Jesús in̈kej iga jempɨk tsɨʼyyajtoʼoba juʼuts cristianojyaj wɨɨ iga chin̈yajiñ (maayɨ Mateo 28:19, 20). ¿Pero tyiapaʼap jeʼm akchin̈oʼoyi? ¿Y tyi wɨɨ iga iwadyiñ jempɨk chin̈toʼoba?

1. ¿Tyiapaʼap jeʼm akchin̈oʼoyi?

Jeʼm an̈maatyi akchin̈oʼoyi topneta de tuum griegojpɨk an̈maatyi iga nɨmtoʼoba «akkumon̈taap», yɨʼp nɨmtoʼoba iga yajpa kumoon̈i nɨʼkɨʼɨm. Jesɨk Jesús chin̈, akkumon̈ta jeʼm nɨʼkɨʼɨm iñɨɨyipɨk Jordán, y okmɨ put de jeʼm «nɨɨcɨɨm» (Marcos 1:9, 10). Jesɨk jeʼm nuntapɨk cristianojyaj chin̈yajpa, akkumon̈yajtaptyim nɨʼkɨʼɨm juutypɨktyim nawatta Jesús.

2. ¿Tyi ikwiñkejpa algun i jesɨk chin̈ba?

Jesɨk algun i chin̈ba, ikwiñkejpa iga ikɨan̈kodayñeum Jehová jeʼm iityi. ¿Y juutypɨk ikɨan̈kodaʼyba Jehová jeʼm iityi? Ikuyukmɨ tuum an̈wejpadoʼoyi ijɨykamaʼyba Jehová iga juchixkej ikuyooxaap. Yɨʼp iwatpa wiñtyi iga chin̈ba. Jesɨk iwatpa yɨʼp an̈wejpadoʼoyi iñɨʼmaʼyba Jehová iga numaaj jeʼ ikoosteñaʼyba y juchixkej iwatpa juʼuts jeʼ ixunba. Wɨɨ iga iwatkiʼpxiñ Jesús y ikupɨguiñ jempɨk jeʼ in̈kej. Jesús nɨm: «Siiga i̱ atúŋɨyt́ooba, wɨ̱ iga ichaguiñ iga iwatpa juuts je ixunpa, [...] jesɨc atúŋɨɨyɨ» (Mateo 16:24). Jempɨk ikɨan̈kodaʼyba Jehová jeʼm iityi y chin̈ba, wɨap iniity tuum wɨbɨk nanɨgoʼoyi kun jeʼ y kun jempɨk ikoosteñayyajpatyim.

3. ¿Tyi wɨap in̈wat siiga michin̈toʼoba?

Siiga michin̈toʼoba, wɨɨ iga wiñtyi iñixpɨguiñ Jehová y inikwiñkejiñ fe (maayɨ Hebreos 11:6). Jesɨk maaj iñixpɨkpa y impɨɨmchiʼiba iñfe, maaj iñtyoyba Jehová. Y yɨʼp miyooxpaʼtpa iga inin̈madyiñ jeʼm Dios In̈maatyi y in̈watkiʼpxiñ jempɨk nɨmpa jeʼm Biblia (2 Timoteo 4:2; 1 Juan 5:3). Siiga algun i sɨʼbam iwat «jém wɨ̱tampɨc cosa yɨ́p naxyucmɨ juʼuts iwɨaŋja̱m» Jehová, jesɨk wɨapsɨ iga ikɨan̈kodaʼyba iityi y chin̈ba (Colosenses 1:9, 10). a

 MAAJ TAN̈WƗKUYUJKAIÑ

4. Jempɨk tan̈kejaʼyba jeʼm Jesús iakchin̈oʼoyi

Maaj tan̈wɨjoodon̈aiñ juutypɨk chin̈ Jesús. Maytyaʼamɨ Mateo 3:13-17 y an̈mattaʼamɨ tyi iñjɨɨstaʼmpa y kutson̈taʼamɨ:

• Jesɨgam chin̈ Jesús, ¿mañtsɨɨxiñam idyɨk?

• ¿Numaaj mujaytya ikoobak kun uxan̈ nɨʼ, o juutypɨk chin̈?

Jesɨk chin̈ Jesús, moj iwat jeʼm yooxakuy ichiʼiñewɨʼɨp idyɨk Dios. Maytyaʼamɨ Lucas 3:21-23 y Juan 6:38, y an̈mattaʼamɨ tyi iñjɨɨstaʼmpa y kutson̈taʼamɨ:

• Okmɨ iga chin̈, ¿juʼp yooxakuy maaj ityegueda Jesús?

5. Siiga in̈wɨpɨkpa iñjɨɨxi, mich wɨaptyim iñchin̈

Jesɨk algun i ijɨɨspa iga ikɨan̈kodaʼyba iityi Jehová y chin̈ba, wiñtyi wɨapsɨ iga kɨɨn̈ba. Pero, siiga duroj iñixpɨkpa Jehová maaj in̈wɨkupɨkpa iga sɨʼ impɨk tuum wɨbɨk jɨɨxi. Iga iñjoodon̈aiñ tyi iyooxpaʼtyaj tun̈gakyaj, aʼmtaʼamɨ jeʼm VIDEO.

Maytyaʼamɨ Juan 17:3 y Santiago 1:5, y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Tyi wɨɨ iga iwadyiñ algun i iga wɨaiñ ichin̈?

1. Tan̈kɨan̈kodaʼyba Jehová jeʼm tañityi jesɨk tanjɨykamaʼyba iga juchixkej tan̈kuyooxaap.

2. Jesɨk tachin̈ba tanakwiñkejayyajpa tun̈gakyaj iga tan̈kɨan̈kodayñeum Dios jeʼm tañityi.

 6.Jesɨk algun i chin̈ba tsɨʼybatyim juʼuts Jehová ifamilia

Jesɨk tachin̈um mojpa tanaity tuum familia ikuwɨtyi naxyukmɨ. Dyaʼ tyi ijoo juuty tamiññetaʼm o tyityam tannaskanetaʼm, tantumpɨytyam tanaitytyaʼm tumtyi jɨɨxi y tan̈wattaʼmpa juʼuts in̈kejpa jeʼm Biblia. Maytyaʼamɨ Salmo 25:14 y 1 Pedro 2:17, y an̈mattaʼamɨ tyi iñjɨɨstaʼmpa y kutson̈taʼamɨ:

• Juʼuts nɨmpa yɨʼpyaj versículos, ¿juutypɨk tawɨwadaʼyba jeʼm akchin̈oʼoyi?

 JEMPƗK TAN̈KUYUJKAʼ

Jesús nɨm iga algun i tsɨʼyba juʼuts cristiano jesɨk chin̈ba. Pero nasuntaap iga ikwiñkejiñ fe, ikupɨguiñ Jehová y jeʼm in̈kiʼmayoʼoyiyaj y ikɨankodaʼyiñ jeʼm iityi.

¿Iñjɨɨspanam?

• ¿Tyiapaʼap jeʼm akchin̈oʼoyi, y tyiʼiga wɨɨ iga tanteguedaiñ?

• ¿Juutypɨk tɨgɨykuʼmpa jeʼm kɨan̈kodoʼoyi kun jeʼm akchin̈oʼoyi?

• ¿Tyi wɨɨ iga iwadyiñ algun i wiñtyi iga ikɨan̈kodaʼyiñ Jehová jeʼm iityi y chiʼn̈iñ?