AN̈KEJAYOʼOYI 16

¿Tyi iwat Jesús jesɨk jaʼy ityi yɨʼp naxyukmɨ?

REPRODUCIR EN

Jaʼyan̈yaj jesɨk ijɨɨsyajpa Jesús, ijɨɨsyajpa juʼuts tuum xutyu tsɨɨxi, juʼuts tuum profeta tsampɨk ijoodon̈ o juʼuts tuum pɨɨxiñ kaʼapaʼap ixɨʼ. ¿Dyaʼ maaj wɨɨ iga tanjoodon̈ataʼmiñ juʼuts idyɨk iityi jesɨk oy yɨʼɨm naxyukmɨ? Jeempɨgam maaj tan̈wɨixpɨktaʼmpa. Kun yɨʼp an̈kejayoʼoyi tan̈kutɨʼɨyɨytyaʼmpa tyityam iwat Jesús y juutypɨk tɨgɨykuʼmpa tañityijom.

1. ¿Juʼp yooxakuy maaj idyɨk ityeguedaap Jesús?

Jeʼm yooxakuy majpɨk ityegueda Jesús jeʼ iga in̈mat «jém wɨbɨc aŋma̱t́i ju̱t́pɨc iŋjacpa Dios jém it́yajwɨɨp yɨ́p naxyucmɨ» (maayɨʼ Lucas 4:43). In̈mat iga Dios ikkaʼmpa tuum an̈jagoʼoyi iga iktogoyba ityumpɨy jeʼm kobakpiijiyaj. a Jesús iwat yɨʼp yooxakuy tuumtsam tukuteen amtyɨy (Mateo 9:35).

2. ¿Juutypɨk kuyooxaoyyaj jeʼm milagrojyaj iwatwɨʼɨp Jesús?

Jeʼm Biblia in̈matpa iga «Dios ichi [Jesús] ipɨ̱mi iga wɨa̱p iwat jém d́apɨc oypa tánix, jém wɨbɨc milagro y jém seña» (Hechos 2:22). Kun jeʼm Dios ipɨɨmi, Jesús iktɨnean̈jak jeʼm lamar, ikwiʼk jaʼyan̈yaj, ikpɨs jeʼm mɨmneyajwɨʼɨp y iktsukum jeʼm kaʼaneyajwɨʼɨp (Mateo 8:23-27; 14:15-21; Marcos 6:56; Lucas 7:11-17). Jeʼm milagrojyaj iwatwɨʼɨp Jesús ikwiñkej iga Dios ikutsatneʼ idyɨk. Yɨʼp ikwiñkejpa iga Jehová iniity jeʼm pɨɨmi iga iktogoyba ityumpɨy jeʼm kobakpiijiyaj.

3. ¿Tyi tan̈kuyujkaʼaba kun tyityam iwat Jesús?

Jesús juchixkej ikupɨk Jehová (maayɨʼ Juan 8:29). Mex iga tun̈gakyaj dyaʼ idyɨk iwɨan̈jamyaj, Jesús juchixkej ikupɨk ijaatun̈, jexpam kaʼ. Ikwiñkej iga wɨap tan̈kuyooxataʼm Jehová mex iga tannaskataʼmpa kutɨʼɨchiyaj. Yɨʼɨmpɨk, «tatsagayt́a tu̱m ejemplo iga tantúŋɨ́ypa jém Cristo y taŋwattámpat́im juuts je» (1 Pedro 2:21).

MAAJ TAN̈WƗKUYUJKAIÑ

Tanaʼmiñ juutypɨk in̈mat Jesús jeʼm wɨtampɨk an̈maatyi y juutypɨk idyɨk iwatpa jeʼm milagrojyaj.

4. Jesús in̈mat jeʼm wɨtampɨk an̈maatyi

Jesús jaʼy wiityi jeʼm poʼtpodan̈jom jaʼyan̈ kilómetro juʼtspɨyam wɨa iga in̈matpa idyɨk jeʼm wɨtampɨk an̈maatyi. Maytyaʼamɨ Lucas 8:1 y an̈mattaʼamɨ tyi iñjɨɨstaʼmpa y kutson̈taʼamɨ:

¿In̈madaʼyba idyɨk Jesús numaaj jempɨk ikunuʼkyajpa?
¿Tyityam iwat Jesús iga wɨaiñ idyɨk in̈maday tun̈gakyaj?

