Tsaam importante je’m nɨ’ɨpiñ. Siiga dya’ tanɨ’piñɨytya’m dya’ wɨap tañitytya’m. Iga Dios tawatneta’m, numaaj je’ tanɨ’ma’yba juutypɨk wɨɨ iga tampɨguiñ. ¿Tyi tanɨ’ma’yba? ¿Wɨapsɨ tan̈kɨ’ɨs o tanakka’mta’m je’m nɨ’ɨpiñ? ¿Tyi wɨap miyooxpa’t iga in̈wɨpɨguiñ iñjɨɨxi jesɨk tɨgɨyku’mpa je’m nɨ’ɨpiñ?

1. ¿Ju’uts ia’m Jehová je’m nɨ’ɨpiñ?

Wiñɨk, Jehová iñɨ’may je’m iyooxakɨ’ɨwiñyaj: «Je’m nɨ’ɨpiñ iniitywɨ’ɨp je’m maayi’, je’am je’m iityi» (Levítico 17:14). Para Jehová, je’m nɨ’ɨpiñ ikwiñkejpa je’m ityi. Y je’m ityi je’ tuum wɨbɨk xaaja tachi’iñewɨ’ɨp Dios, je’yukmɨ je’m nɨ’ɨpiñ tsaam sagrado.

2. ¿Taa’mchitya’mpa Dios iga tampɨkta’miñ je’m nɨ’ɨpiñ?

Wiñtyityim, Jehová iñɨ’may je’m iyooxakɨ’ɨwiñyaj iga odoy ikɨ’ɨsyajiñ nɨ’ɨpiñ (maayɨ’ Génesis 9:4 y Levítico 17:10). Okmɨ Jehová eybɨktyim nɨm yɨ’p an̈ki’mayo’oyi. Je’m kumun nayooxaoyyajpa’ap—je’m apóstolyaj y ancianojyaj—ichi’iyaj yɨ’p an̈ki’mayo’oyi je’m cristianojyaj: «Odoy pɨktson̈ta’amɨ […] nɨ’ɨpiñ» (maayɨ’ Hechos 15:28, 29, TNM).

¿Tyi nɨmto’oba iga odoy tampɨktson̈iñ nɨ’ɨpiñ? Siiga je’m doctor miñɨ’ma’yba iga odoy iñuguiñ alcohol, wɨapsɨ iga mich in̈kupɨkpa. Pero ¿in̈kɨ’ɨspa wi’kkuyan̈jom o miniju’ptaap? Dya’ in̈watpa yɨ’ɨmpɨk. Jeempɨktyim naspa kun je’m an̈ki’mayo’oyi iga odoy tampɨktson̈ta’miñ nɨ’ɨpiñ. Tan̈kupɨkta’mpa Dios jesɨk dya’ tan̈kɨ’ɨsta’mpa nɨ’ɨpiñ, dya’ tanukpa, dya’ tan̈kɨ’ɨspa animatyaj iga dya’ tobayyajtaap iñɨ’ɨpiñ ni je’m wi’kkuy iga kukomayñeyajta nɨ’ɨpiñ.

Je’m doctores ikka’mayyajpa nɨ’ɨpiñ jempɨk mɨmneyaj iga pɨxiñ, je’yukmɨ wɨapsɨ iga ipɨkyajpa ityumpɨy o tuum je’m cuatro najaaka’ iniitywɨ’ɨp je’m nɨ’ɨpiñ: glóbulos rojos, glóbulos blancos, plaquetas y plasma. Y Dios dya’ ikusu’nɨ’yba. Pero itytyim tratamiento juuty pɨktaap maaj uxtyam, dyampɨk ka’psne’eba ju’uts nɨ’ɨpiñ (fracciones sanguíneas) y yɨ’p wɨap ipɨkta tuum je’m cuatro najaaka’ iniitywɨ’ɨp je’m nɨ’ɨpiñ. Y wɨapsɨ iga je’tyim iñɨ’ɨpiñ pɨgaytyaap. Okmɨ iga ikɨ’pin̈neum ju’ptam tratamiento ity, iya’agam ipɨkpa ijɨɨxi (Gálatas 6:5). a

 MAAJ TAN̈WƗKUYUJKAIÑ

3. Pɨɨkɨ jɨɨxiyaj imaymaywatpa’ap Jehová

¿Juutypɨk wɨap impɨk jɨɨxiyaj iwɨixpa’ap Dios jesɨk tɨgɨyku’mpa je’m nɨ’ɨpiñ? A’mta’amɨ je’m VIDEO y okmɨ an̈matta’amɨ ju’tspɨy tawɨwada’yba siiga tan̈watpa ju’uts nɨmpa yɨ’ɨm:

• Waga’ayɨ Dios joodon̈o’oyi (Santiago 1:5).

