving [Jenaj holohik laj naʼojbʼal inbʼaan reh loqʼinik: Reʼ kiʼooj pan tokoom yeʼaabʼ reh loqʼinik eh reʼ inqʼorarik chi riij i peet qʼiij reh i ninqʼiij Ruqʼijiil i tyooxinik]).

   Reʼ taqeh i ninqʼiij inkibʼan chi ne tiyoʼjik oon reʼ inkikoj wach i wilik jenaj tyoox reh i bʼehomal. Reʼ Santo Laj Huuj iruqʼor chi reʼ inkiloqʼej «i rut’iosil i bʼehomal» reʼ keh wilkeebʼ chi kixilak i inkikanaaʼ i Jehová (Isaías 65:11). Ruum aj reʼ, reʼ taqeh testigo reh Jehová maʼ inkibʼan ta taqeh i ninqʼiij wilih:

  •  Iván Kupala. «Reʼ taqeh kʼachareel inkininqʼijej wach i wilih, inkikapaaj chi pan ruqʼijiil i Iván Kupala chuʼnchel i wilik nah akʼal irisaj i ransil eh mi jenoʼ kow riibʼ eh wilik rusuerte ne irukʼul i aansil wilih» (The A to Z of Belarus [Reʼ A ko pan Z reh i yeʼaabʼ Bielorrusia]). Inkibʼan naq i wilih reh runinqʼijiik i peet qʼiij reh i si’qil. Xa reʼ laʼ, jeʼ rukabʼ irukʼuhtaaj jenaj enciclopedia, «reʼ taqeh iglesia xkitikʼaaʼ kibʼanam i ninqʼiij wilih noq k’ih xkik’ulaa’ i nimanik eh xkiqʼor chi reʼ wilih [reʼ runinqʼiij i San Juan Bautista]» (Encyclopedia of Contemporary Russian Culture [Enciclopedia chi riij i tinamit Rusia]).

  •  Reʼ akʼ haabʼ reh i poh (Akʼ haabʼ keh taqeh chino oon Akʼ haabʼ keh taqeh coreano). «Chupaam taqeh i qʼiij reʼreʼ, re taqeh familia eh chuʼnchel taqeh kʼachareel kiqajik chi kapebʼinik chi riij i holohik ne inkikʼul pan kikʼachariik, chi riij ruloqʼjiik taqeh tyoox eh taqeh uxlabʼal eh chi riij chi ne inwihʼik kibʼehomal chupaam i haabʼ chalik reh» (Mooncakes and Hungry Ghosts​—Festivals of China [Ninqʼiij keh taqeh chino: Wiʼk reh i poh eh keh taqeh uxlabʼal inkaaj kib’anam kiwaʼ]). Jeʼ reʼ noq, reʼ taqeh aj Corea noq inkininqʼijej wach i akʼ haabʼ, «inkiloqʼej i kimaam katiʼt, inkibʼan reh reh wach naʼojbʼal reh chi reʼ taqeh i maʼ atoobʼ laj uxlabʼal ne ki’ooj eh chi ne inwihʼik kisuerte chupaam i haabʼ chalik reh, eh inkisikʼ jenaj ehtalil reh runabʼjiik chajariik narukʼulariik chupaam i haabʼ chalik reh» (Encyclopedia of New Yearʼs Holidays Worldwide [Reh Enciclopedia chi riij i ninqʼiij reh i akʼ haabʼ junsut i akʼal]).

   Ninqʼiij ahaʼ wiiʼ inkikʼuhtaaj chi inkikoj wach chi reʼ anima maʼ inkimik ta. Reʼ Santo Laj Huuj iruqʼor chi reʼ anima inkimik (Ezequiel 18:4, TNM). Jeʼ reʼ noq, reʼ taqeh testigo reh Jehová maʼ inkibʼan ta taqeh ninqʼiij aha’ wii’ ink’uhtjik chi reʼ anima maʼ inkimik ta, jeʼ rukabʼ taqeh ninqʼiij wilih:

  •  Ruqʼijiil taqeh kamnaq. Jenaj huuj iruqʼor, chi chupaam i qʼiij wilih «reʼ taqeh kʼachareel inkʼulik pan kikʼux taqeh i xikimik chik». Reʼ huuj wilih iruqʼor woʼ hoq chi «chupaam i haabʼ 500 ko pan haabʼ 1,500 reʼ taqeh kʼachareel inkikoj naq wach chi reʼ taqeh kamnaq, reh rukʼuhtjiik kiibʼ keh taqeh i maʼ xikʼaxwik ta keh pan kikʼachariik, kikʼulik chi jeʼ jenaj uxlabʼal taqeh, chi jeʼ aj war taqeh, chi jeʼ jukuk oon sapo taqeh» (New Catholic Encyclopedia [Reʼ akʼ Enciclopedia keh taqeh católico]).

