AN̈KEJAYOʼOYI 09

Jeʼm an̈wejpadoʼoyi miyooxpaʼtpa iga in̈kunuʼguiñ Dios

REPRODUCIR EN

¿Oyba inin̈jaam iga iñxunba yooxpadoʼoyi jeʼm iñityijom? ¿Iniity akwagoʼoyiyaj iga dyanam impaʼdayñeʼ ikutson̈oʼoyi? ¿Mityogoyay anmajan̈chioʼoyi o akpoksoʼoyi? ¿Maaj in̈kunuʼktoʼoba Jehová? Jeʼm an̈wejpadoʼoyi wɨap miyooxpaʼt. Pero ¿juutypɨk wɨɨ iga in̈wadyiñ jeʼm an̈wejpadoʼoyi? ¿Ikumaton̈ba Dios ityumpɨy jeʼm an̈wejpadoʼoyiyaj? ¿Tyi wɨap in̈wat iga Dios mikumaton̈iñ jesɨk mich inin̈wejpaʼtpa? Tan̈kɨʼpin̈iñ.

1. ¿Iapaʼap tanan̈wejpaʼdyiñ? ¿Tyityam wɨap tanjɨykiʼm?

Jesús in̈kej iga numaaj tanJaatun̈ sɨn̈yukmɨpɨk wɨɨ iga tanan̈wejpaʼttaʼmiñ. Jeʼ in̈wejpaʼttyim Jehová. Tun̈kɨy nɨm yɨʼɨmpɨk: «Cuando iniŋwejpáttámpa Dios, nɨmtaamɨ yɨɨmpɨc: ‹ManJa̱tuŋ Dios, miit́wɨɨp sɨŋyucmɨ…›» (Mateo 6:9). Jesɨk tanan̈wejpaʼtpa Jehová majtyim takunuʼkpa.

Jesɨk tanan̈wejpaʼtpa Dios wɨap tan̈waʼgay tyidyin̈kej, pero siiga tansunba iga Dios takutson̈iñ, wɨɨ iga tan̈waʼgaʼyiñ jempɨk jeʼ ixunba. Jeʼm Dios In̈maatyi nɨmpa iga «siiga taŋwágáypa Dios jém wɨ̱tampɨc cosa juuts ixunpa Dios, jesɨc tanjo̱doŋ iga tamatoŋpa» (1 Juan 5:14). Jesús tan̈kejay tyityam wɨap tan̈waʼk jesɨk tanan̈wejpaʼtpa Dios (maayɨʼ Mateo 6:9-13). Wɨɨ iga tan̈waʼgaʼyiñ jempɨk taɨchtyam tatogoyaytyaʼm, pero odoy tan̈kujaʼamaʼyiñ iga tanchiʼityaʼmiñ gracias y tan̈waʼgaʼyiñtyim iga iyooxpaʼdyiñ tun̈gakyaj.

2. ¿Juutypɨk tan̈wadyiñ jeʼm an̈wejpadoʼoyi?

Jeʼm Biblia nɨmpa: «Nɨʼmaytyaʼamɨ ityumpɨy tyityam iniitytyaʼm iñanmajom» (Salmo 62:8). Jeʼm tanan̈wejpadoʼoyi wɨɨ iga pudyiñ dende tananmajom, juchixkej wɨap tanan̈wejpaʼttaʼm Jehová. Juutytyin̈kej iga taitytyaʼm y juutypɨgam tawɨataʼmpa.

3. ¿Juutypɨk ikutson̈ba Dios jeʼm tanan̈wejpadoʼoyiyaj?

Takutson̈ba ikuyukmɨ jeʼm In̈maatyi y jeem ikutson̈batyim jeʼm tanakwagoʼoyiyaj. Jesɨk tammayba jeʼm Dios In̈maatyi wɨap tajɨɨxian̈chiʼ jesɨk tatogoyay joodon̈oʼoyi (Salmo 19:7; maayɨʼ Santiago 1:5). Jesɨk tanaitypa kutɨʼɨchiyaj Jehová tayooxpaʼtpa, ikuyukmɨ jeʼm tantɨwɨtam tayooxpaʼtpatyim.

MAAJ TAN̈WƗKUYUJKAIÑ

Tan̈kɨʼpin̈iñ juutypɨk wɨap tan̈wat an̈wejpadoʼoyiyaj iga ikusuʼnɨʼyba Dios y juutypɨk jeʼm an̈wejpadoʼoyiyaj wɨap tayooxpaʼttaʼm.

4. Jempɨk tawaʼgaʼyba Dios jesɨk tanan̈wejpaʼtpa

¿Tyi wɨɨ iga tan̈wadyiñ iga Dios ikumaton̈iñ jeʼm tanan̈wejpadoʼoyiyaj? Aʼmtaʼamɨ jeʼm VIDEO.

