AN̈KEJAYOʼOYI 15
¿Iapaʼap Jesús?
Dende wiñɨgam tsaam ixpɨktaap jeʼm Jesús iñɨɨyi, pero dyaʼ ityumpɨyyaj iwɨixpɨkyajpa y jaʼyan̈yaj dyaʼ iwɨjoodon̈yaj iapaʼap Jesús. ¿Tyi tan̈kejaʼyba jeʼm Biblia?
1. ¿Iapaʼap Jesús?
Jesús jeʼ tuum espíritu, tsaam pɨɨmiɨy y sɨɨ ity sɨn̈yukmɨ. Jehová iwat Jesús wiñtyi iga iwadyiñ ityumpɨy. Jeʼyukmɨ aknɨʼɨyakataap «jém wiñt́ipɨc» (Colosenses 1:15). Jeʼm Biblia tan̈kejaʼyba iga Jehová ikutyum iwat Jesús y jeʼyukmɨ aknɨʼɨyakataap «jém t́u̱mpɨc iMa̱nɨc» (Juan 3:16). Jesús iwaganayooxa jeʼm iJaatun̈, Jehová, jesɨk iwatyaj ityumpɨy (maayɨʼ Proverbios 8:30). Ikwɨstɨkyaj tsaam nawɨnanɨgayyajtaap. Jesús jeʼam «jeʼm An̈maatyi», yɨʼp nɨmtoʼoba iga jeʼam in̈matpa jempɨk Dios ixunba iga joodon̈ataiñ (Juan 1:14, TNM).
2. ¿Tyiʼiga miñ Jesús yɨʼp naxyukmɨ?
Nasneum tuumtsam 2,000 amtyɨy iga Jehová ipɨk jeʼm iespíritu santo jesɨk iwat tuum milagro: dende sɨn̈yukmɨ iwat iga tuum woñyoomo iñɨɨyipɨk María manɨktsɨʼyiñ. Jeʼyukmɨ, Jesús nay yɨʼɨm Naxyukmɨ juʼuts tuum tsɨɨxi (maayɨʼ Lucas 1:34, 35). Jeʼ miñ yɨʼɨm Naxyukmɨ iga tsɨʼyiñ juʼuts jeʼm Cristo o jeʼm Mesías jɨykamnetawɨʼɨp, y miñ takɨakputtaʼm. a Jeʼ ikkupak ityumpɨy jeʼm jɨychagoʼoyiyaj ijɨykiʼmyajpaʼap idyɨk jeʼm Mesías. Yɨʼp iyooxpaʼt jaʼyan̈yaj iga ikutɨʼɨyɨyyajiñ iga jeʼam jeʼm «Cristo jém vivopɨc Dios [i]Ma̱nɨc» (Mateo 16:16).
3. Sɨɨ, ¿juuty ity Jesús?
Jesɨk Jesús kaʼ, aktsukumta juʼuts tuum espíritu y kiʼm eybɨk sɨn̈yukmɨ. Jemɨgam «Dios iccám iga más mɨjpɨc aŋjagooyi» (Filipenses 2:9). Mex iga sɨɨ Jesús iniity jaʼyan̈ teguedɨʼɨyi; Jehová jeʼam jempɨk maaj pɨɨmiɨy.
MAAJ TAN̈WƗKUYUJKAIÑ
Maaj tan̈wɨkɨʼpin̈iñ iapaʼap Jesús y tyiʼiga tsaam wɨɨ iga tañixpɨguiñ.
4. Jesús dyaʼ jeʼ jeʼm Dios majpɨk pɨɨmiɨy
Mex iga Jesús tsaam pɨɨmiɨy, jeʼm Biblia nɨmpa iga ikupɨkpatyim Jehová, iga jeʼ iDios y iJaatun̈. ¿Tyiʼiga tanɨmpa yɨʼɨmpɨk? Aʼmtaʼamɨ jeʼm VIDEO iga tan̈kutɨʼɨyɨʼyiñ juutypɨk in̈kejpa jeʼm Biblia iga Jehová y Jesús dyaʼ tumtyiyaj.
Jeʼm textos kejyajpaʼap yɨʼɨm tayooxpaʼtpa tan̈kutɨʼɨyɨy tyiʼiga Jehová y Jesús dyaʼ tumtyiyaj. Maytyaʼamɨ tumtum texto y an̈mattaʼamɨ tyi iñjɨɨstaʼmpa y kutson̈taʼamɨ:
Maytyaʼamɨ Lucas 1:30-32.
-
Juʼuts nɨm jeʼm sɨn̈pɨxiñ, Jesús, ¿ijunɨmiixɨ Jehová?
Maytyaʼamɨ Mateo 3:16, 17.
-
¿Tyi nɨm jeʼm jɨɨyi dende sɨn̈yukmɨ jesɨk chin̈ Jesús?
-
¿Iapaʼap idyɨk sɨʼ ijɨy?
Maytyaʼamɨ Juan 14:28.