  •  Ninqʼiij reh i Ching Ming eh Ninqʼiij keh taqeh uxlabʼal inkaaj kiwaʼ. Chupaam taqeh i kiʼibʼ ninqʼiij wilih, reʼ taqeh k’achareel inkiyeew kiloqʼil i kimaam katiʼt. Jenaj huuj iruqʼor chi chupaam i Ninqʼiij Ching Ming, «inkiyeew i wiʼk haʼ eh inkikʼat i tumin reh chi reʼ taqeh kamnaq maʼ ne ta inkikuy kiwaʼ kihaaʼ eh chi ne inwihʼik kitumiin» (Celebrating Life Customs Around the World​—From Baby Showers to Funerals [Reʼ inkibʼan taqeh kʼachareel reh runinqʼijik i kʼachariik: reʼ ninqʼiij inkibʼan noq narasjik jenaj halakʼun eh reʼ inkibʼan noq inwihʼik jenoʼ kamnaq]). Reʼ huuj wilih iruqʼor chi re’ inkibʼan i ninqʼiij keh taqeh i uxlabʼal inkaaj kiwaʼ, inkikapaaj chi «chupaam i poh inkibʼan [i ninqʼiij reʼreʼ], chupaam i ak’ haabʼ noq muquun i poh, reʼ taqeh kʼachareel eh reʼ taqeh kamnaq inkireq kiibʼ. Jeʼ reʼ noq, inkibʼan chuʼnchel reh chi ne inkikʼam kiibʼ chi korik kuukʼ taqeh kamnaq eh inkiyeew kiloqʼil taqeh i kimaam katiʼt».

  •  Chuseok jenaj ninqʼiij inbʼaan ar Corea del Sur. Jenaj huuj iruqʼor, chi chupaam taqeh i ninqʼiij wilih keh taqeh coreano «inyeʼarik kiwaʼ kihaʼ reh i kanima taqeh kamnaq». Reʼ inkibʼan irukʼuhtaaj «chi inkikapaaj chi noq jenoʼ inkimik reʼ ranima maʼ inkimik ta» (The Korean Tradition of Religion, Society, and Ethics [Reʼ inkibʼan taqeh nimanik ar Corea eh reʼ inkibʼan pan kitinamiit taqeh kʼachareel]).

   Reʼ taqeh ninqʼiij inkichop kiibʼ ruukʼ i qʼijinik. Reʼ Santo Laj Huuj iruqʼor: «Maʼ tijej taq aweh i qʼijinik, maa qʼor taq chi awehtʼal taq chibʼih i naa rukʼulariik naa chubʼan maʼan taq aweh i warinik. Eh maʼ naa ta woʼ rojiik apahqam taq anaʼojbʼal kuukʼ i aj qʼiij. Jeʼ woʼ kuukʼ i kiqʼorinik reh i maʼ tobʼlaj Uxlabʼal, jeʼ woʼ kuukʼ i kiqʼorinik reh i kamnaq. R ʼ i QaJaaw Dios maʼ imponik ta kʼisinoq panaqʼwach i kibʼanik reh taqe i yiibʼ wach naʼojbʼal reʼ reʼ» (Deuteronomio 18:10-12). Reh chi maʼxta qilooj ruukʼ iqʼijinik, i runabʼjiik chi riij i qachʼuminaal, reʼ hoj testigo reh Jehová maʼ inqaninqʼijej ta wach i Halloween ni xa ta reʼ taqeh ninqʼiij wilih:

  •  Reʼ akʼ haabʼ cingalés eh Reʼ akʼ haabʼ tamil. «Reʼ inkibʼan chupaam i ninqʼiij wilih irukʼam riibʼ [...] ruukʼ juʼjun taqeh kamanik noq reʼ chʼumiil iruqʼor keh chi mi inkibʼan i wilih chupaam i junkʼaam reʼreʼ holohik nakeliik» (Encyclopedia of Sri Lanka [Enciclopedia reh Sri Lanka]).

  •  Songkran. Jenaj enciclopedia iruqʼor chi reʼ rubʼihnaal i ninqʼiij wilih inchalik ar Asia «inchalik ruukʼ i qʼorik sánscrita [...] reʼ iraaj ruqʼorom irukʼuyisaj riibʼ eh irujal riibʼ». Reʼ ninqʼiij wilih «irutoqʼaaʼ noq inokik i qʼiij chupaam i signo Aries» reʼ taqeh kʼachareel inkikapaaj chi reʼ wilih irutikʼaaʼ pan 21 reh marzo eh irukohlaaj pan 20 reh abril» (Food, Feasts, and Faith​—An Encyclopedia of Food Culture in World Religions [Wiʼk, ninqʼiij eh kojbʼal: Reʼ huuj inqʼorik chi riij i kʼuxbʼal reh taqeh nimanik jun suut i akʼal]).

