¿Kaʼaneʼ algun i jempɨk iñtyoyba? Siiga miñaskaneʼ jeempɨk wɨapsɨ iga minikwaʼkta «¿Nɨksɨ ityi tun̈gak an̈eymɨ? ¿Anaʼmpasɨ eybɨk?». Yɨʼp an̈kejayoʼoyi y jeʼm tun̈gak, tan̈kɨʼpin̈taʼmpa jempɨk in̈kejpa jeʼm Biblia, y yɨʼp tsaam taanmajan̈chiʼiba.

1. Jesɨk takaʼaneum, ¿nɨkpa taityi tun̈gak an̈eymɨ?

Jesús ikukiʼps jeʼm kaʼiʼ juʼuts jesɨk tamon̈ba, jesɨk algun i wɨmon̈ba dyaʼ ijoodon̈ tyityam naspa an̈sɨkmɨ. ¿Tyiʼiga tanɨmpa iga jesɨk algun i kaʼaba jeextyim juʼuts jesɨk wɨmon̈ba? Jesɨk algun i kaʼaneum dyam ijaampa tooyaʼ y dyamtyim yaʼachaap. Jeʼm Dios In̈maatyi nɨmpa iga «jempɨk kaʼaneyajum dyam jɨɨxiɨyyaj ni uxan̈» (maayɨʼ Eclesiastés 9:5).

2. ¿Tyiʼiga tayooxpaʼtpa tanjoodon̈a tyi naspa jesɨk takaʼaba?

Jaʼyan̈yaj ikɨɨn̈yajpa jeʼm kaʼiʼ y ikɨɨn̈yajpatyim jeʼm kaʼaneyajwɨʼɨp. Pero jempɨk in̈kejpa jeʼm Biblia takpoʼksaʼyba tananmaj. Jesús nɨm: «Jém nu̱mapɨc aŋquímayooyi miccutsɨgayt́ámpa iga odoy michɨ́yt́ámiñ juuts tu̱m esclavo» (Juan 8:32). Jeʼm Biblia dyaʼ in̈matpa jempɨk in̈kejyajpa tun̈gak religiónyaj, iga taɨchtyam tanaitytyaʼm tuum anmaj dyapɨk kaʼaba, jempɨk putpa jesɨk takaʼaneum. Jesɨk algun i kaʼaneum dyam yaʼachaap; jeʼm kaʼaneyajwɨʼɨp dyam jɨɨxiɨyyaj y dyam wɨap tamalwadayyaj. Jeʼyukmɨ dyaʼ nasuntaap iga tan̈koosteñayyajiñ o tan̈wadayyajiñ wiʼkkuy iga jeʼeyaj odoy tamoʼogɨyyajiñ.

Weeñi nɨmyajpa iga wɨap inimuruyaj jeʼm kaʼaneyajwɨʼɨp, pero mɨgoʼoyityim. Juʼuts tan̈kɨʼpin̈netaʼm, jeʼm kaʼaneyajwɨʼɨp «dyam jɨɨxiɨyyaj». Jempɨk ijɨɨsyajpa iga inimuruyajpa jeʼm ifamiliar kaʼanewɨʼɨp sɨʼ inimuruyaj jeʼm demoniojyaj iga jeʼeyaj iwatkiʼpsyajpa jeʼm kaʼaneyajwɨʼɨp. Jeʼyukmɨ tsaam wɨɨ iga tanjoodon̈tam tyi naspa jesɨk takaʼaba, yɨʼp takupujpa iga odoy tamɨgoyayyajiñ jeʼm demoniojyaj. Jehová tan̈kiʼmpa iga odoy tanamuruyajiñ jeʼm kaʼaneyajwɨʼɨp iga jeʼm demoniojyaj odoy tamalwadayyajiñ (maayɨʼ Deuteronomio 18:10-12).

3. Jempɨk nunta naspa jesɨk takaʼaneum

Ikuwɨtyi naxyukmɨ dyaʼ tumtyi jɨɨxi iniityyaj iga tyi naspa jesɨk takaʼaneum. Pero dyaʼ ityumpɨy jempɨk tun̈gakyaj ikupɨkyajpa wɨap tan̈kupɨk.

