1. ¿Juutypɨk sɨʼ ijɨɨxian̈chiʼ idyɨk Jehová jeʼm iyooxakɨʼɨwiñ en jeʼm wiñtyipɨk siglo?

 JESƗK Jehová ichiʼiba tuum yooxakuy jeʼm iyooxakɨʼɨwiñyaj in̈joʼkpa iga iwatyajiñ kun orden (1 Cor. 14:33). Juʼuts akwiñkejoʼoyi, jeʼ ixunba iga an̈mattaiñ jeʼm wɨtampɨk an̈maatyi ikuwɨtyi Naxyukmɨ (Mat. 24:14). Y Jehová ichiʼ jeʼm imaanɨk Jesús iga jeʼam iwɨtsaguiñ yɨʼp yooxakuy iga wɨakkupaktaiñ, y jeempɨgam iwatneʼ. En jeʼm wiñtyipɨk siglo en Jerusalén, jeʼm apóstoles y weeñi ancianojyaj jeʼam idyɨk ijɨɨxian̈chiʼiyajpa jeʼm kumunyaj iga juutypɨk watyajtaiñ jeʼm yooxakuyyaj (Hech. 15:2; 16:4). Jeʼyukmɨ jeʼm kumunjomyaj kupin̈yajtaap idyɨk ancianojyaj iga jeʼeyajam idyɨk iñɨʼmayyajiñ jeʼm tɨwɨtam juʼp jɨɨxi pɨkneta (Hech. 14:23). Iga jeʼeyaj kupɨgoyyaj, ipɨɨmchiyaj ife y majtyim jaʼyan̈ayaj (Hech. 16:5).

2. ¿Juutypɨk Jehová ijɨɨxian̈chiʼiñeʼ y ikwiʼkneʼ jeʼm ikumun dende 1919?

² Yɨʼp jaama, Jehová seguido ijɨɨxian̈chiʼiñeʼ jeʼm ikumun. Dende 1919, Jesús ipɨk weeñi tɨwɨtam kupin̈neyajtawɨʼɨp iga iwɨtsakyajiñ jeʼm an̈matkuy y ichiʼiyajiñ jeʼm wiʼkkuy espiritual jeʼm ityɨwɨtam (Luc. 12:42). a Wɨkejpa iga Jehová ikumayketneʼ  jeʼm yooxakuy jempɨk sɨʼ iwatyaj (Is. 60:22; 65:​13, 14).

3, 4. a) An̈maatɨ kun tuum akwiñkejoʼoyi juutypɨknam tawɨwadaʼyba iga ityumpɨy ity organizado. b) ¿Tyi tan̈kɨʼpin̈taʼmpa yɨʼp kuyujijom?

³ Meʼega dyaʼ i tanɨʼɨyɨyaʼyba juutypɨk tan̈watpa jeʼm yooxakuy tachiʼiñewɨʼɨp Jesús, dyaʼ wɨap idyɨk tanakkupak (Mat. 28:​19, 20). Juʼuts akwiñkejoʼoyi, siiga dyaʼ i tanɨʼɨyɨyaʼyba juʼptam territorios iniity jeʼm kumunyaj, wɨap iga taputpa juutytyam maaj tan̈kusuʼnɨʼyba. Y wɨapsɨ iga tun̈gak an̈eymɨyaj ni keman an̈mattaap jeʼm Dios In̈maatyi. ¿Juutypɨknam tawɨwadaʼyba iga ityumpɨy ity organizado?

⁴ Yɨʼp jaama, Jesús seguido ijɨɨxian̈chiʼiñeʼ jeʼm Dios ikumun juutypɨktyim iwat jesɨgam jaʼy ityi yɨʼp Naxyukmɨ. Yɨʼp kuyujijom tan̈kɨʼpin̈taʼmpa juutypɨk Jesús iwatneʼ y juutypɨk jeʼm organización jeempɨktyim sɨʼ iwat. Tan̈kɨʼpin̈taʼmpa juutypɨk wɨap tanakwiñkejtaʼm iga tanaidyay confianza jeʼm Jehová iorganización.

