AN̈KEJAYOʼOYI 08
Mich wɨap iñamigoja Jehová
Jehová ixunba iga mich maaj in̈wɨixpɨguiñ. ¿Tyiʼiga? Iga Dios ijoodon̈ siiga maaj in̈wɨixpɨkpa jeʼm ijɨɨxiyaj, juutypɨk iwatneʼ ityumpɨy y jempɨk jeʼ ixunba, majnam iñamigojatoʼoba. ¿Pero wɨapsɨ tanamigojataʼm Dios? (Maayɨʼ Salmo 25:14). ¿Tyi wɨap in̈wat iga wɨaiñ iñamigoja? Jeʼm Dios In̈maatyi ikutson̈ba yɨʼpyaj akwagoʼoyiyaj y nɨmpatyim iga jeʼm wɨnanɨgoʼoyi kun Jehová jeʼam jempɨk maaj wɨɨ iga iniidyiñ.
1. ¿Tyi mityɨʼppa Jehová iga in̈wadyiñ?
«Cunúctaamɨ Dios, jesɨc micunúcpat́im Dios» (Santiago 4:8). ¿Tyi nɨmtoʼoba yɨʼpyaj an̈matyiyaj? Iga Jehová sɨʼ mityɨʼp iga iñamigojaiñ. Wɨapsɨ iga weeñi tan̈kaʼ ikujɨɨsyaj iga iamigojaap Dios iga dyaʼ wɨap tanaʼm. Pero jeʼ tatsagayñeʼ jeʼm Bibliajom ityumpɨy jempɨk nasuntaap iga maaj tan̈wɨixpɨktaʼmiñ y tan̈kunuʼktaʼmiñ. Jesɨk tammaytyaʼmpa jeʼm Dios In̈maatyi jeʼm tan̈wɨnanɨgoʼoyi kun Jehová maaj pɨɨmiaap, mex iga dyaʼ wɨap tanaʼmtaʼm.
2. ¿Tyiʼiga Jehová jeʼam jeʼm maaj wɨbɨk amigo wɨapaʼap iniity?
Jehová jeʼam jempɨk maaj mityoyba. Jeʼ ixunba iga mimaymayaiñ y in̈wagaʼyiñ iyooxpadoʼoyi jesɨk mityogoyay. Wɨap in̈kɨan̈koday «it́u̱mpɨy jém imvida jém tanJa̱tuŋ Dios icɨɨjo̱m porque tsa̱m tawattámpa cuenta» (1 Pedro 5:7). Jehová juchixkej iyooxpaʼtpa, ikpoʼkspa y ikumaton̈ba jeʼm iamigojyaj (maayɨʼ Salmo 94:18, 19).
3. ¿Tyi in̈joʼkpa Jehová iga iwatyajiñ jeʼm iamigojyaj?
Jehová tatoyba tantumpɨytyam, pero «iniity tuum wɨnanɨgoʼoyi kun jempɨk iwɨwatyajpa» (Proverbios 3:32). Jehová ixunba iga jeʼm iamigojyaj ityeguedayajiñ iwɨwatyaj y odoy iwatyajiñ tyityam jeʼ ijooyixpa. Wɨapsɨ iga weeñi ijɨɨsyajpa iga ni keman dyaʼ wɨap iwatyaj jempɨk Jehová ixunba. Pero jeʼ tsaam takutɨʼɨyɨytyaʼmpa y iwɨpɨktson̈ba ityumpɨy jempɨk ityoyyajpa y ityeguedayajpa iwatyaj jempɨk jeʼ ixunba (Salmo 147:11; Hechos 10:34, 35).
MAAJ TAN̈WƗKUYUJKAIÑ
Maaj tan̈kuyujkaiñ juutypɨk wɨap tanamigoja Jehová y tyiʼiga jeʼam jeʼm maaj wɨbɨk amigo wɨapaʼap tanaity.
