AN̈KEJAYOʼOYI 37
Je’m yooxakuy y je’m tumiñ ¿tyi in̈kejpa je’m Biblia
¿Oyñe’ mikobakpiiji por je’m yooxakuy y je’m tumiñ? Wɨapsɨ iga por je’m yooxakuy tanaitywɨ’ɨp uxan̈ tan̈ka’ tan̈wat jempɨk Jehová ixunba. Je’m Biblia tachi’iba wɨtampɨk an̈ki’mayo’oyiyaj iga wɨap tayooxpa’t.
1. ¿Juutypɨk tan̈ki’mpa je’m Biblia iga tana’mta’miñ je’m yooxakuy?
Dios ixunba iga tamaymayaiñ kun je’m yooxakuy tan̈watpa’ap. Je’m Biblia nɨmpa: «Maaj wɨɨ iga je’m pɨɨxiñ maymayaiñ […] kun je’m yooxakuy iwatnewɨ’ɨp» (Eclesiastés 2:24). Jehová tsaam yooxaap. Jesɨk tan̈watki’psta’mpa y tan̈watta’mpa kun maymayaaji je’m tanyooxakuy, sɨ’ tan̈wat jempɨk je’ ikusu’nɨ’yba y taɨch tamaymayaptyim.
Je’m yooxakuy tayooxpa’tpa, pero jesɨk pɨɨmi tayooxaap wɨap iwat iga odoy tan̈kuyooxaiñ Jehová (Juan 6:27). Je’ tajɨykama’yba iga tachi’iba tyityam tatogoyay siiga juchixkej tan̈kupɨkpa.
2. ¿Juutypɨk wɨɨ iga tana’mta’miñ je’m tumiñ?
Je’m Biblia nɨmpa iga «je’m tumiñ takupujpa», pero tanɨ’ma’ybatyim iga je’m tumiñ dya’ wɨap tachi’ je’m nuntapɨk maymayaaji (Eclesiastés 7:12). Je’yukmɨ je’m Biblia tanɨ’ma’yba iga odoy tan̈kusu’nɨ’yiñ je’m tumiñ y tachi’iba yɨ’p an̈ki’mayo’oyi: «Maymáya̱jɨ con t́it́am iniit́» (maayɨ’ Hebreos 13:5). Jesɨk tamaymay kun tyityam tanaity dyam tanteguedaap iga pɨɨmi tayooxaap y dya’ tatsoobɨy ja’tspa (Proverbios 22:7). Dyatyim tan̈kupɨkpa je’m mɨgo’oyi iga wɨap tan̈kooñwɨy ja’yan̈ tumiñ mex siiga dya’ pɨɨmi tayooxaap.
3. ¿Juutypɨk wɨap tanyooxpadoy kun je’m tantumiñ?
Jehová chio’yba tyityam iniity y tan̈watki’psta’mpa jesɨk tanchi’itya’mpa «jém yaacha̱yajpáppɨc […] t́it́am it́ogóyáy» (1 Timoteo 6:18). Tan̈wɨpɨkpa je’m tantumiñ jesɨk tayooxpadoytya’mpa je’m kumunjom y jesɨk tanyooxpa’tyajpa je’m tantɨwɨtam y tun̈gakyaj. Jehová tsaam ityeguet iga tachioytya’miñ kun ityumpɨy tananmaj, jesɨk tan̈watpa jeempɨk tammaymaywatpa y tamaymayaptyim (maayɨ’ Hechos 20:35).
MAAJ TAN̈WƗKUYUJKAIÑ
Tan̈kɨ’pin̈iñ juutypɨk wɨɨ iga tana’miñ je’m yooxakuy, tamaymayaiñ kun tyityam tanaity y juutypɨk yɨ’p tawɨwada’yba.
4. Wɨwaatɨ je’m iñyooxakuy iga kuji’ptaiñ Jehová
Je’m tan̈wɨnanɨgo’oyi kun Jehová tɨgɨyku’mpa kun tanyooxakuy. A’mta’amɨ je’m VIDEO y an̈matta’amɨ tyi iñjɨɨsta’mpa y kutson̈ta’amɨ:
-
Kun jempɨk iwat Jason juuty yooxaap, ¿tyi miga’man̈jakpa?
-
¿Juutypɨk ikwiñkej iga dya’ numaaj ityeguet iyooxakuy?
Maytya’amɨ Colosenses 3:23, 24 y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi’iga jesɨk tan̈watta’mpa algun yooxakuy tan̈watta’miñ kun ityumpɨy tananmaj?
Wɨɨ iga tayooxata’miñ, pero maaj wɨɨ iga tanteguedata’miñ iga tan̈kuyooxata’mpa Jehová.