JEʼM ORGANIZACIÓN ITYUN̈ƗʼYBA JEʼM JESÚS IAKWIÑKEJOʼOYI

5. ¿Juutypɨk iwatkiʼpspa jeʼm organización jeʼm Jesús iakwiñkejoʼoyi? (Juan 12:49).

⁵ Jesús ikuyujkaʼ kun iJaatun̈ jempɨk iwatpa y jempɨk nɨmpa. Jeempɨktyim iwatpa jeʼm Jehová iorganización, jeʼm an̈kejayoʼoyi y jeʼm jɨɨxian̈chioʼoyiyaj chioypaʼap, ityoppa jeʼm Dios In̈matyijom (maayɨʼ Juan 12:49; 2 Tim. 3:​16, 17). Juchixkej takjɨɨsyajpa iga tammayiñ jeʼm Biblia y tanakkupaguiñ jeʼm tañityijom jempɨk tan̈kuyujkaneʼ. ¿Juutypɨk tawɨwadaʼyba siiga tan̈kupɨkpa yɨʼp an̈kiʼmayoʼoyi?

6. ¿Juutypɨk tawɨwadaʼyba siiga tan̈kuyujkaʼaba jeʼm Biblia?

⁶ Jesɨk tan̈kuyujkaʼaba jeʼm Biblia kun jeʼm totjaayiyaj tsaam tayooxpaʼtpa. Juʼuts akwiñkejoʼoyi, tayooxpaʼtpa tan̈kukiʼps jempɨk in̈kejpa jeʼm Biblia kun jeʼm jɨɨxian̈chioʼoyiyaj tachiʼipaʼap jeʼm organización. Jesɨk tanaʼmpa iga jeʼm jɨɨxian̈chioʼoyiyaj topneyajta Bibliajom, ipɨɨmchiʼiba jeʼm confianza tanaidyaywɨʼɨp jeʼm Jehová iorganización (Rom. 12:2).

7. ¿Tyi iwat Jesús, y juutypɨk jeʼm Jehová iorganización ityun̈ɨʼyba jeʼm iakwiñkejoʼoyi?

⁷ Jesús in̈mat «jém wɨbɨc aŋma̱t́i ju̱t́pɨc iŋjacpa Dios» (Luc. 4:​43, 44). Jeʼyukmɨ, ikutsat jeʼm idiscípulos iga jeempɨktyim iwatyajiñ (Luc. 9:​1, 2; 10:​8, 9). Yɨʼp jaama, ityumpɨyyaj jeempɨk ityyaj jeʼm Jehová iorganización in̈matyajpa jeʼm Dios iAn̈jagoʼoyi, dyaʼ tyi ijoo juuty ityyaj o juʼtsan̈ yooxakuy iniityyaj.

8. ¿Juʼp wɨbɨk xaaja tachiʼiñetamta?

⁸ Tachiʼiñeta tuum mɨjpɨk xaaja: iga tanan̈madaʼyiñ tun̈gakyaj de jeʼm Dios iAn̈jagoʼoyi. Yɨʼp yooxakuyyaj dyaʼ ityumpɨyyaj wɨap iwatyaj. Juʼuts akwiñkejoʼoyi, jesɨgam Jesús jaʼy ityi yɨʼp Naxyukmɨ dyaʼ iaʼmchiʼ iga jeʼm demonios iwatyajiñ (Luc. 4:41). Yɨʼp jaama jesɨk algun i puttoʼoba jeʼm an̈matkuyjom, wiñtyi ikkupaguiñ tyityam nasuntaap. ¿Juutypɨk tanakwiñkejpa iga tantsoowaixpa yɨʼp yooxakuy? Jesɨk tanan̈kejayyajpa tun̈gakyaj de jeʼm Dios iAn̈jagoʼoyi. Siiga tan̈watpa juʼtspɨy tawɨap iga tanan̈matpa jeʼm Dios In̈maatyi, sɨʼ tan̈watkiʼps Jesús (Mat. 13:​3, 23; 1 Cor. 3:6).

9. ¿Juutypɨk jeʼm organización in̈kejayñeʼ tun̈gakyaj jeʼm Dios iñɨɨyi?

