AN̈KEJAYOʼOYI 22
¿Juutypɨk wɨap inin̈mat jeʼm wɨtampɨk an̈maatyi?
Siiga iñjoodon̈am jempɨk in̈kejpa jeʼm Biblia, wɨapsɨ iga iñjɨɨspa: «¡Tsaam wɨɨ iga ityumpɨyyaj ijoodon̈ayajiñ!». Y jesaneum; wɨɨ iga ityumpɨyyaj ijoodon̈ayajiñ. Pero wɨapsɨ iga mikɨɨn̈ba jesɨk iñjɨɨspa iga inin̈madayyajpa tun̈gakyaj jeʼm Dios In̈maatyi. Tan̈kɨʼpin̈iñ tyi wɨap in̈wat iga odoy mikɨʼɨn̈iñ y mimaymayaiñ jesɨk inin̈madayyajpa tun̈gakyaj jeʼm wɨtampɨk an̈maatyi itywɨʼɨp Bibliajom.
1. ¿Juutypɨk wɨap inin̈maday jempɨk iñixpɨkyajpa tyityam sɨʼ in̈kuyujkaʼ?
Jeʼm Jesús ikuyujkɨʼɨwiñyaj nɨmyaj: «Aɨcht́am d́a wɨa̱p antsacta iga anaŋmattámpa t́i ánixñe y t́i ammatoŋne» (Hechos 4:20). Tsaam ichoowaixyajpa idyɨk jeʼm nuntapɨk an̈kejayoʼoyi y in̈madayyajtoʼoba idyɨk ityumpɨyyaj. ¿Mich iñchoowaixpatyim? Jesɨk waatɨ juʼtspɨy miwɨap iga inin̈madayyajpa jeʼm iñfamilia y jeʼm iñamigojyaj jempɨk sɨʼ in̈kuyujkaʼ (maayɨʼ Colosenses 4:6).
Weeñi jɨɨxiyaj miyooxpaʼtpaʼap iga wɨaiñ inin̈mat
-
Jesɨk inimurupa tuum iñfamiliar, wɨap iññɨʼmay «Jeʼm jɨɨxi jempɨk an̈kuyujkaʼ yɨʼp semana tsaam an̈kusuʼnɨy».
-
Jesɨk tuum iñamigo yaʼachaap ixɨʼ, an̈kejaʼayɨ tuum texto ianmajan̈chiʼipaʼap.
-
Jesɨk mikwaʼkyajpa jempɨk in̈waganayooxayajpa juʼuts miñɨgay jeʼm fin de semana, an̈madaʼayɨ jempɨk in̈kuyujkaʼ jeʼm an̈tuʼumaajijom o jesɨk mikkuyujta.
-
An̈kejayyaajɨ jeʼm iñamigojyaj jeʼm sitio de internet jw.org.
-
Jesɨk mikkuyujtaap tɨʼpyaajɨ tun̈gakyaj o an̈kejayyaajɨ juutypɨk wɨap iwaʼkyaj iga akkuyujtaiñ en jw.org.
2. ¿Juutypɨk miwɨwadaʼyba siiga miputpa jeʼm an̈matkuyjom kun jeʼm tɨwɨtam?
Jeʼm Jesús ikuyujkɨʼɨwiñyaj dyaʼ numaaj in̈madayyaj jeʼm wɨtampɨk an̈maatyi jempɨk iixpɨkyajpa idyɨk. Jesús «icutsat wɨswɨs» iga in̈matyajiñ jeʼm wɨtampɨk an̈maatyi (Lucas 10:1). Jeempɨgam jaʼyan̈yaj wɨa mu imaton̈yaj jeʼm wɨtampɨk an̈maatyi. Y jeʼeyaj tsaam maymayayaj iga putyaj wɨswɨs (Lucas 10:17). Y mich, ¿miputtoʼoba jeʼm an̈matkuyjom kun jeʼm tɨwɨtam?
