¿Nu’kpa jaama iga kuyajpa je’m terrorismo?
Jesɨk je’m terroristas imalwatyajpa, wɨapsɨ iga tanakwa’ktaap: «¿Ityeguet Dios jempɨk naspa? ¿Tyi’iga naspa yɨ’ɨmpɨk? ¿Nu’kpa jaama iga kuyajpa je’m terrorismo a? ¿Tyi wɨap an̈wat iga odoy akɨɨn̈neiñ?». Je’m Biblia ikutson̈ba yɨ’pyaj akwago’oyiyaj.
¿Ju’uts ia’m Dios je’m terrorismo?
Dios ijooyixpa je’m malwado’oyi y je’m terrorismo (Salmo 11:5; Proverbios 6:16, 17). Y Jesús, iga jempɨktyim ijɨɨspa ju’uts Dios, in̈jɨyjak je’m ikuyujkɨ’ɨwiñyaj jesɨgam je’eyaj imalwatyaj (Mateo 26:50-52). Weeñiyaj pɨɨmi malwatyajpa y nɨmyajpa iga Dios ixunba iga iwatyajiñ jeempɨk. Pero Dios dya’ ikusu’nɨ’yba jempɨk iwatyajpa. Je’yukmɨ, dyatyim ikumaton̈a’yba je’m in̈wejpado’oyiyaj (Isaías 1:15).
Dios ityeguet ityumpɨy jempɨk ya’achayajpa, je’yukmɨ ityeguet jempɨk malwadayñeyajta ikuyukmɨ je’m terrorismo (Salmo 31:7; 1 Pedro 5:7). Y je’m Biblia in̈kejpa iga Dios iktogoyba je’m malwado’oyi (Isaías 60:18).
Tyi’iga ity je’m terrorismo
Je’m Biblia in̈matpa tyi’iga ity je’m terrorismo: «Je’m pɨɨxiñ in̈jakne’ tun̈gak pɨɨxiñ y namalwadayñeta» (Eclesiastés 8:9). Dende pekam, ityyaj jempɨk ichɨgan̈je’kyajpa y imalwadayyajpa tun̈gakyaj iga nawattaiñ ju’uts je’eyaj ikusu’nɨyyajpa. Je’yukmɨ, weeñiyaj ipɨkyajpa je’m terrorismo iga dya’ naa’mchiyajtaap (Eclesiastés 7:7).
Kuyajpa je’m terrorismo
Dios ijɨykamne’ iga iktogoyba je’m malwado’oyi y dyam takɨɨn̈ta’mpa, y itypam paz yɨ’p naxyukmɨ (Isaías 32:18; Miqueas 4:3, 4). Iwatpa yɨ’ɨmpɨk:
Iwɨtsakpa ityumpɨy iga odom idyiñ terrorismo. Dios ikka’yba je’m an̈jago’oyiyaj ikka’mneyajwɨ’ɨp je’m pɨxiñtyam y ikka’mpa je’pɨk ian̈jago’oyi, y in̈jakpa ikuwɨtyi yɨ’p nas. Jesucristo, je’m an̈jago’oyi iga kupin̈neta, je’m kobakpɨk, iwɨwada’yba ityumpɨyyaj y iktogoyba je’m malwado’oyi y je’m ya’achwado’oyi (Salmo 72:2, 14). Jesɨk iwatum yɨ’ɨmpɨk, dyam i iwatpa terrorismo. Ityumpɨyyaj «iniityyajpa ja’yan̈ maymayaaji» (Salmo 37:10, 11).
Iyooxpa’tpa ityumpɨyyaj jempɨk imalwaday je’m terrorismo. Dios ikpɨsa’yba imɨjtay jempɨk je’m terrorismo ikmalnaskayaj y ikka’ya’yba je’m kɨɨn̈i iga iniityyaj ianmajom (Isaías 65:17; Apocalipsis 21:3, 4). Y dya’ numaaj je’. Dios ijɨykamne’ iga iktsukumpa jempɨk ka’ayaj: iitykayajpa yɨ’p nas y dyam i imalwadayyajpa (Juan 5:28, 29).
Je’m Biblia takkupɨkpa iga Dios dyam ja’yñe’ iwatpa yɨ’ɨmpɨk. Pero wɨapsɨ iga minikwa’ktaap tyi’iga dyanam iktogoyñe’ je’m terrorismo. Siiga iñjoodon̈ato’oba je’m kutson̈o’oyi, a’mɨ je’m video ¿T́iiga iámchiiba Dios iga tayaachatámiñ?
a Jesɨk tanan̈matpa je’m terrorismo, nɨmto’oba jempɨk iotyɨ’mayyajpa o imalwadayyajpa tun̈gakyaj —y maaj jempɨk dya’ tɨgɨyku’mneyaj— iga kɨɨn̈yajiñ y iwatyajiñ jempɨk je’eyaj ixunyajpa, iga kuyagɨyyajtaiñ siiga ikakyajto’oba tuum jɨɨxi político, religioso o social. Pero, wɨapsɨ iga dya’ ityumpɨyyaj ijɨɨspa siiga tuum nasɨyo’oyi je’ terrorismo o dya’.