⁹ Jesús iguixpɨk tun̈gakyaj jeʼm Dios iñɨɨyi. Tun̈kɨy jesɨk sɨʼ in̈wejpaʼt idyɨk jeʼm iJaatun̈ sɨn̈yukmɨpɨk nɨm: «Aŋwɨ̱aŋquejáy jeeyaj iga icutɨɨyɨyyajiñ iga mii̱apaap» (Juan 17:26). Jeʼm Jehová iorganización jeempɨktyim  iwatyajpa, ityeguedayajpa iga in̈kejayyajiñ tun̈gakyaj jeʼm Dios iñɨɨyi. Jeʼyukmɨ jeʼm Traducción del Nuevo Mundo, ity —ikumuuma o tuum jaakaʼ— en maaj de 270 an̈matyiimɨ. Y jeem eybɨk jaykunuʼgaytya jeʼm Dios iñɨɨyi juutytyam kejyajpa idyɨk. Jeʼm apéndices A4 y A5 tawɨan̈madaʼyba tyiʼiga watta jeempɨk. Y jeʼm apéndice C, iga iniity jeʼm Biblia de estudio, in̈matpa tyiʼiga jeʼm Dios iñɨɨyi kejiñ en 237 veces en jeʼm Escrituras Griegas Cristianas.

10. ¿Tyi tan̈kejaʼyba jempɨk iñaskaʼ jeʼm yoomoʼ itywɨʼɨp Myanmar?

¹⁰ Juʼutsyim iwat Jesús, taɨchtyam tansuntaʼmpatyim iga jaʼyan̈yaj iixpɨkyajiñ jeʼm Dios iñɨɨyi. En Myanmar, jesɨgam tuum yoomoʼ iga iniity 67 iamtyɨy an̈kejaytya iga Dios iñɨɨyi Jehová, pɨɨmi aʼman̈jak y moj weeji, jeʼ nɨm: «Ni keman oyñeʼ idyɨk an̈kumaton̈ iga Dios iniity tuum nɨɨyi. [...] Tsaam wɨɨ jempɨk anan̈kejayñeʼ». Yɨʼp nasɨyoʼoyi tan̈kejaʼyba iga jesɨk algun i ijoodon̈aap i iñɨɨyi Dios wɨap ikukagayay iityi.

SEGUIDO TANAKWIÑKEJTAʼMIÑ IGA TANAIDYAY CONFIANZA JEʼM ORGANIZACIÓN

11. ¿Juutypɨk jeʼm ancianojyaj ikwiñkejyajpa iga iniidyayyaj confianza jeʼm Dios iorganización? (Aʼmɨtyim jeʼm fotos).

¹¹ ¿Juutypɨk jeʼm ancianojyaj ikwiñkejyajpa iga iniidyayyaj confianza jeʼm Dios iorganización? Iwɨmayyajiñ jeʼm jɨɨxian̈chioʼoyiyaj chiʼiyajtapaʼap y okmɨ ikupɨkyajiñ. Juʼuts akwiñkejoʼoyi, jɨɨxian̈chiʼiyajtaap juutypɨk iwatyajiñ jeʼm an̈wejpadoʼoyiyaj jeʼm an̈tuʼumaajijom y jeʼm asignaciones, y juutypɨk ikuixyajiñ jeʼm Cristo iovejajyaj. Jesɨk jeʼm ancianojyaj ikupɨkyajpa jeʼm jɨɨxian̈chioʼoyiyaj iga ichiʼiyajpa jeʼm organización, jeʼm tɨwɨtam ijaamyajpa iga Jehová ityoyyajpa y sɨʼ ikuixyajta.

12. a) ¿Tyiʼiga tan̈kupɨkyajiñ jempɨk tajɨɨxian̈chiʼiyajpa? (Hebreos 13:​7, 17). b) ¿Tyiʼiga odoy numaaj tanaʼmtaʼmiñ juutytyam jɨɨxtyogoyyajpa jempɨk tajɨɨxian̈chiʼiyajpa?