   Reʼ taqeh ninqʼiij inkichop kiibʼ ruukʼ i rukʼuhbʼaal i Moisés, reʼ xkuxik wach ruukʼ i rukimiik i Jesús. Reʼ Santo Laj Huuj iruqʼor: «i najtir kʼuhbʼaal ar xkʼulik kuxoq wach i noq xkʼulik i Jesucristo» (Romanos 10:4). Korik chi reʼ taqeh ajnimaneel ko inkamanik keh i naʼojbʼal inkan pan rukʼuhbʼaal i Moisés, reʼ xyeʼarik reh i tinamit Israel. Xa reʼ laʼ, maʼ inkibʼan ta chik taqeh ninqʼiij inkibʼan naq taqeh aj Israel najtir, jeʼ rukabʼ i ninqʼiij reh i rukʼuliik i Sikʼooj wach, ruum chi reʼ taqeh ajnimaneel inkikoj wach chi reʼ Sikʼooj wach xkʼulik chik. Reʼ Santo Laj Huuj iruqʼor: «Chuʼnchel i naʼojbʼal reʼ reʼ, xa rehtalil pee chaloq i xti korik xkʼulik iloq koqʼuun, reʼ korik reʼ reʼ, reʼ Jesucristo» (Colosenses 2:17). Ruum i wilih eh ruum chi wilik taqeh ninqʼiij maʼ inkikʼam ta kiibʼ ruukʼ iruqʼor i Santo Laj Huuj, reʼ taqeh testigo reh Jehová maʼ inkibʼan ta taqeh ninqʼiij wilih:

  •  Janucá. Reʼ ninqʼiij wilih irubʼan chi ne inkʼulik pan kikʼux noq xkikohlaaj rukaʼpeech rukorsjiik i templo ar Jerusalén. Xa reʼ laʼ, reʼ Santo Laj Huuj iruqʼor chi reʼ Jesucristo reʼ chik i reh i rajaaw i kʼamal kibʼeeh ajtiij, reh jenaj yeʼaabʼ «xiikʼ naah loqʼil, maʼ reʼ ta kiyej-anik winaq, maʼ reʼ ta woʼ ayuʼ wach akʼal wilik» (Hebreos 9:11). Reʼ taqeh ajnimaneel inkikapaaj chi reʼ paat reh loqʼinik i wilik naq ar Jerusalén xjalarik wach ruum jenaj paat pan uxlabʼal reʼ iruqʼor i Hebreos.

  •  Rosh Hashaná. Reʼ peet qʼiij reh i haabʼ keh taqeh judío. Najtir cho qʼiij chupaam i ninqʼiij wilih inkiqʼahsaj naq i kʼatoj mayiij imponik naq chuwach i Dios (Números 29:1-6). Xa reʼ laʼ, reʼ Jesús reʼ Sikʼooj wach, xubʼan chi maʼ na ta chik kiyeʼem i mayiij (Daniel 9:26, 27). Ruum aj reʼ, reʼ taqeh i mayiij wilih maʼ ko ruman ta chik chuwach i Dios.

•   ¿Mi reʼ ninqʼiij nanubʼanam irubʼan chi ne kinkamanik kuukʼ taqeh tokoom nimanik?

   Reʼ naʼojbʼal reh i Santo Laj Huuj: «¿Mi eliik wach reʼ i runaʼojbʼal i aj nimaneel ruukʼ i maʼ reʼ ta aj nimaneel? ¿Mi rukʼul reʼ chi neen wihik tzʼaqoj tiyoox parupaat i kʼachlik Dios?» (2 Corintios 6:15-17).

   Reʼ taqeh testigo reh Jehová chaqʼlaam taqeh ruukʼ i reh reh wach kʼachareel eh inkikanaaʼ chi reʼ juʼjun ne iruchih iraaj rukojom wach, xa reʼ laʼ maʼ inqabʼan ta taqeh ninqʼiij ahaʼ wiiʼ reʼ taqeh nimanik inkixilakeej kiibʼ ruukʼ taqeh jeʼ rukabʼ taqeh ninqʼiij wilih.