VIDEO: ¿Ikumaton̈ba Dios ityumpɨy jeʼm an̈wejpadoʼoyiyaj? (tuum jaakaʼ) (2:42)

Jehová ixunba iga numaaj jeʼ tanan̈wejpaʼttaʼmiñ. Maytyaʼamɨ Salmo 65:2 y an̈mattaʼamɨ tyi iñjɨɨstaʼmpa y kutson̈taʼamɨ:

¿In̈kupɨkpa iga jeʼm Dios ikumaton̈paʼap jeʼm an̈wejpadoʼoyiyaj ixunba iga mich inin̈wejpaʼdyiñ? ¿Tyiʼiga iñjɨɨspa jeempɨk?

Siiga tansunba iga Dios takumaton̈iñ jesɨk tanan̈wejpaʼtpa, wɨɨ iga tan̈kupɨguiñ jeʼm in̈kiʼmayoʼoyiyaj. Maytyaʼamɨ Miqueas 3:4 y 1 Pedro 3:12, y an̈mattaʼamɨ tyi iñjɨɨstaʼmpa y kutson̈taʼamɨ:

¿Tyi wɨɨ iga tan̈wadyiñ iga Dios ikumaton̈iñ tanan̈wejpadoʼoyiyaj?

Wɨapsɨ iga wɨsteen ejército nɨkpa an̈aajiyaj y tumtum iwaʼgayyajpa Dios iga iyooxpaʼdyiñ ikooñwɨyyaj jeʼm an̈aaji. ¿Wɨap tanjɨɨs iga Dios ikutson̈ba yɨʼpyaj an̈wejpadoʼoyiyaj?

5. Tanan̈wejpaʼttaʼmiñ Dios dende tananmajom

Jaʼyan̈yaj an̈kejayñeyajta iga nɨmyajiñ jeʼtyim jeʼtyim an̈matyiyaj jesɨk in̈wejpaʼtyajpa Dios. Pero ¿ikusuʼnɨʼyba Dios yɨʼpyaj an̈wejpadoʼoyiyaj? Maytyaʼamɨ Mateo 6:7 y an̈mattaʼamɨ tyi iñjɨɨstaʼmpa y kutson̈taʼamɨ:

¿Tyi wɨap tan̈wat iga odoy tanɨʼmiñ «jeet́im jeet́im aŋma̱t́i» jesɨk tanan̈wejpaʼtpa Dios?

Tumtum jaama kujɨɨsɨ algun tyi jempɨk mich in̈kusuʼnɨʼyba iñityijom y okmɨ chiɨʼ gracias Jehová. Siiga in̈watpa jeempɨk, jesɨk nasum tuum semana inin̈madayñeum Jehová siete jɨɨxiyaj y dyaʼ kun jeʼtyim jeʼtyim an̈matyiyaj.

Tuum wɨbɨk jaatun̈ ixunba iga jeʼm imaanɨk in̈madaʼyiñ juʼuts in̈jaam ianmajom. Jehová ixunbatyim iga tanan̈wejpaʼdyiñ dende tananmajom.

6. Jeʼm an̈wejpadoʼoyi jeʼ tuum wɨbɨk xaaja iga Dios tachiʼiñetaʼm

¿Juutypɨk wɨap tayooxpaʼt jeʼm an̈wejpadoʼoyi y maaj jesɨk sɨʼ tanyaʼachataʼm? Aʼmtaʼamɨ jeʼm VIDEO.

VIDEO: Jeʼm an̈wejpadoʼoyi tayooxpaʼtpa iga tanyaʼachɨytyaʼmiñ (1:32)

Jeʼm Dios In̈maatyi tanɨʼmaʼyba iga jeʼm an̈wejpadoʼoyi wɨap tachiʼ jeʼm wɨbɨk jɨɨxi tananmajom. Maytyaʼamɨ Filipenses 4:6, 7 y an̈mattaʼamɨ tyi iñjɨɨstaʼmpa y kutson̈taʼamɨ:

Mex iga jeʼm an̈wejpadoʼoyi dyaʼ takkaʼyaʼyba jeʼm tanyaʼachaaji, ¿juutypɨk tayooxpaʼtpa?
¿Tyityam iññɨʼmaytyoʼoba Dios?

¿Iñjoodon̈am idyɨk?

Jeʼm an̈maatyi amén nɨmtoʼoba «jeempɨgam naxiñ» o «jeempɨgam». Dende wiñɨk pɨkta jeʼm an̈maatyi «amén» okmɨ iga yajpa iwatta tuum an̈wejpadoʼoyi (1 Crónicas 16:36).

7. Ni keman odoy kujaʼamaʼayɨ in̈wat jeʼm an̈wejpadoʼoyi

Juchixkej tayooxataʼmpa, jeʼyukmɨ tan̈kujaʼamaʼyba tan̈wat jeʼm an̈wejpadoʼoyi. ¿Juʼtspɨy ichoowaixpa idyɨk Jesús jeʼm an̈wejpadoʼoyi? Maytyaʼamɨ Mateo 14:23 y Marcos 1:35, y an̈mattaʼamɨ tyi iñjɨɨstaʼmpa y kutson̈taʼamɨ: