AN̈KEJAYOʼOYI 38
Tantsoowaixtya’miñ je’m ityi
Tañityijom ity ja’yan̈ tyidyin̈kej iga wɨap tan̈watta’m. Y mex iga tanan̈teeñkamokpa ja’yan̈ kobakpiijiyaj, wɨap tammaymaya. ¿Juutypɨk wɨap tanakwiñkejay Jehová iga tantsoowaixpa je’m ityi? ¿Y tyi’iga tsaam importante iga tan̈wadyiñ?
1. ¿Tyi’iga wɨɨ iga tantsoowaixtya’miñ je’m ityi?
Wɨɨ iga tantsoowaixtya’miñ je’m ityi iga je’ tuum xaaja iga tachi’iñeta’m je’m tanJaatun̈, Jehová. Je’m Biblia nɨmpa «micham jempɨk michio’yba je’m ityi», yɨ’p nɨmto’oba iga je’am iwatne’ ityumpɨy jempɨk ity yɨ’p naxyukmɨ (Salmo 36:9). «Tachiiba tamvida tantu̱mpɨyt́am. Tachiibat́im jém sa̱wa iga tasa̱upɨcpa. Tachiiba it́u̱mpɨy» (Hechos 17:25, 28). Jehová je’am jempɨk tachi’iñeta’m ityumpɨy iga wɨaiñ tañitytya’m y tamaymayata’miñ (maayɨ’ Hechos 14:17).
2. ¿Juutypɨk wɨap tanakwiñkejay Jehová iga tantsoowaixpa je’m ityi?
Dende jesɨk iñaapa manɨktsɨy, Jehová mia’man̈ta’aya. Tuum Dios iyooxakɨ’ɨwiñ iga iñɨɨyi David nɨm yɨ’ɨmpɨk en tuum an̈wejpado’oyi: «Iñixkuy aa’m dende jesɨk aju’mpakta» (Salmo 139:16). Jehová tsaam ichoowaixpa je’m iñityi (maayɨ’ Mateo 10:29-31). Y je’ tsaam ityoyan̈jaampa jesɨk tsoobɨy akka’ataap algun i o iga nakka’ataap iya’ak (Éxodo 20:13). a Siiga dya’ tanakuixtyaap y tammalnaska’aba o tammalwada’yba tun̈gakyaj, Jehová ityoyan̈jaampatyim. Jesɨk tanakuixtyaap y tan̈kuixayyajpa tun̈gakyaj iityi, tanakwiñkejpa iga tantsoowaixpa je’m ityi jempɨk Dios tachi’iñeta’m.
MAAJ TAN̈WƗKUYUJKAIÑ
Tana’miñ juutypɨk wɨap tanakwiñkej iga tantsoowaixpa je’m ityi tachi’iñewɨ’ɨp Jehová.
3. Kuiixɨ’ je’m iñityi
Je’m cristianojyaj ijɨykamayñeyajwɨ’ɨp Jehová iga ikuyooxayajpa, ikɨan̈kodayñeyajum je’m iityi ju’uts tuum sacrificio y je’yukmɨ wɨɨ iga juchixkej ikuixyajiñ. Maytya’amɨ Romanos 12:1, 2 y an̈matta’amɨ tyi iñjɨɨsta’mpa y kutson̈ta’amɨ:
-
¿Tyi’iga wɨɨ iga in̈kuixiñ iñityi?
-
¿Juutypɨk wɨap in̈wat?
4. Kuiixɨ’ iñityi y kuixa’ayɨ tun̈gakyaj iityi
Je’m Biblia tanɨ’ma’yba iga tanakuixtyaiñ kun tyityam wɨap tamalwaday o imalwaday tun̈gakyaj. A’mta’amɨ je’m VIDEO jempɨk tan̈keja’yba juutypɨk wɨap tanakuixtya.
Maytya’amɨ Proverbios 22:3 y an̈matta’amɨ juutypɨk wɨap tanakuixtya y tan̈kuixyaj tun̈gakyaj jesɨk...
-
... taity tantɨkkɨ’ɨm.
-
... taity juuty tayooxaap.
-
... nɨkpa tamɨɨchi.
-
... tanakwitypa carro o tanɨki carrojom.
5. Tsoowaixa’ayɨ iityi tuum tsɨɨxi dyapɨknam nayñe’
David in̈mat iga Jehová tsaam ityeguedaap tuum tsɨɨxi jempɨk dyanam nayñe’. Maytya’amɨ Salmo 139:13-17 y an̈matta’amɨ tyi iñjɨɨsta’mpa y kutson̈ta’amɨ:
-
Para Jehová, ¿juchix mojpa ityi algun i?
Je’m an̈ki’mayo’oyiyaj ichi’iwɨ’ɨp Jehová a Israel ikupujpa idyɨk je’m yoomo’ manɨkkomkanewɨ’ɨp y je’m tsɨɨxi dyapɨknam nayñe’. Maytya’amɨ Éxodo 21:22, 23 y an̈matta’amɨ tyi iñjɨɨsta’mpa y kutson̈ta’amɨ:
-
¿Ju’uts idyɨk ia’m Jehová jesɨk algun i dya’ idyɨk ichoobɨy akka’aba tuum tsɨɨxi dyapɨknam nayñe’?
-
¿Ju’uts in̈jaam jesɨk algun i ichoobɨy akka’aba tuum tsɨɨxi dyapɨknam nayñe’? b
-
Y mich, ¿ju’uts iña’m jempɨk Dios ijɨɨspa?
Mex iga tuum yoomo’ ichoowaixpa je’m ityi, wɨapsɨ ijɨɨs iga dya’ tyi naspa siiga iga’yba imaanɨk. Maytya’amɨ Isaías 41:10 y an̈matta’amɨ tyi iñjɨɨsta’mpa y kutson̈ta’amɨ:
-
Siiga tuum yoomo’ teguedɨytyaap iga iga’yiñ imaanɨk, ¿iapa’ap wɨap iwagay yooxpado’oyi? ¿Tyi’iga?
WEEÑI NƗMYAJPA IGA: «Je’m yoomo’ wɨap ipɨk ijɨɨxi siiga iga’yba imaanɨk o dya’».
-
¿Tyi mikkupɨkpa iga Jehová ichoowaixpa je’m yoomo’ manɨkkomkanewɨ’ɨp y je’m tsɨɨxi dyapɨknam nayñe’?
JEMPƗK TAN̈KUYUJKA’
Jehová tachi’iñeta’m tañityi. Je’m Biblia tan̈keja’yba iga tan̈kuixiñ, tan̈kupujiñ y tanto’yiñ tañityi y tun̈gakyaj iityi.
¿Iñjɨɨspanam?
-
¿Tyi’iga tanjoodon̈tam iga Jehová ichoowaixpa je’m ityi?
-
¿Ju’uts in̈jaam Jehová jesɨk algun i tsoobɨy nakka’ataap o ichoobɨy akka’aba tun̈gak?
-
¿Tyi jempɨk maaj in̈kusu’nɨ’yba iñityijom?
JODON̈AAJƗNAM
¿Juutpɨk wɨap tanchi’ gracias Jehová iga tachi’iñeta’m tañityi?
¿Iwada’yba perdón Dios tuum yoomo’ iga oyñe’ iga’y imaanɨk?
«¿Tyi nɨmpa je’m Biblia jesɨk aga’ytyaap tuum tsɨɨxi?» (Artículo de jw.org)
Kɨ’pin̈ɨ ju’uts ia’m Dios tañityi y je’m mɨɨchiyaj tan̈kupin̈pa’ap.
«¿Wɨɨ tan̈kupin̈ mɨɨchiyaj jempɨk wɨap imalwaday tañityi?» (¡Despertad!, 8 de octubre de 2000)
¿Y siiga algun i nakka’atato’oba? Kɨ’pin̈ɨ juutypɨk wɨap iyooxpa’t je’m Biblia.
«¿Wɨap ayooxpa’t je’m Biblia siiga anakka’atato’oba?» (Artículo de jw.org)
a Jehová tsaam ityeguet jempɨk pɨɨmi an̈ya’kneyaj (Salmo 34:18). Je’ iwɨkutɨ’ɨyɨ’yba ju’uts in̈jaamyaj y iyooxpa’tto’oba jempɨk ijɨɨsneyaj iga nakka’ayajtato’oba. Kɨ’pin̈ɨ ju’tspɨy wɨap iyooxpa’tyaj je’m an̈ki’mayo’oyiyaj in̈kejpa’ap je’m artículo «¿Wɨap ayooxpa’t je’m Biblia siiga anjɨɨsne’ iga anakka’atato’oba?», wɨap impa’t juuty nɨmpa «Jodon̈aajɨnam».
b Siiga peka’ tuum yoomo’ ichoobɨy aga’yñe’ imaanɨk, odoy ijɨɨxiñ iga Jehová ni keman dya’ iwada’yba perdón. Maaj tawɨan̈mada’yba je’m artículo «¿Tyi nɨmpa je’m Biblia jesɨk aga’ytyaap tuum tsɨɨxi?», impa’tpa juuty nɨmpa «Jodon̈aajɨnam».
