1. ¿Tyiapaʼap jeʼm paraíso espiritual, y tyiʼiga odoy tantsaktaʼmiñ?

 YƗʼP jaama, yɨʼp Naxyukmɨ ity tuum paraíso iga sɨʼ iwatta wɨtampɨk tyidyin̈kej. Jaʼyan̈yaj jempɨk ityyaj jeem iniityyaj paz y dyaʼ ichakyajtoʼoba. Ixunyajpatyim iga tun̈gakyaj ityyajiñtyim jeem. ¿Tyiapaʼap yɨʼp paraíso? ¡Jeʼm paraíso espiritual! a

2. ¿Tyiʼiga tagaʼman̈jakpa iga ity jeʼm paraíso espiritual?

² Tsaam tagaʼman̈jakpa iga Jehová iwatneʼ yɨʼp paraíso espiritual mex iga yɨʼp naxyukmɨ tsaam ity jooyixoʼoyi, malwadoʼoyi y peligros (1 Juan 5:19; Apoc. 12:12). Jeʼ ijoodon̈ juʼtspɨy tamalwadaʼyba jempɨk in̈jakneʼ jeʼm Wookkɨʼɨwiñ. Jeʼyukmɨ tachiʼiba yɨʼp paraíso espiritual iga tsaam tatoyba y wɨaiñ tan̈kuyooxa kun maymayaaji. Jeʼm In̈matyijom akwiñkejtaap yɨʼp paraíso juʼuts tuum an̈eymɨ iga wɨap iyamyaj y tuum jardín iga wɨmujneta (Is. 4:6; 58:11). Kun jeʼm Jehová ikumaykedoʼoyi, jempɨk ityyaj en yɨʼp paraíso tsaam maymayyaj y ijaamyajpa iga kuixñeyajta mex iga yɨʼp in̈an̈pɨgam  jaama tsaam ity yaʼachaajiyaj (Is. 54:14; 2 Tim. 3:1).

3. ¿Juchix kupak wiñtyi jeʼm capítulo 65 de Isaías?

³ En jeʼm capítulo 65 de Isaías, Jehová in̈mat juʼuts jeʼm paraíso espiritual. Yɨʼpyaj an̈matyiyaj wiñtyi kupakyaj jeʼm amtyɨy 537 antes de nuestra era. Jesɨgam jeʼm judíojyaj kupɨgoyyajwɨʼɨp, putyaj de Babilonia y seetyaj ityɨgan̈jom. Kun jeʼm Jehová ikumaykedoʼoyi y iyooxpadoʼoyi iwatseetyaj Jerusalén iga aktogoyñeta idyɨk, y eybɨk tsaam idyɨk wɨɨ ikeeji. Watseettatyim jeʼm templo iga eybɨk koosteñaytyaiñ Jehová en Israel (Is. 51:11; Zac. 8:3).

4. ¿Juutypɨk yɨʼp jaama kupakpa ixɨʼ jeʼm capítulo 65 de Isaías?

⁴ Maaj okmɨ, jeʼm an̈matyiyaj itywɨʼɨp en Isaías eybɨk kupakyaj en 1919, jesɨgam jeʼm Jehová iyooxakɨʼɨwiñyaj topyajta de jeʼm Mɨjpɨk Babilonia. Dende jesɨgam jeʼm paraíso espiritual mɨja mu iñɨk ikuwɨtyi Naxyukmɨ. Jempɨk in̈matyajpa idyɨk jeʼm Dios iAn̈jagoʼoyi kun maymayaaji, yooxpadoyyaj iga idyiñ jaʼyan̈ kumunyaj. Jaʼyan̈ pɨxiñtyam y yomtam iga imalwatyajpa y tan̈kawatyajpa idyɨk sexualmente, mɨjaneyaj espiritualmente y sɨʼ iwatyajpa jempɨk Jehová ikusuʼnɨʼyba (Efes. 4:24). Jaʼyan̈ jeʼm kumaykedoʼoyiyaj iga ijɨykiʼm Isaías kupakyajpanam jeʼm jomnaxyukmɨ. Pero sɨɨ, tanaitytyaʼm jaʼyan̈ kumaykedoʼoyiyaj. Tanaʼmtaʼmiñ juutypɨk tawɨwadaʼyba jeʼm paraíso espiritual y tyiʼiga odoy tantsaktaʼmiñ.

