AN̈KEJAYOʼOYI 34

¿Juutypɨk wɨap tanakwiñkejay Jehová iga tantoyba?

REPRODUCIR EN

¿Iñjaampa iga maaj in̈kunu’kne’ Dios dende jesɨk moj in̈kuyujka’ je’m Biblia? ¿Iñxunba iga in̈wɨnanɨgo’oyi kun je’ majnam mɨjaiñ? Siiga Jehová ia’mpa iga mich majnam iñtyoyba, jɨɨsɨ iga je’ mityoybatyim y mikuixpa. ¿Juutypɨk wɨap inikwiñkejay iga iñtyoyba?

1. ¿Juutypɨk tanakwiñkejaytya’mpa Jehová iga tantoyba?

Tanakwiñkejaytya’mpa iga tantoyba jesɨk tan̈kupɨkta’mpa (maayɨ’ 1 Juan 5:3). Pero je’ dya’ ityeguedɨ’yba ni i iga ikupɨguiñ. Je’yukmɨ, je’ taa’mchitya’mpa iga taɨchtyam tampɨkta’miñ tanjɨɨxi siiga tan̈kupɨkpa o dya’. ¿Tyi’iga? Iga Jehová ixunba iga tan̈kupɨkta’miñ kun ityumpɨy tananmaj (Romanos 6:17). Yɨ’p nɨmto’oba iga Jehová ixunba iga tan̈kupɨguiñ iga tantoyba y dya’ iga tateguedɨytyaap. Je’m tukuteen y je’m maktastenpɨk jaaka’ itywɨ’ɨp yɨ’p librojom, miyooxpa’tpa iga inikwiñkeja’yiñ Jehová je’m iñtyoyo’oyi de wɨsteen maneras: iga in̈wadyiñ jempɨk je’ ikusu’nɨ’yba y odoy in̈wadyiñ jempɨk je’ dya ikusu’nɨ’yba.

2. ¿Tyi’iga waatykɨy tan̈ka’ tanakwiñkejay Jehová iga tantoyba?

«Ja’yan̈ ya’achaajiyaj iñaska’aba jempɨk ikupɨkpa Dios» (Salmo 34:19). Iga tatan̈kaɨykɨ’ɨwiñtyam tsaam takobakpijtya’mpa, je’yukmɨ tan̈ya’kpa jesɨk dya’ tatumiñɨy, tamalwadaytyaap o jesɨk tanan̈teeñkamokpa tun̈gak kobakpiijiyaj. Y jesɨk tannaska’aba yɨ’ɨmpɨk, wɨapsɨ iga maaj tan̈ka’ tan̈kupɨk y tan̈wat jempɨk Jehová ixunba. Pero inikwiñkejpa iga iñtyoyba Jehová jesɨk in̈watpa ju’tspɨyam miwɨap iga in̈kupɨkpa kun ityumpɨy iñanmaj. Y siiga dya’ iñjagan̈tsakpa, je’ dyatyim mijagan̈tsakpa (maayɨ’ Salmo 4:3).

MAAJ TAN̈WƗKUYUJKAIÑ

Tan̈kɨ’pin̈ta’miñ tyi’iga Jehová maaj ityeguet iga takupɨgoytya’miñ y tyi wɨap tayooxpa’tta’m iga odoy tanjagan̈tsakta’miñ.

3. Kun jempɨk nɨm je’m Wookkɨ’ɨwiñ, tatɨgɨyku’mpatyim

Ju’uts nɨmpa je’m Biblia, je’m Wookkɨ’ɨwiñ ikumɨgoy Job, pero dya’ numaaj je’ kumɨgoytya, ikumɨgo’ytyim ityumpɨy jempɨk ikuyooxayajto’oba Jehová. Maytya’amɨ Job 1:1 y 1:6-2:10, y an̈matta’amɨ tyi iñjɨɨsta’mpa y kutson̈ta’amɨ:

¿Juutypɨk ikumɨgoy je’m Wookkɨ’ɨwiñ a Job? (Maytya’amɨ Job 1:9-11).
¿Juutypɨk takumɨgoyñeta’m je’m Wookkɨ’ɨwiñ? (Maytya’amɨ Job 2:4).

Maytya’amɨ Job 27:5b y an̈matta’amɨ tyi iñjɨɨsta’mpa y kutson̈ta’amɨ:

¿Juutypɨk ikwiñkej Job iga ityoyba idyɨk Jehová?

Job ikwiñkej iga ityoyba idyɨk Jehová iga dya’ ijagan̈tsak mex iga tsaam ya’acha.

Jesɨk dya’ tanjagan̈tsakta’mpa Jehová, tanakwiñkejta’mpa iga tantoytya’mpa.

4. Maymaywada’ayɨ je’m Jehová ianmaj

Maytya’amɨ Proverbios 27:11 y an̈matta’amɨ tyi iñjɨɨsta’mpa y kutson̈ta’amɨ:

¿Ju’uts in̈jaam Jehová jesɨk in̈kupɨkpa y in̈wɨpɨkpa iñjɨɨxi? ¿Tyi’iga?

5. Mich wɨap in̈kupɨk Jehová juchixkej

Iga tantoytya’mpa Jehová, tanan̈madaytya’mpa tun̈gakyaj ju’uts je’. Y dya’ tantsakpa iga tanan̈matta’mpa mex iga taya’achwattamtaap. A’mta’amɨ je’m VIDEO y an̈matta’amɨ tyi iñjɨɨsta’mpa y kutson̈ta’amɨ:

VIDEO: Kupuujɨ tyityam in̈kupɨkpa mex iga min̈teeñkamoktaap (5:09)

¿Mikɨɨn̈ba inin̈madayyaj tun̈gakyaj de Jehová?
Ju’uts in̈kej je’m video, ¿tyi iyooxpa’t Grayson iga odoy kɨ’n̈iñ?

Maaj dya’ tan̈ka’ tan̈kupɨk Jehová jesɨk tantoyba jempɨk je’ ityoyba y tanjooyixpa jempɨk je’ ijooyixpa. Maytya’amɨ Salmo 97:10 y an̈matta’amɨ tyi iñjɨɨsta’mpa y kutson̈ta’amɨ:

Kun ityumpɨy jempɨk in̈kujuykaneum hasta sɨɨ, ¿tyityam ityoyba Jehová, y tyityam ijooyixpa?
¿Juutypɨk wɨap iñtyoy jempɨk wɨɨ y iñjooyix jempɨk dya’ wɨɨ?

6. Tawɨnɨga’yba jesɨk tan̈kupɨkpa Jehová

Wɨɨ siiga juchixkej tan̈kupɨkpa Jehová. Maytya’amɨ Isaías 48:17, 18 y an̈matta’amɨ tyi iñjɨɨsta’mpa y kutson̈ta’amɨ:

¿In̈kupɨkpa iga Jehová ijoodon̈ jempɨk maaj wɨɨ para taɨchtyam? ¿Tyi’iga iñjɨɨspa jeempɨk?
Dende jesɨk moj in̈kuyujka’ je’m Biblia, ¿juutypɨk miyooxpa’tne’ iga maaj in̈wɨixpɨguiñ Jehová, je’m nuntapɨk Dios?

WEEÑI NƗMYAJPA IGA: «Dios dya’ ityeguet siiga ɨch an̈wɨwatpa o dya’».