   Reʼ taqeh ninqʼiij ahaʼ wiiʼ inkiyeew ruloqʼil jenoʼ kʼachareel oon jenoʼ qʼiij i qʼeʼ ko ruman chi kiwach taqeh nimanik reʼ inkibʼan chi reʼ taqeh kʼachareel jenaj wach kikʼux pan loqʼinik atoobʼ ta reh reh wach i kinimanik. Najtir cho qʼiij noq reʼ Dios xubʼan chi reʼ rutinamit ne inokik pan jenaj akʼal ahaʼ wiiʼ wilkeebʼ kʼachareel reh reh wach i kinimanik, xuqʼor keh i rajkamanoom: «Maʼ xta taq naa akʼulaam keh chi nee taq i na aʼn i hat. Eh maa loqʼej taq aweh i hat kitiyoox i keh. [...] Ruum wi aʼn taq jinaj awach kuukʼ, nee woʼ taq inaloqʼej i kitiyoox i keh, ruum i reʼ nee woʼ taq i naqʼebʼ awiibʼ i hat» (Éxodo 23:32, 33). Ruum aj reʼ reʼ taqeh testigo reh Jehová maʼ inkibʼan ta taqeh ninqʼiij wilih:

  •  Loi Krathong. Chupaam i ninqʼiij wilih keh taqeh aj Tailandia, «reʼ taqeh kʼachareel inkikorsaj taqeh i kokʼ chakach ruukʼ xaq chʼahn. Eh chupaam inkikoj taqeh candela oon incienso eh chi riij i reʼ inkiyeew pan haʼ. Inkapebʼjik chi reʼ taqeh kokʼ chakach wilih inkikʼam rejeh i maʼ holohik ta. Chupaam i ninqʼiij wilih inkʼulik pan kikʼux jenaj rehtalil i rooq i Buda xukanaaʼ chi chiiʼ i rooq haʼ». (Encyclopedia of Buddhism [Enciclopedia reh i budismo]).

  •  Ruqʼijiil i yotʼoj kʼuxliis chupaam i tinamit. Jenaj winaq inkamanik ruukʼ i ajabʼees nah tinamit xuqʼor pan jenaj huuj reh Papúa Nueva Guinea reʼ rubʼihnaal The National, xuqʼor chi reʼ taqeh kitoobʼinik chupaam i ninqʼiij wilih «inkikʼulaaʼ juʼjun taqeh naʼojbʼal reh i nimanik». Eh xuqʼor chi reʼ ninqʼiij wilih «irutobʼeej taqeh kʼachareel reh chi ne inwihʼik kinaʼojbʼal taqeh nimanik chupaam i tinamit».

  •  Vesak. Reʼ ninqʼiij wilih xti aajwaal wach chi keh taqeh kiloqʼinik reh i Buda. Ruum chi «inkʼulik pan kikʼux i raasjiik i Buda, reʼ saqominik xukʼul eh i rusahchiik wach taqeh reh reh wach kapebʼinik reʼ iruyeew tiʼkiil» (Diccionario reh taqeh religiones comparadas).

   Taqeh ninqʼiij inchalik pan reh reh wach nimanik reʼ i maʼ irukʼam ta riibʼ ruukʼ i Santo Laj Huuj. Reʼ Jesús xuqʼor keh taqeh ajkʼamal bʼeeh najtir cho qʼiij: «Maʼ na aʼn ta taq i ruqʼor i rukʼuhbʼaal i Dios ruum i rubʼanariik taq anaʼojbʼal atijem taq chaloq». Eh xuqʼor woʼ keh chi reʼ i loqʼinik inkibʼan maʼ manlik ta wach ruum chi reʼ kʼuhbʼaal inkikʼuhtaaj xa rukʼuhbʼaal i winaq (Mateo 15:6, 9). Ruum chi reʼ taqeh testigo reh Jehová inkibʼan iruqʼor i naʼojbʼal wilih, maʼ inkininqʼijej ta wach taqeh i ninqʼiij wilih:

  •  Epifanía (Timkat oon reʼ taqeh ajqʼiij). Chupaam i ninqʼiij wilih reʼ taqeh kʼachareel inkʼulik pan kikʼux noq reʼ taqeh aj ilool chʼumiil xiponik chi rilariik i Jesús noq ko reʼ asjik oon noq reʼ Jesús xuqahsaj ruhaaʼ. Jenaj huuj rubʼihnaal (The Christmas Encyclopedia [Enciclopedia reh i Raasjiik), iruqʼor chi reʼ ninqʼiij wilih «xubʼan chi reʼ taqeh ajnimaneel ne inkininqʼijej wach noq inmaxkʼinik taqeh uhtzʼubʼ, eh inkiyeew ruloqʼil taqeh dios reh taqeh rooq haʼ». Reʼ ninqʼiij keh taqeh etíope reʼ rubʼihnaal Timkat, jenaj ninqʼiij «inchalik ruukʼ inkibʼan naq i tinamit najtir cho qʼiij» (Encyclopedia of Society and Culture in the Ancient World [Huuj reh taqeh ninqʼiij inkibʼan taqeh kʼachareel najtir cho qʼiij]).