5. Siiga tamaymayaap kun tyityam tanaity tawɨwada’yba
Ja’yan̈yaj iniityyajto’oba ja’yan̈ tumiñ, pero je’m Biblia dya’ tachi’iba yɨ’p an̈ki’mayo’oyi. Maytya’amɨ 1 Timoteo 6:6-8 y an̈matta’amɨ tyi iñjɨɨsta’mpa y kutson̈ta’amɨ:
-
¿Ju’p an̈ki’mayo’oyi tachi’iba je’m Biblia?
Wɨap tammaymaya mex iga dya’ ju’chan̈ tanaity. A’mta’amɨ je’m VIDEO y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi’iga maymayyaj yɨ’pyaj familia mex iga dya’ ju’chan̈ tumiñ iniityyaj?
¿Pero tyi naspa siiga tanaityum ja’yan̈ y majtyim tanaitytyo’oba? Jesús ikwiñkej iga yɨkxpɨk jɨɨxi dya’ wɨɨ. Maytya’amɨ Lucas 12:15-21 y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi min̈keja’yba je’m akwiñkejo’oyi ipɨkwɨ’ɨp Jesús? (Maytya’amɨ je’m versículo 15).
Maytya’amɨ Proverbios 10:22 y 1 Timoteo 6:10 y an̈matta’amɨ tyi iñjɨɨsta’mpa y kutson̈ta’amɨ:
-
¿Iñjɨɨspa iga maaj wɨɨ iga tanamigojaiñ Jehová o iga tanaidyiñ ja’yan̈ tumiñ? ¿Tyi’iga?
-
¿Tyi naspa siiga tsaam tan̈kusu’nɨ’yba je’m tumiñ?
6. Jehová tachi’iba tyityam tatogoya’yba
Jesɨk dya’ tayooxakuyɨy y jesɨk dya’ ju’chan̈ tumiñ tanaity wɨap tayooxpa’t iga tanjoodon̈aiñ ju’tsan̈ fe tanaidyay Jehová. A’mta’amɨ je’m VIDEO iga iñjoodon̈aiñ juutypɨk wɨap iñya’achɨy y okmɨ an̈matta’amɨ tyi iñjɨɨsta’mpa y kutson̈ta’amɨ:
-
¿Ju’ptam kobakpiiji in̈teeñkamok je’m tɨɨwɨ?
-
¿Tyi iwat iga wɨaiñ idyɨk imatspak ifamilia?
Maytya’amɨ Mateo 6:25-34 y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi ijɨykama’yba Jehová jempɨk pɨɨmi ikuyooxayajpa?
WEEÑI NƗMYAJPA IGA: «Juchixkej ayooxaiñ iga ammatspakpa anfamilia. Dya’ wɨap annɨk tumtum semana je’m an̈tu’umaajiyaj».
-
¿Ju’p texto miyooxpa’tpa in̈kupɨk iga miwɨnɨga’yba siiga wiñtyi in̈kuyooxaap Jehová?
JEMPƗK TAN̈KUYUJKA’
Je’m yooxakuy y je’m tumiñ tayooxpa’tyajpa, pero odoy pɨɨmi tanteguedayajiñ, iga wɨap taktsakyaj iga tan̈kuyooxaap Jehová.
¿Iñjɨɨspanam?
-
¿Tyi wɨap miyooxpa’t iga odoy pɨɨmi iñtyeguedaiñ je’m yooxakuy?
-
¿Juutypɨk tawɨwada’yba siiga tamaymay kun tyityam tanaity?
-
Jehová ijɨykama’yba je’m iyooxakɨ’ɨwiñyaj iga ichi’iba tyityam ityogoyayyaj, ¿juutypɨk wɨap inikwiñkej iga iniidyay confianza?
JODON̈AAJƗNAM
Jodon̈aajɨ siiga je’m Biblia nɨmpa iga malo jesɨk tatumiñɨ’yba.
«¿Iniity culpa je’m tumiñ iga tsaam ity malwado’oyiyaj?» (Artículo de jw.org)
Kɨ’pin̈ɨ iga Jehová maymay jesɨk tanchi’iyajpa tun̈gakyaj tyityam tanaity.
«¿Tyi nɨmpa je’m Biblia jesɨk tanchi’iba tun̈gakyaj tyityam tanaity?» (Artículo de jw.org)
¿Malo siiga tamɨɨchpa iga tan̈kooñwɨytyo’oba tumiñ?
«¿Tyi nɨmpa je’m Biblia de je’m mɨɨchiyaj juuty tan̈kooñwɨ’yba tumiñ?» (¡Despertad!, marzo de 2015)
Maayɨ’ tyi iyooxpa’t tuum pɨɨxiñ iga ikak je’m iityi mex iga nu’mpa idyɨk y mɨɨchpa idyɨk iga ikooñwɨ’yba tumiñ.
«Tsaam idyɨk an̈kusu’nɨ’yba an̈wat apuesta» (La Atalaya, 1 de noviembre de 2011)