JEʼM KUMAYKEDOʼOYIYAJ TAMPƗKTSON̈PAʼAP EN JEʼM PARAÍSO ESPIRITUAL

5. Juʼuts nɨmpa Isaías 65:​13, ¿juʼptam kumaykedoʼoyiyaj tampɨktson̈taʼmpa en jeʼm paraíso espiritual?

⁵ Dyaʼ tyi tatogoyaytyaʼm. Tsaam tagaʼman̈jakpa jesɨk Isaías in̈mat juʼuts tañityityam en jeʼm paraíso espiritual y juʼuts iityiyaj jempɨk dyaʼ ityyaj jeem (maayɨʼ Isaías 65:13). b Ityumpɨy jempɨk ikuyooxayajpa Jehová dyaʼ tyi ityogoyayyaj espiritualmente. Tachiʼiba jeʼm iespíritu santo, jeʼm In̈maatyi y jaʼyan̈ wiʼkkuy espiritual iga wɨap tan̈kɨʼɨstaʼm, tanuktaʼm y tamaymaywattaʼm (aʼmɨtyim Apocalipsis 22:17). Pero ityumpɨy jempɨk dyaʼ ityyaj en yɨʼp paraíso yuʼayajpa, nɨʼktsɨtyajpa y tsaʼayajpa. Dyaʼ iniityyaj tyityam ityogoyayyaj espiritualmente (Amós 8:11).

6. ¿Juʼutspɨk wiʼkkuy ijɨykiʼmpa Joel 2:​21-24, y juutypɨk tawɨwadaʼyba?

⁶ En tuum jɨychagoʼoyi, Joel ijɨykiʼm iga Jehová ichiʼiba idyɨk jeʼm ikumun jeʼm wiʼkkuy ityogoyayyajwɨʼɨp juʼuts jeʼm ɨkxiʼ, jeʼm vino y jeʼm aceite de oliva (Joel 2:​21-24). Yɨʼp nɨmtoʼoba idyɨk iga Jehová ichiʼiba tyityam ityogoyaʼyba jeʼm ikumun, juʼuts jeʼm wiʼkkuy espiritual. ¿Juutypɨk iwatpa yɨʼp jaama? Ikuyukmɨ jeʼm Biblia, jeʼm totjaayiyaj, jeʼm sitio de internet, jeʼm an̈tuʼumaajiyaj y jeʼm mɨjtampɨk an̈tuʼumaajiyaj. Siiga tumtum jaama tan̈kɨʼɨspa yɨʼpyaj wiʼkkuy tayooxpaʼtyajpa y tawɨwadaʼyba.

7. ¿Tyiʼiga tsaam tamaymaytyam? (Isaías 65:14).

⁷ Tamaymaytyam kun tyityam tanaitytyaʼm. Jeʼm cristianos ichoowaixyajpa ityumpɨy jempɨk Dios ichiʼiñeyaj, jeʼyukmɨ tsaam maymayyaj (maayɨʼ Isaías 65:14). c ¿Tyiʼiga tsaam maymayyaj? Iga jeʼm In̈matyijom ipaʼtyajpa wɨtampɨk jɨykamoʼoyiyaj  y an̈kejayoʼoyiyaj iga ianmajan̈chiʼiyajpa. Y ikuyukmɨ jeʼm kɨakpudoʼoyi iga iwat Jesús, iniityyaj tuum wɨbɨk an̈jogoʼoyi. ¡Y tsaam maymayyaj jesɨk in̈matyajpa yɨʼpyaj jɨykamoʼoyiyaj kun jeʼm ityɨwɨtam! (Sal. 34:8; 133:​1-3).

8. ¿Tyityam tampaʼttaʼmpa en jeʼm paraíso espiritual?

⁸ En jeʼm paraíso espiritual jeʼm Jehová ikumun ikwiñkejyajpa toyoʼoyi y nawɨnanɨgayyajtaap. Yɨʼp toyoʼoyi tayooxpaʼtpa iga tanaitytyaʼmiñ «tu̱mt́i jɨ̱xi», tayooxpaʼtpatyim tan̈kujɨɨs juʼutskom taitytyaʼmpa jeʼm jomnaxyukmɨ. Jeem majtyim tanakwiñkejtaʼmpa toyoʼoyi y majnam tanawɨnanɨgaytyamtaap (Col. 3:14). Tuum yoomtɨwɨ nɨm iga aʼman̈jak jesɨgam iixpɨk jeʼm Jehová itestigojyaj: «Ɨch dyaʼ anjoodon̈ idyɨk juutypɨk amaymayaap kun jeʼm anfamilia. Moj anaʼm juutypɨk akwiñkejtaap jeʼm nuntapɨk toyoʼoyi jesɨk añixpɨk jeʼm Testigojyaj». Ityumpɨy jempɨk maymayayajtoʼoba tɨgɨyyajiñ en jeʼm paraíso espiritual. Dyaʼ tyi ijoo tyi nɨmyajpa tun̈gakyaj, Jehová y jeʼm ifamilia universal tatoyyajpa y tawɨixyajpa (Is. 65:15).

9. ¿Tyi naspa kun jeʼm yaʼachaajiyaj? (Isaías 65:​16, 17).

⁹ Tsaam wɨɨ tanan̈jaamtaʼm. Isaías 65:14 nɨmpa: «Min̈wejtaʼmpa iga iniitytyaʼm tooyaʼ iñanmajom y miwejtaʼmpa iga dyaʼ wɨɨ inin̈jaamtaʼm» jeʼam iñaskayajpa jempɨk dyaʼ ityyaj en jeʼm paraíso espiritual. ¿Y tyi naspa kun jeʼm yaʼachaajiyaj iñaskayajpaʼap jeʼm Dios iyooxakɨʼɨwiñyaj? Jehová ijɨykaʼmneʼ: «Jeʼm yaʼachaajiyaj iñaskaneyajwɨʼɨp kujaʼamayyajtaap; akyamyajtaap» (maayɨʼ Isaías 65:​16, 17). d Jeʼ iktogoʼyba ityumpɨy jeʼm yaʼachaajiyaj y okmɨ kujaʼamayyajtaap.

10. ¿Tyiʼiga jeʼ tuum wɨbɨk xaaja iga taitytyaʼm en jeʼm Dios iorganización? (Aʼmɨtyim jeʼm foto).

¹⁰ Yɨʼp jaama jesɨk tanɨkpa jeʼm an̈tuʼumaajiyaj tsaam wɨɨ tanan̈jaam iga tan̈kujaʼamaytyaʼmpa jeʼm kobakpiijiyaj tanaitytyamwɨʼɨp. ¿Juutypɨk wɨap tanyooxpadoy iga idyiñ yɨʼkxpɨk jɨɨxi en jeʼm paraíso espiritual? Tanakwiñkejtaʼmiñ jeʼm cualidades iga iniity jeʼm espíritu santo, juʼuts jeʼm toyoʼoyi, jeʼm maymayaaji, paz, tan̈wɨjɨʼyaʼyiñ y tan̈wɨnanɨgaʼyiñ tun̈gakyaj (Gál. 5:​22, 23). ¡Tuum wɨbɨk xaaja iga taitytyaʼm en jeʼm Dios iorganización!  Siiga dyaʼ taputpa en yɨʼp paraíso espiritual, wɨap tanaʼm juutypɨk ikkupakpa Dios iga ikjoomaseetpa «jeʼm sɨn̈ y jeʼm nas».

11. ¿Juʼuts tanan̈jaamtaʼm iga taitytyaʼm en jeʼm paraíso espiritual? (Isaías 65:​18, 19).

¹¹ Tantsoowaixtyaʼmpa y tamaymaytyam iga taitytyaʼm yɨʼɨm. Isaías in̈matpa tyiʼiga jeʼm Dios iyooxakɨʼɨwiñyaj tsaam maymayyaj. Jeʼm paraíso espiritual juuty taitytyaʼm Jehová iwatneʼ (maayɨʼ Isaías 65:​18, 19). e Jeʼyukmɨ taanmajan̈chiʼiba iga tanyooxpaʼtyajiñ tun̈gakyaj iga putyajiñ de jeʼm religiónyaj mɨgoyyajpaʼap y wɨaiñ ityɨgɨyyaj en yɨʼp paraíso espiritual. ¡Tsaam tamaymaytyam iga taitytyaʼm jeem! Y tanan̈madayyajtoʼoba tun̈gakyaj jeʼm kumaykedoʼoyiyaj tanaitytyamwɨʼɨp (Jer. 31:12).

12. ¿Juʼuts inin̈jaam jesɨk immayba Isaías 65:​20-24, y tyiʼiga?