  •  Ninqʼiij chi riij noq reʼ María xooj pan taxaaj. Reʼ taqeh kʼachareel inkibʼan i ninqʼiij wilih ruum chi inkikapaaj chi reʼ rutuut i Jesús xjohtik pan taxaaj chi maʼ uxlabʼal ta. Jenaj huuj inqʼorik chi riij taqeh nimanik, iruqʼor chi «reʼ peet pech xbʼirjik chi riij i naʼojbʼal wilih pan haabʼ 400» eh chi «chupaam i akʼ kʼuhbʼaal maʼxta iruqʼor chi riij i naʼojbʼal wilih».

  •  Ninqʼiij chi riij i raasjiik i María. Reʼ Enciclopedia keh taqeh católico reʼ wilik pan internet iruqʼor chi riij i raasjiik i María: «reʼ ruqʼorbʼal i Dios maʼxta iruqʼor chi riij i naʼojbʼal wilih, ruum aj reʼ maʼ ne ta irubʼan chi ne inqʼorarik chi reʼ wilih wilik pan Santo Laj Huuj ruum chi maʼ jeʼ ta reʼ». Reʼ wilih xa jenaj reh, taqeh naʼojbʼal inkikʼuhtaaj taqeh Iglesia.

  •  Cuaresma. Jeʼ rukabʼ iruqʼor jenaj huuj reh Europa eh América, reʼ taqeh qʼiij wilih ahaʼ wiiʼ reʼ taqeh kʼachareel inkibʼan kʼih i tiij eh inkikuy kiwaʼ kihaʼ, xkitoqʼaaʼ kibʼanam noq «ikʼinaq chik ihaabʼ 325», noq ikʼinaq naq chik kiʼibʼ ciento haabʼ noq xtzʼihbʼjik i huuj wilik pan rukuxik i Santo Laj Huuj. Reʼ peet qʼiij reh i ninqʼiij wilih reʼ miércoles reh i rokiik chaaj, reʼ woʼ i huuj wilih iruqʼor: «Reʼ i rokiik chaaj na naq kibʼanam chuʼnchel taqeh ajnimaneel jeʼ rukabʼ xutaqʼaaʼ rubʼanariik i Urbano II pan moloj iibʼ xbʼanarik ar Benevento pan haabʼ 1091».

  •  Meskel. Reʼ ninqʼiij wilih inbʼaan ar Etiopía inkininqʼijej i «rureqariik i Cruz, reʼ cruz ahaʼ wiiʼ xkimik i Jesús. Pan ninqʼiij wilih inkiqop qʼaaqʼ eh kisoninik chi rujunsuut» (Encyclopedia of Society and Culture in the Medieval World [Huuj chi riij i kibʼanooj taqeh kʼachareel chuwach taqeh haabʼ 500 ko pan 1,500]). Xa reʼ laʼ, reʼ taqeh testigo reh Jehová maʼ inkikoj ta i cruz reh ruloqʼjiik i Dios.

•   Reʼ ninqʼiij, ¿iruyeew na ruloqʼil jenoʼ kʼachareel, jenoʼ molaabʼ oon jenoʼ rehtalil i tinamit?

   Naʼojbʼal reh i Santo Laj Huuj: «Tiʼ i narukʼulum i winaq reʼ irukoj rukʼux ruukʼ taqeh i xa winaq eh irukoj rukʼux ruukʼ i raansil i winaq, eh maʼ ruukʼ ta chik i Jehová irukoj rukʼux» (Jeremías 17:5, TNM).

   Reʼ taqeh testigo reh Jehová inkikapaaj taqeh kʼachareel eh inkibʼan woʼ kitiij chi kiij, xa reʼ laʼ maʼ inkibʼan ta taqeh ninqʼiij wilih.

   Reʼ taqeh ninqʼiij inbʼaan reh ruyeʼariik ruloqʼil jenoʼ kʼachareel wilik rajaawriik. Reʼ Santo Laj Huuj iruqʼor chi maʼ na ta qakojom qakʼux kuukʼ taqeh i xa winaq taqeh, ruum reʼ keh xa reh junkʼaam i kikʼachariik (Isaías 2:22). Ruum aj reʼ, reʼ taqeh testigo reh Jehová maʼ inkininqʼijej taq wach i ruhabʼul jenoʼ reey oon jenoʼ ixoq reey.

