¿Min̈ya’kpa y iñjaampa iga miity in̈kutyum? | ¿Tyi nɨmpa je’m Biblia?
Tuum estudio wattawɨ’ɨp ikuwɨtyi yɨ’p naxyukmɨ, a nɨm iga 1 de cada 4 personas ijaamyajpa iga ity ikutyum.
«Tantumpɨytyam wɨap tanan̈ya’ktam o tanjaam iga taity tan̈kutyum, dya’ tyi ijoo ju’tsan̈ amtyɨy iniity y ju’p an̈eymɨ ity» (Chido Mpemba, copresidenta de la Comisión de la Organización Mundial de la Salud sobre Conexión Social).
Taga’man̈jakpa iga je’m an̈ya’aki dya’ numaaj ijaamyajpa jempɨk tsaamiyajam o jempɨk ityyajto’oba ikutyum, ijaamyajpatyim je’m mañipɨkyaj, jempɨk ke’nam agui wɨɨ in̈jaamyaj, jempɨk an̈ko’mɨyñeyajum y jempɨk ke’nam agui iwɨnɨgayyajpa. Jempɨk an̈ya’kpa y ijaampa iga ity ikutyum pɨɨmi wɨap imalwaday física y emocionalmente.
«Iga min̈ya’kpa y iñjaampa iga miity in̈kutyum ustam ustam wɨap in̈ka’, jeextyim ju’uts algun i jempɨk ijukpa 15 cigarros tumtum jaama» (Vivek Murthy, director general de Salud Pública de Estados Unidos).
Jempɨk nɨmpa je’m Biblia
Jempɨk tawatneta’m dya’ ixunba iga taitytya’miñ tan̈kutyum. Dios ixunba iga juchixkej tanaitytya’miñ wɨtampɨk amigojyaj y tamaymayata’miñ.
Je’m Biblia nɨmpa: «Dios nɨ’m: ‹Dya’ wɨɨ iga je’m pɨɨxiñ idyiñ ikutyum›» (Génesis 2:18).
Dios ixunba iga tanamigojaiñ. Je’ tajɨykamayñeta’m iga takunu’kta’mpa siiga taɨchtyam tan̈kunu’kta’mpatyim (Santiago 4:8).
Je’m Biblia nɨmpa: «Maymayyaj jempɨk ime’tsyajpa juutypɨk ikunu’kyajpa Dios, je’eyaj ipɨktson̈yajpa je’m Dios iAn̈jago’oyi» (Mateo 5:3).
Dios ixunba iga tan̈wagakoosteñaytya’miñ kun tun̈gakyaj. Jesɨk tan̈watta’mpa jeempɨk, majnam tamaymaytyam.
Je’m Biblia nɨmpa: «Wɨ̱ iga tammétstámiñ jutsa̱p tanayo̱xpáttamta̱ con jém tantɨ̱wɨtam iga tanatoyt́amta̱iñ, iga tawɨ̱wadayt́ámiñ i̱ quej. D́a tantsactámpa iga taŋtuuma̱támpa [...].Wɨ̱ iga tanaŋquímtamta̱p iga taŋwattámiñ juuts ixunpa Dios» (Hebreos 10:24, 25, Jém Jomipɨc Trato, La Liga Bíblica).
Siiga iñjoodon̈ato’obanam juutypɨk wɨap inin̈teeñkamok jesɨk min̈ya’kpa o iñjaampa iga miity in̈kutyum, maayɨ’ je’m an̈kejayo’oyi «Soledad en la era de la comunicación».
a Je’m estudio The Global State of Social Connections (Estado de las conexiones sociales en el mundo), por Meta y Gallup, 2023.