Pɨɨmi tan̈yaʼkpa jesɨk kaʼaba algun i. Jeʼyukmɨ jeʼm Biblia nɨmpa iga jeʼm kaʼiʼ jeʼ tuum enemigo (1 Corintios 15:26). Jeʼm an̈kejayoʼoyi 27 tan̈maday iga Jehová iktogoyba yɨʼp enemigo. ¿Pero tyi iñaskayajpa jempɨk kaʼaneyajum? Yɨʼp an̈kejayoʼoyi tan̈madaʼybanam tuum wɨbɨk jɨykamoʼoyi ichaknewɨʼɨp Jehová: jeʼ iktsukumpa jaʼyan̈yaj jempɨk kaʼaneyajum y jeʼeyaj wɨap iityyaj kun maymayaaji juchixkej. ¡Eybɨk miñba ityiyaj! ¿Nuntasɨ naspa? ¿Y juuty aktsukumyajtaap? ¿Sɨn̈yukmɨ o naxyukmɨ?

1. ¿Tyi iwattoʼoba Jehová kun jeʼm kaʼaneyajwɨʼɨp?

Jehová pɨɨmi iktsukumtoʼoba jempɨk kaʼaneyajum. Job jeʼ idyɨk tuum pɨɨxiñ jempɨk pɨɨmi ikwiñkej fe, jeʼyukmɨ iwɨkupɨkneʼ idyɨk iga Jehová dyaʼ ikujaʼamaʼyba jesɨk kaʼaba y tsɨʼyba juuty kumneta. Jeʼyukmɨ iñɨʼmay Dios: «Mich anjɨyaʼyba y ɨch man̈kutson̈ba» (maayɨʼ Job 14:13-15).

2. ¿Tyiʼiga tanjoodon̈ iga jempɨk kaʼaneyajum pɨsyajpa?

Jesɨk Jesús oy ityi yɨʼp naxyukmɨ, Dios ichiʼ ipɨɨmi iga wɨaiñ iktsukum jeʼm kaʼaneyajwɨʼɨp. Jesús ikpɨs tuum wooñi iga iniity idyɨk 12 iamtyɨy y ikpɨstyim tuum kunooya imaanɨk (Marcos 5:41, 42; Lucas 7:12-15). Maaj okmɨ jeʼm iamigo Lázaro kaʼ. Y mex iga nɨkiam idyɨk cuatro jaama iga kaʼaneʼ y kumneta, Jesús iktsukum. Wiñtyi in̈wejpaʼt Dios, okmɨ aʼmnɨk juuty kumneta idyɨk y pɨɨmi jɨy: «¡MiLázaro, pu̱tɨ!». Y «jesɨc putum jém Lázaro, jém caanewɨ́ppɨc id́ɨc», ¡vivojam idyɨk! (Juan 11:43, 44). ¿In̈kujɨɨspa juʼtspɨy idyɨk maymayyaj jeʼm Lázaro ifamilia y jeʼm iamigojyaj?

3. ¿Tsukumyajpasɨ jempɨk jaʼy in̈waganaityyaj?

Jeʼm Biblia ijɨykamneʼ «iga Dios icpɨspa jém caaneyajwɨɨp» (Hechos 24:15). Jesɨk jaʼy ityi yɨʼɨm naxyukmɨ, Jesús iktsukum weeñi jempɨk kaʼaneyajum idyɨk, pero jeʼeyaj dyaʼ nɨkyaj sɨn̈yukmɨ (Juan 3:13). Tsaam idyɨk maymayyaj iga eybɨk ityyaj idyɨk naxyukmɨ. Jeempɨktyim, dyam jaʼyñeʼ, jesɨk Jesús iktsukumpa jeʼm kaʼaneyajwɨʼɨp, ityyajpa yɨʼɨm naxyukmɨ, iga wɨtsaktaap juʼuts tuum paraíso. Jesús nɨm iga «it́u̱mpɨy jém caaneyajwɨɨp [jempɨk ityyaj jeʼm Dios ijɨɨxian̈jom] putyajpa de ju̱t́ cumneyajta̱». Tsukumyajpatyim jempɨk dyam i ijɨɨspa pero ityyaj jeʼm Dios ijɨɨxian̈jom (Juan 5:28, 29, nota).

 MAAJ TAN̈WƗKUYUJKAIÑ

4. Jesús ikwiñkej iga wɨap iktsukum jeʼm kaʼaneyajwɨʼɨp

Jodon̈aajɨnam tyiñam iwat Jesús jesɨk iktsukum jeʼm iamigo Lázaro. Maytyaʼamɨ Juan 11:14 y 38-44, y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Juutypɨk tanjoodon̈ iga Lázaro nunta kaʼaneʼ idyɨk? (Aʼmtaʼamɨ jeʼm versículo 39).

• Meʼega Lázaro nɨk sɨn̈yukmɨ, ¿in̈kupɨkpa mich iga Jesús iwɨwaday jesɨk eybɨk inimiñ naxyukmɨ?

Aʼmtaʼamɨ jeʼm VIDEO.

5. ¡Jaʼyan̈yaj tsukumyajpa!

Maytyaʼamɨ Salmo 37:29 y an̈mattaʼamɨ tyi iñjɨɨstaʼmpa y kutson̈taʼamɨ:

• ¿Juuty ityyajpa ityumpɨyyaj jempɨk aktsukumyajtaap?

Jesús dyaʼ numaaj iktsukumpa jempɨk ikoosteñayyajpa idyɨk Jehová; iktsukumpatyim tun̈gakyaj. Maytyaʼamɨ Hechos 24:15 y an̈mattaʼamɨ tyi iñjɨɨstaʼmpa y kutson̈taʼamɨ:

• Jesɨk aktsukumyajtaap jeʼm kaʼaneyajwɨʼɨp, ¿iapaʼap iñaʼmtoʼoba eybɨk?

• ¿Juutypɨk ianmajan̈chiʼiñeʼ jeʼm aktsukumoʼoyi jeʼm Phelicity ijaatun̈yaj?

 JEMPƗK TAN̈KUYUJKAʼ

Jeʼm Biblia nɨmpa iga tsaam jaʼyan̈yaj aktsukumyajtaap. Jehová ixunba iga eybɨk ityyajiñ y Jesús chiʼiñeta jeʼm pɨɨmɨ iga iktsukumpa jeʼm kaʼaneyajwɨʼɨp.

¿Iñjɨɨspanam?

• ¿Tyiʼiga tanjoodon̈ iga Jehová y Jesús iktsukumyajtoʼoba jeʼm kaʼaneyajwɨʼɨp?

• ¿Juuty ityyajpa jempɨk aktsukumyajtaap: sɨn̈yukmɨ, o naxyukmɨ? ¿Tyiʼiga iñjɨɨspa jeempɨk?

• ¿Tyi mikkupɨkpa mich iga wɨap ichukumyaj jempɨk jaʼy in̈waganaityyaj?