   Reʼ taqeh ninqʼiij inkichop kiibʼ ruukʼ i rubandera jenoʼ tinamit. Reʼ taqeh testigo reh Jehová maʼ inkininqʼijej ta wach i ruqʼijiil i rehtalil i tinamit. ¿Chaaj woʼ reet maʼ inkibʼan ta? Ruum chi reʼ Santo Laj Huuj iruqʼor: «maayeew taq chik kajaawriik i xatzʼaqoj tiyoox» (1 Juan 5:21). Chi kiwach juʼjun taqeh kʼachareel reʼ rehtalil i tinamit maʼ reʼ ta jenaj tyoox inkiloqʼej wach. Xa reʼ laʼ jenaj winaq Carlton Hayes i rubʼihnaal irutzʼir riij xkʼularik, xqʼorik chi riij «taqeh tinamit re’ chi maʼ inkaaj ta chi ajwach ne intaqʼanik chi kinah» eh xuqʼor: «reʼ bandera rehtalil i tinamit eh ehtalil reh loq’inik».

   Reʼ taqeh ninqʼiij inkiyeew ruloqʼil jenoʼ Santo. ¿Chajariik xubʼan i apóstol Pedro noq jenaj winaq xuxukʼaaʼ riibʼ chuwach? Reʼ Santo Laj Huuj iruqʼor chi reʼ Pedro jeʼ wilih xuqʼor reh: «maaxukʼaaʼ awiibʼ chi nuwach, tipaaʼ johtoq reʼ hin xa hin woʼ winaq» (Hechos 10:25, 26). Ni xa ta reʼ Pedro ni xa ta jenoʼ chik apóstol xkaaj chi ne inyeʼarik kiloqʼil. Ruum aj reʼ reʼ taqeh testigo reh Jehová maʼ inkibʼan ta taqeh ninqʼiij ahaʼ wiiʼ inyeʼarik kiloqʼil taqeh kʼachareel inqʼorarik chi Santo taqeh, maʼ inkibʼan ta taqeh ninqʼiij jeʼ rukabʼ i wilih:

  •  Ruqʼijiil taqeh Santo. Reʼ huuj Año cristiano iruqʼor chi inbʼanariik i ninqʼiij wilih reh «ruyeʼarik kiloqʼil chuʼnchel taqeh Santo». Iruqʼor woʼ: «chi reʼ inkitzʼir riij xkʼularik, inkiqʼor chi maʼ qʼeʼ ta kehtʼal ahaʼ inchalik i ninqʼiij wilih».

  •  Ninqʼiij reh i Guadalupe. Reʼ ninqʼiij wilih inbʼanariik «reh jenaj ixoq wilik rajaawriik ar México», reʼ taqeh kʼachareel inkikapaaj chi reʼ ixoq wilih reʼ María reʼ rutuut i Jesús. Inkiqʼor chi xukʼuhtaaj riibʼ chuwach jenaj winaq pan haabʼ 1531 (Enciclopedia Guadalupana).

  •  Ruqʼijiil jenoʼ Santo oon kiqʼijill taqeh kʼachareel wilik kibʼihnaal reh santo. Jenaj huuj iruqʼor chi «reʼ ninqʼiij wilih inbʼanarik chupaam i qʼiij noq jenoʼ halakʼun inqajik ruhaaʼ oon inqahtesjik eh inkojarik rubʼihnaal reh jenoʼ santo». Eh iruqʼor chi «reʼ qʼiij wilih jenaj qʼiij reh loqʼinik» (Celebrating Life Customs Around the World​—From Baby Showers to Funerals [Reʼ inkibʼan taqeh kʼachareel reh runinqʼijik i kʼachariik: reʼ ninqʼiij inkibʼan noq narasjik jenaj halakʼun eh reʼ inkibʼan noq inwihʼik jenoʼ kamnaq]).

   Reʼ taqeh ninqʼiij inkichop kiibʼ ruukʼ i política. Reʼ Santo Laj Huuj iruqʼor: «Xiikʼ naah chihojal chi ruukʼ i QaJaaw Dios neenuyeew nukʼux, chuwach chi ruukʼ winaq neenuyeew nukʼux» (Salmo 118:8, 9). Reʼ taqeh testigo reh Jehová maʼ inkikoj ta kikʼux chi reʼ taqeh winaq nakisacham wach taqeh kʼaxkilal wilik nah akʼal eh ruum aj reʼ maʼ inkibʼan ta taqeh ninqʼiij reʼ inkichop kiibʼ ruukʼ taqeh política oon ruukʼ jenoʼ molaabʼ iruqʼor chi iraaj rutobʼeem taqeh kʼachareel, jeʼ rukabʼ i runinqʼiij taqeh kʼijool eh iruninqʼiij taqeh ixoq. Eh ruum i reʼ maʼ inkibʼan ta woʼ i ninqʼiij reh i ruqʼijiil noq reʼ taqeh kʼachareel maʼ reʼ ta chik moso taqeh. Inkikoj la kikʼux chi reʼ i runimaal rajaawriik i Dios narusacham wach ixowanik eh maʼ ajwach ta chik tokoom rilariik narubʼanariik (Romanos 2:11; 8:21).