Dios ijɨychak iga jeʼm Cristo in̈matpa idyɨk jeʼm wɨtampɨk an̈maatyi. Maytyaʼamɨ Isaías 61:1, 2 y an̈mattaʼamɨ tyi iñjɨɨstaʼmpa y kutson̈taʼamɨ:

¿Juutypɨk ikkupak Jesús yɨʼp jɨychagoʼoyi?
¿In̈kupɨkpa iga tun̈gakyaj ityogoyayyajtyim ikumaton̈yaj yɨʼp wɨtampɨk an̈maatyi?

5. Jesús in̈mat wɨtampɨk an̈kiʼimiyaj

Jesús in̈mat jeʼm wɨtampɨk an̈maatyi iga Dios in̈jakpa yɨʼp nas. Tanaʼmiñ jeʼm an̈kiʼimiyaj in̈matwɨʼɨp jesɨk akkuyujoy tuum kotsɨkyukmɨ. Maytyaʼamɨ Mateo 6:14, 34 y 7:12, y an̈mattaʼamɨ tyi iñjɨɨstaʼmpa y kutson̈taʼamɨ:

¿Juʼp wɨtampɨk an̈kiʼimiyaj chioy Jesús kun yɨʼpyaj versículos?
¿Miñɨmpasɨ iga yɨʼpyaj an̈kiʼimiyaj tayooxpaʼtyajpa?

6. Jesús iwat jeʼm milagrojyaj

Jehová ichiʼ Jesús jeʼm pɨɨmi iga wɨaiñ iwat jeʼm milagrojyaj. Aʼmɨ tuum akwiñkejoʼoyi, maytyaʼamɨ Marcos 5:25-34 o aʼmtaʼamɨ jeʼm VIDEO. Okmɨ an̈mattaʼamɨ tyi iñjɨɨstaʼmpa y kutson̈taʼamɨ:

VIDEO: Akpɨsta tuum yoomoʼ mɨmnewɨʼɨp (5:10)

Juʼuts in̈kej jeʼm video, ¿tyi idyɨk iwɨkupɨkneʼ jeʼm yoomoʼ mɨmnewɨʼɨp?
¿Tyiʼiga migaʼman̈jakpa jempɨk Jesús iwat?

Maytyaʼamɨ Juan 5:36 y an̈mattaʼamɨ tyi iñjɨɨstaʼmpa y kutson̈taʼamɨ:

¿Tyi ikwiñkejpa jeʼm milagrojyaj iwatwɨʼɨp Jesús?

¿Iñjoodon̈am idyɨk?

Jeʼm maktasteen Evangelios in̈matpa ityumpɨy tyityam iwat Jesús. Jeʼm ijaykunuʼkyajwɨʼɨp—Mateo, Marcos, Lucas y Juan—in̈matyaj tyityam iwat Jesús. Jempɨk ijaykunuʼkyaj takwiñkejaʼyba juʼuts idyɨk iityi yɨʼɨm naxyukmɨ.

MATEO

jeʼam jempɨk ijaykunuʼk jeʼm wiñtyipɨk Evangelio. In̈matpa tyityam in̈kej Jesús y jempɨk iwatpa jeʼm Dios iAn̈jagoʼoyi.
MARCOS

ijay jeʼm Evangelio maaj ñokopɨk. In̈matpa nasɨyoʼoyiyaj tagaʼman̈jakpaʼap.
LUCAS

in̈matpa tyiʼiga seguido wɨɨ tan̈wat jeʼm an̈wejpadoʼoyi, in̈matpatyim iga Jesús tsaam iwɨnanɨgay jeʼm yomtam.
JUAN

in̈matpa juʼuts idyɨk Jesús y juutypɨk idyɨk inimurupa jeʼm iamigojyaj y tun̈gakyaj.