-
¿Iapaʼap maaj ikutɨʼɨyɨʼyba y iniity maaj teguedɨʼɨyi: tuum jaatun̈, o jeʼm imaanɨk?
-
¿Tyi idyɨk nɨmtoʼoba Jesús jesɨk nɨm iga Jehová jeʼam iJaatun̈?
Maytyaʼamɨ Juan 12:49.
-
¿Ijɨɨspa idyɨk Jesús iga jeʼ kun iJaatun̈ tumtyiyaj? ¿Tyi in̈kupɨkpa mich?
5. Jesús jeʼam idyɨk jeʼm Cristo
Jeʼm Bibliajom tampaʼtpa jaʼyan̈ jɨychagoʼoyiyaj iga tayooxpaʼtpa tan̈kutɨʼɨyɨy iapaʼap jeʼm Cristo jempɨk Dios ikupin̈ iga takɨʼakputtaʼmiñ. Aʼmtaʼamɨ jeʼm VIDEO, juuty in̈matpa iga Jesús ikkupak weeñi jɨychagoʼoyiyaj jesɨk oy yɨʼɨm Naxyukmɨ.
Maytyaʼamɨ Bibliajom yɨʼpyaj jɨychagoʼoyiyaj y an̈mattaʼamɨ tyi iñjɨɨstaʼmpa y kutson̈taʼamɨ:
Maytyaʼamɨ Miqueas 5:2 iga iñjoodon̈ataʼmiñ juuty nayba idyɨk jeʼm Cristo. b
-
¿Kupak yɨʼp jɨychagoʼoyi jesɨk nay Jesús? (Mateo 2:1).
Maytyaʼamɨ Salmo 34:20 y Zacarías 12:10 iga iñjoodon̈ataʼmiñ juutypɨk idyɨk kaʼaba jeʼm Cristo.
-
¿Kupakyaj yɨʼpyaj jɨychagoʼoyiyaj? (Juan 19:33-37).
-
¿Iñjɨɨspasɨ iga Jesús tɨgɨykuʼm iga wɨaiñ ikupak weeñi jɨychagoʼoyiyaj?
-
Juʼuts in̈kejpa jeʼm Biblia, ¿iapaʼap Jesús?
6. Jesɨk tañixpɨkpa Jesús tawɨwadaʼyba
Jeʼm Biblia in̈matpa tyiʼiga wɨɨ iga tañixpɨguiñ Jesús y jeʼm yooxakuy ichiʼiñewɨʼɨp Dios. Maytyaʼamɨ Juan 14:6 y 17:3, y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Tyiʼiga tsaam wɨɨ iga tañixpɨguiñ Jesús?
Jesús tan̈kejayñeʼ jeʼm tun̈ iga wɨaiñ tanamigojataʼm Dios y tan̈kejayñetyim jeʼm numapɨk an̈kejayoʼoyi. Jeʼ ikuyukmɨ wɨap tampɨktson̈taʼm jeʼm ityi dyapɨk kuyajpa.
WEEÑI NƗMYAJPA IGA: «Jeʼm Jehová itestigojyaj dyaʼ ikupɨkyajpa Jesucristo».
-
¿Tyisɨ in̈kutson̈ba?
JEMPƗK TAN̈KUYUJKAʼ
Jesús jeʼ tuum espíritu, tsaam pɨɨmiɨy, jeʼ jeʼm Dios iMaanɨk y jeʼtyim jeʼm Cristo.
¿Iñjɨɨspanam?
-
¿Tyiʼiga aknɨɨyakataap Jesús «jém wiñt́ipɨc»?
-
¿Tyi idyɨk iwatpa Jesús wiñtyi iga miñ yɨʼɨm Naxyukmɨ?
-
¿Juutypɨk tanjoodon̈ iga Jesús jeʼam jeʼm Cristo?
JODON̈AAJƗNAM
Jodon̈aajɨ tyiʼiga Jesús jeʼam jeʼm Cristo.
«¿Ikwiñkejpa jeʼm jɨychagoʼoyiyaj Bibliajompɨk iga Jesús jeʼam jeʼm Cristo?» (Artículo de jw.org)
Kɨʼpɨn̈ɨ siiga jeʼm Biblia in̈kejpa iga Dios iwat Jesús juʼuts jeʼm pɨxiñtyam iwatyajpa jeʼm imanɨktam.
«¿Tyiʼiga aknɨʼɨyakataap Jesús jeʼm Dios iMaanɨk?» (Artículo de jw.org)
Jodon̈aajɨ tyiʼiga jeʼm Biblia dyaʼ in̈kejpa jeʼm trinidad.
Maayɨʼ juutypɨk tuum yoomoʼ kak iityi jesɨk imay Bibliajom jempɨk iwat Jesús.
a Jeʼm an̈kejayoʼoyiyaj 26 y 27 iwɨan̈matpa tyiʼiga tatogoyay kɨakpudoʼoyi y juutypɨk takɨakputtaʼmpa Jesús.