•   ¿Irukʼuhtaaj na i ninqʼiij chi jenoʼ tinamit oon jenoʼ tzuhbʼ chi kʼachareel nim kajaawriik chi kiwach i tokoom?

   Reʼ naʼojbʼal iruyeew i Santo Laj Huuj: «Yuʼnaak i hin xti nureq chi riij chi reʼ Dios maʼ awach taj i tokoom rilariik i rubʼan. Irukoj la taqe chi rakʼuun rixqʼuun xa ahaʼ pantaq nimaq tinamit i kiyeʼwik ruloqʼil, eh inki aʼn i holohik laj naʼojbʼal imponik chuwach i reh» (Hechos 10:34, 35).

   Atoobʼ ta reʼ taqeh testigo reh Jehová looqʼ chi keh i kitinamitaal maʼ inkibʼan ta taqeh ninqʼiij ahaʼ wiiʼ inkikʼuhtaaj chi jenoʼ tinamit oon jenoʼ tzuhbʼ chi kʼachareel nim chi kiwach i tokoom.

   Reʼ taqeh ninqʼiij inkiyeew ruloqʼil i puhbʼanik. Reʼ Jesús xwihʼik pan tuqkilal kuukʼ taqeh tokoom, ruum aj reʼ xuqʼor keh taqeh rajtahqaneel: «Reʼhin iniqʼor taq aweh: chakʼax taqeh i kixowanik taq aweh eh chabʼan taq atiij chi kiij i kibʼanik tiʼ kʼaxik aweh» (Mateo 5:44, RLLH). Ruum aj reʼ, reʼ taqeh testigo reh Jehová maʼ inkininqʼijej ta wach taqeh ninqʼiij ahaʼ wiiʼ inkiyeew ruloqʼil taqeh soldado jeʼ rukabʼ taqeh wilih:

  •  Ruqʼijiil i Anzac. Jenaj huuj iruqʼor chi reʼ qʼorik «Anzac iraaj ruqʼorom reʼ kitiʼjolal taqeh soldado ar Australia eh Nueva Zelanda» eh chi reʼ «ruqʼijiil i Anzac jenaj qʼiij ahaʼ wiiʼ reʼ taqeh kʼachareel inkʼulik pan kikʼux chuʼnchel taqeh i xikimik pan qʼaqʼinik» (Historical Dictionary of Australia [Jenaj Diccionario inqʼorik chi riij xkʼularik ar Australia]).

  •  Día de los veteranos (oon qʼiij reh i rukʼuliik pan kikʼux, Domingo reh rukʼuliik pan kikʼux eh ruqʼijiil i rukʼuliik pan kikʼux taqeh xkiyeew i kikʼachariik pan qʼaqʼinik). Jenaj huuj reh i qaqʼijil ruqʼor chi reʼ ninqʼiij wilih inbʼanarik «kuum taqeh xitoobʼinik chi qʼaqʼinik[...] eh jeʼ woʼ kuum taqeh xkiyeew i kikʼachariik pan qʼaqʼinik».

   Ninqʼiij reh i rukʼuliik pan kikʼux chajariik xkʼularik pan jenoʼ tinamit oon chi riij i independencia reh jenoʼ tinamit. Reʼ Jesús je wilih i xuqʼor chi kiij taqeh rajtahqaneel: «Reʼkeh maʼ reh ta i wach akʼal taqeh, jeʼ rikabʼ i hin maʼ hin ta reh i wach akʼal» (Juan 17:16, RLLH). Atoobʼ ta reʼ taqeh testigo reh Jehová inkaaj kinabʼeem chi riij chajariik inkʼularik ruukʼ i kitinamiit, maʼ inkibʼan ta taqeh ninqʼiij jeʼ rukabʼ taqeh wilih:

  •  Ruqʼijiil i Australia. Jenaj huuj iruqʼor chi reʼ ninqʼiij wilih inbʼanarik reh chi ne inkʼulik pan kikʼux xkʼularik pan «haabʼ 1788 noq reʼ taqeh soldado aj Inglaterra xkijohsaj i kibandera eh xkiqʼor chi reʼ tinamit Australia jenaj naq chik akʼ tinamit» (Worldmark Encyclopedia of Cultures and Daily Life [Enciclopedia Worldmark chi riij inkʼularik kuukʼ taqeh tinamit eh ruukʼ i kʼacharik rajlaal qʼiij]).

  •  Ruqʼijiil i Guy Fawkes. Reʼ qʼiij wilih «reh chi pan tinamit ne naq inkʼulik pan kikʼux noq reʼ Guy Fawkes eh juʼjun chik taqeh católico xkaaj naq kisacham wach i taqʼanik ar [Gran Bretania] eh inkaaj woʼ naq kikansam i reey Jacobo I pan haabʼ 1605» (A Dictionary of English Folklore [Diccionario chi riij i kibʼanooj taqeh aj Inglaterra]).