• Kua’mɨ jɨɨxian̈chio’oyiyaj itywɨ’ɨp Bibliajom y kupɨɨkɨ (Proverbios 13:16).

• Juuty miity akwago’oyɨ ju’ptam tratamiento ity iga wɨaiñ in̈kupin̈.

• Kɨ’pin̈ɨ ju’ptam tratamiento dya’ impɨktson̈ba.

• Odoy mimo’ogɨ’yiñ je’m jɨɨxi impɨknewɨ’ɨp (Hechos 24:16). b

• Jɨɨskupakneɨ’, dya’ i wɨap miñɨ’may ju’p jɨɨxi wɨap impɨk—ni in̈wɨdyaaya, ni iñyoomo’, ni tuum anciano o jempɨk mikkuyujpa—mich jempɨk impɨkpa je’m iñjɨɨxi (Romanos 14:12).

• Jaykamtsaakɨ je’m jɨɨxi impɨknewɨ’ɨp.

4. Je’m Jehová itestigojyaj natsoyɨyyajtaptyim

Iga tan̈kupɨkta’mpa je’m Dios ian̈ki’mayo’oyi, de je’m nɨ’ɨpiñ, dya’ nɨmto’oba iga dya’ tanawɨtsoyɨytyaap. A’mta’amɨ je’m VIDEO.

Maytya’amɨ Tito 3:2 y an̈matta’amɨ tyi iñjɨɨsta’mpa y kutson̈ta’amɨ:

• ¿Tyi’iga jesɨk tanamuruyajpa je’m doctoryaj wɨɨ iga tan̈wadyiñ kun respeto?

 5. Fracciones iniitywɨ’ɨp je’m nɨ’ɨpiñ

Je’m nɨ’ɨpiñ iniity cuatro najaaka’: glóbulos rojos, glóbulos blancos, plaquetas y plasma. Y tumtum yɨ’pyaj jaaka’ iniity uxtyam, dyampɨk ka’psne’ ju’uts nɨ’ɨpiñ. c Y weeñi yɨ’p maaj uxtyam iniity nɨ’ɨpiñ, pɨkyajtaap iga tsoyɨytyaap ka’kuyyaj o jesɨk algun i nakunɨ’piñaytyaap.

Ju’utsam ikuyujkane’ je’m Bibliajom, tumtum cristiano iya’ak ipɨkpa ijɨɨxi siiga ipɨktson̈ba tuum tratamiento iga tɨgɨyku’mpa kun je’m fracciones. Wɨapsɨ iga weeñiyaj ipɨkyajpa ijɨɨxi iga dya’ ipɨktson̈yajpa tuum tratamiento iga iniitypa jempɨk dyam ka’psne’ ju’uts nɨ’ɨpiñ. Pero tun̈gakyaj wɨapsɨ iga ipɨktson̈yajpa.

Jesɨk impɨkpa iñjɨɨxi, nakwa’ktaajɨ:

• ¿Juutypɨk anan̈mada’yba je’m doctor tyi’iga ampɨktson̈ba o dya’ je’m fracciones iniitywɨ’ɨp je’m nɨ’ɨpiñ?

JEMPƗK TAN̈KUYUJKA’

Jehová ixunba iga tantsoowaixtya’miñ je’m nɨ’ɨpiñ y odoy tammalpɨkta’miñ.

¿Iñjɨɨspanam?

• ¿Tyi’iga Jehová tsaam ichoowaixpa je’m nɨ’ɨpiñ?

• ¿Tyi’iga jesɨk nɨm Dios iga odoy tampɨktson̈ta’miñ nɨ’ɨpiñ tɨgɨyku’mpatyim iga odoy tanakka’mta’miñ?

• Jesɨk impɨkpa tratamiento iga tɨgɨyku’mpa je’m nɨ’ɨpiñ, ¿tyi miyooxpa’tpa in̈wɨpɨk iñjɨɨxi?