Mantɨwɨtam:

Iga tantoytyaʼmpa Dios y tantoytyaʼmpatyim tun̈gakyaj, tayooxpaʼtpa iga tan̈kupɨguiñ yɨʼp an̈kiʼmayoʼoyi: «Nɨgɨ aŋmadaayɨ Dios iŋma̱t́i it́u̱mpɨy jém pɨxiñt́am […]. Tsɨ́yyajiñ juuts ɨch aŋcuyujcɨɨwiñ. Acchiŋtaamɨ» (Mat. 28:​19, 20; Mar. 12:​28-31). Jeʼm nuntapɨk toyoʼoyi iga tanakwiñkejaʼyba tun̈gakyaj wɨap iyooxpaʼt «jém icupiŋnewɨɨp Dios iga ipɨctsoŋyajiñ jém vida jém d́apɨc cuyajpa» (Hech. 13:48).

Pekaʼ tsaam tanteguedataʼmpa idyɨk iga tanjaamaktsɨʼytyaʼmiñ tyi tanɨmtaʼmpa jeʼm an̈matkuyjom y wɨaiñ tan̈kɨan̈kottaʼm totjaayiyaj. Pero sɨɨ maaj wɨɨ iga tan̈kutɨʼɨyɨytyaʼmiñ juutypɨk tamurutaʼmiñ. Tanakwiñkejpa iga tantoyba tun̈gakyaj jesɨk tanan̈madayyajpa jempɨk jeʼeyaj ityeguedayajpa. Tantumpɨytyam takukaknetaʼm, jeʼyukmɨ tan̈wɨpɨguiñ tanjɨɨxi y odoy tan̈kujaʼamaʼyiñ tyityam ityeguet o ikkobakpijpa jempɨk sɨʼ tanamuru. ¡Yɨʼp totjaayi watneta iga wɨaiñ miyooxpaʼt!

Yɨʼp folleto iniity 12 an̈kejayoʼoyiyaj iga tayooxpaʼtpa tanakwiñkej toyoʼoyi y tampaʼdyiñ kuyujkɨʼɨwiñyaj. Tumtum an̈kejayoʼoyi topneta Bibliajom juuty Jesús o tun̈gak cristiano de jeʼm wiñtyipɨk siglo ikwiñkej tuum wɨbɨk jɨɨxi o jaamoʼoyi jeʼm an̈matkuyjom. Tanakwiñkejaytyamtoʼoba toyoʼoyi tun̈gakyaj y dyam iga tanjaamaktsɨʼytyaʼmiñ tyi tanɨmtaʼmpa. Mex iga ityumpɨy jeʼm jɨɨxiyaj y jaamoʼoyiyaj inimiñpaʼap yɨʼp folleto tayooxpaʼttaʼmpa jeʼm an̈matkuyjom, weeñiyaj tsaam tayooxpaʼtyajpa jesɨk tanaktsukumpa muruujiyaj, jesɨk tanjooyxedayyajpa y jesɨk takkuyujoʼyba kun jeʼm Biblia.

Jesɨk in̈kuyujkaʼaba tumtum an̈kejayoʼoyi, kujɨɨsɨ juutypɨk inikwiñkejpa tumtum jɨɨxiyaj y jaamoʼoyiyaj jesɨk inimuruyajpa jempɨk ityyaj iñtyɨgan̈jom. Teguedaajɨ iga majnam iñtyoʼyiñ Jehová y tun̈gakyaj, yɨʼbam miyooxpaʼtpa iga inikkupaguiñ iñyooxakuy: iga inin̈kejaʼyiñ tun̈gakyaj iga ikuyooxayajiñ Dios.

Tsaam amaymaytyam iga wɨap man̈waganayooxataʼm (Sof. 3:9). ¡Pɨɨmi mikumaykedyiñ Jehová iga iñtyoyba tun̈gakyaj y iñyooxpaʼtyajpa iga ikuyooxayajiñ Dios!