  •  Ninqʼiij reh Independencia. Pan juʼjun taqeh tinamit inkininqʼijej wach i qʼiij noq jenoʼ tinamit xelik riʼsil rajaawriik tokoom tinamit.

•   ¿Mi jenaj ninqʼiij ahaʼ wiiʼ inilarik i xohkʼrik eh i kʼoyomal?

   Naʼojbʼal reh i Santo Laj Huuj: «Reʼ taq i hat xa aʼn taq chaaweh i inki aʼn i maʼ kinimanik ta ree Dios. Eh xa reʼ naq i maʼ tobʼlaj tuskil inawootwaaj. Xa chibʼih chik jariik i yiibʼ wach xukʼax taq cho wach atiʼjolal: Xa chayeew taq chik i xohkʼrik i na aʼn, jeʼ woʼ ninqʼijinik, xaloqʼej woʼ taq i tiyoox» (1 Pedro 4:3).

   Jeʼ rukabʼ iruqʼor i naʼojbʼal reh i Santo Laj Huuj reʼreʼ, reʼ taqeh testigo reh Jehová maʼ inkibʼan ta taqeh ninqʼiij ahaʼ wiiʼ reʼ taqeh kʼachareel kixohkʼrik. Reʼ taqeh Testigo imponik chi kiwach rikʼsjiik i kiqʼiij kuukʼ taqeh kamigo. Mi jenoʼ iruchih rukʼem kʼisinoq rukʼahlaj haʼ, maʼ irikʼsaj ta naah i irukʼej. Inkiyeew la kikʼux chi runimjiik i naʼojbʼal wilih: «Eh wi xa aʼn taq awaʼ ahaaʼ, eh xa chibʼih-oq chik jariik taq i xawaaj aʼnam, maʼ xta reet cha aʼn taq chuʼnchel chi loqʼoombʼal ree Dios» (1 Corintios 10:31).

   Jeʼ reʼ noq reʼ taqeh testigo reh Jehová maʼ inkibʼan ta taqeh ninqʼiij jeʼ rukabʼ i carnaval oon jenoʼ chik ninqʼiij ahaʼ wiiʼ inilarik i yiibʼ wach naʼojbʼal i maʼ imponik ta chuwach i Dios. Chi kixilak taqeh i ninqʼiij wilih wilik i ninqʼiij inkibʼan taqeh judío reʼ rubʼihnaal Purim. Atoobʼ ta najtir cho qʼiij inkibʼan naq i ninqʼiij wilih reh chi ne inkʼulik naq pan kikʼux noq xikoʼljik taqeh judío pan taqeh haabʼ quiniento noq ko majaaʼ inkʼulik i Cristo, xa reʼ laʼ yuʼnaak inqʼorarik chi reʼ inkininqʼijej wach taqeh judío reʼ carnaval. Reʼ huuj El Judaísmo iruqʼor chi reʼ ninqʼiij wilih reh chi reʼ taqeh kʼachareel «ne inkibʼan i bʼanaj haʼ ko rehtaal maʼ inkikapaaj ta chik chajariik inkibʼan eh ahaʼ wiiʼ reʼ taqeh kʼachareel inkikoj taqeh máscara taqeh disfraz ahaʼ wiiʼ inkanabʼjik chi reʼ winaq ne irukoj i rusoʼ ixoq eh reʼ ixoq ne rukoj i rusoʼ i winaq».

 Reʼ Santo Laj Huuj iruqʼor chi naqakʼaxam eh looqʼ oq chi qeh i qafamilia maʼxta qʼorik reh chajariik inkinimaj (1 Pedro 3:1, 2, 7). Korik chi noq jenoʼ Testigo maʼ irubʼan ta chik taqeh ninqʼiij reʼ inkibʼan i tokoom, reʼ kifamilia wilik pech inchalik kijosqʼiil, intiʼbʼik kikʼux eh inkikʼraaj chi maʼ inajwanjik ta chik kiwach. Ruum aj reʼ, reʼ taqeh Testigo inkikʼuhtaaj chi inkaaj wach i kifamilia, inkiqʼor keh chajariik inkinimaj ruukʼ chaqʼlamiil eh kiʼikʼik qʼiij kuukʼ.

 Reʼ taqeh Testigo kehtʼal chi reʼ juʼjun naruchihiim chajariik iraaj rubʼanam (Josué 24:15). Looqʼ chik keh chuʼnchel taqeh kʼachareel, maʼxta iruqʼor chajariik inkinimaj (1 Pedro 2:17).