AN̈KEJAYOʼOYI 36

Juchixkej tan̈wɨwatta’miñ y tanuuman̈matta’miñ

REPRODUCIR EN

Tantumpɨytyam tanaitytyamto’oba amigojyaj iga iwɨwatyajiñ y nuuman̈matyajiñ, y Jehová jeexpɨktyim amigojyaj ixunba. Pero usan̈ tan̈ka’, iga tsaam ja’yan̈yaj dya’ iwɨwatyajpa y dya’ nuuman̈matyajpa. ¿Juutypɨk tawɨwada’yba siiga juchixkej tan̈wɨwatpa y tanuuman̈matpa?

1. ¿Tyi’iga juchixkej tan̈wɨwatta’miñ y tanuuman̈matta’miñ?

Tanakwiñkejpa iga tantoyba Jehová y tanaidyay respeto jesɨk tan̈wɨwatpa y tanuuman̈matpa. Odoy kujama’ayɨ iga Jehová ijoodon̈ ityumpɨy jempɨk tanjɨɨspa y tan̈watpa (Hebreos 4:13). Jesɨk tan̈wɨwatpa y tanuuman̈matpa je’ ia’mpa y tsaam ichoowaixpa. «Jehová ijooyixpa jempɨk tsaam imalwatyajpa pero iniity tuum wɨbɨk nanɨgo’oyi kun jempɨk dya’ imalwatyajpa» (Proverbios 3:32).

2. ¿Juchix nasuntaap iga tan̈wɨwatta’miñ y tanuuman̈matta’miñ?

Jehová tachi’iba yɨ’p an̈ki’mayo’oyi: «odoy namɨgoyaytyamtaajɨ» (Zacarías 8:16, 17). ¿Tyi nɨmto’oba yɨ’p? Iga dya’ tammɨgoya’yba tanfamilia, jempɨk tan̈waganayooxayajpa, je’m tɨwɨtam je’m kumunjompɨk y jempɨk iniityyaj teguedɨ’ɨyi. Jempɨk iwɨwatpa dya’ mɨgo’yba y dya’ nu’mpa (maayɨ’ Proverbios 24:28 y Efesios 4:28). Iyojyajpatyim je’m impuestos (Romanos 13:5-7). «Je’yukmɨ juchixkej tan̈wɨwattamto’oba y tanuuman̈mattamto’oba» (Hebreos 13:18, TNM).

3. ¿Juutypɨk tawɨwada’yba siiga tan̈wɨwatpa y tanuuman̈matpa?

Jesɨk taixpɨktaap iga tan̈wɨwatpa y tanuuman̈matpa, tun̈gakyaj takupɨgayyajpa. Tayooxpado’ybatyim iga idyiñ paz y confianza je’m kumunjom. Y je’m tanjɨɨxi dyatyim tamo’ogɨ’yba. Siiga tan̈wɨwatpa y tanuuman̈matpa tan̈watpa iga kupɨktaiñ «jém Dios iŋquímayooyi, jém tacɨacputpaap» y wɨapsɨ iga tun̈gakyaj mojpatyim ikuyooxayaj Jehová (Tito 2:10).

MAAJ TAN̈WƗKUYUJKAIÑ

Tana’miñ juutypɨk maaj tan̈wɨnanɨga’yba Jehová jesɨk tan̈wɨwatpa y tanuuman̈matpa.

4. Jehová iwɨixpa jempɨk iwɨwatyajpa y nuuman̈matyajpa

Maytya’amɨ Salmo 44:21 y Malaquías 3:16, y an̈matta’amɨ tyi iñjɨɨsta’mpa y kutson̈ta’amɨ:

¿Wɨɨ tanjɨɨs iga dya’ tyi naspa siiga tanan̈yampa tyityam nasne’? ¿Tyi’iga iñjɨɨspa jeempɨk?
Siiga tanuuman̈matpa mex iga tan̈ka’ tan̈wat, ¿ju’uts in̈jaam Jehová?

Jesɨk je’m tsɨxtyam nuuman̈matyajpa, imaymaywatyajpa ijaatun̈yaj. Jesɨk taɨchtyam tanuuman̈matta’mpa, tammaymaywatta’mpa Jehová.

5. Juchixkej tan̈wɨwatta’miñ y tanuuman̈matta’miñ

Ja’yan̈yaj ikupɨkyajpa iga dya’ tyi naspa siiga dya’ tan̈wɨwatpa y dya’ tanuuman̈matpa, pero taɨch dya’ wɨɨ iga tan̈wadyiñ jeempɨk. ¿Tyi’iga? A’mta’amɨ je’m VIDEO.

VIDEO: ¿Tyi wɨap tayooxpa’t iga tamaymayaiñ? Kua’yñeiñ tanjɨɨxi (2:32)

Maytya’amɨ Hebreos 13:18 y an̈matta’amɨ juutypɨk wɨap tan̈wɨwatta’m y tannuuman̈matta’m jesɨk taity...

... kun tanfamilia.
... juuty tayooxaap o juuty takuyujpa.
... tun̈gak an̈eymɨ.

6. Jesɨk tan̈wɨwatpa y tanuuman̈matpa tawɨwada’yba

Juchixkej tamaymayaap siiga tan̈wɨwatpa y tanuuman̈matpa mex iga tan̈ka’ tan̈wat. Maytya’amɨ Salmo 34:12-16 y an̈matta’amɨ tyi iñjɨɨsta’mpa y kutson̈ta’amɨ:

¿Juutypɨk wɨap tayooxpa’t siiga juchixkej tan̈wɨwatpa y tanuuman̈matpa?

Siiga tuum an̈komɨ’ɨyi iwɨwatpa y nuuman̈matpa maaj nawɨnanɨgayyajtaap.
Jesɨk algun i iwɨwatpa y nuuman̈matpa juuty yooxaap je’m ijefe maaj iniidya’yba confianza.
Jesɨk tan̈wɨwatta’mpa y tanuuman̈matta’mpa, je’m teguedɨ’ɨyiyaj tawɨa’myajpa.

WEEÑI NƗMYAJPA IGA: «Tuum xutyu mɨgo’oyi dya’ i imalwada’yba».