ESCUELA PARA EVANGELIZADORES DEL REINO. Tɨ́pyajta̱p it́u̱mpɨy jém precursoresyaj iniit́yajwɨɨp 23 a 65 ia̱mt́ɨy, siiga máj icuyo̱xayajtooba Jehová wɨa̱p iñɨcyaj yɨ́p aŋtuuma̱ji watta̱paap jém ja̱ma domingo icutsuuyaji. Dende jém plataforma aŋmatta̱p ju̱t́ y juchixhora watta̱p.

ACCHÍŊOOYI. Je̱mpɨc chiŋyajpa tsagayyajta̱p jém co̱ñcuyyaj it́yajwɨɨp jém plataforma iwiñjo̱m, siiga d́a je̱m it́pa, nɨɨyɨ́yyajta̱p ju̱t́ co̱ñyajpa. Je̱mpɨc chiŋyajpa wɨ̱ iga nɨguiñ co̱ñiyaj wiñt́i iga tsucúmiñ jém najɨ́yooyi jém ja̱ma sábado cuque̱jacɨɨm. It́u̱mpɨy ininɨcyajjiñ tu̱m toalla y tu̱m traje de baño decente.

CONTRIBUCIONES. Jáyaŋ tumiñ pɨcneta̱ iga tanait́t́ámiñ wɨ̱tampɨc co̱ñcuy, tu̱m wɨbɨc sonido iga wɨa̱iñ taŋwɨ̱cumatoŋ y taŋwɨ̱amtámiñ jém video y tuŋgac t́id́iŋquej iga wɨa̱iñ taŋwɨ̱cumatoŋtam yɨ́p aŋtuuma̱ji y maj tancunúctámiñ Jehová. Jém tumiñ iñt́úmtampáppɨc pɨcta̱p iga wɨa̱iñ tanyoj it́u̱mpɨy jutsaŋam pɨcneta̱ y jext́im iga tayo̱xpadoyt́ámiñ cun jém yo̱xacuy icuwɨ̱t́i naxyucmɨ. Jeyucmɨ tsacneyajta̱ cajas ju̱t́ wɨa̱p iŋcucom iñt́umiñ jutsaŋam mich miwɨa̱p. Yucwɨpdius por je̱mpɨc michioyt́ámpa. Jém tantɨ̱wɨtam cumun nayo̱xaoyyajpaap miñɨ́mayt́ámpat́im yucwɨpdius iga tsa̱m miyo̱xpadoyt́ámpa.

CO̱ÑCUYYAJ. Maŋwagayt́ámpa iga iñyaachaŋja̱miñ jém iñt́ɨ̱wɨtam. Numáj pɨ̱cɨ co̱ñcuy jutsaŋam mit́ogoyáy iga iŋwaganaco̱ñiñ jém iñt́úmɨpɨcyaj, je̱mpɨc iŋwaganamiññeyaj o je̱mpɨc sɨ iniccuyujyaj. Odoy t́i tsa̱cɨ co̱ñcuyyucmɨ siiga d́a impɨcpa.

JE̱MPƗC IMPATSTOGOYÑE. Siiga impátpa tu̱m t́i togoyñewɨɨp cɨ̱aŋco̱tɨ ju̱t́ it́yaj jém tɨ̱wɨtam ipɨctsoŋyajpaap en yɨ́p Departamento. Siiga mich impatstogoyñe tu̱m t́i nɨ̱gɨ cuámɨ yɨɨm. Nanɨ̱cɨt́im jém tsɨ̱xi togoyñewɨɨp. Maŋwagayt́ámpa iga wɨ̱cui̱xɨ jém imma̱nɨctam y juchixquej waganait́ya̱jɨ.

PRIMEROS AUXILIOS. Manacjo̱dóŋatámpa iga yɨ́p departamento je NUMÁJ para tu̱m EMERGENCIA.

SIIGA MIYO̱XPADOYT́OOBA. Siiga miyo̱xpadoyt́ooba para yɨ́p aŋtuuma̱ji nɨ̱gɨ ámya̱jɨ jém tɨ̱wɨtam it́yajwɨɨp yɨ́p Departamento.

WƗ̱TSAGOYYAJPAAP. Jém wɨ̱tsagoyyajpaap wɨa̱p miyo̱xpátyaj. Cupɨcɨ je̱mpɨc miñɨɨyɨ́yáyba ju̱t́ iñchacpa iŋcarro, ju̱t́t́am wɨa̱p iŋwit́, jute̱n co̱ñcuy impɨcpa siiga wa̱t́i iŋwaganaco̱ñyajpa y tuŋgac t́id́iŋquej.