¹² Jesɨk jeʼm ancianojyaj tajɨɨxian̈chiʼiyajpa, wɨɨ iga tan̈kupɨktaʼmiñ. Jesɨk maaj dyaʼ tan̈kaʼap ikkupakyaj iyooxakuy. Jeʼm Biblia tanɨʼmaʼyba iga tan̈kupɨkyajiñ jempɨk tajɨɨxian̈chiʼiyajpa (maayɨʼ Hebreos 13:​7, 17). Wɨapsɨ iga a veces tan̈kaʼ tan̈kupɨkyaj iga tan̈kaɨyyajtyim. Pero tan̈kujɨɨstaʼmiñ siiga numaaj tanaʼmtaʼmpa juutytyam jɨɨxtyogoyyajpa, sɨʼ tan̈wattaʼm jempɨk ikusuʼnɨyyajpa jeʼm tanenemigos. ¿Tyiʼiga tanɨmpa jeempɨk? Jesɨk tammalkujɨɨsyajpa wɨapsɨ iga dyam tanaidyaʼyba confianza jeʼm Dios iorganización. Pero, ¿tyi tayooxpaʼtpa iga odoy tanaʼmchiʼiñ iga tamɨgoyayyajiñ jeʼm tanenemigos?

ODOY TANAʼMCHIʼIÑ IGA TUN̈GAKYAJ TAMƗGOYAYYAJIÑ

13. ¿Tyi takkupɨkyajtoʼoba jeʼm tanenemigos?

¹³ Jeʼm tanenemigos takkupɨkyajtoʼoba iga jeʼm Dios iorganización dyaʼ iwɨwatpa. Juʼuts akwiñkejoʼoyi, jeʼm Biblia in̈kejpa iga Jehová ixunba iga jeʼm iyooxakɨʼɨwiñyaj kuaʼyñeyajiñ física, moral y espiritualmente. Nɨmpatyim iga jempɨk dyaʼ ityoʼyan̈jaampa jempɨk iwatneʼ y dyaʼ ikakpa ijɨɨxi, putpa expulsada de jeʼm kumunjom (1 Cor. 5:​11-13; 6:​9, 10). Iga tan̈kupɨkpa Jehová y dyam tanan̈pɨʼtsyajpa, jeʼm tanenemigos nɨmyajpa iga tanjooyixyajpa y dyam tantoyyajpa.

14. ¿Iapaʼap tamɨgoyaytyoʼoba?

¹⁴ Tan̈kujɨɨstaʼmiñ iapaʼap tamɨgoyaytyoʼoba. Jeʼm Wookkɨʼɨwiñ iga juchixkej mɨgoʼyba, in̈matpa mɨgoʼoyiyaj de jeʼm organización (Juan 8:44; Gén. 3:​1-5). Jeʼyukmɨ dyaʼ tagaʼman̈jakpa iga ipɨkpa tun̈gakyaj iga tamɨgoyayyajiñ, jeʼam iwat en jeʼm wiñtyipɨk siglo.

15. ¿Tyi iwatyaj jeʼm líderes religiosos kun Jesús y jeʼm idiscípulos?

 ¹⁵ Mex iga Jesús, jeʼm Dios iMaanɨk dyaʼ tan̈kaɨy y iwatpa idyɨk wɨtampɨk milagros, Jeʼm Wookkɨʼɨwiñ ipɨk tun̈gakyaj iga nɨmyajiñ mɨgoʼoyiyyaj. Juʼuts akwiñkejoʼoyi, jeʼm líderes religiosos nɨmyajpa idyɨk iga Jesús ityoppa jeʼm demonios «jém mal espíritu iŋjagooyi» (Mar. 3:22). Y jesɨgam sɨʼ idyɨk ikɨʼpin̈ta, jeʼm líderes religiosos ikumɨgoyyaj de blasfemia y ikkupɨkyaj tun̈gakyaj, jeʼyukmɨ iwaʼkyaj iga akkaʼataiñ (Mat. 27:20). Maaj okmɨ jesɨgam jeʼm Cristo idiscípulos moj in̈matyaj, jeʼm ienemigos «icjóyixyajt́im jém tuŋgac pɨxiñt́am» y moj ikumɨgoyyajta iga yaʼachwatyajtaiñ idyɨk (Hech. 14:​2, 19). Jeʼm Totjaayɨ Takjoodon̈apaʼap del 1 de diciembre de 1998 en español, iwɨan̈matpa jempɨk nɨmpa Hechos 14:​2, nɨmpa iga jempɨk ijooyixyajpa idyɨk jeʼm cristianojyaj, dyaʼ numaaj dyaʼ iwɨpɨktson̈yaj jeʼm wɨtampɨk an̈matyiyaj, moj ikujɨyyajta iga tun̈gakyaj ijooyixyajiñtyim iga odoy kumaton̈yajtaiñ.

