Reʼ taqeh testigo reh Jehová wilik jenaj kikambʼaal reh rutoobʼjiik taqeh kʼachareel reh rureqariik chi riij irukʼuhtaaj i Santo Laj Huuj. Reʼ qatijinik chi riij i Santo Laj Huuj ne tirutobʼeej reh chi:

•   Suq akʼux pan akʼachariik.

•   Hat ramigo i Dios.

•   Ne inatijej iruqʼor i Santo Laj Huuj chi riij i chalik reh.

Ayuʼ naqaqʼoriik chi riij taqeh pahqanik wilih:

•  ¿Nikʼwach taqeh qatijinik chi riij i Santo Laj Huuj?

•  ¿Intojarik naak?

•  ¿Nikʼ najtil inchahmik i tijinik?

•  ¿Ahaʼ nanutoqʼaam?

•  ¿Ne na irubʼan chi ne inutoqʼaaʼ i tijinik eh chi riij i reʼ ne inukanaaʼ?

•  Mi xwaaj tijinik chi riij i Santo Laj Huuj, ¿ko ruman na chi ne inubʼan chi hin testigo reh Jehová?

•  ¿Ne na irubʼan chi ne inukoj i nuSanto Laj Huuj?

•  ¿Mi ne irubʼan chi ne kiruchʼihleej jenoʼ noq ne kintijinik?

•  Wilaʼ xintijinik chik kuukʼ taqeh testigo reh Jehová chi riij i Santo Laj Huuj, ¿mi ne irubʼan chi ne woʼ chik kintijinik?

•  ¿Ne na irubʼan chi xa wutkeel ne inutijej chi riij i Santo Laj Huuj?

 Jenaj ajkʼuhtaneel ne tirutobʼeej runabʼjiik chi juʼjunaal taqeh naʼojbʼal chi riij i Santo Laj Huuj. Ruukʼ i kamambʼal reh tijinik chi riij i Santo Laj Huuj reʼ Chasuqkileej akʼachariik, chi qʼun qʼun ne natijej irukʼuhtaaj i Santo Laj Huuj eh nikʼwach ne tirutobʼeej pan akʼachariik. Mi ko nawaaj awehtʼaliim chi riij, chawil i video wilih.

 Ta. Reʼ taqeh testigo reh Jehová inqabʼan i xuqʼor qeh i Jesús chi naqaʼanam: «Xa chi siih taq xakʼul, [...] xa chi siih woʼ chik taq naa ayeʼem» (Mateo 10:8). Eh jeʼ woʼ, i hat maʼxta naʼatojom chi riij i narukojariik reh tijinik chi riij i Santo Laj Huuj, reʼ irukʼam cho jenaj Santo Laj Huuj eh jenaj huuj reh tijinik i rubʼihnaal Chasuqkileej akʼachariik.

 Reʼ tijinik manlik wach irukʼam cho 60 chi lección. Ne inooj eloq wach jeʼ rukabʼ inawaaj i hat. Kʼih taqeh kʼachareel inkitijej jenaj lección chuwach i xamaano eh wilik taqeh inkaaj kitijem kiibʼ ixibʼ oq chi lección.

1.  1. Chanunjisaj paam huuj wilik pan qayeʼaabʼ reh internet. Ne inqakoj abʼihnaal reh chi jenaj testigo reh Jehová ne inqʼorik awuukʼ eh ne imponik chasikʼariik.

2.  2. Reʼ kʼachareel naruyeʼem aweh i tijinik ne tiruqʼoreej. Ne iruqʼor aweh chajariik ne nareq chupaam i tijinik reh i Santo Laj Huuj eh ne iruchʼuq wach aweh chi riij taqeh apahqanik.

3.  3. Reʼ hat, eh i narukʼuhtinik aweh ne naqʼor taq chawach i qʼiij eh i hora. Ne irubʼan chi ne kiponik awuukʼ chi tijinik oon ne irubʼan chi ne tikiqʼoreej pan teléfono, pan videollamada, ne inkitaqʼaaʼ acorreo oon ne inkitzʼihbʼaaj acorreo electrónico. Reʼ tijinik mareh ne inchahmik jenaj hora oo xa jaruubʼ paʼ inawaaj, xa reʼ laʼ mi reʼ hat tehlik oq awach.

 Ne irubʼan. Rum aj reʼ, chanunjisaj paam i huuj wilik pan qayeʼaabʼ reh internet. Noq reʼ ajkʼuhtaneel ne tiruqʼoreej, chaqʼor reh chi nawaaj atijem awiibʼ eh chi peet naʼawilom mi xakʼax wach oon maʼxta. Jeʼ aj reʼ noq narukojariik i huuj maʼ nim ta paam Chasuqkileej akʼachariik, xa ixibʼ ti i lección wilik reh.

 Maʼxta. Reʼ taqeh testigo reh Jehová xa inkaaj chik kikʼuhtaam chi riij i Santo Laj Huuj keh taqeh kʼachareel, xa reʼ laʼ maʼ inkimin ta reh jenoʼ i kinimanik. Ruukʼ laʼ chaqʼlamiil inkikʼuhtaaj chi riij i Santo Laj Huuj eh kehtʼaliim chi reʼ taqeh kʼachareel nakichopom haj wilik inkaaj kinimam (1 Pedro 3:15).

 Ne irubʼan. Ne irubʼan chi ne nakoj xa ahaʼ paʼ wilik i Santo Laj Huuj. Reʼ hoj testigo reh Jehová inqakoj i Traducción del Nuevo Mundo, jenaj Santo Laj Huuj manlik wach eh maʼ kʼaxik ta runabʼjiik chi riij, qehtʼal chi reʼ taqeh kʼachareel imponik chi kiwach rukojariik i Santo Laj Huuj reʼ okrinaq taqeh reh.

 Ne irubʼan. Ne irubʼan chi ne nayuqʼeej taqeh afamilia eh taqeh awamigo inawaaj i hat.

 Ne irubʼan. Ne laʼ chik imponik chawach noq naxatoqʼaaʼ tijinik. Reʼ tijinik xtihqik wach, reh chi maʼ kʼaxik ta chik i tijinik ne inkibʼan taqeh kʼachareel. Eh jeʼ woʼ chik, reʼ ajtijineel ne chik inqʼorik chi riij i xutijej eh irukʼam cho kʼih taqeh video eh taqeh ehtalil chuwach taqeh huuj reh kʼuhtanik reh najtir.

 Ne irubʼan. Wilik taqeh kʼachareel maʼ inkikʼaxkileej ta i tijinik noq kitobʼjik ruum jenoʼ ajkʼuhtaneel eh wilik woʼ taqeh inkaaj kitijem xa chi kutkeel. Ahaʼ wiiʼ iruqʼor « Toʼbʼal qeh reh tijinik chi riij i Santo Laj Huuj» wilik reh reh wach kamambʼaal chi siih reh chi maʼ ne ta inakʼaxkileej i tijinik. Wilih taqeh juʼjun:

•   Taqeh video chi riij i Santo Laj Huuj. Iruqʼor rubʼehel ruukʼ kiʼibʼ ixibʼ oq chi minuto taqeh naʼojbʼal aajwaal wach reh i Santo Laj Huuj.

•   Taqeh pahqanik chi riij i Santo Laj Huuj. Ayuʼ iruqʼor rubʼehel chi riij taqeh pahqanik inbʼanarik chi riij i Santo Laj Huuj.

•   Reʼ taqeh texto chʼuquuj (inchʼobʼarik) kiwach chi korik. Chareq chi riij nikʼwach iruqʼor taqeh texto reh i Santo Laj Huuj ehtʼalimaj kiwach.