¹² Jempɨk taitytyaʼm en yɨʼp paraíso espiritual tsaam tantsoowaixtyaʼmpa y tamaymaytyam por jeʼm tanan̈jogoʼoyi. ¡Kujɨɨsɨ tyityam wɨap iñaʼm y in̈wat jeʼm jomnaxyukmɨ! Jeʼm Biblia nɨmpa: «Jeem dyaʼ itypa xutyu tsɨɨxtyam iga ityyajpa weeñi jaamayaj ni tsaamipɨkyaj iga dyaʼ kaʼpspa tsaamiyaj». Y nɨmpatyim iga «iwatyajpa tɨkyaj y iitykayajpatyim; iñipyajpa uvas y ikudayyajpatyim ityɨm». Y «dyaʼ xaaja yooxayajpa» iga Jehová ikumayketpa. Dios ijɨykamneʼ iga wɨityyajpa, kuixyajtaap y dyaʼ tyi ityogoyayyajpa. «Wiñtyi iga iwaʼkyajpa yooxpadoʼoyi», Dios ijoodon̈am tyityam ityogoyayyaj y jeʼ ichiʼiba «tyityam ixunyajpa» (Is. 65:​20-24; Sal. 145:16).

13. ¿Juutypɨk in̈matpa Isaías 65:25 jeʼm kukakiyaj iwatyajpaʼap jempɨk ikuyooxayajpa Jehová?

¹³ Tawɨitytyaʼm y takuixñetamta. Jeʼm espíritu santo iyooxpaʼtneʼ jaʼyan̈yaj iga ikakyajiñ iityi (maayɨʼ Isaías 65:25). f Wiñtyi tsaam imalwatyajpa idyɨk (Rom. 12:2; Efes. 4:​22-24). Jempɨk tan̈kuyooxataʼmpa Dios tajɨɨxtyogoytyampanam iga tatan̈kaɨytyam. Numaaj Jehová iwatneʼ iga tantumpɨytyam tawɨitytyaʼmiñ y tanakwiñkejtaʼmiñ toyoʼoyi (Tito 2:11).

14. ¿Juutypɨk tuum tɨɨwɨ ikkupak jempɨk nɨmpa Isaías 65:25?

¹⁴ ¿Nunta algun i wɨap iwat kukakiyaj jeʼm iityijom? Tanaʼmiñ tuum akwiñkejoʼoyi. Tuum pɨɨxiñ iga iniity 20 iamtyɨy tsaam an̈aapa idyɨk y iwatpa tan̈kayaj sexuales. Watykɨy pajta iga imalwatpa y nuʼmpa idyɨk. Juchixkej ikusuʼnɨʼyba idyɨk in̈a. Jesɨgam moj ikumaton̈ jempɨk in̈kejpa jeʼm Biblia y moj nɨki jeʼm an̈tuʼumaajiyaj ikutɨʼɨyɨy iga ipaʼtneʼ idyɨk jeʼm paraíso espiritual. Okmɨ iga chin̈ watykɨy ijɨɨs juutypɨk kupak Isaías 65:25 jeʼm iityijom. Wiñtyi jeex idyɨk keʼnam juʼuts tuum león y sɨʼ manxujam idyɨk juʼuts tuum cordero.

15. ¿Tyiʼiga tanyooxpaʼtyajiñ tun̈gakyaj iga tɨgɨyyajiñ en jeʼm paraíso espiritual, y juutypɨk tan̈watpa?

¹⁵ Jehová juchixkej ikkupakpa jeʼm ijɨykamoʼoyiyaj, Isaías 65:13 mojpa kun yɨʼpyaj an̈matyiyaj: «Yɨʼbam jeempɨk nɨmpa tanOmi An̈jagoʼoyi Jehová». Y jeʼm versículo 25 kuyajpa yɨʼɨmpɨk: «Nɨmpa Jehová» (Is. 55:​10, 11). Jeʼm paraíso espiritual nunta ity, jeʼ ikkupak jempɨk ijɨykamneʼ idyɨk. Iwat tuum familia juuty takuixñetamta y tawɨitytyaʼm  mex iga yɨʼp naxyukmɨ dyaʼ wɨkoom (Sal. 72:7). Jeʼyukmɨ tanyooxpaʼtyajtoʼoba tun̈gakyaj iga tɨgɨyyajiñ yɨʼɨm. ¿Juutypɨk? Tanan̈kejayyajiñ ikuyooxayaj Dios (Mat. 28:​19, 20).

JUUTYPƗK TANYOOXPAʼTYAJIÑ JEMPƗK TƗGƗYYAJTOʼOBA

16. ¿Juutypɨk wɨap tanyooxpadoy iga tun̈gakyaj tɨgɨyyajiñ en yɨʼp paraíso espiritual?