16. ¿Tyi tan̈wadyiñ siiga tamɨgoyaytyatoʼoba?

¹⁶ Jeʼm Wookkɨʼɨwiñ juchixkej mɨgoyñeʼ, y yɨʼp jaama seguido «imɨgóyáypa it́u̱mpɨy jém pɨxiñt́am icuwɨ̱t́i yɨ́p naxyucmɨ» (Apoc. 12:9). Jeʼyukmɨ, siiga tan̈kumaton̈taʼmpa iga sɨʼ ikujɨytya jeʼm organización o jeʼm tantɨwɨtam tanjɨɨxian̈chiʼiyajpaʼap, tan̈kujɨɨstaʼmiñ jempɨk iwatyaj jeʼm Dios ienemigos kun Jesús y jeʼm idiscípulos. Jeʼm Biblia ijɨychakneum iga jeʼm Jehová itestigojyaj yaʼachwatyajtaap y kujɨyyajtaap idyɨk (Mat. 5:​11, 12). Pero dyaʼ tamɨgoyayyajpa siiga tanjoodon̈am iapaʼap tamɨgoyaytyoʼoba y siiga jobity tanakuixtyaap. ¿Juutypɨk tan̈watpa?

17. ¿Tyi tan̈wadyiñ siiga algun i tamɨgoyaytyoʼoba? (2 Timoteo 1:13; aʼmɨtyim jeʼm recuadro « Tyi tan̈wadyiñ jesɨk tamɨgoyaytyatoʼoba»).

 ¹⁷ Odoy tan̈kupɨktaʼmiñ jeʼm mɨgoʼoyiyaj. Jeʼm apóstol Pablo in̈mat tyi tan̈wadyiñ jesɨk algun i tamɨgoyaytyoʼoba. En 1 Timoteo 1:​3, 4 nɨm iga odoy kumaton̈taiñ jeʼm mɨgoʼoyiyaj. Y Timoteo chiʼitya yɨʼp an̈kiʼmayoʼoyi: «Tsa̱cɨ jém malopɨc cuento, [...] porque puro jɨ̱xquiimi» (1 Tim. 4:7). Juʼuts akwiñkejoʼoyi, siiga tuum xutyu tsɨɨxiʼ ipaʼtpa naxyukmɨ algun tyi, wɨapsɨ iga ipin̈ba y ikukompa ijɨpjom; pero jempɨk jɨɨxiɨy dyaʼ iwatpa jeempɨk, iga ijoodon̈am iga wɨap imalwaday. Jeʼyukmɨ taɨchtyam dyaʼ tan̈kumaton̈taʼmpa jeʼm mɨgoʼoyiyaj y numaaj tan̈kumaton̈taʼmpa «jém nu̱mapɨc aŋma̱t́i» (maayɨʼ 2 Timoteo 1:13).

18. ¿Juutypɨk tanakwiñkejtaʼmpa iga tanaidyay confianza jeʼm Jehová iorganización?

¹⁸ Tan̈kɨʼpin̈netaʼm tukuteen maneras iga jeʼm Dios iorganización iwatkiʼpspa Jesús, pero jesɨk mich immayba jeʼm Biblia impaʼtyajpanam tun̈gak. Seguido yooxpaʼtyaajɨ jeʼm tɨwɨtam iga ipɨɨmchiyajiñ jeʼm confianza iniidyayyajwɨʼɨp jeʼm organización. Y juchixkej kupɨɨkɨ iga Jehová ipɨkpa jeʼm iorganización iga ikkupakpa jempɨk jeʼ ixunba (Sal. 37:28). Tsaam tamaymaytyam iga tan̈kuyooxaap Jehová en tuum organización juuty akwiñkejtaap toyoʼoyi y ityumpɨyyaj kupɨgoyyajpa. ¡Tantsoowaixtyaʼmiñ yɨʼp xaaja!