MAAJ TAN̈WƗKUYUJKAIÑ
Tan̈kɨʼpin̈iñ tyi wɨap miyooxpaʼt iga odoy mikɨʼɨn̈iñ y mimaymayaiñ inin̈mat jeʼm wɨtampɨk an̈maatyi.
3. Jehová miyooxpaʼtpa
Weeñiyaj in̈matyajtoʼoba jempɨk sɨʼ ikuyujkayaj, pero kɨɨn̈yajpa iga dyaʼ ijoodon̈yaj siiga wɨpɨktson̈yajtaap o dyaʼ.
-
Y mich, jesɨk iñjɨɨspa iga inimuruyajpa tun̈gakyaj, ¿mikɨɨn̈ba, o dyaʼ? ¿Tyiʼiga?
Aʼmtaʼamɨ jeʼm VIDEO y an̈mattaʼamɨ tyi iñjɨɨstaʼmpa y kutson̈taʼamɨ:
-
Jempɨk kejyajpa jeʼm videojom, ¿tyi iwatyaj iga odom kɨɨn̈yajiñ?
Maytyaʼamɨ Isaías 41:10 y an̈mattaʼamɨ tyi iñjɨɨstaʼmpa y kutson̈taʼamɨ:
-
Siiga mikɨɨn̈ba inin̈mat jeʼm Dios In̈maatyi, ¿tyiʼiga wɨɨ iga in̈wadyiñ an̈wejpadoʼoyi?
¿Iñjoodon̈am idyɨk?
Jaʼyan̈yaj jeʼm Jehová itestigojyaj ijɨɨsyajpa idyɨk iga ni keman wɨap idyɨk in̈matyaj jeʼm Dios In̈maatyi. Juʼuts akwiñkejoʼoyi, tuum pɨɨxiñ iñɨɨyipɨk Sergey ijaampa idyɨk iga dyaʼ tyi kuwatkuy y kɨɨn̈ba idyɨk inimuru tun̈gakyaj. Pero tuum jaama moj ikuyujkaʼ jeʼm Biblia, jeʼ nɨm: «Mex iga akɨɨn̈ba idyɨk moj anan̈maday tun̈gakyaj jempɨk sɨʼ an̈kuyujkaʼ. Yɨʼp tsaam ayooxpaʼt y maajtyim tsɨʼy jeʼm ananmajom».
4. Wɨnamuruyaajɨ
Wiñtyi iga inimurupa algun i odoy numaaj jɨɨsɨ tyi iññɨʼmaʼyba, jɨɨsɨtyim juutypɨk iññɨʼmaʼyba. Maytyaʼamɨ 2 Timoteo 2:24 y 1 Pedro 3:15, y an̈mattaʼamɨ tyi iñjɨɨstaʼmpa y kutson̈taʼamɨ:
-
¿Juutypɨk wɨap in̈watkiʼps yɨʼpyaj versículos jesɨk inin̈madayyajpa tun̈gakyaj jempɨk in̈kejpa jeʼm Biblia?
-
Wɨapsɨ iga jeʼm iñfamilia o jeʼm iñamigojyaj dyaʼ iniityyaj jexpɨktyim jɨɨxi. ¿Tyi wɨap in̈wat? ¿Y tyi dyaʼ wɨɨ iga in̈wadyiñ?
-
¿Tyiʼiga maaj wɨɨ iga tan̈wɨnamuruyajiñ y odoy tannɨʼmayyajiñ tyi ikupɨkyajiñ?
5. Tamaymay jesɨk tanan̈matpa jeʼm wɨtampɨk an̈maatyi
Jehová iwaʼgay Jesús iga in̈madaʼyiñ tun̈gakyaj jeʼm wɨtampɨk an̈maatyi. ¿Juutypɨk iaʼmpa idyɨk Jesús jeʼm an̈matkuy? Maytyaʼamɨ Juan 4:34 y an̈mattaʼamɨ tyi iñjɨɨstaʼmpa y kutson̈taʼamɨ:
-
Tsaam tan̈kusuʼnɨʼyba tan̈kɨʼɨs wɨtampɨk wiʼkkuyyaj. ¿Tyiʼiga nɨm Jesús iga jesɨk tanan̈mattaʼmpa jeʼm wɨtampɨk an̈maatyi jeex juʼuts jeʼm wiʼkkuy?