¹⁶ Tantumpɨytyam wɨap tanyooxpadoytyaʼm iga tun̈gakyaj tɨgɨyyajiñtyim en yɨʼp paraíso espiritual. ¿Juutypɨk? Tan̈watkiʼpstaʼmiñ Jehová. Jeʼ dyaʼ ipɨʼɨmɨʼyba iga algun i iga iwadyiñ jempɨk jeʼ ikusuʼnɨʼyba, iyooxpaʼtpa kun yaʼachan̈jamoʼoyi (Jer. 31:3; Juan 6:44). Jempɨk iixpɨkyajtoʼoba Jehová y iniityyaj tuum wɨbɨk anmaj ikunuʼkyajpa. ¿Tyi wɨap tan̈wat iga tun̈gakyaj tɨgɨyyajiñtyim en yɨʼp paraíso espiritual?

17. ¿Tyi wɨap tan̈wat iga tun̈gakyaj tɨgɨyyajiñ en jeʼm paraíso espiritual?

¹⁷ Wɨap tanyooxpaʼtyaj iga tɨgɨyyajiñ en yɨʼp paraíso espiritual jesɨk tanakwiñkejayyajpa toyoʼoyi y yaʼachan̈jamoʼoyi jeʼm tantɨwɨtam. Tansuntaʼmpa iga jempɨk nɨkyajpa jeʼm an̈tuʼumaajiyaj nɨmyajiñtyim juʼuts nɨmyaj jempɨk jaʼy ityiyaj Corinto: «Nu̱ma Dios it́ con mimicht́am» (1 Cor. 14:​24, 25; Zac. 8:23). Jeʼyukmɨ tan̈kupɨktaʼmiñ yɨʼp an̈kiʼmayoʼoyi: «Odoy áŋa̱taamɨ con jém iñt́ɨ̱wɨtam» (1 Tes. 5:13).

18. ¿ Tyiʼiga tun̈gakyaj tɨgɨyyajtoʼoba en jeʼm organización?

¹⁸ Juchixkej tanaʼmyajiñ jeʼm tantɨwɨtam juʼuts iaʼmpa Jehová. Jeʼyukmɨ tanaʼmaʼyiñ jeʼm iwɨtampɨk cualidades y dyaʼ juutytyam jɨɨxtyogoyyajpa. Jeʼm toyoʼoyi tayooxpaʼtpa tan̈wɨtsak juʼptyin̈kej jɨpmuruji siiga tan̈kupɨkpa yɨʼp an̈kiʼmayoʼoyi: «Nayaachaŋja̱mtamta̱jɨ  con jém iñt́ɨ̱wɨtam. Nawadayt́amta̱jɨ perdón» (Efes. 4:32). Ityumpɨyyaj jempɨk maymayayajtoʼoba tɨgɨyyajpa en yɨʼp paraíso espiritual. g

ODOY TANTSAGUIÑ JEʼM PARAÍSO ESPIRITUAL

19. a) ¿Tyi nɨmneyaj weeñiyaj iga ikuseetneyaj jeʼm paraíso espiritual? (Aʼmɨ jeʼm recuadro « Ichakyaj pero eybɨk seetyaj»). b) ¿Juʼp jɨɨxi tampɨknetaʼmiñ? (Aʼmɨtyim jeʼm imagen).

¹⁹ ¡Tsaam tamaymaytyam iga taitytyaʼm en yɨʼp paraíso espiritual! Sɨɨ majtyim wɨɨ ikeeji y jaʼyan̈yaj sɨʼ ikuyooxayaj Jehová. Juchixkej tantsoowaixtyaʼmiñ yɨʼp paraíso iga Dios iwatneʼ para taɨchtyam. Ityumpɨyyaj jempɨk wɨityajtoʼoba, maymayayajtoʼoba, y ijaamyajiñ iga kuixñeyajta, tɨgɨyyajiñ en yɨʼp paraíso espiritual y odoy ichakyajiñ. Pero tanakuixtyaiñ iga jeʼm Wookkɨʼɨwiñ tamɨgoyaytyoʼoba y taktsaktoʼoba yɨʼp paraíso espiritual (1 Ped. 5:8; Apoc. 12:9). Odoy tanaʼmchiʼiñ iga iwɨpudaʼyiñ jeʼm ijɨɨxi. Jeʼyukmɨ tan̈kuixiñ juʼtspɨy wɨɨ ikeeji, kuaʼyñeiñ y idyiñ paz en yɨʼp paraíso espiritual.