• Jempɨk ityyaj juuty mich miity, ¿tyi ijɨɨsyajpa iga naspa jesɨk takaʼaneum?

 4. Jesɨk tan̈kutɨʼɨyɨʼyba juʼuts jeʼm kaʼiʼ dyam takɨɨn̈ba

Jesɨk tan̈kutɨʼɨyɨʼyba juʼuts jeʼm kaʼiʼ tayooxpaʼtpa iga odom tan̈kɨɨn̈yajiñ jeʼm kaʼaneyajwɨʼɨp. Maytyaʼamɨ Eclesiastés 9:10 y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Wɨap tamalwadayyaj jeʼm kaʼaneyajwɨʼɨp?

Siiga tan̈kupɨkpa jempɨk tanɨʼmaʼyba jeʼm Biblia dyaʼ tan̈kupɨkpa jeʼm mɨgoʼoyi iga jeʼm kaʼaneyajwɨʼɨp wɨap tamalwadayyaj o tanamuruyaj. Maytyaʼamɨ Isaías 8:19 y Apocalipsis 4:11, y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Juʼutssɨ in̈jaam Jehová jesɨk algun i ikoosteñaʼyba o iwagaʼyba yooxpadoʼoyi jeʼm kaʼaneyajwɨʼɨp?

5. Jesɨk tan̈kutɨʼɨyɨʼyba tyi naspa jesɨk takaʼaba tsaam wɨɨ tanan̈jaam

Jaʼyan̈yaj an̈kejayñeyajta iga jesɨk kaʼayajpa nɨkpa yaʼachaajiyaj siiga imalwatneyaj. Pero tamaymay tanjoodon̈ataʼm iga ni i dyaʼ nɨkpa yaʼachaaji jesɨk kaʼaba mex iga tsaam imalwat. Maytyaʼamɨ Romanos 6:7 y an̈mattaʼamɨ tyi iñjɨɨstaʼmpa y kutson̈taʼamɨ:

• Jeʼm Biblia in̈kejpa iga jesɨk algun i kaʼaba kuyajpatyim jeʼm tan̈kaʼ iwatnewɨʼɨp idyɨk. Jesɨk, ¿miñɨmpasɨ mich iga jeʼm kaʼaneyajwɨʼɨp sɨʼnam iyaʼachayaj iga sɨʼ iyojyaj ityan̈kaʼ?

Jesɨk maaj tan̈wɨixpɨkpa Jehová, majtyim tan̈wɨkupɨkpa iga jeʼ dyaʼ iyaʼachwatpa jeʼm kaʼaneyajwɨʼɨp. Maayɨʼ Deuteronomio 32:4 y 1 Juan 4:8, y an̈mattaʼamɨ tyi iñjɨɨstaʼmpa y kutson̈taʼamɨ:

• Juʼuts nɨmpa yɨʼpyaj versículos, ¿iaʼmchiʼibasɨ tuum Dios toyoypaʼap iga yaʼachwatyajtaiñ jeʼm kaʼaneyajwɨʼɨp?

• Jesɨk tan̈wɨkutɨʼɨyɨʼyba tyi naspa jesɨk takaʼaba, ¿miñɨmpasɨ mich iga takpoʼkspa? ¿Tyiʼiga?

 JEMPƗK TAN̈KUYUJKAʼ

Jesɨk algun i kaʼaba, jeʼm iityi kuyajpatyim. Jeʼm kaʼaneyajwɨʼɨp dyam yaʼachayajpa y dyatyim wɨap tamalwadayyaj.

¿Iñjɨɨspanam?

• Jesɨk takaʼaneum, ¿nɨkpa taityi tun̈gak an̈eymɨ?

• ¿Tyiʼiga dyam takɨɨn̈ba jesɨk tan̈kutɨʼɨyɨʼyba tyi naspa jesɨk takaʼaba?

• ¿Juutypɨk takpoʼkspa jesɨk tan̈kutɨʼɨyɨʼyba tyi naspa jesɨk takaʼaba?