4. Abrahán iamigo idyɨk Jehová
Jeʼm Biblia in̈matpa de Abrahán (iñɨɨyityim Abrán), yɨʼp tan̈kejaʼyba tyi nɨmtoʼoba iga tanamigojaiñ Dios. Maytyaʼamɨ jeʼm Abrahán iñasɨyoʼoyi en Génesis 12:1-4 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyi iwaʼgay Jehová iga iwadyiñ Abrahán?
-
¿Tyi ijɨykamay Jehová?
-
¿Tyi iwat Abrahán okmɨ iga ipɨktson̈ jeʼm Jehová ian̈kiʼimiyaj?
5. Tyi iwaʼgaʼyba Jehová jeʼm iamigojyaj
Tanan̈joʼktaʼmpa iga tanamigojyaj tayooxpaʼtyajiñ.
-
¿Juutypɨk iñxunba mich iga jeʼm iñamigojyaj miyooxpaʼtyajiñ?
Maytyaʼamɨ 1 Juan 5:3 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyi ixunba Jehová iga iwatyajiñ jeʼm iamigojyaj?
Siiga tan̈kupɨkpa Jehová, wɨɨ iga tan̈wattaʼmiñ kukakiyaj jeʼm tañityijom. Maytyaʼamɨ Isaías 48:17, 18 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyiʼiga Jehová iwaʼgaʼyba jeʼm iamigojyaj iga iwatyajiñ kukakiyaj iityijom?
6. Juutypɨk Jehová iyooxpaʼtpa jeʼm iamigojyaj
Jehová iyooxpaʼtpa jeʼm iamigojyaj iga iyaʼachɨyyajiñ jesɨk yaʼachayajpa. Aʼmtaʼamɨ jeʼm VIDEO y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Juutypɨk Jehová iyooxpaʼtneʼ jeʼm yoomoʼ iga odoy iniidyiñ jeʼm jɨɨxiyaj dyapɨk iyooxpaʼtpa?
Maytyaʼamɨ Isaías 41:10, 13 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Juutypɨk ijɨykamayñeʼ Jehová iga iyooxpaʼtpa jeʼm iamigojyaj?
-
¿In̈kupɨkpa iga Jehová wɨap miyooxpaʼt juʼuts tuum wɨbɨk amigo? ¿Tyiʼiga?
7. Siiga tanamigojtam Jehová, juchixkej tanamuruiñ
Jesɨk tanamuruyajpa tanamigojyaj maaj tan̈wɨixpɨkyajpa. Maytyaʼamɨ Salmo 86:6, 11 y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Juutypɨk wɨap tanamuru Jehová?
-
¿Juutypɨk tajɨʼyaʼyba Jehová?
WEEÑI NƗMYAJPA IGA: «Ni keman wɨap tanamigoja Dios».
-
¿Kun juʼp texto inin̈kejaʼyba tun̈gakyaj iga wɨap tanamigoja Jehová?
JEMPƗK TAN̈KUYUJKAʼ
Jehová ixunba iga iñamigojaiñ y jeʼ miyooxpaʼtpa iga in̈kunuʼguiñ.
¿Iñjɨɨspanam?
-
¿Juutypɨk iyooxpaʼtpa Jehová jeʼm iamigojyaj?
-
¿Tyiʼiga iñɨʼmaʼyba Jehová jeʼm iamigojyaj iga iwatyajiñ kukakiyaj jeʼm iityijom?
-
¿Tan̈kasɨ tanamigoja Jehová? ¿Tyiʼiga iñjɨɨspa jeempɨk?
JODON̈AAJƗNAM
¿Juutypɨk wɨap miyooxpaʼt iñityijom siiga iñamigojaap Dios?
«Jehová, tuum Dios jempɨk wɨɨ iga tañixpɨguiñ» (La Atalaya, 15 de febrero de 2003)
Kuyujkaɨʼ juutypɨk in̈wɨnanɨgaʼyba Dios.
Jodon̈aajɨ juutypɨk iyooxpaʼt tuum yoomoʼ iga iamigoja Jehová.
Kumatoon̈ɨ tyi ijɨɨsyajpa weeñiyaj de Jehová.