-
Y mich tyi iñjɨɨspa, ¿juutypɨk mimaymaywatpa siiga inin̈matpa jeʼm wɨtampɨk an̈maatyi?
Weeñi jɨɨxiyaj miyooxpaʼtpaʼap
-
Jesɨk miitypa jeʼm an̈tuʼumaajijom aknastapaʼap entre semana, aʼmɨ juutypɨk wɨap iniktsukum muruujiyaj.
-
Akwaʼakɨ jempɨk mikkuyujpa tyi wɨap in̈wat siiga immaytyoʼoba jeʼm Dios In̈maatyi o siiga iniknastoʼoba tuum akwiñkejoʼoyi jesɨk itypa jeʼm an̈tuʼumaaji aknastapaʼap entre semana. Jesɨk miñaspa wiñjom miyooxpaʼtpa iga odoy mikɨʼɨn̈iñ jesɨk inin̈matpa jeʼm Dios In̈maatyi.
-
Kɨʼpin̈ɨ jeʼm jɨɨxi itywɨʼɨp yɨʼp librojom juuty nɨmpa «Weeñi nɨmyajpa iga» y «Weeñi akwaʼgoyyajpa», y jeempɨk wɨap in̈kutson̈ akwagoʼoyiyaj.
WEEÑI AKWAʼGOYYAJPA: «¿Tyiñam inin̈matpa? ¿Juʼuts miñɨgayñeʼ?».
-
¿Juutypɨk wɨap impɨk yɨʼpyaj akwagoʼoyiyaj iga inin̈madyiñ jempɨk in̈kuyujkaneʼ Bibliajom?
JEMPƗK TAN̈KUYUJKAʼ
Tamaymaywatpa jesɨk tanan̈matpa jeʼm wɨtampɨk an̈maatyi y dyaʼ tan̈kaʼ jesɨk mojpa tanan̈mat.
¿Iñjɨɨspanam?
-
¿Tyi wɨap miyooxpaʼt iga inin̈madyiñ jeʼm wɨtampɨk an̈maatyi?
-
¿Juutypɨk wɨap in̈wɨnamuruyaj?
-
¿Tyi wɨap in̈wat iga odoy mikɨʼɨn̈iñ?
JODON̈AAJƗNAM
Aʼmɨ juutypɨk wɨap inin̈mat jeʼm Dios In̈maatyi kun jeʼm tarjeta de contacto de jw.org.
Jɨɨxiyaj miyooxpaʼtpaʼap jesɨk impɨkpa jeʼm tarjeta de contacto de jw.org (1:43)
Kɨʼpin̈ɨ cuatro jɨɨxiyaj miyooxpaʼtpaʼap iga inin̈madyiñ jeʼm wɨtampɨk an̈maatyi.
«¿Immeʼtstoʼoba pɨxiñtyam juʼuts tɨʼɨpɨ?» (La Atalaya, septiembre de 2020)
Aʼmɨ tuum nasɨyoʼoyi Bibliajompɨk jempɨk iyooxpaʼtpa jeʼm tsɨxtyam iga odoy kɨɨn̈yajiñ in̈matyaj jeʼm wɨtampɨk an̈maatyi.
Maayɨʼ juutypɨk kun jeʼm Biblia wɨap iñyooxpaʼt iñfamilia iga iixpɨkyajiñtyim Jehová.
«Juutypɨk wɨap iñyooxpaʼt iñfamilia iga ikupɨkyajiñtyim Jehová» (La Atalaya, 15 de marzo de 2014)
